Baana na Rekabɩ kʋrɛ Ɩsɩbosɛtɩ.
4
1 Ɔbɔɔkɛ Sayuli bikuun Ɩsɩbosɛtɩ nɩɛnɩ dɩ Abɩnɛɛr khire Ebʋrɔ̃, ɲɛ̃ɛ khiirure dɩ jẽu fʋlɛ Ɩjɩrayɛl fɛw.2 Ɩsɩbosɛtɩ kɔɔ hananɛ sɔrasɩ kɔ̃tɩna yeɲɔɔkɛ dɔnɩ Rɩmɔ̃ɔ bikũusɔ, kɛ wɩ n wenɩ bɩɛl Baana, dɩ bɩɛl na n do Rekabɩ; Berɔtɩdaar gɩ a do Bɛ̃jamɛ̃ɛ məl; gɩdonɩ Bɛ̃jamɛ̃ɛ məlsɔɔ bənnə Berɔtɩ dɩɩ n kɔɔ ther, 3 dɩɩ fʋna kɛkɛkɛrakɛ Berɔtɩdara fuulenɩ jal too Gɩtayɩm dɩ awɩ mǝlsɔ ha lera a dana nĩ 'lo. 4 Sayuli bikuun Jonatã kɔɔ hananɛ bikuun nɛ kʋɛ, da n do Mefibosɛtɩ. Yɛna yemɔy a kɔɔ hana ɔbɔɔkɛ Sayul na Jonatãa khida thenɩ Jɩjɩrɛl a pɔ dã. Dɩ ɔɔ tetee gbaa da n cana. Dɩ mɔ̃ a n phananɩ mɛ̃, a kpɛɛrɛ bɩsaan dɩ nɛɛ kʋɛ khorr.
5 Dɩ Rɩmɔ̃ɔkɛ thɛnɩ Berɔtɩ, ɔɔ bikũusɔ, Rekabɩ na Baana, ɩɩrɛ lõ Ɩsɩbosɛtɩɩ cɔ ɩtɩ phʋrɔ bɔɔ, ɔbɔɔkɛ a phɩnɩ da n daar ʋlkhɔ daan. 6 Wɩ pɔr lõ cɔ bɩnɔ dɩɩ ho bile a wɩ n ƴaal wɩ gba, sa gʋɔ bɩnɛna a kʋ; agɩpɩ dɩ wɩ fuule. 7 Cʋɔrɔ wɩ kɔɔ lõ dabɔɔraakɛ a phɩnɩ ɔɔ phɩ̃ para da n hɩɩr ɔɔ du bɩnɔ, kana a n phɩnɩ. Dɩ wɩ gʋɔrɛ a kʋ a kuru yʋʋ a gbana hʋɛɛkɛ n kananɩ Araba bə̃ fãa a ɩɩrna dɩtɩnɛɛle fɛw. 8 Dɩ wɩ gbaar Ɩsɩbosɛtɩɩ yʋ a jalna Ebʋrɔ̃ Davɩdɩra, a sʋʋraa: «Jamana ya, yɛkɛ Ɩsɩbosɛtɩɩ yʋ, afɩ lãlaardaar, kɛ n kɔɔ ƴaalɛ fɩnɩ yʋʋ, kɛ dɔnɩ Sayuli bikuun. Nĩikɛ Thãgba Kɔ̃tɩn n tiire afɩ hel Sayul na ɔɔ mǝlsɔɔra». 9 Dɩ Davɩdɩ birse Rɩmɔ̃ɔkɛ thɛnɩ Berɔtɩ ɔɔ bikũusɔ, Rekabɩ na Baana ayɩ: «Yidaar Thãgba Kɔ̃tɩn do, ɔrkɛ taa mɩnɩ nɩwɛ caar fɛʋra. 10 Ʋrɛɛkɛ kɔɔ pʋɔnɩ a mɩɛ mɩ Sayuli khida, a kpɩɛr thɩmɩɩ bʋɔ ɩnɩ n mɩɩ mɩ, mɩ pɛrɛ dɩ wɩ fʋʋ a kʋ le Sɩkɩlagɩ; dɩɩ do gɛr dɔ lɩmɩnɛ mɩ lɩmʋʋnɩ ɔɔ thɩmɩɩrara. 11 Dɩ nɛr tɩɩ puunǝ ɩɩr jal a sɔɔrɔ tɩɩ telẽe ɔɔ cɔ a kʋʋ phɩ̃ paar; aɲe ma ka na lɩmɩ nɩnakɛ gɩrɛ tɔr, kʋrraakɛ nɩ kʋʋnɩ mɔlɔ? Na jɩ dɩɩ do anɩ bũburõokɛ ma bũburõ nɩnɩ dɩ na hɛl thɩɩraakɛ, ɩ̃ tiir nar ɔɔ tɔmɩn hɛl, gɛr na dʋɔn anɩ lɩmaa?»
12 Dɩ Davɩdɩ 'laa hʋɛ daɓolminǝnǝǝkɛ dɔnɩ ɔɔ kobisɔ wɩ kʋrɛ wɩ. Dɩ wɩ kuur wɩ ɲɛ̃ɛ na nɛɛ, sa ju wɩ Gabãɔ per nʋɔra. Agɩpɩ wɩ gbaar Ɩsɩbosɛtɩɩ yʋ a dʋ Abɩnɛɛrɩ kara Ebʋrɔ̃.