Davɩdɩ ƴaalɛ a mɩ Thãgba fʋɔr cʋɔr
7
1 Ɔbɔɔkɛ Davɩdɩ jamana toonɩ ɔɔ jamana cɔra, dɩ Thãgba Kɔ̃tɩn haa hɩɩrɛ pɩ, a tagʋʋ ɔɔ lãlaardarasɔɔra fɛʋʋkɛ diǝrǝǝni, 2 a sor Thãgbaa mɩmɩɩ Natana ayɩ: «Hɩnɛ mɛr n ka cɔ cʋɔraakɛ wɩ mɩnɩ na sɛɛdɩrɩ thɩra, sɩ Thãgbaa ʋlfɛ khɛɛsʋ wer n ka a na n cɔ kẽkẽ waw bɛɛ?» 3 Dɩ Natã sʋʋraa: «Ado fɩ hananɛ kpɩɛrɛ thɩɛna, jala cʋɛ gɩdonɩ Thãgba Kɔ̃tɩn har kha na fɛrɛ.»4 Sɩ ga dɩtɩnɔɔlera Thãgba Kɔ̃tɩn mɩɩnanɛ Natã ayɩ: 5 «Jala sɔ ɩ̃ thɔ̃daar Davɩdɩra wɔɔ: Mɛr Thãgba Kɔ̃tɩn sor ayɩ, ɔr Davɩdɩ na mɛ cʋɔr na ha mɩ ɩ̃ tooro ya? 6 Gɩ maanɛ kɛkɛkɛ, a fʋna wireekɛ mɩ tini Ɩjɩrayɛl bɩsana a thena Ejipiti, ma cɔ cɔ mɩnanɛna sa dana niǝ̃'. Sɩ kẽkẽ waa kɔɔ dʋɔn ɩ̃ cɔ dɩ ma n kpaarna Ɩjɩrayɛl bɩsanaa thɩ̃thɩɩn. 7 Paar fɛʋkɛ mɩ kɔɔ kpaarnanɩ Ɩjɩrayɛl bɩsana, mɩ phiire kɔ̃tɩna awɩ casɔɔra, kɛ mɩ pɛrnɩ wa n thɔɔ ɩ̃ too Ɩjɩrayɛl. Sɩ amɛra mɩ kɔɔ so ayɩ: aɲe gɩ dɩ aa mɩ cʋɔr na sɛɛdɩrɩ thɩra a ha ma'? 8 Gɛr gɩ nɛnɛ̃, jala sɔ ɩ̃ thɔ̃daar Davɩdɩra wɔɔ: Aa mɛr Thãgba Kɔ̃tɩn kokenaa kɔ̃tɩ̃ sɔ ayɩ: Mɛr phiree bana khe paar, a puno a do ɩ̃ too Ɩjɩrayɛlɩ thɔthɔɔ. 9 Aa mɩ kɔɔ har kha na ɔr ɔɔ thɔ̃sɔraakɛ fɛw a kɔɔ cʋʋnɩ. Mɩ hɩɛlɛ ɔɔ lãlaardara fɛw sa sɩɩ. Mɩ cʋʋrɛ ɔɔ i dɩɩ the a ho tɩɩ kɔ̃tɩnaakɛ hanɩ thɩɩra. 10 Mɩ har ɩ̃ too Ɩjɩrayɛl bɩsana paar, a thɩɩn wɩ wɩ tɔɔrɔ, maar na n fʋ wɩ dɩkhara bã. Tɩɩ puusɔ na bir na hʋɔl war mɔ̃ gɩ kɔɔ hanɩ mamara, 11 sogʋʋrdaraa bɔɔ, mɔ̃ mɩ kɔɔ pɛ warnɩ wa n thɔɔ ɩ̃ too Ɩjɩrayɛl bɩsana ga. Mɩ har ɔr Davɩdɩ hɩɩrɛ a tagʋʋ ɔɔ lãlaardarara fɛw. Sʋɔraa wɔɔ: Mɛr Thãgba Kɔ̃tɩn na haarɛ mǝle. 12 Aa ɔbɔɔkɛ ɔɔ wi na danɩ da kpãa ɔɔ thɩsɔraakɛ khiirenɩ, ma fʋrɛ ɔɔ mǝlikɛ na kpaaraanɩ, kɛ dɔnɩ ʋrɛ na thɛnɩ ɔɔ tɔmɩna. Ma fʋrɛ ɔɔ jamana do dɩ ga tɩ. 13 Ɔr na mɛ cʋɔr na ha mɩ. Dɩ ma fʋrɛ ɔɔ jamana do dɩ ga tɩ khorr vʋ̃ʋ. 14 Mɛrɛɛ thɛthɛ na dʋɔraa thɩrɛ, a do mar bikuun. Aa cʋʋ dɩɩ, ma naarʋrɛ tibil khaa mɔ̃ thɩrɛ n naarnɩ ɔɔ bi. 15 Sɩ ga hana ɩ̃ hɛllaa ɲɛ̃ɛ mɔ̃ mɩ hɛlnɩ Sayulə sa gbaa pɛra'. 16 Aa, a na 'lee dedee ɔɔ mǝlsɔɔra, ɔɔ jamana too para yuuǝ'. Ɔɔ jamana do na tɩrɛ kɩbɩ, ga hana khu paara'» 17 Dɩ Natã jal a mɩɩ Davɩdɩ thɩmɩaale fɛw mɔna gɩ hanɩ thɩ̃ nɩrɔrɛraale.
Davɩdɩɩ Thãgba bɩɛl
18 Dɩ Davɩdɩ jamana gba jal Thãgba Kɔ̃tɩnɩ ƴɛra a bɩɛlʋ thakɛ ayɩ: «Amɛ mɛrkɛ do yaa Kɔ̃tɩn, Thãgba Kɔ̃tɩnɩ? Dɩ aɲe ɩ̃ cɔ ka do, dɩ fɩ cʋʋ mɩ dɩ̃ thʋ̃ dã kɩɛr thaa ɓoɓo? 19 Sɩ fɛr Kɔ̃tɩn, Thãgba Kɔ̃tɩnna wer, ga do far thɩ̃ɛ pa'. Gɛr dɔ nɔɔ dɩ fɩ bir fa n mɩɩ mɔ̃ mɛr afɩ thɔ̃daarɩ cɔka na hanɩ ƴɛ kʋʋlɔ fĩi. Thãgba Kɔ̃tn ya, mɛr tibil thaa mɔlɔ, ma 'laarɛ na 'liro bɛ? 20 Aɲe ma bir na dɛɛnɔ 'lo fɩ jɩ mɩnɩ? Fɛr Kɔ̃tɩn, Thãgba Kɔ̃tɩn fɩ jɩ mɛr bɔɔbɔɔ, mɛr afɩ thɔ̃daar. 21 Mɔ̃ afɩ thɩmɩɩ na mɔ̃ afɩ ha hanɩ dɔ nɔɔ dɩ fɩ cʋʋ thɩ̃ kɔ̃tɩ̃ ca gɩrɛ mɛr afɩ thɔ̃daar n jɛ gɩ. 22 Aɲaa yaa Thãgba Kɔ̃tɩn, Thãgba dɩ fɩ thʋ̃ wabɩ mɛ̃! Tibil bɩɛllakɛ na hale a hona fa'. Thãgba kpɩɩ na hale dɩkhãa pa saagado fɛr gaaga. Mɛna sɩ kɔɔ nɩɛ afɩdara na asɩ nũ waa dɩ wɩ sona. 23 Kana ca dɔɔ ha thɩɩraakɛ a hona afɩ too Ɩjɩrayɛl, dɩ awɩ thãgbasɔ jal a taa, a cʋʋ wɩ dɩ wɩ do awɩ too, a cʋʋna wɩ dɩ wɩ the ire? Sɩ fɛrɛ, fɩ kɔɔ jaal a taa afɩ too Ejipiti dɩɩra, Ejipiti caarsɔ na awɩ thãgbasɔɔ hʋɔla, gɩ do nɔɔ wɩ do afɩda. Fɩ cʋʋrɛ afɩ too ƴɛra thɩ̃ ɓɔ̃ kɔ̃tɩna na ma kʋ thɩ̃ɛsɔ, gɩdonɩ fɩ kpɩɛrnanɛ afɩ dʋɔ, dɩ wɩ torore yire. 24 Fɛr cʋɛ Ɩjɩrayɛl dɩ do afɩ too khorr vʋ̃ʋ, sɩ dɩ fɛr Thãgba Kɔ̃tɩn do ɔɔ Thãgba. 25 Nɛnɛ̃ɛkɛ Thãgba Kɔ̃tɩn Thãgba, fɔ thɩmɩaakɛra fɩ sonɩ mɛr afɩ thɔ̃daara, na ɔɔ mǝlǝ gɩ ha oti. 26 Dɔ afɩ irǝ n kɔ̃tɩ̃ ga n pɛr wire fɛw, gɩ do nɔɔ wa n so: «Thãgba Kɔ̃tɩn, kokenaa kɔ̃tɩ̃ dʋɔn Ɩjɩrayɛlɩ Thãgba!» Dɔ jamana dʋʋr n ma mɛr Davɩdɩ afɩ thɔ̃daarɩ mǝlsɔɔra afɩ ƴɛra khorr vʋ̃ʋ. 27 Gɩdonɩ fɛr Thãgba Kɔ̃tɩn, kokenaa kɔ̃tɩ̃ɩ thɛthɛ, kɛ dʋɔnɩ Ɩjɩrayɛlɩ Thãgba, fɛr nɛna afɩbara mɛr afɩ thɔ̃daara a so: «Fa ha mɛr mǝle, dɩ gɛr gɩ dɩ̃ hana 'lar a bɩɛl far bɩɛl caarɩkɛ. 28 Nɛnɛ̃ɛkɛ, Kɔ̃tɩn Thãgba Kɔ̃tɩn, fɛr dʋɔn Thãgba. Sobɔr afɩ thɩmɩɩsɔ do. Fɛr nɛna mɛr afɩ thɔ̃daar bɔ cʋʋ caarɩkɛ. 29 Nɛnɛ̃, bɔna mɛr afɩ thɔ̃daarɩ cɔka, gɩ do nɔɔ a too afɩ ƴɛra waa khorr vʋ̃ʋ; gɩdonɩ fɛr Kɔ̃tɩn, Thãgba Kɔ̃tɩn, fɛr mɩa. Dɩ afɩ bɔnana na dɔ nɔɔ mɛr afɩ thɔ̃daarɩ məlsɔ n 'lɛ bɔnanɛ bɔɔ fɛw waa khorr vʋ̃ʋ.