Amɩnɔ̃ na Tamaarɩ thɩmɩɩ
13
1 Hɩnɛ gɩrɛ dananɩ ɔbɔɔkɛ thɩ̃ɛsɔɔle kanɩ pɩ. Davɩdɩɩ bikuun Abɩsalɔ̃ hananɛ õkhɛr bɩɛl dɩ bɔr ka. Ɔɔ i n dʋɔn Tamaar. Dɩ ɔɔ õkuun Amɩnɔ̃, kɛ thɩ bɩɛl kɔna wɩnɩ kha na n khiro. 2 Dɩ Amɩnɔ̃ na n a dɩbara a thʋ̃ ho khodaar dɩɩ do naʋʋkɛ a nanɩ ɔɔ õkhɛr Tamaar dɔ nɔɔ; sɩ ga do a na punone a na cʋʋ dɩkharakɛ sɩ na liiǝ', gɩdonɩ Tamaar na kɔɔ jɩ kuun pa'. 3 Sɩ Amɩnɔ̃ kɔɔ hananɛ kuun bɩɛl da n do Yonadabɩ. Samaakɛ dɔnɩ Davɩdɩɩ õkuunɩ bikuun gɩ; a puno tɩɩ fɩɩlɛ ka. 4 Dɩ Yonadabɩ bule Amɩnɔ̃: «Aɲe gɩ duuro wo duuro dɩ fɩ ha sɔrkpɔrɔɔ fɩɩ bɔ kʋdaar, fɛr jamanaa bikuun. Fa n so mar thɩ̃doaa?» Dɩ Amɩnɔ̃ sʋʋraa: «Ɩ̃ õkhɛr Tamaarɩkɛ thɩ bɩɛl kɔna sɩnɩ, kɛ dɔnɩ Abɩsalɔ̃ɔ õkhɛr lona mɩ haar ga do kpãkpalã ga, gɛr gɩ.» 5 Dɩ Yonadabɩ sʋʋraa: «Jɛ sa phɩna afɩ phɩ̃ para a cʋɛ gɩ ho gɩ n kho fer. Ado afɩ thɩ ɩ̃ a yɩ fɩ, sʋɔraa: "A faa afɩ õkhɛr Tamaar a ɩ̃ a cʋʋ dikor a ha fɩ. Aa, fɩ n ƴaalɛ a cʋɛ afɩ ƴɛra fɩ toro yire, sɩ a to far fɩ kho.»6 Dɩ Amɩnɔ̃ jɩ sa phɩ̃, a cʋʋ dɩɩ ho gɩ n khʋʋrɛ. Dɩ jamana pɔ ɩnɩ n yɩɩ dɩ sʋʋraa: «Mɩ n bɩɛl fɛr, faa ɩ̃ õkhɛr Tamaar a ɩ̃, a pho gato yɩra yeɲɔ, ɩ̃ toro yire, sɩ a to mar ɩ̃ kho.» 7 Dɩ Davɩdɩ thɔ̃ a so Tamaara le ɔɔ cɔ ayɩ: «Jala afɩ õkuun Amɩnɔ̃ɔ cɔ, a cʋɛ dikor hanaa.» 8 Dɩ Tamaar gba jal Amɩnɔ̃ɔ cɔ, dɩ hale a phɩ̃. Dɩ Tamaar kpɩ buru mɩɩn, a cʋɔn Amɩnɔ̃ɔ yiro a pho. 9 Agɩpɩ a gbaar thɩ̃ɛ a deero Amɩnɔ̃ɔ ƴɛra a haa a khɔ, dɩ Amɩnɔ̃ bo sa so wɩ te tɩbɩla fɛw wɩ thɩɩr, dɩ tɩbɩla thɩɩr. 10 Liir dɩphã a so Tamaara ayɩ: «Gba gatora a ɛna kɛ duu a tɔ mar ɩ̃ kho. Dɩ Tamaar gba gatora a phonɩ a kpaana ɔɔ duu. 11 Mɔ̃ a gbanɩ ɩnɩ n 'laaraa a kho, dɩ fʋʋ ɲɔ̃ɔ sa so: «Ɩna phɩnana mɩ yaa ɩ̃ õkhɛr». 12 Dɩ Tamaar sʋʋraa: Ɔ̃'ɔ̃, ɩ̃ õkuun fa n fʋna mɩ fãga gaa dɛ̃! Wa n do mɛ̃ Ɩjɩrayɛl dɩɩra ga. Fa n cʋʋ yicur kɔ̃tɩ̃ thɔ̃ caarɩka'. 13 Kana ma kana ɩ̃ yicur? Dɩ fɛrɛ dakha, fa kʋɛrɛ ire Ɩjɩrayɛl dɩɩra. Mɩ bɩɛl fɛr, mɩana jamana; a na bo fa n he maa ga. 14 Sɩ Amɩnɔ̃ na ƴaal a pɩɛ nũuǝ'; sa fʋʋ na fãga a phɩna.
15 Agɩpɩ dɩ Tamaar yagʋʋ dɩɩ ka jɔ mɔ̃ a kɔɔ lʋʋnɩ haar cacara. Dɩ a sʋʋraarɛ aa: «Ɩrɛ, hala jala pal! » 16 Dɩ Tamaar sʋʋraa: «Ɔ̃'ɔ̃, a fa wee mɩ thaa, ga dor puu kʋkʋʋ fɩ bir fa n cʋʋ mɩ wo dɩɩ ka jɔ gɩrɛ fɩ kɔɔ cʋʋ mɩnɩ gɩrɛ.» 17 Sɩ Amɩnɔ̃ na ƴaal wo a pɩɛ nũǝ'. Sɩ a wer daɓolbir bɩɛlɩkɛ n dʋɔnɛɛnɩ thɔma a sʋʋraa: «Wea khebirikɛ kɩɛr a the sɩ fɩ kpala loo!» 18 Gbɔɔlɔ̃ yɩɩrʋ Tamaar kɔɔ to; gɩdonɩ ga kẽkẽ caale jamanaa bikhɛrsɔɔkɛ na jɛnɩ kuun pa' n kɔɔ to. Dɩ Amɩnɔ̃ɔ thɔ̃daarɩle wegʋʋ sa kpala loo.
19 Dɩ Tamaar gba thoo a bʋl yʋʋ, a ɓǝǝrnǝ ɔɔ gbɔɔlɔ̃ yɩɩrra a kɔɔ tonɩ, a linǝ ɲɛ̃ɛ yʋɔ, sa khɩɩ da n jalna. 20 Dɩ ɔɔ õkuun Abɩsalɔ̃ bulee: «Amɩnɔ̃ fʋ̃ɔ fɩ na fãga gaa? Pɩra; gɩdonɩ afɩ õkuun gɩ, fa n dɔ gɩ puu far haara jɔa'.» Dɩ Tamaar too le ɔɔ õkuun Abɩsalɔ̃ɔ cɔ a ho khɛr faana. 21 Dɩ Davɩdɩ jamana nɩɛrɛ gelela fɛw dɩ nĩkhii fʋʋrɛ jɔɔ ka.a 22 Sɩ Abɩsalɔ̃ na dee Amɩnɔna nʋɔa', sa gbanaa laarɛ gɩdonɩ a kɔɔ fʋrɛ ɔɔ õkhɛr na fãga.
Abɩsalɔ̃ pɛrɛ dɩ wɩ kʋ Amɩnɔ̃ sɩ dɩ ca.
23 Yɛna yeɲɔ gɩ cʋʋ, sɩ wi bɩɛl, dɩ Abɩsalɔ̃ hana bana sũu khabɩrɛ Baal-Hasɔɔr dɩɩra, Efɩrayɩm bǝǝnǝ gɩ. Dɩ a wer jamanaa bikũusɔ fɛw. 24 Dɩ a jaal dakha jamanaa pa a sʋʋraa: «Ɩ̃ thɩ, mɩ hananɛ bana sũu khabɩdara, nɩ pɔ, fɛrɛ, na afɩ thɔ̃dara. 25 Dɩ jamana sʋʋraa: «Kpei, ɩ̃ bikuun waa, sɛrɛ fɛw na pɔa', a mɛ̃ ga sa do farɛ hẽedaar. Dɩ Abɩsalɔ̃ fɛrɛ thʋnɔ, sɩ Davɩdɩ bo sa bɔnaa. 26 Dɩ Abɩsalɔ̃ bir so: «Dɩ a mɛ̃ gɩ hana ɩ̃ õkuun Amɩnɔ̃ hʋɛ sɩ jal kha». Dɩ jamana bulee: «Aɲe gɩ dɩ Amɩnɔ̃ na pɔ?» 27 Dɩ mɔ̃ a n fɛrɛnɩ mɛ̃, jamana faarɛ Amɩnɔ̃ na ɔɔ bikũusɔɔrakɛ fɛw dɩ wɩ jal.
28 Jaa Abɩsalɔ̃ kɔɔ sor ɔɔ thɔ̃darara wa n jʋrɛ Amɩnɔ̃. Aa ɔbɔɔkɛ a na hini taan, a ɩnɩ so war wɩ kɔ Amɩnɔ̃, aa wɩ kʋɔ. Aa wɩ kʋɔ, wa n do maar n fʋ wa'. Ɩnɛr so war. Wɩ lana, wɩ dɔ kuun khana. 29 Dɩ Abɩsalɔ̃ɔ thɔ̃dara kʋ Amɩnɔ̃ mɔna a so warnɩ. Dapaara jamanaa bikuun wɩrɛ sɛnɩ jʋʋn awɩ kũkə̃-gãgosɔ a caalɛ.
30 Dɩ mɔ̃ wɩ hanɩ hʋɛra, thɩmɩɩrɩle kɔɔ daan Davɩdɩ. Wɩ sʋʋraarɛ ayɩ: «Abɩsalɔ̃ kʋʋrɛ afɩ bikũusɔ fɛw, bɩɛlakɛ na sa'» . 31 Dɩ jamana ɓǝǝr ɔɔ kẽkẽsɔ sa ji thɩɩra. Dɩ ɔɔ thɔ̃dara ɓǝǝr awɩ kẽkẽsɔ sa jɛ diirǝǝ. 32 Dɩ Davɩdɩɩ õkuun Samaa bikuun, Yonadabɩ gba thɩmɩɩ ayɩ: «Jamana waa, fa n kpɩɛr dɩ afɩ bikũusɔ fɛw wɩ kʋʋra'. Amɩnɔ̃ dɩbara wɩ kʋ. Abɩsalɔ̃ kɔɔ maan tire kpɩɛrɛ gelelala dɩɩ fʋna wireekɛ Amɩnɔ̃ fʋnɩ ɔɔ õkhɛr Tamaar na fãga. 33 Gɛr gɩ fa n kpɩɛr dɩ afɩ bikũusɔ fɛw khiirǝ'. Amɩnɔ̃ dɩbara khe». 34 Sɩ Abɩsalɔ̃ ca thale. Dɩ daɓolbirikɛ wɩ pɛrnɩ da n gɩɩl na hɩɩn a yɩ tɩbɩla tə̃tə̃tə̃ dɩ wɩ thena gɔ̃gɔ̃ hʋɛɛkɛ hanɩ ɔɔ khiro dɩ wa n pɔ. 35 Dɩ Yonadabɩ so jamanana: «Jamana, ma kɔɔ so faraa? Afɩ bikũusɔɔraale n ɩna.» 36 Mɔ̃ a mɩɩnɩ na pɩ dɩɩ do jamanaa bikũusɔ daan a ma dɩ wa n khɩɩlɛ. Dɩ jamana na ɔɔ thɔ̃daar fɛw mar dɩ wa n bɩ lɩɛrɛra.