2 SAMƲƐL 3

1 Kʋʋrɩle pʋɔrɛ ƴɛrr Davɩdɩɩ too na Sayuli too thɩ̃thɩɩn. Sɩ Davɩdɩ n 'lɛr fãga da n dɛbɩrɔ, sɩ Sayuli too fãga na n wur.

Davɩdɩɩ bikũusɔɔkɛ a kɔnɩ Ebʋrɔ̃.

2 Davɩdɩ kʋɔn kuuminǝ Ebʋrɔ̃. Ɔɔ caca bikuun dʋɔn Amɩnɔ̃, Ahinoamɩkɛ thɛnɩ Jɩjɩrɛl dɔ ɔɔ nɩ. 3 Dɩ balaɲɔdaar na n do Kɩlabɩ, Abɩgayɛl dɔ ɔɔ nɩ. Nabaalɩkɛ thɛnɩ Karmɛl ɔɔ khikhɛr gɩ. Dɩ balãtherdaar na n do Abɩsalɔ̃. Maakaakɛ dɔnɩ Talmaɩɩ bikhɛr dɔ ɔɔ nɩ. Talmaɩ dʋɔn Gesuur jamana. 4 Dɩ balanãdaar na n do Adonɩya, Hagɩtɩ dʋɔn ɔɔ nɩ. Dɩ balamɔɩdaar na n do Sefatɩa, Abɩtalɩ dɔ ɔɔ nɩ. 5 Dɩ maadõdaar na n do Itɩramɩ, Davɩdɩɩ khɛr bɩɛllɩkɛ dɔnɩ Ɛgɩla, dɔ ɔɔ nɩ. Wɛr dɔ kuuminǝǝkɛ Davɩdɩ kɔnɩ Ebʋrɔ̃.

Abɩnɛɛr na Ɩsɩbosɛtɩ thʋnɛ kha.

6 Bɔɔkɛ kʋʋr n pʋɔrnɩ Sayuli too na Davɩdɩɩ too thɩ̃thɩɩn, Abɩnɛɛr laan kĩkĩkĩ sa tee da n pɛr Sayuli toora. 7 Sɩɩ do Sayul kɔɔ hananɛ wɛdaarɩkɛ wɩ n wenɩ Rɩsɩpa, kɛ dɔnɩ Ayaa bikhɛr. Dɩ Ɩsɩbosɛtɩ phaan Abɩnɛɛr ayɩ: «Aɲe gɩ dɩ fɩ ƴaal ɩ̃ thɩɩ wɛdaar?» 8 Dɩ Ɩsɩbosɛtɩɩ thɩmɩɩle fʋrɛ Abɩnɛɛr nĩkhii ka', dɩ birse Ɩsɩbosɛtɩ: «Fɩ kpɩɛrɛ bɩɩn ha mɩ dɩ ma n do thɔma Judaa məlsɔɔra ya? Mɛrɛ do thɔma bɔɔbɔɔ afɩ thɩ Sayuli toora, na ɔɔ õkũusɔɔra, na ɔɔ kũusɔɔra a dana nĩ, a do bʋɔ sɩ Davɩdɩ na n 'lɛ fa', sɩ dɩ fɩ ɩɩr dɩ fa n phaan mɩ nĩ khɛrɩkɛɛ thɩmɩɩraa? 9 Thãgba n pɛ mar sor gɩ khɩɩr gɩ ka ado ma cʋʋ Davɩdɩra gɩrɛra Thãgba Kɔ̃tɩn kɔɔ ʋlfɛnaana'. 10 Gɩdonɩ a sor ɩna teere Sayuli toora jamana dʋʋr, sɩ ɩnɩ n pɛr Davɩdɩra jamana dʋʋr Judaa məlsɔɔra na Ɩjɩrayɛl ca wɩrɛra sɛnɩ; gɩ fʋna Dã gɩ dana Bɛɛrseba.» 11 Dɩ Ɩsɩbosɛtɩ ɩɩ kɩrkɩrkɩr gɩdonɩ a n mar Abɩnɛɛr ka.

Abɩnɛɛr hɛlɛ a ma Davɩdɩ.

12 Le Abɩnɛɛr thɛthɛ thɔna thɔ̃thɔna Davɩdɩra aa wɩ sʋɔraa: «Amɛ hɩna dɩɩ? Ʋlfɛnɛna mɩ ha ie ʋlfɛrɛ sɩ ɩ̃ bul fɩ ɩ̃ kɛr Ɩjɩrayɛl caar fɛw ɩ̃ pɛ far.» 13 Dɩ Davɩdɩ birsee: «Mɩ ture a na ʋlfɛna fɩ ha ie ʋlfɛrɛ, sɩ thɩ̃ bɩɛl hale mɩ n ƴaal farnɩ. A fa ɩ̃, sɩ fa pɛ Sayuli bikhɛr Mɩkal, kɛ dɔnɩ ɩ̃ khɛr ƴɔɔ a ɩna ha ma', fa puno na yɩ ɩ̃ ƴɛ bǝ'». 14 Dɩ Davɩdɩ thɔna thɔ̃thɔna Sayuli bikuun Ɩsɩbosɛtɩra a sʋʋraa: «Ha mɩ ɩ̃ khɛr Mɩkal, kɛ mɩ lɩmɩnɩ na Fɩlɩsɩtɛ̃sɔɔ khʋ̃ lo tamaa (100) sa he.» 15 Dɩ Ɩsɩbosɛtɩ thɔ̃ a teguu ɔɔ ko Paltɩɛlɩ pa, kɛ dɔnɩ Laɩsɩɩ bikuun. 16 Dɩ ɔɔ ko khɩɩ da n kpananaa a jalna dana Bahurim dɩɩra. Dɩ Abɩnɛɛr so ɔɔ kora a kɛra kɔna, dɩ kɛr kɔ̃.

17 Dɩ Abɩnɛɛr mɩɩna wɩrɛ dɔnɩ kɔ̃tɩna Ɩjɩrayɛl caarsɔɔra ayɩ: «Gɩ maanɛ nɩ kɔɔ ƴaalnɩ Davɩdɩ n dɔ nar jamana. 18 Nɛnɛ̃ dɩphã bɔɔ daan dɩ na cʋʋ thɩ̃ɛ; gɩdonɩ Thãgba Kɔ̃tɩn kɔɔ mɩɩrɛ ɔɔdara ayɩ, ɩnɩɩ thɔ̃daar Davɩdɩ ɩna gba na taana ɩnɩɩ too Ɩjɩrayɛl Fɩlɩsɩtɛ̃sɔɔra na awɩ lãlaardarara fɛw». 19 Dɩ Abɩnɛɛr mɩɩnanɛ dakha Bɛ̃jamɛ̃ɛ məlsɔ. Agɩpɩ dɩ gba jal Ebʋrɔ̃ a mɩɛ Davɩdɩ mɔ̃ Bɛ̃jamɛ̃ɛ məlsɔ na Ɩjɩrayɛl ca wɩrɛ sɛnɩ na tini kpɩɛrɛ wɩ kɛr wɩ kpaara . 20 Dɩ a daan Ebʋrɔ̃ Davɩdɩɩ pa na kona kpelẽekɛ thɔgɔɔnɩ. Dɩ Davɩdɩ cʋʋ wɩ fɛtɩ, ɔr na tɩbɩlaakɛ hanaanɩ. 21 Dɩ Abɩnɛɛr sor Davɩdɩra: «Ma kʋɔn na kpa Ɩjɩrayɛl fɛw na jɛ dɩ wa ʋlfɛna fɩ ha ie ʋlfɛrɛ, yaa ɩ̃ kɔ̃tɩ̃ jamana dɩ fa do jamana dʋɔ bilǝni mɔ̃ fɩ n ƴaalnɩ. Dɩ Davɩdɩ pɩɛrɛ hʋɛ dɩ kɔ̃ na ha ɩɩ.

Joabɩ kʋrɛ Abɩnɛɛr

22 Ga pʋɔra', sɩ Joabɩ na Davɩdɩɩ kobisɔ pɔ a dã. Kʋʋra wɩ kɔɔ the, a pɔna thɩ̃beekɛ wɩ khɩɩnɩ kʋʋra dɩɩ kar. Abɩnɛɛr na kɔɔ hale Davɩdɩɩ pa Ebʋrɔ̃ 'lo bã; gɩdonɩ Davɩdɩ kɔɔ pɩɛrɛ hʋɛ dɩ kɔ̃ na ha ɩɩ. 23 Ɔbɔɔkɛ Joabɩ na sɔrasɛɛkɛ fɛw hanaanɩ kha danɩ, wɩ mɩɛrɛ Joabɩ aa, Nɛɛrɩ bikuun Abɩnɛɛr kɔɔ pɔr le jamanaa pa, dɩ fagʋʋ dɩ kɔ̃ na ha ɩɩ. 24 Dɩ Joabɩ gba jal jamanaa pa a bulee: «Aɲe fɩ cʋʋ thaa? Abɩnɛɛr ɩna kɛ afɩ pa, dɩ fɩ fagʋʋ dɩ kɛr pɔlpɔlpɔlɩ? 25 Sɩɩ do fɩ jɩrɛ Nɛɛrɩ bikuun Abɩnɛɛr bɛ! A ɩnɛ a fɩɩl fɩ, sɩ a jɩ afɩ koke fɩl na gɩrɛ fɛʋʋkɛ fɩ n cʋʋnɩ.» 26 Dɩ Joabɩ faa Davɩdɩ sa the a thɔ̃ thɔ̃thɔna wɩ kpaanɛ 'le Abɩnɛɛr. Dɩ wɩ 'lii Sɩra ɲɔ tɛ kor nʋɔra, a kɛrnaa birnǝ sɩ Davɩdɩ na kɔɔ ja'. 27 Ɔbɔɔkɛ Abɩnɛɛr kɛrnɩ bir Ebʋrɔ̃, Joabɩ kpaarɛ kana khokhɩara dɩ lõfonɔ thɩ̃thɩɩn a ho thɩ̃ɛ a n wolõ a mɩgʋʋ le, sa gʋɔ bɩnɛna a kʋ, a tiir ɔɔ õkuun Ajaɛlɩkɛ a kʋnɩɩ hel.

28 Dɩ Davɩdɩ nɩɛ pɩpɩɩ paar, a so: «Thãgba Kɔ̃tɩn jɩrɛ dɩ mɛrɛ na ɩ̃ jamana dɩ fɛw na hana dɩɩ Nɛɛrɩ bikuun Abɩnɛɛrɩ khirǝǝka'. 29 Ɔɔ tɔmɩ̃ɩle na n hɩnɛ Joabɩ na ɔɔ cɔdara fɛw. Tɩbɩla n hana ɔɔ cɔ, tɔmɩn bulo na n the war bɔɔ fɛw, agɩbo gbuul khoo. Kona n hana le wa n puno thɩ̃ kpɩɩ saagado khɛr thɔ̃ haar dɩbara gaa ga. Wa n khe khi khasãa; agɩbo wo, wa n yɩ dɩkɔa'.» 30 Thale Joabɩ na ɔɔ õkuun Abɩsaɩ kʋ Abɩnɛɛr, gɩdonɩ a kɔɔ kʋrɛ awɩ õkuun Ajaɛl Gabãɔ kʋʋra. 31 Dɩ Davɩdɩ sor Joabɩra na wɩrɛ fɛʋraakɛ kɔɔ hanɩ kha na Joabɩ ayɩ: «Nɩ ɓǝǝre anɩ kẽkẽsɔ sa tɔ bɔrɔ kẽkena a bɛna Abɩnɛɛr!» Dɩ Davɩdɩ jamanaa thɛthɛrakɛ na n kpaan khi gbadaara khiro. 32 Dɩ wɩ dʋrɛ Abɩnɛɛr Ebʋrɔ̃. Dɩ jamana bɩrɛ ɔɔ kara, dɩ tɩbɩla fɛw na n khɩɩ. 33 Dɩ Davɩdɩ ti bɔ waal nɩɛɛkɛ Abɩnɛɛrɩdara ayɩ:

«Aɲe gɩ yaa Abɩnɛɛr dɩ fɩ khi

dǝ̃bǝǝl khir thaa?»

34 Wa li fɩnɩ ɲɛ̃ɛa',

dɩ wa barã fɩ nɛɛ wo na jɔrkɔ̃a'

Sɩ dɩ fa khi,

a khi thaa mɔ̃ tɩɩ puunǝ n phuronɩ tibil

35 Dɩ tɩbɩla ɓibi bir lɔɔ wo dɩ wa n bɩ Abɩnɛɛr. Agɩpɩ dɩ wɩ pɔ Davɩdɩra ɔbɔɔkɛ wire hanɩle, wɩ cʋgʋʋ a kho dikor. Sɩ Davɩdɩ bor sa ʋlfɛ ayɩ: «A ga do wire lona ga, sɩ dɩ̃ kho dikor woo dikor, Thãgba n pɛ mar sor gɩ khɩɩr gɩ ka.» 36 Dɩ tɩbɩla fɛw nɩɛrɛ gelela dɩɩ da war ka. Dɩrakɛ Davɩdɩɩ cʋʋ pasɔ n kɔɔ da warɛ ka. 37 Dɩ tɩbɩla fɛw na Ɩjɩrayɛl caar fɛw jɩrɛ ɔwi dɩ ga do jamana 'laanɛ hʋɛ dɩ wɩ kʋ Nɛɛrɩ bikuun Abɩnɛɛra'. 38 Dɩ jamana sor ɔɔ kobisɔɔra aa: «Dakpɩɛ ǝlǝ nĩ Ɩjɩrayɛl caara dɛ! Sɩɩ do nɩ jɩrɛ bɛ? 39 Na ɩ̃ jamana dorakɛ fɛw, sɩ ma sa nɛɛ pa'; tɩbɩlaakɛ, Seruyaa bikũusɔ, wɩ thʋnɛ khɩɩr a jɔ mɩ. Thãgba Kɔ̃tɩn n lɩma wɩ puu caarɩkɛ wɩ cʋʋnɩ mɔna awɩ puu hanɩ».