Thãgbaa mɩmɩɩ Natã nɩnanɛ Davɩdɩ ɔɔ dɩpa.
12
1 Dɩ Thãgba Kɔ̃tɩn thʋɔn ɔɔ mɩmɩɩ Natã Davɩdɩɩ pa. Dɩ Natã jaal Davɩdɩra a sʋʋraa: «Kona yeɲɔ kɔɔ hale dɩ bɩɛla, dɩ bɩɛl do lẽle, sɩ bɩɛl do bɔdaar. 2 Dɩ lẽleele kɔɔ hananɛ na, na banaa tǝ̃tǝ̃tǝ̃. 3 Sɩ bɔdaarɩle na hana dɩkha ga. Bana khebi bɩɛl a the da n haan, dɩ gbɛbɩna ɔɔ bɩsãsɔ da n khɔ̃. Ɔɔ dɩko a n kho, ɔɔ ɲɔ̃kpona a n ɲɔ, ɔɔ kũkuno a n cɔ. Dɩ bana khebirə debɩrakɛ a hʋʋraa bikhɩɛn. 4 Dɩ wi bɩɛl kpakpal gbune lẽledaarɩlee cɔ. Dɩ a borore ɔɔ banasɔ, na ɔɔ nasɔɔra; aa ƴaal a fʋ bɩɛllakɛ a tinǝ ɔɔ kpakpal kpakpaala', sa ɩɩr jal a fʋ bɔdaarɩ bana khebi bɩɛlɩlera a kʋ a tinǝ ɔɔ kpakpal kpakpaalɛ.5 Dɩ nĩkhii thar Davɩdɩ lẽledaaraale, dɩ so Natana: «Na Thãgba Kɔ̃tɩnɩkɛ dɔnɩ yidaar! Ntɛɛkɛ cʋɛnɩ thɩ̃ɛɛle, a teenanɛ khir. 6 Puu caarɩle a cʋʋnɩ sɩ bʋɔ na fʋʋa', sɩ dɔ a birse ɔ bana cara banaa yenã a 'laa.»
7 Dɩ Natã birsee: «Fɛrra dʋɔn kuunɩlera. Ɩjɩrayɛlɩ Thãgba, kɛ dʋɔnɩ Thãgba Kɔ̃tɩn sor ayɩ ɩnɛr phire fɩ, a pɛ far niin yʋɔ dɩ fɩ do Ɩjɩrayɛlɩ jamana; ɩnɛr taa fɩ Sayuli ɲɔ̃kɔɔ. 8 Aa ɩnɛr hana fɩ punone afɩ kɔ̃tɩ̃ Sayuli toora, a gbana ɔɔ khɛrsɔ a ha fɩ. Ɩnɛr pɛ far jamana dʋʋr Ɩjɩrayɛl na Juda caara fɛw. Ado gele na kɔɔ dã fa' ɩna kɔɔ ɓanɔnɛ dakpɩɩ wo. 9 Aa, sɩ aɲe dɔ nɔɔ dɩ fɩ beesi ɩnɛr Thãgba Kɔ̃tɩnɩ thɩmɩɩ, a cʋʋ nar thɩ̃ puu thaa ya? Aa fɛr kɔ Iirɩ, Hɛtɩɩ mǝl na bajɩna, sa gba ɔɔ khɛr a he. Aa fɛr cʋɛ dɩ Amɔ̃ɔ məlsɔ kʋʋ. 10 Aa a fʋna nɛnɛ̃ kʋ kha na pɩ afɩ cɔ kpɩɩ bã, gɩdonɩ fɩ beesi ner, mɔ̃ fɩ gbanɩ Iirɩ, Hɛtɩɩ mǝli khɛr a he. 11 Aa ɩnɛr Thãgba Kɔ̃tɩn sor, ɩna cʋʋrɛ dɩ puure na the afɩ thɛthɛɛ cɔ kara a na dã fɩ. Aa ɩna gbaar afɩ khɛr bɩnɔsɔ afɩ yiro a na ha afɩ kpɩ̃ɩ bɩnɔ a phɩna ʋlkhɔ gbãgbelena. 12 Aa fe wer wolonena fɩ cʋʋ, sɩ ɩne wer, dɩwɩl gbãgbelena ɩna cʋʋ, afɩ too Ɩjɩrayɛl fɛw n toro yire."»
13 Dɩ Davɩdɩ so Natana: «Sobɔr gɩ, mɩ cʋʋrɛ puure Thãgba Kɔ̃tɩnna.» Dɩ Natã sʋʋraa: «Thãgba Kɔ̃tɩn faarɛ afɩ puu cʋʋ a ha fɩ. Fa khǝ'. 14 Sɩ gɩdonɩ fɩ cʋʋrɛ thɩ̃ɛ thaa, a 'laa hʋɛ Thãgba Kɔ̃tɩnɩ lãlaardarara dɩ wɩ beesuu, afɩ biikɛra wɩ kɔnɩ a na khire.»
Biikɛ Davɩdɩ kɔnɩ Basebara khire
15 Agɩpɩ Natã gbaar kɔ̃ ɔɔ cɔ. Dɩ Thãgba Kɔ̃tɩn cʋʋrɛ dɩ ga n kho biikɛra Davɩdɩ kɔnɩ Basebara a puuro ka. 16 Dɩ Davɩdɩ ƴɛɛrɛ Thãgba Kɔ̃tɩn biilee khora a bona dɩkɔ ɓoɓo. Ɔbɔɔkɛ a lonɩ dɩtɩnɔ, thɩɩra a phɩ̃ a cɔ. 17 Dɩ ɔɔ thɔ̃daar kɔ̃tɩ̃sɔɔkɛ hanɩ ɔɔ cɔ pɔr a phʋʋrʋ a ɩrɛ thɩɩra sɩ aa tuǝ'. Dɩ aa khona wɩ dɩkɔ woa'. 18 Wire makoɲɔdaara, dɩ bɩsaan khi. Dɩ maar fʋlɛlɛ ɔɔ kobisɔ dɩ wa 'la na sʋʋraa bɩsaan khirǝ'. Dɩ wɩ n sor: «Bɩsaan kɔɔ hananɩ yire, sɩ dɩ sɩ mɩɩnaa, dɩ aa pɛ sɩ nũǝ', mɔ̃ sa bir na 'la na sʋʋraa bɩsaan khire? A na cʋʋrɛ ɔɔbara puure dɛ!» 19 Mɔ̃ Davɩdɩ yɩnɩ ɔɔ thɔ̃dara dɩ wa n bʋ̃bʋ̃ʋ kha, a jɩrɛ dɩ bɩsaan khire. Dɩ a bulele ɔɔ thɔ̃dara ayɩ: «Bɩsaanna khire ya? Dɩ wɩ yɩ: «Ɔɔ, a khire.» 20 Dɩ Davɩdɩ ɩɩr thɩɩra dɩphã a hʋ ɲʋɔn, a thir niin, a debɩna kẽkena. Agɩpɩ dɩ jal Thãgba Kɔ̃tɩnɩ cɔ a gburõkhu a fʋɔrʋ. Agɩpɩ dɩ kɛr kɔ̃ cʋɔrɔ a yɩ wɩ ha nɩ dikor. Dɩ wɩ haarɛ dikor dɩ kho. 21 Dɩ thɔ̃dara bulee: «Aɲee cʋʋ ca ha gɩrɛ fɩ n cʋʋnɩ thaa yaa jamanaa? Bɩsaan kanɩ kɔɔ hana yire, dɩ fɩ ka fa n kɔɔ bɩ, a bona dɩkɔ, sɩ dɩ khi nɛnɛ̃ dɩ fɩ ɩɩr fa n kho dɩkɔɔ?» 22 Dɩ so war: «Bɩsaan kɔɔ hananɩ yire, mɩ n kɔɔ khɩɩrɛ a bona dɩkɔ, gɩdonɩ ɩ̃ kpɩɛr kɔɔ dʋɔn: Amɛ jɩɛn ado Thãgba na jɩ mɩ bʋɔra dɩ bɩsaannɩkɛ na bir na 'lɛ yirǝ? 23 Sɩ nɛnɛ̃ɛkɛ a 'lini khir, aɲera ma bo dɩkɔ? Ma punone na cʋgʋʋ da the 'lo ya? Mɛr na kpaanɛ ɔɔ pa, sɩ ɔr wer na bir na kɛr na ɩ̃ mar bã.»
Salomɔ̃ɔ kɔ̃
24 Dɩ Davɩdɩ ƴɔlɛ ɔɔ khɛr Baseba haar. Agɩpɩ dɩ phɩnaa; dɩ Baseba kʋɔn kũubir dɩ Davɩdɩ haa ire Salomɔ̃, kɛ Thãgba Kɔ̃tɩn nanɩ; 25 dɩ Thãgba Kɔ̃tɩn thʋɔn ɔɔ mɩmɩɩ Natã a cʋɛ Davɩdɩ a jɩ gɩ. Naw caarɩlera dɔ nɔɔ dɩ Natã ha bɩsaanɩle ire Yedɩdɩa. I kɩrʋ dʋɔn: «Ʋrɛ Thãgba Kɔ̃tɩn nanɩ.»
Davɩdɩ teere Amɔ̃ɔ məlsɔɔ dɩ kɔ̃tɩ̃ Raba.
26 Ga bɔɔlera Joabɩ, sɔrasɛɛ kɔ̃tɩn sɔbɩ Raba, Amɔ̃ɔ məlsɔɔ dɩ kɔ̃tɩ̃, a tee ka dɔnɩ jamanaa dɩ khubi. 27 Dɩ a thʋɔn thɔ̃thɔna wɩ sɔ Davɩdɩra wɔɔ: «Raba dɩɩra mɩ sɔbɩnɩ, mɩ teere ka dɔnɩ ɲɔ jɔ paar. 28 Kpa sɔrasɩ wɩrɛ sɛnɩ a ɩna sɔbaa; a tea dɩɩra na afɩ i. Ma ƴaal ɩ̃ tea na ɩ̃ iǝ', a mɛ̃ ga, ga hor mɛr wa n kpãga. 29 Dɩ Davɩdɩ kpa sɔrasɛɛkɛ sɛnɩ a jal sɔbɩ Raba dɩɩ a tee. 30 Dɩ Davɩdɩ phubire nũfe kpɩɛrɩkɛ hanɩ Raba jamanaa thɩlɩkɛ wɩ n wenɩ Mɩlkɔ̃ɔ yʋɔ. Ɔɔ dʋbɩ daan kilǝ kpelẽ yʋɔr na dɛbɩrɛ. A hananɛ boka ɓʋ̃ɔ dɩ wɩ marɔ. Dɩ wɩ gbaar a ma Davɩdɩɩ nũfe kpɛra. Dɩ a khɩɩrɛ dakha lẽle thɩ̃ɛ tǝ̃tǝ̃tǝ̃ a kɔna. 31 Sɩ dɩdara wer, Davɩdɩ khɩɩ wɛr, a pɛ war fãga thɔmana, kɛ dɔnɩ: thɩr khaarɛ na boka thele na thɩr kuure na birki mɩr. Mɛna Davɩdɩ cʋʋna Amɔ̃ɔ məlsɔɔ dɩ kɔ̃tɩ̃ ɩkhasɔ fɛw. Agɩpɩ dɩ Davɩdɩ na ɔɔ sɔrasɩsɔ fɛw kɛr a kɔ̃ Jerujalɛm.