Davɩdɩɩ kǝǝ Ɩjɩrayɛl dɩ khu jamanasɔɔra
8
1 A gele pɩ, Davɩdɩ kenanɛ Fɩlɩsɩtɛ̃sɔ a puno wɩ, a jo wɩ, a tee war jamana dʋʋr bǝǝnǝnǝ. 2 A punone Moabɩdara dɩ cʋʋ wɩ dɩ wɩ phɩɩn thɩɩra a cʋr, dɩ mɩɛ wɩ na pɔ̃ɔ. Aa mɩɛ pɔ̃ nʋɔ yẽther, dɩ ti pɔ̃ nʋɔ yeɲɔ dɩ kʋʋr sɩ dɩ faa pɔ̃ nɔ bɩɛl na yire. Dɩ Moabɩdara jor Davɩdɩra dɩ wa n lɩmʋʋ lãpho.3 Dɩ Davɩdɩ punone dakha Hadadejɛɛr, Soba jamana, kɛ dɔnɩ Rehɔbɩɩ bikuun. Dabɔɔlera Hadadejɛɛr kɔɔ ƴaal a tee jamana dʋʋr dɩɩsɔraakɛ hanɩ Efɩratɩ mɩɩr bǝǝnǝ. 4 Dɩ Davɩdɩ fʋlɛɛ sɔrasɩ gãgodara gbɩlanɩ taamakoɲɔ (1700) na sɔrasɩ nɛdara gbɩlanɩ kpelẽ (20000); a fʋlɛɛ koke hotoro hal gãgona tamaasɔ (100) a hɩ̃, sa kuur gãgo wɩrɛ fɛʋʋkɛ sɛnɩ jɩlãjɩɩsɔ. 5 Dɩ Siiridaraakɛ hanɩ Damasɩ pɔr wɩ bul Hadadejɛɛr, Soba jamana, dɩ Davɩdɩ kʋʋr awɩ too sɔrasɛ gbɩlanɩ kpelẽ yeɲɔ (22000), kɛ dɔnɩ Siiridara. 6 Dɩ Davɩdɩ pɛr gobanɛrsɔ Siiri bǝnǝnǝǝkɛ dɔnɩ Damasɩ; dɩ Siiridara jor Davɩdɩra dɩ wa n lɩmʋʋ lãpho. Paar wo paarɩkɛ Davɩdɩ n kanɩ, Thãgba Kɔ̃tɩn n haarɛ kǝǝre. 7 Dɩ Davɩdɩ gbaar Hadadejɛɛrɩ sɔrasɩsɔɔ tomɩ phidasɔ, kɛ wɩ n kɔɔ tonɩ, kɛ dɔnɩ dɛ haar a kɔna Jerujalɛm. 8 Dɩ a khɩɩrɛ dakha ther sɛna tǝ̃tǝ̃tǝ̃ Beta na Berɔtaɩ, dɩɩ yeɲɔraakɛ dɔnɩ Hadadejɛɛrɩ dɩsɔ.
9 Dɩ Toyi, kɛ dɔnɩ Hamatɩ jamana nɩɛrɛ aa, Davɩdɩ punone Hadadejɛɛrɩ sɔrasɩsɔ fɛw. 10 Dɩ a thʋɔn ɔɔ bikuun Yoram Davɩdɩ jamanaa pa a fʋɔrɛɛ; a kpãganɛɛ dakha mɔ̃ a punonɩ Hadadejɛɛr a jʋʋ, gɩdonɩ bɔɔ fɛw Toyi na Hadadejɛɛr n kɔɔ ke kha kʋʋr. Dɩ Yoram jalna thɩ̃ɛsɔɔkɛ wɩ cʋʋnanɩ dɛ, na dɛ bulona, na ther sɛna a ha Davɩdɩ. 11 Dɩ Davɩdɩ jamana gba a ha Thãgba Kɔ̃tɩn, mɔ̃ a kɔɔ haanɩ dɛ bulo na dɛ gɩrɛ a kɔɔ khɩɩnɩ caarsɔraakɛ a kɔɔ kǝǝni, kɛ dɔnɩ: 12 Siiridara, Moabɩdara, Amɔ̃ɔ məlsɔ, Fɩlɩsɩtɛ̃sɔ, na Amalɛkɩɩ məlsɔ. Mɛna a haa lẽle thɩ̃ɛɛkɛ a tagɩnɩ Hadadejɛɛraakɛ dɔnɩ Soba jamana, Rehɔbɩɩ bikuun.
13 Ɔbɔɔkɛ Davɩdɩ punonɩ Siiridara sa kɛr da n bir, a kʋʋrɛ Edɔ̃ɔ mǝlsɔ, kona gbɩlanɩ yʋɔr makõther (18.000) paarɩkɛ wɩ n wenɩ lã ɓɛlɛ̃, dɩ ɔɔ i jɩɛ the wo. 14 Dɩ a pɛrɛ gobanɛrsɔ Edɔ̃daraa dɩsɔraakɛ fɛw a kɔɔ teenɩ. Dɩ Edɔ̃dara jor Davɩdɩra. Paar wo paarɩkɛ Davɩdɩ n kanɩ, Thãgba Kɔ̃tɩn n haarɛ kǝǝre.
Davɩdɩɩ thɔ̃daarsɔɔ isɔ.
15 Davɩdɩ dor jamana Ɩjɩrayɛl bɩsanana fɛw. A n gʋʋrɛ ɔɔ too fɛʋʋ so na fɩl telẽe, na fɩl sarʋ aa n lee tibilǝ'. 16 Seruyaa bikuun, Joabɩ kɔɔ dɔ sɔrasɛɛ kɔ̃tɩ̃, dɩ Ahiludɩɩ bikuun Jojafatɩ do jamanaa mɩmɩɩ; 17 dɩ Ahitubii bikuun Sadɔkɩ na Abɩataarɩ bikuun Ahimelɛkɩ do bonɩ jidara; 18 dɩ Seraya do sɛbɛ kheredaar, dɩ Yehoyadaa bikuun Benaya na n hɩɩn Kerɛtɩ na Pelɛtɩ sɔrasɛɛkɛ dɔnɩ jamanaa bɛbɛrsɔ, dɩ Davɩdɩɩ bikũusɔ dakha do bonɩ jidaraa.