Davɩdɩ tire kpɩɛrɛ a gba ʋlfɛ khɛɛsʋʋ a jalna Jerujalɛm.
6
1 Dɩ Davɩdɩ bire kpa wo Ɩjɩrayɛl sɔrasɩ kuun bɔy fɛw, gbɩlanɩ kpelẽ yʋɔr (30000) a jɛ. 2 Dɩ Davɩdɩ na tɩbɩlaalera hanɩ kha na ɔr jaal Baala dɩɩra, Juda dʋɔ, wɩ gba Thãgbaa ʋlfɛ khɛɛsʋʋkɛ Thãgba Kɔ̃tɩnɩ i dʋrɔnɩ. Thãgba Kɔ̃tɩn kokenaa kɔ̃tɩ̃ɩ i gɩ, kɛ n tɔɔnɩ seribɛ̃sɔɔ thɩ̃thɩɩn, ʋlfɛ khɛɛsʋʋra ƴũu. 3 Dɩ wɩ gbaar Thãgbaa ʋlfɛ khɛɛsʋra a pɛr na hotoro phaara a thena Abɩnadabɩɩ cɔ, kɛ hanɩ gɔ̃gʋɔna. Dɩ Abɩnadabɩɩ bikũusɔ, Uja na Ahɩo na n thɔɔ na hotoro phaara. 4 Dɩ wɩ gbaar ʋlfɛ khɛɛsʋʋ le Abɩnadabɩɩ cɔ, kɛ hanɩ gɔ̃gʋɔna. Dɩ Uja na n kana Thãgbaa ʋlfɛ khɛɛsʋ gɛlʋ sɩ Ahɩo ha ʋlfɛ khɛɛsʋ ƴɛbʋrɔ. 5 Dɩ Davɩdɩ na Ɩjɩrayɛl caar fɛw n kãkarɛ Thãgba Kɔ̃tɩnɩ ƴɛra, dɩ wa n bɩna nɩ khɩ̃ thɩ̃ caar dɩɩ dɩɩ fɛw, kɛ wɩ cʋʋnanɩ sɩpɩrɛsɩ thɩrʋ: kolõjʋʋ gɩ, na kãkarma, na bǝ̃bǝǝn, na kpɩlãkpʋʋ na ɓilǝ̃.6 Ɔbɔɔkɛ wɩ danɩ kuunɩkɛ n dʋɔnɩ Nakɔ̃ɔ gbola, nasɔ tharsɩrɛ dɩ Uja 'laa ɲɔ̃ɔ a fʋ Thãgbaa ʋlfɛ khɛɛsʋ. 7 Dɩ nĩkhii fʋ Thãgba Kɔ̃tɩn Ujara dapaara. Dɩ Thãgba bɩɩ liirǝ dɩɩ do ɔɔ dɩpa dɔ nɔɔ. Dɩ Uja khi liirǝ Thãgbaa ʋlfɛ khɛɛsʋ kɩrɔ. 8 Dɩɩ puu Davɩdɩra ka, gɩrɛraakɛ Thãgba Kɔ̃tɩn thʋnɩ be Uja be caar thale a kʋ. Dɩ a dʋrɛ paarɩle ire: «Pɛrɛsɩ-Uja» a. Dɩ wɩ n wer paarɩle Pɛrɛsɩ-Uja a dana nĩikɛ. 9 Dɩ maar fʋrɛ Davɩdɩ Thãgba Kɔ̃tɩnna dawiile dɩ so: «Dɩ mɔ̃ ma fʋ sɩ na 'la na lona Thãgba Kɔ̃tɩnɩ ʋlfɛ khɛɛsʋ ɩ̃ cɔ?» 10 Dɩ aa ƴaal a kɔna Thãgba Kɔ̃tɩnɩ ʋlfɛ khɛɛsʋ ɔɔ pa Davɩdɩɩ dʋɔa', a cʋʋ dɩ wɩ jalna a thɩɩn kuun bɩɛlɩkɛ n dʋɔnɩ Obɛdɩ-Edɔ̃ɔ cɔ, Gatɩ dɩɩra a ha. 11 Dɩ Thãgba Kɔ̃tɩnɩ ʋlfɛ khɛɛsʋ cʋʋrɛ le sɩpora yẽther. Dɩ Thãgba Kɔ̃tɩn bɔnanɛ Obɛdɩ-Edɔ̃, na ɔɔ cɔdara fɛw.
Thãgbaa ʋlfɛ khɛɛsʋ daan Jerujalɛm
12 Dɩ wɩ mɩɛrɛ Davɩdɩ jamana ayɩ: «Thãgba Kɔ̃tɩn bɔnanɛ Obɛdɩ-Edɔ̃ɔ cɔ ka, na thɩ̃ɛ fɛʋʋkɛ a hananɩ dɩɩ do Thãgbaa ʋlfɛ khɛɛsʋ dɔ nɔɔ.» Dɩ Davɩdɩ gbaar hʋɛ a jal gba Thãgbaa ʋlfɛ khɛɛsʋ Obɛdɩ-Edɔ̃ɔ cɔ da n kɔna Davɩdɩɩ dʋɔ na kãka kɔ̃tɩ̃ɩ jɔɔ. 13 Ɔbɔɔkɛ wɩrɛ gbaanɩ Thãgba Kɔ̃tɩnɩ ʋlfɛ khɛɛsʋ kanɩ nɛ kana maadõ, Davɩdɩ jire bonɩɛ na na ke bɩɛl, na na ɓol khʋ̃ɔ bɩɛl. 14 Davɩdɩ kɔɔ liri lɛ̃ kɩ̃kɩɩnɩkɛ wɩ n wenɩ efoodɩ pelela da n sana Thãgba Kɔ̃tɩnɩ i dʋbɩ bɩ̃ na ɔɔ fãga fɛw. 15 Davɩdɩ na Ɩjɩrayɛl bɩsana fɛw jalnanɛ Thãgba Kɔ̃tɩnɩ ʋlfɛ khɛɛsʋ na da hulẽbe na tutuu ʋ̃ʋsɔ.
16 Ɔbɔɔkɛ Thãgba Kɔ̃tɩnɩ ʋlfɛ khɛɛsʋ n lonɩ Davɩdɩɩ dʋɔ, Sayuli bikhɛr Mɩkal n hɩɩnɛ na fɛnɛtɩrɩ, a yɩ Davɩdɩ jamana da n sa Thãgba Kɔ̃tɩnɩ i dʋbɩ bɩ̃ da n ubirinǝ. Dɩ Mɩkal beesuu ɔɔ hara.
17 Dɩ wɩ pɔnanɛ Thãgbaa ʋlfɛ khɛɛsʋ a thɩɩn kẽkẽ wa bɩnɔ, kɛ Davɩdɩ kɔɔ dʋnɩ ɔɔ irǝ. Agɩpɩ dɩ Davɩdɩ ji bonɩ thiinǝsɔ, na 'likha bonɩɛsɔ Thãgba Kɔ̃tɩnna. 18 Ɔbɔɔkɛ Davɩdɩ jini bonɩ thiinǝ na 'likha bonɩɛsɔ pɩ, a bɔnanɛ tɩbɩla Thãgba Kɔ̃tɩn kokenaa kɔ̃tɩ̃ɩ irǝ. 19 Agɩpɩ dɩ tɩnɛ Ɩjɩrayɛl jɔjʋɔɔle, kona na khɛra fɛw dɩkɔ. Fɛw bɩɛlbɩɛl 'lɛr buru bɩɛlbɩɛl, na datɩ bi khɩ bi bulona bɩɛlbɩɛl, na dɩvɛ̃ thɩr bi bulona bɩɛlbɩɛl. Agɩpɩ dɩ tɩbɩla fɛw bɩlã kɔ̃ awɩ cɔsɔ.
20 Dɩ Davɩdɩ kɛrɛ a bɔna ɔɔ cɔdara. Dɩ Sayuli bikhɛr Mɩkal ther a caanʋ a sʋʋraa: «Aɲee i dʋbɩ ca Ɩjɩrayɛl Jamana 'lɛ thaa a faa tomɩr ba ɔɔ thɔ̃daraa thɔ̃daar khɛrsɔɔ yiro a ho mɔ̃ sɩkpuloo n cʋʋnɩ!» 21 Dɩ Davɩdɩ birsee: «Thãgba Kɔ̃tɩnɩ i mɩ dʋbɩna. Thãgba Kɔ̃tɩnɩkɛ yɛ mɩnɩ dɩ̃ ba afɩ thɩ na ɔɔ too fɛw; dɩ phiir mɩ, a pɛ mar ma n thɔa ɔɔ too Ɩjɩrayɛl, ɔr Thãgba Kɔ̃tɩnɩ ƴɛra mɩ kãka. 22 Mɩ n ka ƴaalɛlakɛ ɩ̃ jɩɛ wur, a 'luno ɩ̃bara, sɩrakɛ wa dʋbɩ mɛr, narakɛ thɔ̃daar khɛraakɛra fɩ mɩɩnɩ gɩrɛ.» 23 Dɩ Sayuli bikhɛr Mɩkal na hana bɩsaan kpɩɩrakɛ sa dana ɔɔ khi wǝ'.