Davɩdɩɩ bɔ cʋʋ Jonatãa bikuun Mefibosɛtɩra.
9
1 Davɩdɩ ther wi bɩɛl a bule: «Sayuli tibil ʋkha na sɩ na yire, ɩ̃ cʋgʋʋ bɔɔ gɩ do Jonatã dɔ nɔaa?» 2 Sɩɩ do thɔ̃daar bɩɛl hale Sayuli cɔ da n do Sɩba. Dɩ wɩ kpaarɛ pɔna Davɩdɩra. Dɩ Davɩdɩ jamana bulee: «Fɛr n dɔ Sɩbaa?» Dɩ yɩ: «Ɔɔ, mɛr afɩ thɔ̃daarra gɩ.» 3 Dɩ jamana bulee: «Sayuli tibil ʋkha na hale sɛnɩ ɩ̃ cʋgʋʋ bɔɔ Thãgbaa irǝ gaa?» Dɩ Sɩba birsee: «Jonatãa bikuun hale a kʋɛ nɛɛ». 4 Dɩ jamana bulee: «Kana a ha?» Dɩ Sɩba sʋʋraa: «Lodebaar dɩɩra a ha Amɩɛlɩ bikuun Makɩɩrɩ cɔ». 5 Dɩ Davɩdɩ jamana thʋɔn Amɩɛlɩ bikuun, Makɩɩrɩ cɔ, Lodebaar a kpaa. 6 Dɩ Jonatãa bikuun Mefibosɛtɩ, kɛ dɔnɩ Sayuli bikuuni bi pɔr Davɩdɩra, a gburõkhu a gʋɛ ƴɩɛ thɩɩra. Dɩ Davɩdɩ bulee: «Fɛr n dʋɔn Mefibosɛtɩɩ?» Dɩ yɩ: «Ɔɔ, mɛr afɩ thɔ̃daarra gɩ.» 7 Dɩ Davɩdɩ sʋʋraa: «Fa n do maar n fʋ fa'. Ma cʋʋ fɛr bɔɔ gɩ do afɩ thɩ Jonatã dɔ nɔɔ. Ma ha fɛr afɩ thɩ kɔ̃tɩ̃ Sayuli bǝ̃sɔ fɛw, sɩ fa n kho dɩkɔ ɩ̃ cɔ wire fɛw na mɛrɛ». 8 Dɩ Mefibosɛtɩ gburõkhu sa so: «Amɛ mɛrkɛ do, mɛr be khire thaa dɩ fa n dona bʋɔ?»9 Dɩ jamanana bir we Sayuli thɔ̃daar Sɩba a sʋʋraa: «Mɩ har Mefibosɛtɩ, kɛ dɔnɩ afɩ kɔ̃tɩ̃ Sayuli bikuunɩ bi, thɩ̃ɛ fɛʋʋkɛ Sayul na ɔɔ cɔ ka kɔɔ hɩnɩ. 10 Fɛrɛ, na afɩ bikũusɔ, na afɩ thɔ̃dara, nɛr na kʋlɛ na n pɩɛraa. Nɛr na gbaan thɩ̃ɛ gɩ do nɔɔ afɩ kɔ̃tɩ̃ Sayuli bikuunɩ cɔdara n yɩ dɩkɔ wa n kho. Sɩ Mefibosɛtɩ wer, ɩ̃ cɔ a na n kho dɩkɔ wire fɛw». Sɩɩ do Sɩba hananɛ bikona yʋɔr yemɔy, na thɔ̃dara kpelẽ. 11 Dɩ a sor jamanana: «Ma cʋʋrɛ gɩrɛ fɛʋʋkɛ fɩ so marnɩ yaa, ɩ̃ kɔ̃tɩ̃.» Dɩ mɛ̃ Mefibosɛtɩ n kho dɩkɔ jamanaa cɔ a ho jamanaa bikuun gɩ. 12 Mefibosɛtɩ hananɛ bɩsã kũubir bɩɛl da n do Mɩka. Wɩrɛ fɛʋʋkɛ hanɩ Sɩbaa cɔ, Mefibosɛtɩɩ thɔ̃ wɩ n do fɛw. 13 Mefibosɛtɩ toore Jerujalɛm gɩdonɩ jamanaa cɔ a n kho dɩkɔ wire fɛw. Ɔɔ nɛsɔ yeɲɔ fɛw kɔɔ kʋɛrɛ.