5
1 Salomɔ̃ n kɔɔ kʋmãdɩnɛ dakha jamana dɩɩsɔ fɛʋʋkɛ fɔnɩ Efɩratɩ mɩɩr kɔ̃tɩɩna a jal foo a dana Fɩlɩsɩtɛ̃sɔɔ dʋɔ, na Ejipiti pɛlla. Dɩ wɩ n tire lãpho dɩ wa n haa, a wur jʋʋraa ɔɔ yi hanana fɛw.2 Wi bɩɛl dɩkɔɔkɛ Salomɔ̃ na ɔɔ cɔdara na ɔɔ thɔ̃dara fɛw n khonɩ, gɩ har: mɩ̃ ƴɩɛ, kilə gbɩlanɩ yʋɔr phe bire (9. 000), mɩ̃ phuu kilə gbɩlanɩ yʋɔr makõther (18.000), 3 naakɛ wɩ n haanɩ awɩ ƴɛra kpɩɩ, har na yʋɔr, dɩ na ba ha kpelẽ, dɩ nʋ̃ yɩrasɔ ha tamaa (100), a ɓanɔ nʋ̃ kpɩɩsɔ, jʋwala ʋ̃ thaarsɔ, na jʋwalasɔ, na nʋ̃tasɔ na gbɛl thɩ̃a cunəsɔ.
4 Salomɔ̃ n kɔɔ kʋmãdɩrɛ dakha dɩɩsɔɔkɛ hanɩ Efɩratɩ mɩɩr seero, kɛ fɔnɩ Tɩfɩsa dɩɩra a jalna foo a dana Gaja dɩɩra, na jamanasɔ fɛʋʋkɛ hanɩ mɩɩr seeroole. A kɔɔ hananɛ 'likha na dɩɩsɔ fɛʋʋkɛ diərəənɩ. 5 Salomɔ̃ɔ jamana do bɔɔ, Judadara na Ɩjɩrayɛldara fɛw kɔɔ toore dɩɩra na ha ɩɩ. Wɛr fɛw, ntɛ n toore ɔɔ fɩgɩ thɩr kɩrɔ, na ɔɔ dɩvɛ̃ thɩr kɩrɔ, a fʋ Dã bəənnə foo a jal thʋ Bɛɛr-Seba bəənnə.
6 Salomɔ̃ kɔɔ hananɛ koke hotoro hal gãgona gbɩlanɩ kpalaɲɔɔ (40.000) cɔ pa, a hana dakha gãgo jʋʋn sɔrasɛ gbɩlanɩ yʋɔr yeɲɔ (12.000). 7 Gobanɛrsɔɔlera, ɔbɔɔkɛ ntɛɛ sɩpor danɩ, wɩ n 'laarɛ dɩkɔɔkɛ na n haanɛnɩ Salomɔ̃ na wɩrɛ fɛʋʋkɛ n khɔnɩ dɩkɔ ɔɔ dɩko kho para a cʋʋna sɩpor bɩɛl. Wɩ n jɩɛ dʋ bʋrɛ, gɩ do nɔɔ thɩ̃ bɩɛllakɛ na n ɓɔra'. 8 Wɩ n thɔnanɛ dakha ɔrjɩ na hʋɔnɩkɛ gãgona na hotoro hal gãgona na n khonɩ, dɩɩ pɔ kãakɛra jamana hanɩ mɔ̃kɛ a kɔɔ mɩɛnɩ ntɛ.
Salomɔ̃ɔ kpɛsɛ
9 Thãgba kɔɔ har Salomɔ̃ kpɛsɛrɛ, na fɩl gbãa, na jɩɩr jɔɔ mɔ̃ gbalãkothɩn n hanɩ laɲɔ̃ nʋɔra. 10 Salomɔ̃ɔ kpɛsɛ jɔr wi phã pa bildara fɛʋʋ kpɛsɛ, na Ejipitidaraa kpɛsɛsɔ fɛw. 11 Salomɔ̃ɔ kpɛsɛ jɔr tɩbɩla fɛʋʋda. Ɔɔ kpɛsɛ jɔrakɛ wɩrɛ wɩ n kɔɔ sonɩ wɩ dor kpɛsɛdara, kɛ n dɔnɩ Etã, Ejɩrahɩtɩɩ məl. Ɔɔ kpɛsɛ jɔr Heman na Kalkɔl na Daarda, kɛ dɔnɩ Mahɔlɩ bikũusɔ. Dɩ ɔɔ i ther caarsɔ fɛʋʋkɛ diə warnɩɩ thɩ̃thɩɩn. 12 A dʋrɛ sokpaa gbɩlanɩ yẽther (3.000), a pɛ nɩɛ gbɩlanɩ na yemɔy (1.005). 13 A mɩɩrɛ thɩraada, a fʋna sɛɛdɩrɩ thɩraakɛ hanɩ Lɩbã gɔ̃gʋɔna, a gbana Ɩjɔpɩkɛ n phonɩ gʋʋra. A mɩɩrɛ dakha nʋmaada, na 'lominəəda na bɩ̃ haal nʋmaada na thʋmaada. 14 Dɩ jamanasɔ thɩɩra fɛw, kɛ kɔɔ nɩɛnɛnɩ dɩ wa n mɩɩ Salomɔ̃ɔ kpɛsɛ, n kɔɔ thʋ̃ɔ tɩbɩla dɩ wɩ the caar fɛʋʋ thɩ̃thɩɩn dɩ wɩ pɔ a na pɛ ɔɔ kpɛsɛ nũu.
Salomɔ̃ n gbɛbɩrɛ a mɩ Thãgba fʋɔr cɔ kɔ̃tɩ̃ɩ
15 Tɩɩr jamanaakɛ wɩ n wenɩ Hɩram thʋɔn ɔɔ thɔ̃dara Salomɔ̃ɔ pa, a fʋɔrʋ gɩdonɩ a nɩɛrɛ mɔ̃ wɩ phiirunɩ a pɩɛraa niin yʋɔ, dɩ dee ɔɔ thɩ a do jamana. Hɩram kɔɔ hananɛ naw jɔɔ Davɩdɩra.
16 Dɩ Salomɔ̃ dakha thʋɔn so Hɩramɩna aa: 17 «Fɩ jɩrɛ ɩ̃ thɩ Davɩdɩ na kɔɔ puno a mɩ Thãgba fʋɔr cɔ kɔ̃tɩ̃ɩ a ha Thãgba Kɔ̃tɩn ɔɔ Thãgba ga. Gɩdonɩ lãlara n kɔɔ kenaanɛ kʋʋr paar fɛw, phaphapha dɩ Thãgba Kɔ̃tɩn cʋgʋʋ dɩ puno wɩ fɛw dɩ wɩ jʋʋraa. 18 Dɩ nɛnɛ̃ Thãgba Kɔ̃tɩn, ɩ̃ Thãgba ha mɛr hɩɩrɛ paar fɛw. Lãlara na hale bã, thɩ̃ puu dakha na hale bã. 19 Gɛr gɩ mɩ n ƴaalɛ ɩ̃ mɩ fʋɔr cʋɔr ɩ̃ ha Thãgba Kɔ̃tɩn, ɩ̃ Thãgba. Gɩdonɩ mɛ̃ Thãgba Kɔ̃tɩn kɔɔ so ɩ̃ thɩ Davɩdɩra ayɩ: "Afɩ bikuunɩkɛ ma pɛrnɩ a dee fɩ jamana dʋʋra, ɔr na mɛ cʋɔr na ha mɩ". 20 Gɛr gɩ nɛnɛ̃, mɩ n bɩɛl fɛr, dɩ fa pɛr tɩbɩla wɩ kur sɛɛdɩrɩ thɩraakɛ hanɩ Lɩbã gɔ̃gʋɔna wɩ ha mɩ. Ɩ̃ thɔ̃dara na jaal kha na afɩ thɔ̃dara. Agɩpɩ, ma ha fɛr afɩ thɔ̃daraa lɩmɩ mɔ̃kɛ fa so marnɩ. Gɩdonɩ fɩ jɩrɛ sa hana tibil bɩɛllakɛ asɩ thɩ̃thɩɩn, kɛ jɛnɩ thɩr kuur thɔma Sɩdɔ̃daraa kha ga.»
21 Ɔbɔɔkɛ Hɩram nɩɛnɩ Salomɔ̃ɔ thɩmɩsɔ, daw fʋʋrɛ dɩ so: «Nĩikɛ, Thãgba Kɔ̃tɩn hɩna fʋɔrɛ, gɩdonɩ a har Davɩdɩ bikuunɩkɛ kpɛsɛnɛnɩ a na puno na thɔɔ Ɩjɩrayɛl, caarɩkɛ jʋɔnɔnɩ bərəəm.» 22 Dɩ Hɩram bire thɔ̃ a birse Salomɔ̃ aa: «Mɩ nɩɛrɛ gɩrɛ fɩ thɔnɩ so mar. Ma cʋʋrɛ gɩrɛra fɩ n ƴaalnɩ. Ma 'laarɛ sɛɛdɩrɩ thɩra na sɩpɩrɛsɩ thɩrara fɛw. 23 Ɩ̃ thɔ̃dara na gbaar thɩrara Lɩbã gɔ̃gɔnana a na gbunə laɲɔ̃ nʋɔra wɩ kpalmã gɩ le wɩ li wɩ pɛ laɲʋɔna gɩ pɔ paarɩkɛ fa nɩrɔnɩ. Dɩ ma pɛrɛ wɩ thʋbɩ gɩ wɩ thɩɩn le, nɩ pɔ nɩ gba. Sɩ gɩrɛ mɩ n ƴaal farnɩ dʋɔn, 'laanɛ dɩkɔ ma n haana ɩ̃ cɔdara.»
24 Thale Hɩram 'laa sɛɛdɩrɩ thɩra na sɩpɩrɛsɩ thɩra a ha Salomɔ̃ mɔ̃ a n ƴaalnɩ. 25 Dɩ yɩɛr fɛw, Salomɔ̃ n 'laarɛ dakha bile tɔn gbɩlanɩ maadõ (6.000), na olɩvɩ nĩ tɛna bɔbʋɔ, litiri gbɩlanɩ makõther (8.000) dɩ ha Hɩram a na n haana ɔɔ cɔdara.
26 Thãgba Kɔ̃tɩn kɔɔ har Salomɔ̃ kpɛsɛrɛ mɔna a kɔɔ sʋʋraanɩ. Hɩram na Salomɔ̃ kɔɔ hananɛ kha 'likha, a ʋlfɛ kha nɔ bɩɛl ʋlfɛrɛ.
Salomɔ̃ pɛrɛ dɩ gbɛbɩ thɔma
27 Salomɔ̃ jamana kɔɔ tire tɩbɩla gbɩlanɩ kpelẽ yʋɔr (30.000) Ɩjɩrayɛl dɩɩra fɛw a pɛr, dɩ wa n do dɩ gbɛbɩ thɔma. 28 Dɩ sɩpor bɩɛlla a n thɔ̃ wɛr gbɩlanɩ yʋɔr (10.000), gbɩlanɩ yʋɔr (10 000) dɩ wɩ jal Lɩbã gɔ̃gɔnana a na dee kha. Wɩ n cʋʋrɛ sɩpo bɩɛl Lɩbã, a cʋʋ sɩpora yeɲɔ awɩ cɔ. Adonɩram kɔɔ dʋɔn dɩ gbɛbɩ thɔ̃ hɩ̃ɩdaar kɔ̃tɩn. 29 Salomɔ̃ kɔɔ hananɛ dakha thɔ̃daar kpɩɩsɔ gbɩlanɩ kpalãther yʋɔrɩkɛ (70.000) n gbaanɩ hẽedaarsɔ, a bir hana thɔ̃ doda kpɩɩsɔ wo gbɩlanɩ kpalanã (80.000), kɛ n thelanɩ bokana gɔ̃gʋɔna. 30 Sɩrakɛ kɔ̃tɩna gbɩlanɩ yẽther na tãatherɩkɛ (3.300) Salomɔ̃ɔ gobanɛrsɔ pɛrnɩ hale a ɓanɔ, dɩ wa n hɩɩn thɔma, dɩ wa n hɩɩna dakha thɔ̃ dona. 31 Dɩ jamana so warɛ wɩ te boka kɔ̃tɩnaakɛ ɓɔnanɩ tə̃ə tə̃ə wɩ kpɛɛna Thãgba fʋɔr cɔ kɔ̃tɩ̃ gokʋʋsɔ. 32 Dɩ Salomɔ̃ɔ thɔ̃dara na Hɩramɩ thɔ̃dara na Gebaldaraakɛ dɔnɩ ɲɛ̃ thɔ̃ jɩna thel ger oti. Wɩ gbɛbɩrɛ thɩra na bokana pɩ, kɛ wa mɩnanɩ Thãgba fʋɔr cɔ kɔ̃tɩɩna.