Abɩsalɔ̃ kɛrɛ bir Jerujalɛm
14
1 Mɔ̃ Seruyaa bikuun Joabɩ jɩnɩ dɩ jamanaa ha fire gbe Abɩsalɔna, 2 a thʋɔn Tekoa dɩɩra a pɔna khɛrɩkɛ kpɛsɛnɛnɩ ka. Dɩ a sor khɛraale ayɩ: «Jɛ sa cʋɛ gɩ ho yilẽbidaar ha fɩ. Tɔ be kẽkena. Fa n thir niinǝ'. Cʋɛ a hɔ khɛrɩkɛ tibil khiini dɩ ha yilẽbera dɩɩ pʋɔr ka. 3 Agɩpɩ fɩ jal jamanaa pa fɩ sʋʋraa gɩrɛ ma so farnɩ». Dɩ a mɩɛrɛ khɛrɩle gɩrɛ fɛʋʋkɛ a teenanɩ a sɔ. 4 Dɩ Tekoa khɛrɩle jaal jamanana, a gburõkhu a gʋɛ ƴɩɛ sa hulẽ: «Taa mɩnakɛ yaa jamana»! 5 Dɩ jamana bulee: «Aɲe hana fɩ?» Dɩ so: «Hu! Khikhɛrʋ ha mɩ; ɩ̃ ko khire. 6 Mɛr afɩ thɔ̃daar khɛr, bikona yeɲɔ mɩ kɔɔ hana. Dɩ wɩ jaal hʋɔnɔ dɩ wa n ke le, wɛr yeɲɔra. Tibil na hale wo a kuur wa'. Dɩ bɩɛl bɩɩr bɩɛl a kʋ. 7 Dɩ Ɩ̃ too ɩɩrna mɩ a yɩ foo, ɩ̃ ha wɩ ʋrɛ kɔnɩ ɔɔ õkuun wɩ kʋ, wɩ tiir ʋrɛ a kʋnɩɩ hel. Aa, ɩnɩ n ƴaalɛ ɩnɩ n kpabɩrakɛ ʋrɛ na gbaanɩ thɩrɛɛ thɩ̃. Dɩ thale wɩ n ƴaalɛlakɛ wɩ kpabɩ nũ bɩɛlla sɛ marnɩ a na n hale wa n wena ɩ̃ koo iǝ', gɩ do ɩ̃ ko na hana mǝle thɩɩra ga.» 8 Dɩ jamana sʋʋraa: «Kɛra kɔna afɩ cɔ, ma 'laarɛ ɩ̃ nɔ ka thɩmɩɩ afɩdara.» 9 Dɩ Tekoa khɛrɩle so jamanana: «Dɩ paara n 'le mɩ le mɛrɛ na ɩ̃ thɩɩ cɔ ka yaa ɩ̃ kɔ̃tɩ̃ jamana, sɩ ga n thar fɛr jamanana na afɩ jamana dɩra ga». 10 Dɩ jamana sʋʋraa: «A tibil mɩɩ far dɩkha, ɛnaa ɩ̃ pa, sɩ ntɛ na bir na dee far yuu bã.» 11 Dɩ khɛrɩle bir so: «Kpɩɛrna Thãgba Kɔ̃tɩn, afɩ Thãgbarakɛ yaa jamana, sɩ fa n dɔ ʋrɛɛkɛ n tireni helu n jɩɩ dɛ̃ɛnɔ kʋɛrɛra wo a kpabɩ ɩ̃ bikuun bɩɛlɩkɛ sɛ marna'». Dɩ jamana sʋʋraa: «Na Thãgba Kɔ̃tɩn, kɛ dɔnɩ yidaar, mɛr sɔ far; ɔɔ yʋsũu bi bɩɛlakɛ na ji thɩɩra ga».12 Dɩ khɛrɩle bir sʋʋraa: «Jamana ya, ha mɩ hʋɛ ɩ̃ so far dɩkha fɩɩʋ lee!» Dɩ so: «Mɩa». 13 Dɩ khɛrɩle bulee: «Aɲe gɩ dɩ fɩ hana kpɩɛr caarɩkɛ Thãgbaa toora? Thɩmɩaakɛ fɩ mɩɩnɩ nɛnɛ̃ yaa jamana, fɩ nɩnanɛ casɩ dɩ fɩ cʋʋrɛ dɩ paar, Abɩsalɔ̃ɔkɛ fɩ weenɩ a faa, fa kpaa ɩna ga». 14 Sɛrɛ fɛw na khiire dɩkhõo. A ga do Thãgba n bɛra tibilǝ', sɩ hʋrɛ ɲʋɔnɩkɛ n deerenɩ thɩɩra, dɩ ga n bir a khɩɩ bã. Sɩ ɔɔ ƴaal na do ʋrɛ wɩ weenɩ faa n tɔɔ le a hʋnɔnɛnaa ga. 15 Nɛnɛ̃ ado fɩ yɩɛ yaa jamana dɩ̃ ɩ̃ a so fɛr ɩ̃ kɔ̃tɩnna thɩ̃ɛɛkɛ, tɩbɩla kɔ mɩ maar. Gɛr gɩ, dɩ mɩ so ma mɩɩ fɛr. Agakpaan fa cʋʋrɛ gɩrɛ mɛr afɩ hɛlɛlɛ thɔ̃daar khɛr na so farnɩ. 16 Mɩ sor, agakpaana' fa ture a na pɛ mɛr afɩ hɛlɛlɛ thɔ̃daar khɛr nũu, a na taa mɩ, mɛrɛ na ɩ̃ bikuun ʋrɛraakɛ n tiireni helu, kɛ ƴaalɛnɩ a bũburõ sɩ, a hɛl sɩ Thãgbaa toora. 17 Mɩ sor ayɩ gɩrɛɛkɛ fa sonɩ yaa ɩ̃ kɔ̃tɩ̃, ga ha sɛr ha faarɛ, gɩdonɩ fɩ hʋrɛ Thãgbaa thɔ̃thɔ̃ thu, dɩ fɩ lee bɔɔ na puure kpɩɩ. Thãgba Kɔ̃tɩn afɩ Thãgba n hana kha na fɛrɛ.» 18 Dɩ jamana so khɛraale: «Ma bule fer bule bɩɛl, sɔ mar casɩ, fa n ker mar thɩ̃ɛa'.» Dɩ khɛrɩle sʋʋraa: «Bulene yaa ɩ̃ kɔ̃tɩ̃ jamana». 19 Dɩ jamana bulee: «Ga do Joabɩ nɩ gʋʋrna kha thɩ̃ɛ fɛʋʋ kaa?» Dɩ khɛrɩle sʋʋraa: «Sobɔr gɩ ɩ̃ kɔ̃tɩ̃. Yidaar fɩ do, ma bana ga. Afɩ thɔ̃daar Joabɩ thɔna mɩ. Ɔr mɩɛnɛ mɩ kpakha kpakha gɩrɛ fɛʋʋkɛ ma sonɩ. 20 Afɩ thɔ̃daar Joabɩ ƴaalɛ thɩɛna n deba, gɛr gɩ dɩ cʋʋ mɛ̃. Sɩ fɛrɛ, ɩ̃ kɔ̃tɩ̃, fɩ kpɛsɛrɛ waa a ho Thãgbaa thɔ̃thɔ̃ thu, dɩ fɩ jɩ gɩrɛ fɛʋkɛ n kanɩ thɩɩra.
21 Dɩ jamana so Joabɩra: «Mɩ ture afɩda. Jala kpa Abɩsalɔna a ɛna.» 22 Dɩ Joabɩ gburõkhu a gʋɛ ƴɩɛ thɩɩra a fʋɔr jamana ayɩ: «Ɩ̃ kɔ̃tɩ̃ jamana, nɛnɛ̃ mɩ jɩ dɩphã dɩ fɩ hana marɛ cʋʋ pa bʋɔ, gɩdonɩ fɩ cʋʋrɛ mɔ̃kɛra mɛr afɩ thɔ̃daar sonɩ.» 23 Dɩ a jaal Gesuur dɩɩra a kpa Abɩsalɔ̃ a birnǝ Jerujalɛm. 24 Dɩ jamana so a kɔna ɔɔ cɔ, a na n pɔ a yɩ na'. Dɩ Abɩsalɔ̃ kɔ̃ ɔɔ cɔ a too aa yɩ jamana na yirǝ'.
Davɩdɩ faarɛ Abɩsalɔ̃ɔ dɩpa a haa.
25 Ɩjɩrayɛl dɩɩra fɛw, tibil na kɔɔ hale a bɔr Abɩsalɔ̃ɔ kha dɩ wɩ thʋ̃ khɩsʋʋ mã'. A fʋ nɛɛra a jʋʋn dã yʋʋ, taan na haaraa fɩɩʋraka'. 26 Yɩɛr wo yɩɛrɩ pɩ pa, a n khabɩrɛ ɔɔ yʋ, gɩdonɩ gɩ̃ɩ gbaanɛ ka dɩɩ dʋbɩraa. A wɩ khabɩ, wɩ n mɩɛrɛ na jamanaa thɩ̃ mɩɛda, dɩɩ dã kilǝ yeɲɔ na dakuru. 27 Dɩ Abɩsalɔ̃ kʋɔn kuuminǝ yẽther, na khebir bɩɛlɩkɛ wɩ n wenɩ Tamaar. Khebirǝ bɔrɛ ga do kpãkpalã ga. 28 Yɛna yeɲɔ Abɩsalɔ̃ cʋʋ Jerujalɛm, sɩ aa tor jamanana yirǝ'. 29 Dɩ a thʋɔn bɩɛl Joabɩ, a pɔ ɩnɩ n thʋɔn jamanana, dɩ Joabɩ bo aa pɔa'. Dɩ bir bɩɛlʋ balaɲɔdaa dɩ bo. 30 Le Abɩsalɔ̃ so ɔɔ thɔ̃darara dɩphã: «Nɩ yɩrɛ Joabɩɩ ɔɔjɩ lɛɛle khonǝnɩ ɩ̃da gaa, nɩ jala pɩɛr dɔɔ. Dɩ ɔɔ thɔ̃dara jal a pɛr dɔɔ. 31 Dɩ Joabɩ gba jal Abɩsalɔ̃ɔ cɔ a bulee: «Aɲe dɔ kɩrʋ dɩ afɩ thɔ̃dara jal pɛr dɔɔ ɩ̃ lɔɔ?» 32 Dɩ Abɩsalɔ̃ sʋʋraa: «Mɩ kɔɔ thʋɔn we fɩ, fɩ ɩna dɩ fɩ bo; gɛr gɩ. Mɩ n kɔɔ ƴaalɛ ɩ̃ thɔ̃ fɩ jamanana, fɩ bulee, aɲe dɔ kɩrʋ dɩ kpa mɩ Gesuur a ɩna. Ado le mɩ kɔɔ harakɛ 'lo, mɩɩ gɩ baar bɛ! Gɛr gɩ, nɛnɛ̃ɛkɛ, mɩ n ƴaalɛ ɩ̃ yɩ jamanana, dɩ ado mɛr cʋɛ puure, a thʋna kɔ mɩ. 33 Le Joabɩ gba jal jamanaa pa a mɩɛɛ gɩrɛ Abɩsalɔ̃ sonɩ. Dɩ jamana thʋɔn a we Abɩsalɔ̃ dɩ pɔ a gburõkhu ɔɔ ƴɛbʋrɔ a gʋɛ ƴɩɛ. Dɩ jamana palʋ.