Amɔ̃ɔ məlsɔɔ jamana pɛr Davɩdɩɩ thɔ̃darara yicuru.
10
1 Mɔ̃ gele kanɩ pɩ, Nahasɩɩkɛ dɔnɩ Amɔ̃ɔ məlsɔɔ jamana khire, sɩ ɔɔ bikuun Hanʋn gba ɔɔ too pa a do jamana. 2 Dɩ Davɩdɩ so ɩna cʋʋrɛ Hanʋn bɔɔ mɔ̃kɛ ɔɔ thɩ Nahasɩ kɔɔ cʋʋ nɩnɩ bɔɔ. Dɩ a thʋ̃ɔ ɔɔ thɔ̃dara wɩ ƴɔla Hanʋn haar ɔɔ thɩɩ khidara. Dɩ Davɩdɩɩ thɔ̃daraale jaal mɛ̃ a dã Amɔ̃ɔ məlsɔɔ dʋɔ. 3 Dɩ Amɔ̃ɔ məlsɔɔ kɔ̃tɩ̃sɔ so awɩ kɔ̃tɩ̃ Hanʋna ayɩ: «Fɩ kpɩɛrɛ afɩ thɩɩ khirǝ Davɩdɩ thɔna ɔɔ thɔ̃dara wɩ ɩna ƴɔla fɩ haar wɛ? Fa jɩ a thɔ̃ wɛr wɩ ɩna gɩɩlɛ dɩɩ a jɩɛnɛɛ, sa ɩna wɩɛlɛaa koe!» 4 Dɩ Hanʋn fʋlɛ Davɩdɩɩ thɔ̃dara a bel wɩ nɔkhuusi gɛl bɩɛl, a fʋna awɩ kẽkẽsɔ a caan gɔra a gbunǝ khu pẽkanana sa faa wɩ dɩ wɩ kɔ̃. 5 Dɩ Davɩdɩ nɩɛrɛ mɔ̃ wɩ hanɩ yicur kɔ̃tɩɩna na sobɔr. Dɩ a thʋɔn wɩ caanɛ sɔ war wɩ tɔɔ Jeriko phaphapha awɩ nɔkhuusi n phu ɓo sɩ wɩ pɔ.Davɩdɩ kenanɛ Siiridara na Amɔ̃ɔ məlsɔ.
6 Dɩ Amɔ̃ɔ məlsɔ jɩrɛ gɩrɛ ɩnɩ cʋʋnɩ, gɩ yaarɛ Davɩdɩ ka. Dɩ wɩ ɩɩrɛ jal Siiridararaakɛ hanɩ Bɛtɩ-Rehɔbɩ na Soba a the sɔrasɩ nɛdara gbɩlanɩ kpelẽ (20.000), a jal Maaka jamanana a the sɔrasɛ gbɩlanɩ (1000), a jal Tobi a the sɔrasɛ gbɩlanɩ yʋɔr yeɲɔ (12.000). 7 Dɩ Davɩdɩ nɩɛrɛ, a thɔna war Joabɩ, sɔrasɛɛ kɔ̃tɩ̃ na sɔrasɩ kuun khana fɛw. 8 Dɩ Amɔ̃ɔ məlsɔ ther a gba ko ɲɔ̃ɔ awɩ dɩ lõfonɔra; sɩ Soba sɔrasɛ na Rehɔbɩ sɔrasɛɛkɛ dɔnɩ Siiridara, na Tobi sɔrasɛ na Maaka sɔrasɛ ha pa kpɩɩ hʋɔnɔ. 9 Dɩ mɔ̃ Joabɩ, sɔrasɛɛ kɔ̃tɩ̃ yɩɛnɩ dɩɩ do sodara har gbulona yeɲɔ, bɩɛl ƴɛbʋrɔ, bɩɛl khiro, a phiire sɔrasɩ kuun khana Ɩjɩrayɛl sɔrasɛra a pɛr dɩ wɩ gba ko ɲɔ̃ɔ Siiri Sʋrasɛɛ ƴɛra. 10 Sɩ sɔrasɩ wɩrɛ sɛnɩ dɩ pɛr ɔɔ õkuun Abɩsaɩ, dɩ wɩ gba ko ɲɔ̃ɔ Amɔ̃ɔ məlsɔɔ sɔrasɩsɔɔ ƴɛra. 11 Dɩ a sor Abɩsaɩra ayɩ: «A Siiri sɔrasɛ na jɔ mar, ɩna bulo mɩ; dɩ a fɛra Amɔ̃ɔ məlsɔɔ sɔrasɩsɔ n jɔ, ma pɔr na bul fɩ. 12 Pɩɛr 'lar; sɩ kɛ̃kɛrɛnɛ a pɛ asɩ toora na asɩ Thãgbaa dɩsɔɔra. Thãgba Kɔ̃tɩn na cʋɛ mɔ̃ a yɩɛnɩ dɩɩ bɔr.» 13 Dɩ Joabɩ na sɔrasɩ wɩrɛ hanaanɩ tɔr wɩ pɔ wɩ kena Siiri sɔrasɛ. Dɩ Siiri sɔrasɛ caalɛ. 14 Dɩ mɔ̃ Amɔ̃ɔ məlsɔɔ sɔrasɩsɔ yɩnɩ Siiri sɔrasɛ dɩ wɩ caalɛ, wɛr dakha faarɛ Abɩsaɩ sa caalɛ a lõ awɩ dɩ bɩnɔ. Dɩ Joabɩ faa kʋʋr na Amɔ̃ɔ məlsɔ mɛ̃ sa kɛr bir Jerujalɛm.
15 Mɔ̃ Siiri sɔrasɛ yɩɛnɩ dɩɩ do wɛr Ɩjɩrayɛldara puno, wɩ jɩɛ kpa kha a jɛ. 16 Dɩ Hadadejɛɛr thʋɔn a khuo Siirida wɩrɛ hanɩ le Efɩratɩ mɩɩr seero, dɩ wɩ pɔ dã Elam dɩɩra. Ʋrɛ gbana wɩnɩ ƴɩɛ dʋɔn Sobakɩ, kɛ dɔnɩ Hadadejɛɛrɩ sɔrasɩsɔɔ kɔ̃tɩ̃. 17 Dɩ Davɩdɩ nɩɛrɛ a kpa Ɩjɩrayɛl sɔrasɛ fɛw a jɛ; dɩ wɩ seere Jʋrdɛ̃ mɩɩr a jal le Elam. Dɩ Siiri sɔrasɛ gbaar ko ɲɔ̃ɔ Davɩdɩra wɩ kenaa. 18 Sɩ Siiri sɔrasɛ caalɛlɛ Davɩdɩɩ ƴɛra. Dɩ Davɩdɩ kʋʋrɛ awɩ hotoro hal gãgona taamakoɲɔ (700), a kʋʋrna wɩ sɔrasɩ gãgodara gbɩlanɩ kpalaɲɔ (40.000). Dɩ wɩ 'lɛr Sobakɩ dakha, ʋrɛ dɔnɩ awɩ sɔrasɩsɔɔ kɔ̃tɩ̃ dɩ khi le. 19 Dɩ mɔ̃ jamana yɩrasɔɔkɛ kɔɔ hanɩ Hadadejɛɛrɩ khiro yɩɛnɩ dɩɩ do wɛr Ɩjɩrayɛl sɔrasɛ puno, wɩ kure kha ha ɩɩ na Ɩjɩrayɛl bɩsana a jo war. Dɩ maar fʋlɛlɛ Siiridara wa n 'la na bul Amɔ̃ɔ məlsɔ 'lo bã.