Davɩdɩ na Basebaa thɩmɩɩ
11
1 Mɔ̃ yɩɛr fini, bɔɔraakɛ jamanasɔ mɩlnanɩ dɩ wɩ ɩɩrna kʋʋr, gɛr Davɩdɩ thɔnɔ Joabɩ, ɔɔ sɔrasɩsɔɔ kɔ̃tɩ̃ na ɔɔ thɔ̃dara na Ɩjɩrayɛl sɔrasɛ fɛw, wɩ jala kʋɛa Amɔ̃ɔ məlsɔɔ dɩ, a sɔbana Raba, awɩ dɩ kɔ̃tɩ̃. Sɩ Davɩdɩɩ thɛthɛ wer toore Jerujalɛm. 2 Dɩ wi bɩɛl, mɔ̃ Davɩdɩ ɩɩrnɩ daanɔ wi gaara da n fi ɔɔ nãsʋrɔ ɔɔ jamana cɔra, a 'laarɛ yɩ khɛr bɩɛl dɩ bɔr ka da n hʋ ɲʋɔn. 3 Dɩ Davɩdɩ thʋɔn a bule, a jɩ ntɛ a donɩ. Dɩ wɩ sʋʋraa: «Elɩamɩ bikhɛr gɩ. Ɔr n dɔ Baseba, Iirɩkɛ dɔnɩ Hɛtɩɩ mǝl, ɔɔ khɛr gɩ.» 4 Dɩ Davɩdɩ thʋɔn tɩbɩla dɩ wɩ jal wɩɩ. Dɩ a pɔr Davɩdɩra dɩ phɩnaa. Sɩɩdo ɔɔ sɩpor kɔɔ pɛ da n phʋɔl ɔɔbara, agɩpɩ, a kɛrɛ kɔ̃ ɔɔ cɔ. 5 Dɩ a hananɛ pɛmɛr a thɔ̃ so Davɩdɩra, aa ɩnɩ hananɛ pɛmɛr. 6 Le Davɩdɩ thɔ̃ a so Joabɩra: «Thɔnana mar Iirɩ, Hɛtɩɩ mǝl kɔrɔ». Dɩ Joabɩ thɔnaa Davɩdɩra. 7 Dɩ mɔ̃ Iirɩ danɩ Davɩdɩɩ pa, a buleele bɔɔ, mɔ̃ Joabɩ na sɔrasɛ hanɩ; a bulenaa mɔ̃ kʋʋr hanɩ le. 8 Agɩpɩ dɩ sʋʋraa: «Kɔna afɩ cɔ a cɔcɔɔnɛ nɛɛa a hɩrɛ gbe.» Mɔ̃ Iirɩ thenɩ jamanaa cɔ pɩ, jamana 'laarɛ khaardaa wɩ kpaana hanaa. 9 Sɩ Iirɩ jaal a phɩna ɔɔ kɔ̃tɩ̃ɩ kobisɔ fɛw, le jamanaa lõfonɔra, aa kɔ̃ ɔɔ cɔa'. 10 Dɩ wɩ jaal mɩɛ Davɩdɩ aa, Iirɩ na kɔ̃ ɔɔ cɔa'. Dɩ Davɩdɩ so Iirɩra ayɩ: «Thɩ̃ɛ gɩ pa ƴɔɔ fɩ the a ɩ̃, aɲe tɔna fɩ cɔ kʋɔn?» 11 Dɩ Iirɩ birsee: «Gɩ dorakɛ ʋlfɛ khɛɛsʋʋ, na Ɩjɩrayɛl na Juda sɔrasɛ hale dɩ wa n cɔ kẽkẽ waʋsɔ; dɩ ɩ̃ kɔ̃tɩ̃ Joabɩ, na fɛr ɩ̃ kɔ̃tɩ̃ɩ thɔ̃dara na n jɛ hʋɔnɔ dahɩrɛra; sɩ me wer n kɔ̃ ɩ̃ cɔ, ɩ̃ kho ma n ɲɔna; ɩ̃ lõ ma n phɩna ɩ̃ khɛr bɛɛ? Mɩ ʋlfɛrɛ; ma cʋʋ thɩ̃ɛ thale yuuǝ'! 12 Dɩ Davɩdɩ sʋʋraa: «Dɩ a mɛ̃ gɩ cɔ kɛ nĩ, sɩ a dɩɩ wɩl cʋɔ, ɩ̃ pɛ fɩ hʋɛ fɩ bir. Dɩ Iirɩ too le Jerujalɛm ɔwi na ɔ dɩwɩlɔ.» 13 Dɩ Davɩdɩ wɩɩrɛ dɩ wɩ kho kha dɩkɔ. Dɩ a haarɛ taan dɩ ɲɔ dɩɩ fʋʋ. Sɩrakɛ ga dʋɔrɔɔle Iirɩ ther a phɩ̃ ɔɔ phɩ̃ para, na ɔɔ kɔ̃tɩ̃ɩ sɔrasɩsɔ; aa kɔ̃ ɔɔ cɔa'.14 Mɔ̃ dɩɩ wɩlnɩ duuro, Davɩdɩ kherere lɛtɛrɛ Joabɩra a thɔna Iirɩra a jalana 'laanɛ. 15 Davɩdɩ sor lɛtɛrɛraale ayɩ: «Nɩ tɔ Iirɩ pɩɛr ƴɛbʋrɔ, kãkɛ kʋʋr gbɔɔnɩ khǝkhǝkhǝ, sa hala birǝ khiro, sa sɩɛraa gɩ do nɔɔ sodara n 'lɩɛ a khi»
Basebaa ko Iirɩɩ khi
16 Dɩ Joabɩ jʋʋrɛ dɩɩra wɩ sɔbɩnɩ a hɩɩn kãakɛ sodaraa sɔrasɩ khana hanɩ sa tɔ Iirɩ a pɛr le. 17 Dɩ dɩdaraale ther a tɛna Joabɩ; dɩ wɩ kʋʋrɛ sɔrasɩ ɩkhasɔ Davɩdɩɩ toora, a kʋna dakha Iirɩɩkɛ dɔnɩ Hɛtɩɩ mǝl. 18 Dɩ Joabɩ thʋɔn a mɩɛ Davɩdɩ thɩ̃ɛ fɛʋʋkɛ kanɩ le kʋʋra. 19 A mɩɛrɛ thɔ̃thɔn thakɛ ayɩ: «Ado fɩ mɩɛ jamana kpakha kpakha mɔ̃ thɩ̃ɛ hanɩ kʋʋra a pɩ, 20 dɩ nĩkhii fʋʋ dɩ so: "Aɲe wer gɩ dɩ nɩ tɔ wɔrɔ̃ dɩɩ jɔɔ dɩ na n ke kʋʋr, na jɩ dɩɩ do wɩ n jɩɩlɛ gʋʋra ƴũu sɩ na tha gaa ya? 21 Amɛ kɔɔ kɔ Yerubaalɩ bikuun Abɩmelɛkɩ Tebɛsɩ dɩɩra? Ga do khɛr bulone haan gʋʋra ƴũu sa dʋnanaa naan dɩ khǝǝ? Sɩ aɲe gɩ dɩ nɩ tɔ wɔrɔ̃ gʋʋ thale? Sʋɔraa aa: Afɩ thɔ̃daar Iirɩkɛ dɔnɩ Hɛtɩɩ mǝl khire dakha».
22 Dɩ thɔ̃thɔnɩle jaal. Ɔbɔɔkɛ a danɩ, a mɩɛrɛ Davɩdɩ gɩrɛ fɛʋʋkɛ Joabɩ kɔɔ thʋɔnaanɩ. 23 Dɩ a sor Davɩdɩra ayɩ: «Tɩbɩlaale hananɛ fãga a jɔ sɩ dɛ! Wɩ ther a tɛna sɩ le hʋɔnɔ. Dɩ sɩ weele wɩ a jalna dana dɩ lõfonʋɔ. 24 Dɩ sẽdara har gʋʋra ƴũu sa tha sɩ. Dɩ wɩ kʋʋrɛ afɩ sɔrasɩ ɩkhasɔ, a kʋna Iirɩ dakha, kɛ dɔnɩ Hɛtɩɩ mǝl». 25 Dɩ Davɩdɩ so thɔ̃thɔnnaale ayɩ: «Kɛra birǝ sɔ Joabɩra wɔɔ: "A na n gba gele gɩ dʋʋraa thɩ̃ɛa'. Kʋʋrarakɛ, mɛ̃ gɩ n ha. Ʋ n khire kɛ, dɩ ʋ n khi pal. Aa, a yɩrana dɩɩ a wɩɛlɛ. Hanaa 'lar thale».