Salomɔ̃ mɩrɛ Thãgba fʋɔr cɔ kɔ̃tɩ̃ɩ
6
1 Ɩjɩrayɛl bɩsana kɔɔ thenɩ Ejipiti dɩɩra a na cʋʋ yɛna taanã na kpalanã (480), gɛr Salomɔ̃ cʋʋrɔ yɛna yenã jamana dʋʋra Ɩjɩrayɛl bɩsanana. Dɩ a fʋrɛ ga yɛraalera Jɩvɩ sɩporaakɛ dʋɔnɩ balaɲɔ sɩpor yɩɛra da n mɩ Thãgba Kɔ̃tɩnɩ fʋɔr cɔ. 2 Thãgba Kɔ̃tɩnɩ fʋɔr cɔɔkɛra a mɩnɩ, ɔɔ gbã ha mɛtɛrɛ kpelẽ yʋɔr (30), dɩ pɛw ha mɛtɛrɛ yʋɔr (10), dɩ ɔɔ ƴũu gbã ha mɛtɛrɛ yʋɔr yemɔy (15). 3 Jɛ̃bɛrɛ̃ birikɛ hanɩ Thãgba fʋɔr cɔ lõ paar, ɔɔ gbã ha mɛtɛrɛ yʋɔr (10), mɔna Thãgba fʋɔr cʋɔrɩ pɛw hanɩ. Dɩ ɔɔ pɛw ha mɛtɛrɛ yemɔy (5), a telẽ ka Thãgba fʋɔr cʋɔr pɛnɩ ƴɩɛ.4 Dɩ wɩ pɛrɛ fɛnɛtɩrɩ kana cʋɔrara a toro tɛmɛ̃ fɛnɛtɩrɩsɔ. 5 Wɩ mɩrɛ cɔ cõcoolnasɔ jɩɛra a ɓana Thãgba fʋɔr cɔ gʋʋsɔ a finə. Wɩ mɩ gɛr a dii sãasɩ paara na sãasɩ pa kɔ̃tɩɩna, a mɩna duusɔ a finə. 6 Tɩɛr cɔ cõcoolnaa pɛw ha mɛtɛrɛ yeɲɔ na dakuru, dɩ thɩ̃thɩ̃daa pɛw ha mɛtɛrɛ yẽther, dɩ ƴũudaa pɛw ha mɛtɛrɛ yẽther na dakuru. Wɩ kɔɔ faarɛ thɩr dɛ̃ɛ paarsɔ Thãgba fʋɔr cɔ gʋʋra ɔbɔɔkɛ wɩ n mɩnɩ, gɩ do nɔɔ cɔ cõcoolnasɔɔlee thɩrsɔ na n dɛ̃ɛ Thãgba fʋɔr cɔ gʋʋ thɛthɛra ga. 7 Cʋɔrɩlee mɩ bɔɔ, bokanaakɛ wɩ kɔɔ thelnɩ pɩ wɩ n mɩnaa. Gɛr dɔ nɔɔ marto wire na kpãakpo wire agɩbo ther dɩkhaa wirəkɛ na n the le cʋɔrɔ ɔbɔɔkɛ wɩ n mɩɩna'. 8 Cɔ cõcoolnasɔɔle, tɩɛr duusɔɔ lõfonɔ har Thãgba fʋɔr cɔ ɲɔ̃bɔɔra. Dɩ jʋʋn paar haleekɛ wɩ n jʋʋnanɩ thɩ̃thɩ̃daara na ƴũudaara dakha. 9 Mɔ̃ Salomɔ̃ kpoornɩ Thãgba fʋɔr cʋɔra, a gbaar sɛɛdɩrɩ kparɛsɔ na sɛɛdɩrɩ thɩr pɛna a pɛna pɩlafɔ̃. 10 Cɔ cõcoolnasɔɔlera diəni Thãgba fʋɔr cʋɔrɔ, agɩ ƴũu gbãsɔ ha mɛtɛrɛ yeɲɔ na dakuru. Dɩ sɛɛdɩrɩ kparɛsɔɔkɛ wɩ pɩɛrɔnɩ dɛɛn Thãgba fʋɔr cʋɔr cɔ gʋʋra dɩɩ fʋ kha.
11 Dɩ Thãgba Kɔ̃tɩn mɩɩna Salomɔ̃ aa: «Cʋɔrɩkɛ fɩ n mɩnɩ, 12 ado fa ɩɩr ɩ̃ jɔfʋraakɛ mɩ kherenɩ, ado fa kpaan ɩ̃ nɔkara, ado fa jɩɩ hɩɩn a na cʋʋ ɩ̃ jɔfʋsɔ fɛw, ma cʋʋ farɛ gɩrɛɛkɛra mɩ kɔɔ sonɩ afɩ thɩ Davɩdɩra. 13 Ma toore Ɩjɩrayɛl bɩsanaa thɩ̃thɩɩn, ma bo ɩ̃ too Ɩjɩrayɛl a na faa ga.
14 Mɔ̃ wɩ mɩnɩ Thãgba fʋɔr cʋɔra pɩ, 15 Salomɔ̃ pɛrɛ dɩ wɩ gba sɛɛdɩrɩ thɩr pɛna a bɔɩna cɔ bɩnɛ a thi gʋʋsɔra fɛw, a fʋ kɩrarɔ a jʋʋn dana pɩlafɔ̃, sa gba sɩpɩrɛsɩ thɩr pɛna a bɔɩna thɩɩ a thiro. 16 Wɩ gbaar sɛɛdɩrɩ thɩr pɛna a bɔɩna du bɩnɛ a thi gʋʋsɔɔra, a fʋ tɩɛr a dana ƴũu. Duulee gbã ha mɛtɛrɛ yʋɔr (10). Wɩ gbɛbʋʋrɛ thale wɩ cʋgʋʋ a do sãasɩ pa kɔ̃tɩ̃ɩ. 17 Phəsəəkɛ sɛnɩ sãasɩ pa phuulee ƴɛbʋrɔ, dʋɔnɩ gbalã kɔ̃tɩ̃ɩ, ɔɔ gbã ha mɛtɛrɛ kpelẽ (20). Ɔr dʋɔn Thãgba fʋɔr cʋɔr. 18 Wɩ ɓole thɩ̃ɛsɔ dɩɩ ho kɔkɔbɩa sɩɩrsɔ, a hona thɩr phɩ̃ɩkɛ n caranɩ a pɛr sɛɛdɩrɩ thɩr pɛnanaale wɩ bɔɩnanɩ duule. Sɛɛdɩrɩ thɩra wɩ n yɩ dɩbara, boka bɩɛllakɛ na yɩr jɩɛra ga.
19 A pɛrɛ dɩ wɩ gbɛbɩ duule hanɩ Thãgba fʋɔr cɔ thɩ̃thɩɩn dɩ do sãasɩ pa kɔ̃tɩ̃ɩ, wɩ puno wɩ thɩɩnɔ Thãgba Kɔ̃tɩnɩ ʋlfɛ khɛɛsʋ. 20 Sãasɩ pa kɔ̃tɩɩna mãkhaar billə fɛw. Gbãʋ na pɛw, na ƴũu gbãʋ har mɛtɛrɛ yʋɔr (10). Wɩ calʋlɛ dɛ kile haar koo. Wɩ cʋʋrɛ bonɩ ji paar na sɛɛdɩrɩ thɩra a calʋ dɛ dakha. 21 Wɩ calɛ du bɩnɛ fɛw dɛ kile haar, a ju dɛ jɔrkɔ̃sɔ sãasɩ du lõfonʋɔra, kɛ dɔnɩ duukɛraa wɩ kɔɔ calnɩ dɛ. 22 Wɩ calɛ Thãgba fʋɔr cʋɔr fɛw dɛ. Thãgba fʋɔr cʋɔrra fɛw biləni, dɛ haar wɩ calʋ. Wɩ calɛ dakha bonɩ ji paarɩkɛ hanɩ sãasɩ pa kɔ̃tɩ̃ lõfonɔ ƴɛbʋrɔ dɛ.
23 Wɩ cʋʋrɛ Seribɛ̃sɔb yeɲɔ na hɔ̃ olɩvɩ thɩrʋ a thɩɩn le sãasɩ pa phuurə. Awɩ ƴũu gbã ha mɛtɛrɛ yemɔy. 24 Seribɛ̃sɔɔle hananɛ gbɛla. Cacadaarɩ gbɛl bɩɛlɩ gbã ha mɛtɛrɛ yeɲɔ na dakuru, dɩ bɩɛlɩda ha ɔmɛna. Dɩ gbɛla yeɲɔɔlee gbã fɛw, kɛ fɔnɩ gbɛl bɩɛla a jal dã ʋ̃ gbɛlɩ khu pa, gɩ har mɛtɛrɛ yemɔy. 25 Dɩ balaɲɔ Seribɛ̃ɛ gbɛlsɔɔ gbã ha mɛtɛrɛ yemɔɩra oti. Wɛr yeɲɔ mãkhaar. Wɩ cʋʋ wɛr, wɛr yeɲɔ fɛw cʋʋ ƴɛ bɩɛlla. 26 Caca Seribɛ̃ na balaɲɔ Seribɛ̃ɛ ƴũu gbã mãkhaar. Wɛr yeɲɔ fɛʋʋ ƴũu gbã ha mɛtɛrɛ yemɔy. 27 Wɩ thɩɩnɛ Seribɛ̃sɔɔle thɩ̃thɩ̃ duurəəkɛ dɔnɩ sãasɩ pa kɔ̃tɩ̃ɩ. Cacadaarɩ gbɛl bɩɛlɩ mɩ̃ka 'laarɛ a thʋ go phɛrɛ bɩɛl, dɩ balaɲɔdaarɩda 'laa a thʋ ʋ̃ go phɛrɛ, sɩ gbɛl gɩrɛ sɛnɩ caan du thɩ̃thɩɩna a thʋ kha. 28 Wɩ calɛ Seribɛ̃sɔɔle dɛ.
29 Wɩ ɓolle thɩ̃ɛsɔɔkɛ hɔnɩ seribɛ̃sɔ, a hona kalã jɛ̃ɛsɔ na phɩ̃ɩsɔɔkɛ n caranɩ a pɛr Thãgba fʋɔr cɔ bɩ̃ gʋʋsɔɔra duu yeɲɔra fɛw a finə. 30 Wɩ calɛ dakha duu yeɲɔɔle thɩɩ fɛw dɛ.
31 Wɩ cʋʋrɛ sãasɩ pa kɔ̃tɩ̃ lõo, phɛrɛ yeɲɔ na hɔ̃ olɩvɩ thɩrʋ. Dɩ lõ gogaa thɩr gbuunəsɔ na lõ gogaa thɩr barãbɩnasɔ pɩɛrɛ a mãkhana gʋʋ pɛʋʋ tɩnɛ pa bɩɛl tɩnɛ paar yemɔɩra. 32 Hɔ̃ olɩvɩ thɩrʋ wɩ cʋʋna lõ phɛrɛ yeɲɔɔlera, a ɓol thɩ̃ɛsɔɔkɛ hɔnɩ Seribɛ̃sɔ, na thɩ̃ɛɛkɛ hɔnɩ kalã jɛ̃ɛsɔ, a hona thɩr phɩ̃ɩsɔɔkɛ n caranɩ a pɛr, a cal gɩ dɛ, a calna Seribɛ̃sɔɔle na kalã jɛ̃ɛsɔɔle dɛ. 33 Wɩ cʋʋrɛ dakha gbalãakɛ dɔnɩ Thãgba fʋɔr cʋɔr, ɔɔ lõfonɔ lõ gogaa ɔmɛna. Lõ gogaa thɩr gbuunəsɔ na lõ gogaa thɩr barãbɩnasɔɔ pɛw mãkhananɛ gʋʋ pɛʋʋ tɩnɛ pa bɩɛl tɩnɛ paar yenana, sa cʋʋ lõ phɛrɛ yeɲɔɔle na sɩpɩrɛsɩ thɩrʋ. 34 Lõ phɛrɛ bɩɛl hananɛ thɩr pɛna yeɲɔɔkɛ wɩ n khɛrnɩ dɩ ga n fi, dɩ balaɲɔdaar hana yeɲɔ oti. 35 Wɩ thelle lõosɔraale thɩ̃ɛsɔɔkɛ hɔnɩ Seribɛ̃sɔ, na kalã jɛ̃ɛsɔ, a hona thɩr phɩ̃ɩsɔɔkɛ n caranɩ, a calna ɓol thɩ̃ɛsɔɔle dakha dɛra oti.
36 Wɩ mɩrɛ thɩ̃thɩ̃ gbasa gʋʋ na boka thelnanɛsɔ jɔrɔna yẽther, a dɛ̃ɛnɔ sɛɛdɩrɩ kparɛsɔ jɔrɔ̃ bɩɛl.