1 JAMANASƆ 7

Salomɔ̃ mɩrɛ ɔɔ jamana cɔ

1 Salomɔ̃ mɩrɛ ɔɔ thɛthɛɛ jamana cɔ dakha. Yɛna yʋɔr yẽther a mɩ jamana cʋɔrra a cʋʋna, sa kpoor fɛw. 2 Cɔ ʋrɛ wɩ n wenɩ «Lɩbã-lu-cʋɔr», ɔr wɩ kɔɔ mɩ ɓo. Ɔɔ gbã ha mɛtɛrɛ kpalaɲɔ yʋɔr (50), dɩ ɔɔ pɛw ha mɛtɛrɛ kpelẽ yemɔy (25), dɩ ɔɔ ƴũu gbã ha mɛtɛrɛ yʋɔr yemɔy (15). Wɩ mɩɩrɛ na sɛɛdɩrɩ thɩrkar jɔrɔna yenãakɛ sɛɛdɩrɩ kparɛsɔ dɛɛnɔnɩ. 3 Wɩ pɩɛrɛ kparɛsɔraale sɛɛdɩrɩ thɩrwabe jɔrɔna yẽther. Jɔrɔ̃ bɩɛl har thɩrwabe yʋɔr yemɔy dɩɩ gbɛbɩ fɛw a ha thɩrwabe kpalaɲɔ yemɔy, kɛ thɩrkaraale tɛnɩ. 4 Cʋɔrɩle hananɛ fɛnɛtɩrɩ jɔrɔna yẽther ɔɔ bilə yeɲɔra fɛw. Dɩ bilə yeɲɔɔlee fɛnɛtɩrɩsɔ telene kha oti dẽdẽdẽ. 5 Lõosɔ fɛw na agɩ gogaasɔ fɛw, gbãʋ na pɛw mãkhaar billə fɛw. Fɛnɛtɩrɩ jɔrɔna yẽtherɩle telene khasɔ oti dẽdẽdẽ. 6 Agɩpɩ wɩ mɩrɛ gbalãakɛ wɩ n wenɩ «thɩrkar gbalã». Ɔɔ gbã ha mɛtɛrɛ kpelẽ yemɔy, dɩ ɔɔ pɛw ha mɛtɛrɛ yʋɔr yemɔy. Gbalãale hananɛ jɛ̃bɛrɛ̃ ɔɔ ƴɛbʋrɔ, kɛ hananɩ thɩrkara. Jɛ̃bɛrɛ̃bir hale ɔɔ ƴɛkʋʋlɔ lõ paar. 7 Agɩpɩ wɩ mɩrɛ dakha gbalãakɛ wɩ n wenɩ «so gʋʋr gbalã»; gɩdonɩ le jamana n gʋʋr sɔ. Dɩ wɩ ɓoluule na sɛɛdɩrɩ thɩra, a fʋ thɩɩra a jʋʋna dana pɩlafɔ̃.

8 Agɩpɩ wɩ mɩrɛ dakha cʋɔrɩkɛ Salomɔ̃ n cɔrɔnɩ ɔmɛna gbasa kpɩɩra, kɛ hanɩ so gʋʋr gbalãalee khiro. Dɩ Salomɔ̃ pɛrɛ dɩ wɩ bir mɩ cɔ bɩɛl wo mɔna so gʋʋr gbalãale hanɩ dɩɩ do Faarɔ̃ɔ bikhɛrɩkɛ a henɩɩ cɔ.

9 Wɩ mɩrɛ cɔnaale fɛw na boka ɓɔ̃ kɔ̃tɩnaakɛ wɩ phiirni. Wɩ thele bokanaale na khule bil gɩrɛ wɩ n yɩnɩ cɔ bɩnɔ na jɩɛra dɩɩ mãkha. Gɛr wɩ fʋna go kpɛɛrɛra a jʋʋna dana thɩraakɛ wɩ dɛɛnɔnɩ, a fʋ jɩɛra a jalna foo a dana gbasa kɔ̃tɩɩna. 10 Boka kɔ̃tɩnaakɛ ɓɔnanɩ, kɛ wɩ thelnɩ wɩ kpɛɛna gokʋʋr. Ɩkha gbaanɛ a dã mɛtɛrɛ yemɔy, dɩ ɩkha ha mɛtɛrɛ yenã. 11 Wɩ bire dɛbɩ go kpɛɛrɛraale wo boka ɓɔnaakɛ wɩ thelnɩ dɩɩ mãkha, sa pɩɛrɔ sɛɛdɩrɩ thɩra. 12 Cɔ kɔ̃tɩ̃ gbasa gʋʋkɛ fieni bilə bilə, boka thelnanɛ wɩ mɩnaa jɔrɔnɛ yẽther, dɩ sɛɛdɩrɩ thɩra ha jɔrɔ̃ bɩɛl. Wɩ mɩɩrɛ mɔ̃ wɩ mɩnɩ Thãgba Kɔ̃tɩnɩ fʋɔr cɔ thɩ̃thɩ̃ gbasa, na mɔ̃ wɩ mɩnɩ jɛ̃bɛrɛ̃ɛkɛ hanɩ Thãgba fʋɔr cɔ lõfonʋɔra.

Thãgba fʋɔr cɔ thɩ̃beekɛ Hɩram cʋʋnanɩ ther sɩɛ \ref 2Ch. 15-17; 4. 1-22; 5. 1

13 Salomɔ̃ jamana thʋɔn a kpa kuun bɩɛlɩkɛ wɩ n wenɩ Hɩram, kɛ hanɩ Tɩɩr dɩɩra a pɔna. 14 Ɔɔ nɩ dor khikhɛrʋʋkɛ thɛnɩ Nɛfɩtalɩɩ məllə, sɩ ɔɔ thɩ do Tɩɩrdaar. A jɩrɛ ther sɛ thɔma dɩ cʋʋ, gɩdonɩ a hananɛ kpɛsɛrɛ na yʋ bʋɔ na jɩɩr dɩ cʋʋna ther sɛ thɔ̃ caar fɛw. Dɩ a jaal Salomɔ̃ jamanaa pa a cʋʋ thɔma fɛʋʋkɛ a pɩɛraanɩ.

Hɩram cʋʋrɛ ther sɛ thɩrkara yeɲɔ

15 Hɩram cʋʋrɛ thɩrkara yeɲɔ na ther sɩɛɛkɛ a hɩlnɩ. Thɩrkaraalee ƴũu gbãsɔ ha mɛtɛrɛ yʋɔr phe biri. Dɩ pɔ̃ɔkɛ wɩ mɩɛnanɩ agɩ curo gbaanɛ a dã mɛtɛrɛ maadõ. 16 A cʋʋrɛ thɩrka yʋ subidaasɔ yeɲɔ na ther sɩɛɛkɛ a hɩlnɩ a puno a subi gɩ thɩrka yʋɔsɔ. Gɛr yeɲɔ fɛʋʋ ƴũu gbã ha mɛtɛrɛ yeɲɔ na dakuru. 17 Hɩram cʋʋrɛ dakha thɩrka yʋ subidaasɔɔlee bɔɩdasɔ tɛmɛ̃ khaa makoɲɔ makoɲɔ, a cʋʋna jɔrkɔ̃ yɩrasɔ makoɲɔ makoɲɔ, kɛ a na bɔɩnanɩ thɩrka yʋ subidaasɔɔle wa subinɩ thɩrkar yʋɔsɔ. 18 Dɩ a cʋʋrɛ thɩ̃ɛɛkɛ hɔnɩ girenadɩ thɩr sɩɩr na ther sɩɛ jɔrɔna yeɲɔ, a cʋr gɩ a dii tɛmɛ̃ caarsɔraalera wa bɔɩnanɩ thɩrka yʋ subidaasɔɔle. 19 Thɩrka yʋ subidaasɔɔlera hanɩ thɩrka yʋɔsɔ ƴũu jɛ̃bɛrɛ̃ lõfonʋɔra, n honanɛ poo ƴepələ̃bi phɩɩn. Agɩ ƴũu gbãsɔ ha mɛtɛrɛ yeɲɔ. 20 Wɩ cʋʋrɛ girenadɩ thɩr sɩɩra taaɲɔ (200) taaɲɔ (200) a cʋr gɩ a dii thɩrka yʋ subidaasɔraale wɩ subinɩ thɩrkara yeɲɔɔlee yʋɔ, dɩɩ khunə bʋ̃bʋnɛɛkɛ kpãasɛnɛnɩ ɓol thɩ̃ɛnaalera hɔnɩ tɛmɛ̃. 21 Dɩ Hɩram puure thɩrkaraale Thãgba fʋɔr cɔ jɛ̃bɛrɛ̃ lõfonɔ ƴɛbʋrɔ. A puure bɩɛl ɲɔ̃bɔɔra a dʋʋ ire «Yakɩn»: kɩrʋ dʋɔn Thãgba n fʋɔn dɩɩ ma. Dɩ a puure bɩɛl ɲɔ̃bɩlana, a dʋʋ ire «Boajɩ»: kɩrʋ dʋɔn Thãgba hɩna fãga. 22 Wɩ cʋʋrɛ thɩrka yʋʋsɔ dɩ ga n hona poo ƴepələ̃bi phɩ̃ɩ. Thale wɩ pɩɩr thɩrka cʋʋ thɔma.

Hɩram cʋʋrɛ ther sɛ ɓalãga kɔ̃tɩ̃ɩ

23 Hɩram cʋʋrɛ ɓalãga kɔ̃tɩ̃ɩ, kɛ biləneni na ther sɩɛɛkɛ a hɩlnɩ. Ɔɔ ƴũu gbã ha mɛtɛrɛ yeɲɔ na dakuru, dɩ ɔɔ pɛw ha mɛtɛrɛ yemɔy. Ɔɔ pɛʋkɛ fieni biləbilə ha mɛtɛrɛ yʋɔr yemɔy. 24 Dɩ wɩ ɓole thɩ̃ɛɛkɛ hɔnɩ kɔkɔbɩa sɩɩrsɔ a dii ɔɔ jẽjena. Wɩ n mɩɛrɛ mɛtɛrɛ kuruu, a pɛr kɔkɔbɩa sɩɩr yʋɔr. Thale wɩ cʋʋ a diirəə fɛw. Jɔrɔna yeɲɔ gɩ ha dɩ wɩ cʋʋ gɩ a mana ther sɛ ɓalãgaa thɛthɛ. 25 Ther sɛ ɓalãgara dɛɛnɛ na yʋɔr yeɲɔraakɛ wɩ cʋʋnanɩ ther sɩɛra dakha. Dɩ na yẽther pɛr ƴɩɛ ka wire na n jalnɩ dɩ pɛr ɲɔ̃bɔɔ, yẽther pɛ ƴɩɛ ka wire n lonɩ, yẽther pɛ ƴɩɛ ka wire na n jalnɩ dɩ pɛr ɲɔ̃bɩlã, dɩ yẽther pɛ ƴɩɛ ka wire n phanɩ. Wɩ pɛ kharɛ sɩkana, sɩ ther sɛ ɓalãgaale dɛ̃ɛ war ƴũu, sɩ awɩ sɩkasɔ ha ther sɛ ɓalãgaalee ballɔ. 26 Ther sɛ ɓalãgaalee nɔ gbẽgberɩ pɛw mãkhananɛ ɲɔ̃pɛl haarɩ pɛw. Wɩ cʋʋrɛ ɔɔ nɔ dɩɩ ho ɲɔ̃kpõbir nʋɔ. Wɩ ɓolle thɩ̃ɛɛkɛ hɔnɩ poo ƴepələ̃bi phɩ̃ɩ a pɛ ɔɔ nɔra. Ɲʋɔnɩkɛ n heni ther sɛ ɓalãgaale har litiri gbɩlanɩ kpalanãsɔ (80.000).

Hɩram cʋʋrɛ thɩ̃ tɔ hotoro yɩra na ther sɩɛ

27 Hɩram cʋʋrɛ wo thɩ̃ tɔ hotoro yɩrasɔ yʋɔr na ther sɩɛ. Hotoro bɩɛlɩ gbã ha mɛtɛrɛ yeɲɔ, dɩ pɛw ha mɛtɛrɛ yeɲɔ, dɩ ƴũu gbãʋ ha mɛtɛrɛ bɩɛl na dakuru. 28 Yɛkɛ mɔ̃ a cʋʋnɩ thɩ̃ tɔ hotorosɔɔra: A cʋʋ gɛr na ther sɛ phɛlɛ pɛnasɔ, a cʋʋ gogaasɔ a pɛr agɩ gãgãsɔɔ yenana, dɩ ther sɛ phɛlɛ pɛnaale lono. 29 Wɩ ɓole sidũ'unəsɔ, na nasɔ na seribɛ̃sɔ a pɛr ther sɛ phɛlɛ pɛnanaale lonanɩ gogaasɔɔra. Wɩ jɔɩrɛ ɓolda kpɩɩsɔ a pɛ gogaasɔraale, dɩ ɩkha ha sidũ'unəsɔ na nasɔɔlee ƴũu, dɩ ɩkha ha awɩ ballɔ a julesɔ. 30 Thɩ̃ tɔ hotorosɔɔle fɛw bɩɛlbɩɛlɩ nɛsɔ na nɛ fʋ ɓalasɔ dor ther sɛna. Dɩ kɛkɛrasɔ hale gãgamã yenana a do ther sɩɛra dakha, dɩ ther sɛ ɓalãga dɛɛnɔ, sɩ jɔɩrɛsɔɔle har tɩɛr. 31 Thɩ̃ tɔ hotorosɔɔle hananɛ nʋɔ agɩ yʋɔsɔ bilə̃ bilə̃, dɩɩ ɓa ƴũu a dã mɛtɛrɛ kuruu, a do ther sɛ ɓalãgaalee dɛ̃ɛ pa. Dɩ nɔ gbẽgber pɩɛrɛ a dã mɛtɛrɛ kuruu na gbe. Nʋɔsɔɔle har kpərə̃ kpərə̃ ga bilə̃ ga. Dɩ thɩ̃ɛsɔ hale dɩ wɩ ɓol a pɛr nʋɔsɔraale dakha. 32 Agɩ nɛsɔ yenãale har gogaasɔɔlee ballɔ. Dɩ agɩ ɓɩlasɔ mar kha na hotoroo thɛthɛ. Hotoro nɛɛsɔɔlee ƴũu gbã har mɛtɛrɛ kuruu na gbe. 33 Wɩ cʋʋ gɛr dɩɩ hona koke hotorodaasɔ. Agɩ ɓalasɔ, na agɩ jãdesɔ, na agɩ ƴɔ̃ƴɔ̃bisɔ, na agɩ mayosɔ fɛw, ther sɩɛ wɩ hɩl a cʋʋ gɩ. 34 Hotorosɔɔle fɛw bɩɛlbɩɛl hananɛ kɛkɛra yenã yenã agɩ gãgã yenãsɔɔra, kɛ manɩ kha na hotorosɔɔ thɛthɛ. 35 Thɩ̃ tɔ hotorosɔɔle hananɛ thɩ̃ɛ yʋɔ bilə̃ bilə̃, dɩ ƴũu gbãa mãkhana mɛtɛrɛ kuruu dakur. Agɩ fʋ pasɔ na agɩ ther sɛ phɛlɛ pɛnasɔɔkɛ gɩ hananɩ, ther ca bɩɛlla wɩ cʋʋna gɩ. 36 Dɩ Hɩram ɓole thɩ̃ɛsɔɔkɛ hɔnɩ seribɛ̃sɔ na sidũ'unəsɔ na kalã jɛ̃ɛsɔ a pɛr pa khɩɩsɔraakɛ hanɩ dɛ̃ɛ paarsɔraale, na agɩ ther pɛnasɔɔra. A jɔɩrɛ dakha ɓolda kpɩɩsɔ a bɔɩna gɩ a finə fɛw. 37 Thale a cʋʋ thɩ̃ tɔ hotoro yʋɔrɩlera fɛw. Ther ca bɩɛlla a hɩl a cʋʋ gɩ, mãkha bɩɛlla gɩ hana, a ho kha oti fɛw. \ref 2 Chr. 4. 6

38 Hɩram cʋʋrɛ ther sɛ ɓalãga yɩrasɔ yʋɔr. Ɲʋɔnɩkɛ n he gɩnɩ bɩɛlbɩɛl har litiri gbɩlanɩ taamadõsɔ (1.600). Agɩ ƴũu gbã daan mɛtɛrɛ yeɲɔ. Dɩ wɩ dɛɛnɛ gɛr fɛw bɩɛlbɩɛl thɩ̃ tɔ hotorosɔ yʋɔraale. 39 A thɩɩnɛ thɩ̃ tɔ hotorosɔɔlera yemɔy Thãgba fʋɔr cɔ ɲɔ̃bɔ gɛllɔ, a thɩɩn yemɔy Thãgba fʋɔr cɔ ɲɔ̃bɩlã gɛllɔ, sa thɩɩn ther sɛ ɓalãga kɔ̃tɩ̃ɩ Thãgba fʋɔr cɔ gɛl ʋrɛ hanɩ ka wire na n jalnɩ dɩ pɛr ɲɔ̃bɩlã, a birnə wi phã pa khʋra. 40 Hɩram cʋʋrɛ dakha ther sɛ ɓalãga kpɩɩsɔ, na pɛlsɔ na tɔmɩ̃ jɛbɩ gborminəsɔ. Thale a pɩɩr Thãgba Kɔ̃tɩnɩ fʋɔr cɔ thɔmaakɛ Salomɔ̃ jamana kɔɔ pɩɛraanɩ a cʋɛ. Gɛr ha gɩrɛ: 41 thɩrkara yeɲɔ na thɩrka yʋ subida pɛnasɔ yeɲɔɔkɛ wɩ subini agɩ yʋɔsɔ na tɛmɛ̃ caar yeɲɔɔkɛ wɩ thini thɩrka yʋ subidaasɔraalera hanɩ thɩrkara yeɲɔraale. 42 A cʋʋrɛ girenadɩ thɩr sɩɩr taanãakɛ a cʋrnɩ a dii thɩɛnaakɛ hɔnɩ tɛmɛ̃ caar yeɲɔ. A cʋrɛ girenadɩ thɩr sɩɩle jɔrɔna yeɲɔ a dii tɛmɛ̃ bɩɛlla, gɩ puno gɩ thi thɩrka yʋ subidaasɔɔraakɛ hanɩ thɩrka yʋɔsɔ ƴũu. 43 A cʋʋrɛ thɩ̃ tɔ hotorosɔ yʋɔr, na ɓalãga yɩrasɔ yʋɔrɩkɛ hanɩ thɩ̃ tɔ hotorosɔraale ƴũu. 44 A cʋʋrɛ ɓalãga kɔ̃tɩ̃ɩ, ɔr bɩɛla 'lẽ'lẽ'lẽ. A cʋʋrɛ nasɔ yʋɔr yeɲɔ, kɛ ɓalãga kɔ̃tɩ̃ɩ dɛɛnɔnɩ. 45 A cʋʋrɛ tho tɛdaasɔ na pɛlsɔ na tɔmɩ̃ jɛbɩ gborminə. Thãgba Kɔ̃tɩnɩ fʋɔr cɔ thɩ̃bisɔɔle fɛw Hɩram cʋʋnɩ a ha Salomɔ̃ jamana, ther sɩɛ a cʋʋna gɩ fɛw, a lɔɔr gɩ dɩɩ pɔlɔ. 46 Salomɔ̃ jamana kɔɔ pɛrɛ dɩ wɩ hɩl ther sɛnaale jʋrdɛ̃ bəənnə, ka thɩɩ donɩ jaar le Sukɔtɩ dɩɩ na Sartã dɩ thɩ̃thɩɩn. 47 Agɩpɩ Salomɔ̃ pɛrɛ dɩ wɩ thɩɩn gɩ Thãgba fʋɔr cʋɔrɔ. Sɩ aa ther gɩ a jɩ ther sɛ kilə nʋɔɔkɛ wɩ gbanɩ a cʋʋna ga, gɩdonɩ gɩ jɔrɛ a və̃vĩə.

48 Dɩ Salomɔ̃ bire pɛr dɩ wɩ cʋʋ Thãgba Kɔ̃tɩnɩ fʋɔr cɔ thɩ̃bi kpɩɩsɔ wo fɛw na dɛ; gɛr dʋɔn: bonɩ ji paar na tabalɩkɛ wɩ n dɛɛnɔnɩ Thãgba buru. 49 Wɩ cʋʋrɛ dɔ carã dɛ̃ɛ paarsɔɔkɛ wɩ cʋʋnanɩ dɛ kile haar, dɩ yemɔy ha ɲɔ̃bɔɔra, yemɔy ha ɲɔ̃bɩlana le sãasɩ pa kɔ̃tɩ̃ ƴɛbʋrɔ, na ɓoldaarsɔɔkɛ dɔnɩ phɩ̃ɩ, na dɔ carãasɔ, na dɔ carã khɩɛrdaasɔɔkɛ dɔnɩ dɛdaa. 50 Wɩ cʋʋrɛ tasa pɛnasɔ, na khala, na tɔmɩ̃ jɛbɩ gborminə, na bilẽse, na dɔ ti bilẽseekɛ wɩ cʋʋnanɩ dɛ kile haar, na lõ to paarsɔɔkɛ wɩ cʋʋnanɩ dɛ kile haar, na sãasɩ pa kɔ̃tɩ̃ lõ to paar, na gbalã lõ to paar. 51 Thale Thãgba Kɔ̃tɩnɩ fʋɔr cɔ thɔmaakɛ Salomɔ̃ cʋʋnɩ pɩɩr fɛw. Dɩ a gbaar thɩ̃ɛ fɛʋʋkɛ ɔɔ thɩ Davɩdɩ kɔɔ tini a ha Thãgba Kɔ̃tɩn, kɛ dɔnɩ: dɛ bulo na dɛ na thɩ̃besɔ a pɛr lẽle thɩ̃ɛsɔɔraakɛ hanɩle Thãgba Kɔ̃tɩnɩ fʋɔr cɔra.