2 SAMƲƐL 15

Abɩsalɔ̃ ƴaalɛ a tee jamana dʋʋr ɔɔ thɩra

1 A gele karɔ pɩ, Abɩsalɔ̃ 'lɛr hotoro bɩɛl na gãgona na kona kpalaɲɔ yʋɔr, kɛ n gbaanɛɛnɩ ƴɛ kʋʋlɛ. 2 Dɩ a n mãa ɩɩrɛ duuro dɩ jal dɩ jɩɩl dɩ lõfonʋɔra, hʋ nʋɔra. Bɔɔ fɛw, a tibil hana kɩɩlʋ a na jalna kɩɩl paar jamana cʋɔrɔ, Abɩsalɔ̃ n wer ntɛ dɩ bulee: «Ʋmɔ̃ɔ dɩra fɩ the?» Ado ntɛ sʋʋraa, Ɩjɩrayɛl ca ʋrɛra a thenɩ pɩ, 3 dɩ sʋʋraa: «Hɩnɛ, afɩda daarɛ, a telena, sɩ liir jamanaa pa tibil bɩɛlakɛ na hale na pɛ fɩ nũuǝ'.» 4 Dɩ bir dɩ so wo: «Kpa, ado mɛr kɔɔ dʋɔn so gʋʋrdaar dɩɩraakɛ, wɩrɛ fɛʋʋkɛ n hananɩ kɩɩlʋ, dɩ wɩ ɩna mar, ma gʋʋrɛ dẽdẽ na pɛr ntɛ.» 5 A tibil pɔ Abɩsalɔna, a ha na yɩ ɩnɩ n gburõkhune a fʋɔrɛɛ, a n caanɛ dɩ fʋ ntɛ ɲɔ̃ɔ dɩ khǝi, sɩ dɩ palʋ. 6 Mɛna Abɩsalɔ̃ n cʋʋ na Ɩjɩrayɛl caar fɛw, kɛ n jalanɩ jamanana so gʋʋrʋ. Dɩɩ do mɛ̃, a kɛrɛ Ɩjɩrayɛl bɩsanaa ha a pɛ ɔɔ pa.

7 A yɛna yenã ka pɩ, Abɩsalɔ̃ sor jamanana ayɩ: «Mɩ kɔɔ sor nʋɔ Thãgba Kɔ̃tɩnna. Ha mɩ hʋɛ ɩ̃ jal Ebʋrɔ̃ ɩ̃ ti; 8 gɩdonɩ ɔbɔɔkɛ mɛr afɩ thɔdaar kɔɔ hanɩ Gesuur, Siiri dʋɔ, mɩ kɔɔ sor nʋɔ Thãgba Kɔ̃tɩnna ayɩ, ado a kɛrna mɩ ɩna Jerujalɛm, ma jiirǝǝre bonɩɛ». 9 Dɩ jamana sʋʋraa: «Jala na ha ɩɩ». Dɩ Abɩsalɔ̃ gbaar jal Ebʋrɔ̃.

10 Dɩ le a thɔna wɩrɛ hanɩ ɔɔ khiro wolonena Ɩjɩrayɛl caara fɛw, a ha wɩ jɩɩn ayɩ: «A nɩ nɩɛ tutuu ʋʋn, na n sɔ: "Abɩsalɔ̃ dʋɔn jamana Ebʋrɔ̃ yoo!"» 11 Abɩsalɔ̃ kɔɔ wer kona taaɲɔ (200) Jerujalɛm dɩ wɩ jal kha. Konaale thɔgʋʋrɛ na ha bɔbʋɔ khaar. Wa kɔɔ jɩ dɩ thɩ̃ɛ hale a gʋʋrna'. 12 Dɩ ɔbɔɔkɛ a hanɩ bonɩ jirro, a thʋɔn Gilo dɩɩra a we Ahɩtofɛl a pɔna, Davɩdɩɩ fɩl 'laadaar bɩɛl gɩ, kɛ hanɩ le dɩɩraale. Dɩɩ do wɩrɛ hanɩ Abɩsalɔ̃ɔ khiro jɔrɛ dɩ wa n pɛr, dɩ gɩrɛ wɩ gʋʋrnɩ jɩɩ hana fãga ga do kpãkpalã ga.

Davɩdɩ car sa faa Jerujalɛm dɩɩ

13 Dɩ ʋrɛ jalanɩ mɩɛ Davɩdɩ sʋʋraarɛ ayɩ: «Ɩjɩrayɛl bɩsana fɛʋʋ ha fire a ha Abɩsalɔna». 14 Dɩ dɩpaara, Davɩdɩ sor ɔɔ kobisɔraakɛ hanɩ kha na ɔr Jerujalɛm ayɩ: «Nɩ ɩrɛ, sɩ caalɛnɛ, a mɛ̃ ga Abɩsalɔ̃ na faa sɩ na yirə'. Sɩ phana khǝ̃khǝ̃ a jala, a mɛ̃ ga, a na gbʋr sɛr dapaara a na 'li si; dɩ a na cʋʋ sɛr puure dɩ ga pho na ka, a na kʋʋr dɩdara na bajɩna mɔlɔ.» 15 Dɩ ɔɔ kobisɔ sʋʋraa: «Fɛr dɔ jamana, gɩrɛ fɩ tini kpɩɛrɛ, fɛr dʋɔn kɔ̃tɩn, sɩ n kpaannɛ. 16 Dɩ jamana ther na nɛɛ, dɩ ɔɔ cɔdara fɛw na n kpaan. Ɔɔ wɛdara yʋɔr a faa dɩbara, wa n hɩnɛ cʋɔr. 17 Dɩ jamana ther, dɩ ɔɔ too fɛw na n kpaan. Dɩ wɩ jaal a dã pɩpɩɩ cʋɔra a jɩɩl. 18 Dɩ ɔɔ thɔ̃dara fɛw cʋrrɛ dɩ wa n ka: Kɩrɛtɩ sɔrasɛ na Pelɛtɩ sɔrasɛ, kɛ dɔnɩ jamanaa bɛbɛrsɔ pɔr a ka, dɩ Gatɩ sɔrasɛ taamaadõ (600), kɛ kɔɔ manɩ Davɩdɩ pɔ a ka.

19 Dɩ jamana bule Ɩtayɩ, kɛ dɔnɩ Gatɩ sɔrasɛɛ kɔ̃tɩ̃ ayɩ: «Fɛrɛ, aɲe gɩ dɩ fa n ƴaal sɩ jala kha dakha? Kɛra birrǝ dɩɩra a tɔɔna jamana phaa. Dɩrakɛ wo, kpakpal ha fɩ kɩɛr; gɩdonɩ wɩ ti fer afɩ dʋɔ. 20 Ma jɩnɩ gɩrɛ ka mɩ n jalna', fa n daan de, nĩikɛ ɩ̃ haal fɩ ma n kpaarna ya? Kɛra birǝ dɩɩra. Kpa afɩ too nɩ bir kha. Thãgba Kɔ̃tɩn n cʋɛ fɩ bɔɔ na sobɔr». 21 Dɩ Ɩtayɩ birse jamana ayɩ: «Na Thãgba Kɔ̃tɩn, kɛ dɔnɩ yidaar, na fɛrɛ dakha dɔnɩ yidaar, kana fɛr ɩ̃ kɔ̃tɩ̃ n lonɩ, lera mɛr afɩ thɔ̃daar na lõ; ado khirǝ gɩ, ado yirera gɩ.» 22 Dɩ Davɩdɩ sʋʋraa: «Dɩ a thale gɩ, ka ƴɛbʋrɔ». Dɩ Ɩtayɩ na ɔɔ sɔrasɩsɔ fɛw ka ƴɛbʋrɔ, wɛr na awɩ cɔdara fɛw.

23 Tɩbɩla ɓibi dɩɩra n kɔɔ bɩrɛ na nɔ khena sɩ dɩ tɩɩ jɔjʋɔɔle cʋr dɩ wa n ka. Dɩ jamana na wɩrɛ fɛʋʋkɛ n kpaaraanɩ seere Sedʋrɔ̃ ɓɛlɛ̃ dɩ wa n jal na hʋɛɛkɛ n thɛnɩ bə̃ kparaara. 24 Sadɔkɩ bonɩ jidaar kɔɔ hale dakha na Levɩɩ məlsɔ fɛʋʋkɛ n gbaanɩ Thãgbaa ʋlfɛ khɛɛsʋ. Dɩ wɩ thɩɩnɛ Thãgbaa ʋlfɛ khɛɛsʋ; dɩ Abɩataar bonɩ jidaar na n ji bonɩɛ, dɩɩ dana bɔɔkɛ wɩrɛ fɛʋʋkɛ thɛnɩ dɩɩra wa n pɔ kanɩ pɩ. 25 Dɩ jamana so Sadɔkɩra: «Kɛrana Thãgbaa ʋlfɛ khɛɛsʋ a birǝnǝ dɩɩra. Ado Thãgba Kɔ̃tɩn n ƴaalɛ ɩ̃da bɔ gel, a na kɛrna mɛr na ɩna, a na cʋʋ mɩ dɩ ma bir na yɩ ʋlfɛ khɛɛsʋʋkɛ na ɔɔ cɔ pa. 26 Sɩ a gɩ do wo, ɔr sɔ, ɩna n ƴaal mɩ bã, dɩ a cʋɛ mɩ mɔ̃ a yɩɛnɩ dɩɩ bʋɔraa.» 27 Dɩ a bire 'loro wo, a so Sadɔkɩra: «Fɩ yɩɛraa? Kɛra na ha ɩɩ a birǝ dɩɩra, na afɩ bikuun Ahɩmasɩ na Abɩataar na ɔɔ bikuun Yonatã, anɩ bikona yeɲɔ na nɛrɛ. 28 Sɩ me wer, ma hale bǝ̃ kpara thɩ̃thɩɩna, kɛ wɔrɔnanɩ Jʋrdɛ̃ mɩɩr ɓɛlɛ̃ paar ma n pɩɛr phaphapha ɩ̃ nɩɛr anɩ nɔ ɓo.» 29 Liir Sadɔkɩ na Abɩataar kɛrna Thãgbaa ʋlfɛ khɛɛsʋ a birnǝ Jerujalɛm a too le.

Davɩdɩ thʋɔn Husayɩ a jala gɩɩlɛ Abɩsalɔ̃.

30 Davɩdɩ mar olɩvɩ thɩr gɔ̃gʋɔn a khɩɩ da n jʋʋna. Dɩ a thire kɩ̃kɩɩn yʋɔ sɩ da n ɩɩr na nɛ biire. Dɩ wɩrɛ fɛʋʋkɛ kɔɔ hanaanɩ kha thi kẽkena yʋɔsɔ a khɩɩna dɩ wa n jʋʋna. 31 Dɩ wɩ pɔr so Davɩdɩra ayɩ: «Ahɩtofɛl hale wɩrɛraakɛra gʋrɛnɩ khaa thɩ̃thɩɩn, a ma Abɩsalɔ̃.» Dɩ Davɩdɩ so: «Pha Thãgba Kɔ̃tɩn ya! Cʋɛ Ahɩtofɛl, a 'laa dǝ̃bǝǝl fɩlɛ.» 32 Ɔbɔɔkɛ Davɩdɩ danɩ gɔ̃gɔ̃ yʋʋ pɩ, a gburõkhure Thãgbaa ƴɛra paarɩkɛ wɩ n fʋɔrnɩ Thãgba. Dɩ a yɩrɛ ɔɔ fɩl 'laadaarɩkɛ wɩ n wenɩ Husayɩ, Arkɩdaar gɩ, da n caanʋ na gbɔɔlɔ̃ ɓǝǝru na thɩn yʋɔ. 33 Dɩ Davɩdɩ sʋʋraa: «A fɩ yɩ sɩ jala kha, fa do marɛ hẽedaar. 34 Ka kɛra birǝ dɩɩra a sɔ Abɩsalɔna, a yɛ: “Jamana yaa, mɩ n ƴaalɛ ɩ̃ do afɩ thɔ̃daar. Mamararakɛ afɩ thɩɩ thɔ̃daar mɩ kɔɔ do. Sɩ nɛnɛ̃ɛkɛ afɩ thɔ̃daar mɩ n ƴaal ɩ̃ do.” Ga dor nɔɔ fɩ gbãga Ahɩtofɛlɩ fɩlɩkɛ a na 'laanɩ gɩ do mɔlɔ, gɩ puno gɩ bul mɩ. 35 Dɩ wo, Sadɔkɩ na Abɩataar bonɩ jidara hale wa n khu fɩ. Thɩ̃ɛ wo thɩ̃ɛɛkɛ fa nɩɛnɩ le jamana cʋɔrɔ, jala a mɩɛnɛ wɩ. 36 Awɩ bikona yeɲɔ fɛw hale dɩ wɩ ha kha: Ahɩmasɩ, kɛ dɔnɩ Sadɔkɩɩ bikuun na Yonatã, kɛ dɔnɩ Abɩataarɩ bikuun. Wɛr na thɔ̃ wɩ ɩ̃ wɩ mɩɛ mɩ thɩ̃ɛ wo thɩ̃ɛɛkɛ na nɩɛnɩ.» 37 Dɩ Davɩdɩɩ kuun Husayɩ kɛr bir Jerujalɛm. A na daan dɩɩra, dɩɩ do gɛr Abɩsalɔ̃ɔ thɛthɛ n lono dɩɩra.