Davɩdɩ dor jamana Ɩjɩrayɛl caara fɛʋ
5
1 Ɩjɩrayɛl caar ɓibi pɔr Davɩdɩra, le Ebʋrɔ̃, a sʋʋraa: «Sɛr ha wɩrɛ. Tɔmɩ̃ bɩɛllala sɩ the. 2 Mamararakɛ Sayul kɔɔ donɩ asɩ jamana, sɩ fɛr n kɔɔ gbaan Ɩjɩrayɛl ƴɩɛ kʋʋra. Thãgba Kɔ̃tɩn kɔɔ so farɛ aa, fɛr na khɛ ɩnɩɩ too Ɩjɩrayɛl; fɛr na dɔ awɩ thɔthɔɔ.» 3 Thale Ɩjɩrayɛl kɔ̃tɩna fɛw pɔ Davɩdɩra Ebʋrɔ̃, dɩ Davɩdɩ jamana ʋlfɛna wɩ nɔ bɩɛl ʋlfɛrɛ le Ebʋrɔ̃ Thãgba Kɔ̃tɩnɩ ƴɛra. Dɩ wɩ phiirre Davɩdɩ, a pɩɛraa niin yʋɔ dɩ do Ɩjɩrayɛl fɛʋʋ jamana.4 Yɛna kpelẽ yʋɔr Davɩdɩ kɔɔ hana sa do jamana. Dɩ a kɔɔ dor jamana a cʋʋna yɛna kpalaɲɔ. 5 Le Ebʋrɔ̃, a cʋʋrɔrɛ yɛna makoɲɔ na sɩpora maadõ Judaa məlsɔɔra; a jal Jerujalɛm a cʋʋrɔ yɛna kpelẽ yʋɔr yẽther (33) Judaa məlsɔɔra na Ɩjɩrayɛl ca wɩrɛra sɛnɩ fɛw.
Davɩdɩ teere Jerujalɛm dɩɩ
6 Dɩ Davɩdɩ jamana ɩɩrna ɔɔ too fɛw a jal Jerujalɛm a sɔbɩ Jebusidaraakɛ kɔɔ dɔnɩ dʋɔdara. Dɩ wɩ sor Davɩdɩra: «Fa lõ kɩɛra', yara na nɛ kʋɛdaraa harakɛ na kɔɔ dii fer.» Awɩ thɩmɩɩ mɩɩ gɩ dɩ wɩ mɩɩ mɛ̃; kɩrʋ dʋɔn Davɩdɩ na puno awɩ dɩ na tee kpɩɩraka'. 7 Sɩ Davɩdɩ teere Sɩyɔ̃ɔ fãga pa, kɛ wɩ dʋnɩ ire “Davɩdɩɩ dɩ”. 8 Dawiilera Davɩdɩ kɔɔ sor ayɩ: «Ado ntɛ ƴaal a punone Jebusidara, a lonana ɲɔ celuukɛ wɩ mɩnɩ thɩɩra popǝr khaa, a dana wɩ. Nɛ kʋɛda ca wele, na yaar ca wele, wɩ yaa mɛr ka!» Gɛrra dɔ kɩrʋ dɩ wɩ so: «Yara na nɛ kʋɛdara na n lõ Thãgba Kɔ̃tɩnɩ fʋɔr cɔra ga.» 9 Dɩ Davɩdɩ toore fãga paar, a dʋ gɩ ire: «Davɩdɩɩ dɩ». Dɩ a mɩrɛ bɛbɛr go pɛ gbana bilǝ fɛw, a thena paarɩkɛ hɔnɩ nãsʋʋ, kɛ wɩ n wenɩ Milo a ba jalna lona dɩɩra. 10 Davɩdɩ n 'lɛr fãga da n dɛɛnɔ; gɩdonɩ Thãgba Kɔ̃tɩnɩkɛ dɔnɩ Thãgba kokenaa kɔ̃tɩ̃ kɔɔ har kha na ɔr.
11 Hɩram, kɛ dɔnɩ Tɩɩr jamana thɔnanɛ thɔ̃thɔna Davɩdɩra, na sɛɛdɩrɩ thɩra na dakha thɩr khaadara, na boka thela dɩ wɩ mɩ Davɩdɩɩ jamana cɔ. 12 Dɩ Davɩdɩ jɩrɛ dɩphã dɩ Thãgba Kɔ̃tɩn pɛ nar jamana dʋʋrra Ɩjɩrayɛlla, dɩ ɩnɩɩ jamana do tɔr dɩ ga n pɛr dɩɩ do ɔɔ too Ɩjɩrayɛl dɔ kɩrʋ.
Davɩdɩɩ bɩsãsɔɔkɛ a kɔnɩ Jerujalɛm
13 Dɩ Davɩdɩ bir gba wɛdara, a hena Jerujalɛm khɛra, a thenɩ Ebʋrɔ̃ a jal. Dɩ a bire kɔ̃ kuuminǝ na kheminǝ wo. 14 Yɛkɛ wɩrɛ a kɔnɩ Jerujalɛm, awɩ isɔ: Samʋa, Sobabɩ, Natã, Salomɔ̃, 15 Ɩbaar, Elɩsʋa, Nefɛɛgɩ, Yafɩa, 16 Elɩsama, Elɩada na Elɩfelɛtɩ
Davɩdɩ kǝǝre Fɩlɩsɩtɛ̃sɔɔra
17 Fɩlɩsɩtɛ̃sɔ nɩɛrɛ dɩ wɩ yɩ wɩ phiire Davɩdɩ a pɩɛraa niin yʋɔ dɩ do jamana Ɩjɩrayɛla. Dɩ wɩ ther fɛw a jal ɔɔ ƴaal pa. Dɩ Davɩdɩ nɩɛrɛ a gba gbũ fãga paar. 18 Dɩ Fɩlɩsɩtɛ̃sɔ pɔr dã a mala Rɩfayɩm ɓɛlɛ̃ fɛw. 19 Dɩ Davɩdɩ bule Thãgba Kɔ̃tɩn ayɩ: «Ɩ̃ jala kɛna Fɩlɩsɩtɛ̃sɔɔra ya? Fa gba wɛr a na dʋ mɩ ɲɔ̃kɔɔ bɛ?» Dɩ Thãgba Kɔ̃tɩn sʋʋraa: «Ɔɔ, jala, ma gba wɛr a na dʋ fɩ ɲɔ̃kɔɔ». 20 Dɩ Davɩdɩ jaal dã Baal-Perasɩm, kãakɛ a punonɩ Fɩlɩsɩtɛ̃sɔɔra. Agɩpɩ dɩ so: «Thãgba Kɔ̃tɩn ɓɛlɛ ɩ̃ lãlaardaraa ko ɲɔ̃ ɩ̃ ƴɛbʋrɔ dɩɩ ho mɔ̃ ɲʋɔn n ɓɛlnɩ gberẽ khur. Liir gɩ the dɩ wɩ ha paarɩle ire Baal-Perasɩm; kɩrʋ dʋɔn: «Gberẽ khur ɓɩɛl kɔ̃tɩn». 21 Dɩ Fɩlɩsɩtɛ̃sɔ dʋʋrna le awɩ thɩlsɔ, dɩ Davɩdɩ na ɔɔ too khɩɩ.
22 Dɩ Fɩlɩsɩtɛ̃sɔɔra bir the wo balaɲɔdaa a pɔ mala Refaɩtɩsɔ ɓɛlɛ̃. 23 Dɩ Davɩdɩ bule Thãgba Kɔ̃tɩn, dɩ Thãgba Kɔ̃tɩn sʋʋraa: «Fa n jal dẽdẽa', sɩ fe awɩ khiro a pɔ dana wɩ mirie thɩr lu ƴɛbʋrɔ. 24 Ɔbɔɔkɛ fa nɩɛnɩ nɛ bɩna mirie jĩjilǝ̃biirǝ, gbulone khǝ̃khǝ̃ gɩdonɩ mɛr Thãgba Kɔ̃tɩn kʋlɛ fɩ ƴɩɛ ɩ̃ kʋʋr Fɩlɩsɩtɛ̃ sɔrasɛ. 25 Dɩ Davɩdɩ cʋʋ mɔna Thãgba Kɔ̃tɩn kɔɔ sʋʋraanɩ. Dɩ a kʋʋrɛ Fɩlɩsɩtɛ̃sɔ a fʋna Geba dɩɩra, a weele wɩ foo a dana Gejɛɛr dɩ lõ paar.