Wɩ jalnanɛ nɔ bɩɛl ʋlfɛ khɛɛsʋʋ Thãgba fʋɔr cɔ phaara \ref 2Chr. 5-7; Khɩɩ. 68. 25; Nɩr. 11. 19
8
1 A gele pɩ, Salomɔ̃ wer Ɩjɩrayɛl kɔ̃tɩna na Ɩjɩrayɛl caarsɔɔ kɔ̃tɩ̃sɔ fɛw, na Ɩjɩrayɛl bɩsanaa cɔ kasɔɔ kɔ̃tɩ̃sɔ a gbɛbɩ ɔɔ pa Jerujalɛm, wɩ jal Davɩdɩɩ dʋɔɔkɛ wɩ n wenɩ dakha Sɩ̃ɔ wɩ gba Thãgba Kɔ̃tɩnɩ nɔ bɩɛl ʋlfɛ khɛɛsʋ wɩ pɔna.2 Dɩ Ɩjɩrayɛl kona fɛw kpar a gbɛbɩ kha wa too fɛtɩ bɔɔ Salomɔ̃ jamanaa pa sɩporaakɛ wɩ n wenɩ Etanɩm, kɛ dɔnɩ yɩɛrɩ ɲẽbe makoɲɔ sɩpor.
3 Ɩjɩrayɛl kɔ̃tɩna fɛw pɔr, dɩ bonɩ jidara gba nɔ bɩɛl ʋlfɛ khɛɛsʋʋ. 4 Dɩ wɩ gbaar Thãgba Kɔ̃tɩnɩ nɔ bɩɛl ʋlfɛ khɛɛsʋ na Thãgba caan waa na thɩ̃bi sãasɩnanɛsɔ fɛʋʋkɛ kɔɔ hanɩ Thãgba caan waw a jalna. Bonɩ jidara na Levɩɩ məlsɔ kɔɔ gbaan gɩ a jalna. 5 Dɩ Salomɔ̃ jamana jɩɩlɛ nɔ bɩɛl ʋlfɛ khɛɛsʋʋ ƴɛbʋrɔ na Ɩjɩrayɛl bɩsana fɛʋʋkɛ a kɔɔ wenɩ dɩ wɩ pɔ ɔɔ pa. Dɩ wɩ jire bonɩɛ na nʋ̃ yɩra na nʋ̃ kɔ̃tɩna dɩ wɩ və̃vĩə, dɩ ga do wa punone na ther a na jɩ nʋɔa'. 6 Dɩ bonɩ jidara lonanɛ Thãgba Kɔ̃tɩnɩ nɔ bɩɛl ʋlfɛ khɛɛsʋra Thãgba fʋɔr cʋɔrɔ, paaraakɛ wɩ kɔɔ gbɛbɩraanɩ, sãasɩ pa phuurə, a thɩɩnʋ le Seribɛ̃sɔɔ gbɛl ballɔ. 7 Gɩdonɩ Seribɛ̃sɔ kɔɔ hale a bel awɩ gbɛlsɔ ƴũu a kɛɛ paarɩlera nɔ bɩɛl ʋlfɛ khɛɛsʋʋ na toonɩ. Thale wɩ kɛɛ nɔ bɩɛl ʋlfɛ khɛɛsʋraale na ɔɔ ɓalãɓɔsɔɔraakɛ wɩ n gbanaanɩ. 8 Ɓalãɓɔnaale kɔɔ gbaanɛ, dɩ wa n yɩ agɩ mɩ̃kasɔ sãasɩ paarɩkɛ hanɩ sãasɩ pa phuu ƴɛbʋrɔ. Sɩ wa n yɩ gɩ jɩɛra ga. Dɩ gɩ toore le foo a dana nĩikɛ. 9 Boka thelna phɛlɛ yeɲɔɔkɛ wɩ khereronɩ nɔ bɩɛl ʋlfɛ thɩmɩɩr, kɛ Mʋɩjɩ kɔɔ pɛrnɩ, gɛrra hãale dɩbara. Gɛr dʋɔn bʋka phɛlɛsɔɔkɛ Mʋɩjɩ kɔɔ 'lɛnɩ Orɛbɩ gɔ̃gʋɔnna ɔbɔɔkɛ Thãgba Kɔ̃tɩn kɔɔ ʋlfɛnanɩ Ɩjɩrayɛl bɩsana bɔɔraakɛ wɩ thenɩ Ejipiti dɩɩra.
10 Ɔbɔɔkɛ bonɩ jidara thenɩ sãasɩ paar na pɩ, ndɔlɔ̃paar hire Thãgba Kɔ̃tɩnɩ fʋɔr cɔ. 11 Dɩ bonɩ jidara na puno a na too le na do thɔma ga dɩɩ do ndɔlɔ̃paarɩle dɔ nɔɔ. Gɩdonɩ Thãgba Kɔ̃tɩnɩ i dʋbɩ kɔɔ hire Thãgba Kɔ̃tɩnɩ fʋɔr cɔ.
12 Dɩ Salomɔ̃ sor aa:
«Thãgba Kɔ̃tɩn, fɩ sor, fɩ ƴaalɛ fɩ too pa birərə gbibi.
13 Sɩ mɩ mɩrɛ cʋɔr gɩ do afɩ too pa.
Le dɔ paarɩkɛ fa toonɩ waa khorr vʋ̃ʋ!»
Thãgba fʋɔr cɔ phʋɔl thɩmɩɩrɩkɛ Salomɔ̃ mɩɩnɩ \ref 2Ch 6.3-11
14 Dɩ le jamana kɛr ƴɩɛ a pɛ Ɩjɩrayɛlɩ tooraakɛ jɩlɛnɩ ƴũu, a bɔna wɩ fɛw. 15 Agɩpɩ dɩ so aa: «Thãgba Kɔ̃tɩnɩkɛ dɔnɩ Ɩjɩrayɛlɩ Thãgba hɩna fʋɔrɛ. Ɔr kɔɔ sɔ ɩ̃ thɩ Davɩdɩra na ɔɔ thɛthɛɛ nɔ, gɩrɛɛkɛra a cʋʋnɩ na ɔɔ puno mɔna a kɔɔ sʋʋranɩ ayɩ: 16 “Kɛkɛkɛ, a fʋna wireekɛ mɩ kɔɔ tini ɩ̃ too Ɩjɩrayɛl Ejipiti dɩɩra a thena, ma kɔɔ phiir dɩ bɩɛl kpɩɩ Ɩjɩrayɛl ca bɩɛlɩ thɩ̃thɩɩn, ka wa mɩnɩ ɩ̃ fʋɔr cɔ, ɩ̃ i na n we la'. Sɩ Davɩdɩ mɩ phiir a na n thɔɔnɛ ɩ̃ too Ɩjɩrayɛl.” 17 Dɩ ɩ̃ thɩ Davɩdɩ kɔɔ hananɛ ƴaalɛ ɔɔ hara a mɩ Thãgba fʋɔr cʋɔr a dʋbɩna Thãgba Kɔ̃tɩnɩkɛ dɔnɩ Ɩjɩrayɛlɩ Thãgba. 18 Sɩ Thãgba Kɔ̃tɩn sʋʋraarɛ ayɩ: “Ƴaalɛɛkɛ fɩ hananɩ afɩ hara, fɩ mɩ fʋɔr cʋɔr fɩ dʋbɩna ɩ̃ i, gɩ bɔrɛ na sobɔr. 19 Sɩ ga do fɛr na mɛ fʋɔr cʋɔrra ga. Sɩ afɩ bikuunɩkɛ fa kɔnɩ, kɛ dɔnɩ afɩ bikuun bɩnɔ, ɔr na mɛ fʋɔr cʋɔrɩle a na dʋbɩna ɩ̃ i.” 20 Dɩ mɛ̃ Thãgba Kɔ̃tɩn fʋ thɩmɩɩrɩlera a kɔɔ mɩɩnɩ dɩɩ dã oti. Dɩ mɩ gbaar ɩ̃ thɩ Davɩdɩɩ too pa, a too Ɩjɩrayɛlɩ too jamana too para mɔna Thãgba Kɔ̃tɩn kɔɔ sonɩ. Dɩ mɩ mɩrɛ cʋɔrra Thãgba Kɔ̃tɩnɩ i dʋbɩra, kɛ dɔnɩ Ɩjɩrayɛlɩ Thãgba. 21 Mɩ gbɛbɩrɛ paar le, kãakɛ ʋlfɛ khɛɛsʋʋkɛ hananɩ Thãgba Kɔ̃tɩnɩ nɔ bɩɛl ʋlfɛ thɩmɩɩr na toonɩ. Gɛr dʋɔn nɔ bɩɛl ʋlfɛrɛɛkɛ a kɔɔ ʋlfɛnanɩ asɩ thɩ kɔ̃tɩ̃sɔ ɔbɔɔkɛ a kɔɔ ti wɩnɩ Ejipiti dɩɩra a thena.»
Salomɔ̃ɔ Thãgba bɩɛl \ref 2Chr. 6. 12-40; Th. t t. 7. 42-50
22 Salomɔ̃ jɩɩlɛ ƴũu, Thãgba Kɔ̃tɩnɩ bonɩ ji pa ƴɛbʋrɔ tɩbɩla fɛʋʋ ƴɛra, a 'laa ɲɛ̃ɛ thãgbara ƴũu 23 a so aa: «Thãgba Kɔ̃tɩn, Ɩjɩrayɛlɩ Thãgba wei! Thãgba kpɩɩ na hale a hona fɩ le thãgbara ƴũu, dɩ kɛ thɩɩraakɛ ga. Fɩ n fʋrɛ afɩ nɔ bɩɛl ʋlfɛ. Fɩ dor sobɔdaar afɩ thɔ̃darasɔraakɛ n ɩrɛnɩ afɩ hʋra na awɩ ha fɛw. 24 Gɛr gɩ dɩ fɩ cʋʋ ɩ̃ thɩ Davɩdɩraakɛ dʋɔnɩ afɩ thɔ̃daar gɩrɛɛkɛra fɩ kɔɔ sʋʋraanɩ. Gɩrɛra fɩ kɔɔ sonɩ na afɩ nɔ, fɩ cʋʋ gɛr nĩ na afɩ fãga ɲɔ̃. 25 Nɛnɛ̃, Thãgba Kɔ̃tɩnɩkɛ dɔnɩ Ɩjɩrayɛlɩ Thãgba, cʋɛ dakha gɩrɛɛkɛra fɩ kɔɔ sonɩ ɩ̃ thɩ Davɩdɩraakɛ dʋɔnɩ afɩ thɔ̃daar gɩrɛɛkɛra fɩ kɔɔ sʋʋraanɩ. Fɩ sʋʋraarɛ ayɩ, a na 'lee dedee afɩ ƴɛbʋrɔ, kɛ na tɔɔnɩ Ɩjɩrayɛlɩ məlsɔɔ jamana too para yuurəka'. Aa thɩ̃ bɩɛl dɩbara dʋɔn ɔɔ bikũusɔ na n dɔ bʋrɛ awɩ cʋʋ para, a na ɩrɛ afɩ ƴɛra mɔ̃kɛra a kɔɔ ɩɩrnɩ. 26 Dɩ nɛnɛ̃ Ɩjɩrayɛlɩ Thãgba, mɩ n bɩɛl fɛr cʋɛ thɩmɩɩrɩkɛra fɩ kɔɔ mɩɩnɩ ɩ̃ thɩ Davɩdɩra, kɛ dɔnɩ afɩ thɔ̃daar gɩ ha oti!
27 Sɩɩdo fɛr Thãgba na n cɔr thɩɩra ger bɛ? Gɩdonɩ thãgbara ƴũu na ɔɔ wabɩ fɛʋrakɛ 'lũ farɛ toorera, dɩ aɲe cʋɔrɩkɛ mɩ mɩnɩ a ha fɩ do? 28 Sɩ na gele fɛw, fɛr Thãgba Kɔ̃tɩn ɩ̃ Thãgba, pɛ nũu mɛr afɩ thɔ̃daarɩ bɩɛlla na ɩ̃ ƴɛɛra. Pɛ nũu ɩ̃ hulẽbirə na ɩ̃ bɩɛllaakɛ mɛr afɩ thɔ̃daar n bɩɛl fɩnɩ nĩikɛ. 29 Ga yire fʋɔr cʋɔraakɛ na paaraakɛ dɩwɩlʋ na dɩtɩnɔ, gɩdonɩ fɩ kɔɔ sor ayɩ, kɩɛr afɩ i na n we! Dɩ gɛr gɩ pɛ nũu bɩɛllɛlaakɛ mɛr afɩ thɔ̃daar n bɩɛl fɩnɩ kɩɛr paarɩkɛ. 30 Ɔbɔɔkɛ mɛr afɩ thɔ̃daar na afɩ too Ɩjɩrayɛl na ɩnɩ kɩɛr paarɩkɛ a na ƴɛɛ fɩ, to asɩ bɩɛl. Fɛrɛ, to asɩ bɩɛl paarɩkɛ kãakɛ fɩ hanɩ le ƴũu. Pɛ sɩ nũu, a faa asɩ dɩpa.
31 Ado tibil cʋʋ puure ɔɔ alãkha tibillə, dɩ wɩ fɛrɛɛ ayɩ a ʋlfɛnɛ, dɩ ɩ̃ afɩ bonɩ ji pa ƴɛbʋrɔ, kɩɛr cʋɔrɔɔkɛ a ʋlfɛ, 32 Nɩɛnɛ awɩ wi le thãgbara ƴũu a 'lɔɔrɔ ɲɔ̃ɔ a gʋʋrɛ. Kɩlɛ afɩ thɔ̃daraa so, a heene dɩ padaar sor, a cʋɛ ɔɔ puu cʋʋ n kɛr gɩ heen ɔɔ yʋɔ, sɩ a hɛlla tɩɩ sarʋ sor, a lɩmaa mɔ̃kɛ ɔɔ fɩl sar hanɩ.
33 Ado lãlara puno afɩ too Ɩjɩrayɛl dɩɩ do sopuu wɩ cʋʋ far gɛr dɔ nɔɔ, sɩ dɩ wɩ bir kɛr a ɩ̃ far, a bir ha fɩ dʋbɩrɛ, ado wɩ bɩɛl fɩ a ƴɛɛna fɩ kɩɛr cʋɔrɔɔkɛ, 34 nɩɛnɛ awɩ wi le thãgbara ƴũu. Faa afɩ too Ɩjɩrayɛlɩ sopuu, sɩ a kɛrana wɩ birənə dɩɩraakɛra fɩ kɔɔ ʋlfɛnɩ fɩ ha awɩ thɩ kɔ̃tɩ̃sɔ.
35 Ado thãgba kur, dɩ thãgba ɲʋɔn na n dã ga', dɩɩ do sopuu wɩ cʋʋ far gɛr dɔ nɔɔ dɩ fɩ pɛ war sor, sɩ dɩ wɩ ɩ̃ kɩɛr paarɩkɛ a bɩɛl fɩ, ado wɩ bir ha fɩ i dʋbɩrɛ a bir kɛr sa faa awɩ sopuusɔ, 36 nɩɛnɛ awɩ bɩɛl le thãgbara ƴũu. Faa afɩ thɔ̃darasɔɔ sopuu na afɩ too Ɩjɩrayɛlɩ sopuu. Birə dɩrɛ wɩ hʋ bʋɔɔkɛ wɩ teenanɩ wa n ɩrɛrɔ. Birə cʋɛ thãgba ɲʋɔn n dã thɩɩraakɛra fɩ kɔɔ hanɩ afɩ too wɩ hɩna!
37 Ado kɔmɛr lõ dɩɩra, agɩbo kho mananɛ, agɩbo thɩr phɩ̃ jɛ khoo, agɩbo jʋ khi khoo, agɩbo ɓãsʋlãasɔ, agɩbo toosõosɔ, agɩbo lãlara pʋɔn a sɔbɩ afɩ too awɩ dʋɔ, awɩ dɩ lõfonɔsɔɔra, ado thɩlke caar dɩɩdɩɩ na khoe lõ dɩɩra, 38 bɩɛl caar fɛw na ƴɛɛ caar fɛʋʋkɛ tibil wo tibil, agɩbo afɩ too fɛʋʋkɛ dɔnɩ Ɩjɩrayɛl na pɔna farnɩ, ado ntɛɛ ha na bɩ a ma jɩ puureraakɛ a cʋʋnɩ, dɩ 'laa ɲɛ̃ɛ cʋɔraakɛ a bɩɛl fɩ, 39 pɩɛ nũu le ƴũu, paarɩkɛra fɩ hanɩ. Faa dɩ paar a 'laanɛ. Cʋɛ thɩ̃ɛ a lɩma ntɛ mɔ̃kɛra ɔɔ cʋʋ pasɔ hanɩ, gɩdonɩ fɛr bɩɛl dɩbara jɩɛn tɩbɩla fɛʋʋ ha. 40 Dɩ ga dor nɔɔ wa n ma fɩ bɔɔ fɛʋʋkɛ wɩ hananɩ yire dɩɩraakɛra fɩ kɔɔ hanɩ asɩ thɩ kɔ̃tɩ̃sɔ.
41 Cʋɛ mɛna dakha na kpakpalaakɛ na thɛnɩ Ɩjɩrayɛl caaraakɛ dɔnɩ afɩ tooa', ɔbɔɔkɛ bɩɛl wɛrra na thenɩ dɩ ƴɔɔ fĩi na ɩ̃ gɩ do afɩ i dɔ nɔɔ. 42 Gɩdonɩ wa nɩɛrɛ mɔ̃ afɩ i thenɩ, mɔ̃ fɩ hananɩ fãga na punone, dɩ wa ɩnɛ cʋɔrɔɔkɛ a na bɩɛl fɩ. 43 Pɛ ntɛɛ wi nũu le ƴũu, paarɩkɛra fɩ hanɩ. Hana kpakpalɩle thɩ̃ɛ fɛʋʋkɛra a bɩɛl farnɩ, gɩ do nɔɔ caar fɛʋʋkɛ hanɩ thɩɩra n jɩ fɩ, wa n ma fɩ mɔ̃ afɩ too Ɩjɩrayɛl n ma fɩnɩ. Dɩ mɛ̃ wa jɩ fɩ har kɛ cʋɔraakɛra mɩ mɩnɩ.
44 Ado afɩ too jal kʋʋra wɩ kena awɩ lãlaardara, a kpaan hʋɛraakɛra fɩ nɩ warnɩ, ado wɩ kɛr ƴɩɛ a telẽ dɩɩkɛ fɩ phiirni na fʋɔr cʋɔrɩkɛ mɩ mɩnɩ afɩ i dʋbɩra a bɩɛl fɛr Thãgba Kɔ̃tɩn, 45 pɛ awɩ bɩɛl nũu le ƴũu na awɩ ƴɛɛ, a tea pɛ war.
46 Ado wɩ cʋʋ far sopuurəkɛ, gɩdonɩ tibil bɩɛllakɛ na hale na n cʋɛnɩ sopuəə ga, dɩ fɩ gbana wɩ nĩkhii, a faa wɩ a ha awɩ lãlaardara dɩ wɩ fʋlɛ wɩ jalna dɩ kpɩɩra lãlaraa dʋɔ ƴɔɔ fĩi agɩbo dɩraakɛ wɔrɔnɛnɩ, 47 Sɩ kpɩɛrɛ bir lõ war dɩɩraalera, ka wɩ fʋlɛ wɩnɩ jalna, dɩ wɩ kɛr bir far, a na ƴɛɛ fɩ le awɩ lãlaardaraa dʋɔra aa, ɩnɩ cʋʋrɛ sopuu, ɩnɩ dɩrɛ, ɩnɩ cʋʋrɛ puure, 48 ado wɩ kɛr bir far na awɩ ha fɛw, na awɩ kpɩɛr fɛw, ado lele awɩ lãlaardaraa dʋɔ, ka wɩ fʋlɛ wɩnɩ jalna, wɩ kɛr ƴɩɛ pɛ dɩɩraakɛ fɩ kɔɔ hanɩ awɩ thɩ kɔ̃tɩ̃sɔ, na dɩ kɔ̃tɩɩnaakɛ fɩ phiirni, na cʋɔraakɛra mɩ mɩnɩ afɩ i dʋbɩra, a bɩɛl fɩ, 49 pɛ awɩ bɩɛl na awɩ ƴɛɛ nũu le ƴũu, paarɩkɛra fɩ hanɩ, a tea pɛ war. 50 Faa afɩ too sopuusɔɔkɛ wɩ cʋʋ farnɩ na cʋʋ pa puunəəkɛ wɩ hana farnɩ. Cʋɛ bʋɔ n fʋ wɩrɛɛkɛra kɔɔ fʋlɛnɛ wɩnɩ, wɩ jɩ wɩ bʋɔra. 51 Gɩdonɩ afɩ too wɩ do na afɩ thɩ̃ hɩnanɛ, kɛ fɩ tini Ejipiti a thena, kãakɛ wɩ kɔɔ hanɩ bɔgaar kɔ̃tɩɩnaakɛ hɔnɩ ther hɩl dɔɔ!
52 Garɔ yire a nɩɛnɛ mɛr afɩ thɔ̃daarɩ ƴɛɛ na afɩ too Ɩjɩrayɛlɩ ƴɛɛ. Na pɛ sɩ nũu bɔɔ fɛʋʋkɛ sɩ n we fɩnɩ! 53 Gɩdonɩ fɛr Kɔ̃tɩn, kɛ dɔnɩ Thãgba Kɔ̃tɩn, fɛr kɔɔ lea sɩ kpɩɩ gɩ̃ɩ casɔɔra fɛʋʋkɛ hanɩ thɩɩra dɩ wɩ do afɩ thɩ̃ hɩnanɛ, mɔ̃kɛra fɩ kɔɔ gbanɩ Mʋɩjɩ a mɩɩna, ɔbɔɔkɛ fɩ kɔɔ tini asɩ thɩ kɔ̃tɩ̃sɔ Ejipiti a thena!
Salomɔ̃ bɩɛlɛ Thãgba a bɔna ɔɔ too
54 Ɔbɔɔkɛ Salomɔ̃ pɩnɩ bɩɛl caarɩle a bɩɛlnɩ Thãgba Kɔ̃tɩn na ƴɛɛ caarɩle thale pɩ, a ɩɩrɛ le Thãgba Kɔ̃tɩnɩ bonɩ ji pa ƴɛbʋrɔ, kãakɛ a kɔɔ gulẽganɩ a 'laa ɲɛ̃ɛ thãgbara ƴũu. 55 Dɩ a jɩɩlɛ ƴũu, a bɔna Ɩjɩrayɛl bɩsana fɛw na nɔ kheu ayɩ: 56 «Thãgba Kɔ̃tɩn hɩna khɩɩrɛ, ɔrkɛ hananɩ ɔɔ too Ɩjɩrayɛl hɩɩrɛ mɔ̃kɛ a kɔɔ sonɩ! Gɩdonɩ a cʋʋrɛ thɩ̃ bɔy fɛʋʋkɛra a kɔɔ gbanɩ ɔɔ thɔ̃daar Mʋɩjɩ a mɩɩna dɩɩ dã fɛw, bɩɛl na ɓɔra'. 57 Thãgba Kɔ̃tɩnnɩkɛ dɔnɩ asɩ Thãgba n hana kha na sɛrɛ mɔ̃kɛ a kɔɔ hanɩ kha na asɩ thɩ kɔ̃tɩ̃sɔ. A na n bo sɩ yuuə', a na n faa sa'. 58 Sɩ a kɛra asɩ ha na pɛ ɔɔ pa, gɩ do nɔɔ sa n ɩɩr ɔɔ hʋsɔɔra fɛw, sa n hɩɩna ɔɔ jɔfʋsɔ na ɔɔ jɔfʋsɔɔkɛ a kherenɩ na ɔɔ nɔ thɩmɩɩrsɔɔkɛ a kɔɔ hanɩ asɩ thɩ kɔ̃tɩ̃sɔ! 59 Thãgba Kɔ̃tɩn n fɔrɔ ƴɛɛ thɩmɩɩrɩkɛ mɩ pɔnanɩ ɔr Thãgba Kɔ̃tɩn asɩ Thãgbara a na jɛna gɩ dɩwɩlʋ na dɩtɩnɔ. A tea na pɛ mɛr ɔɔ thɔ̃daara na ɔɔ too Ɩjɩrayɛlla wire fɛw. 60 Dɩ thale tɩbɩla fɛw thɩɩra na puno na jɩ dɩ fɛr Thãgba Kɔ̃tɩn dʋɔn Thãgba, dakpɩɩ na hala'. 61 Sɩ nɛrɛ, nɩ dɔ anɩ ha n ha Thãgba Kɔ̃tɩn asɩ Thãgbara biləni mɔ̃ gɩ hanɩ nĩikɛ. Na n kpaanɛ ɔɔ jɔfʋsɔraakɛ kherenenɩ, a na cʋɛna ɔɔ jɔfʋsɔ.
Thãgba fʋɔr cɔ phʋɔl bonɩɛ
62 Salomɔ̃ jamana na Ɩjɩrayɛlɩ məlsɔ fɛʋʋkɛ wɩ hananɩ kha jire bonɩɛsɔ Thãgba Kɔ̃tɩnɩ ƴɛbʋrɔ. 63 Salomɔ̃ jire bonɩɛɛkɛ dɔnɩ 'likha bonɩɛ Thãgba Kɔ̃tɩnna na nʋ̃ kɔ̃tɩna gbɩlanɩ gbelẽ yeɲɔ (22.000) na nʋ̃ yɩra gbɩlanɩ tamaa na kpelẽ (120.000). Thale Salomɔ̃ jamana na Ɩjɩrayɛlɩ məlsɔ fɛw phʋɔl Thãgba Kɔ̃tɩnɩ fʋɔr cɔ. 64 Ga wiilera Salomɔ̃ gba gbasa thɩ̃thɩɩnɩkɛ hanɩ Thãgba Kɔ̃tɩnɩ fʋɔr cɔ ƴɛbʋrɔ a pɛ Thãgba ƴɔɔ. Gɩdonɩ le a ji nʋ̃ thiinə bonɩɛsɔ na thɩ̃ bi bonɩɛsɔ a thiinə 'likha bonɩ nʋ̃ niin. Gɩdonɩ ther sɛ bonɩ ji paarɩkɛ hanɩ Thãgba Kɔ̃tɩnɩ ƴɛbʋrɔ 'lune jɔɔ ka, dɩ ga do bonɩ thiinə nʋ̃ʋ, na thɩ̃ bi bonɩɛ, na 'likha bonɩ nʋ̃ niin na punone a na lõa'.
65 Salomɔ̃ na Ɩjɩrayɛlɩ məlsɔ fɛʋʋkɛ hanɩ kha na ɔr cʋʋrɛ fɛtɩ ɔbɔɔlera. Tɩbɩla bərəəm kɔɔ ther Lebotɩ-Hamatɩ dɩ lõ paar, na Ejipiti mɩɩr khʋra a pɔ. Dɩ wɩ jɩɩlɛ Thãgba Kɔ̃tɩn, asɩ Thãgbaa ƴɛbʋrɔ a cʋʋna wire makoɲɔ. Agɩpɩ, wɩ bire cʋʋ wire makoɲɔ kpɩɩ wo a dɛbɩrɔ, dɩɩ ha wire yʋɔr yenã. 66 Dɩ gaa dɩwɩllɔ, Salomɔ̃ jamana bɩlanɛ tɩbɩla. Dɩ wɩ fʋɔrɛ jamana, sa kɔ̃ awɩ cɔsɔ. Dɩ awɩ ha hinəne daw, dɩ wa n kãka bɔ caar fɛʋraakɛ Thãgba Kɔ̃tɩn kɔɔ cʋʋnɩ ɔɔ thɔ̃daar Davɩdɩ na ɔɔ too Ɩjɩrayɛldara.