Thãgba Kɔ̃tɩn bire nɩna ɔɔbara Salomɔ̃ balanyɔdaa wo
9
1 Ɔbɔɔkɛ Salomɔ̃ mɩnɩ Thãgba Kɔ̃tɩnɩ fʋɔr cɔ na jamana cʋɔr pɩ na gɩrɛ fɛʋʋkɛ a kɔɔ ƴaalnɩ a cʋʋ mɔ̃kɛra a n ƴaalnɩ, 2 Thãgba Kɔ̃tɩn bire nɩna ɔɔbara Salomɔ̃ balaɲɔdaa wo, mɔ̃ a kɔɔ nɩnaanɩ Gabãɔ. 3 Thãgba Kɔ̃tɩn sʋʋraarɛ aa: «Mɩ ture afɩ bɩɛlɩkɛ fɩ bɩɛl mɩnɩ a ƴɛɛna mɩ. Mɩ ture cʋɔrɩkɛra fɩ mɩnɩ fɩ dʋbɩna ɩ̃ i bɔɔ khorr vʋ̃ʋ, dɩ do ɩ̃da. Ma n har bɔɔ fɛw anɩ thɩ̃thɩɩn cʋɔrɔɔkɛ. Ma n hɩɩnʋʋnɛ, ɩ̃ ha n haaraa wire fɛw. 4 Dɩ fɛrɛ, ado fa ɩɩrna haarɩkɛ telenenɩ na fɩl telẽe ɩ̃ ƴɛbʋrɔ mɔ̃kɛ afɩ thɩ Davɩdɩ kɔɔ ɩɩrnɩ, a na cʋʋ mɔ̃kɛ mɩ so farnɩ fɛw, ado fa kpaan ɩ̃ jɔfʋsɔraakɛ kherenenɩ na ɩ̃ nɔ thɩmɩɩsɔɔra, 5 ma fʋrɛ afɩ jamana do Ɩjɩrayɛlla gɩ tɩ khorr, mɔ̃kɛ mɩ kɔɔ sonɩ afɩ thɩ Davɩdɩra ayɩ, a na 'lee dedee ɔɔ jamana too para Ɩjɩrayɛlla yuurəka'. 6 Sɩ ado nɛrɛ na anɩ bɩsãsɔ jɩ sa kɛr sa faa mɩ, na n hɩɩn ɩ̃ jɔfʋsɔ na jɔfʋʋkɛ mɩ kherena', ado na fʋɔr thãgba kpɩɩsɔ, a na gburõku wɛra, 7 ma tire Ɩjɩrayɛl bɩsana dɩɩraakɛra mɩ kɔɔ ha wɩnɩ a na faa. Ma bor fʋɔr cʋɔrɩkɛ dɔnɩ ɩ̃ i dʋbɩda, kɛ mɩ tuni gɩrɛ dɩ do ɩ̃da a na faa. Dɩ Ɩjɩrayɛl na fire na do sokpaa na mãthɩ̃ nɔɔ caarsɔ fɛʋʋ thɩ̃thɩɩn. 8 Fʋɔr cʋɔrɩkɛ na ɔɔ ɓɔ̃ fɛw, sɩ tibil wo tibilikɛ na kananɩ le, nʋɔ na kpagʋʋrɛ ɔɔ wɩɛrra a na n kpise: «Hu! Hu!» Agɩpɩ a na bulele aa: “Aɲe dɔ kɩrʋ dɩ Thãgba Kɔ̃tɩn thʋ̃ cʋʋ dɩɩkɛra na cʋɔrɩkɛra thaa ɓoɓo?” 9 Dɩ tɩbɩla na birsere nayɩ: “Gɩdonɩ wɩ bor Thãgba Kɔ̃tɩn, awɩ Thãgbaakɛ kɔɔ tenɩ awɩ thɩ kɔ̃tɩ̃sɔ Ejipiti dɩ wɩ the, sɩ wa n kpaan thãgba kpɩɩsɔɔra, dɩ wɩ gburõkhu na fʋɔr wɛr, dɩ wa n do war thɔma, gɛr dɔ kɩrʋ dɩ Thãgba Kɔ̃tɩn pɛ war thɩlkenasɔɔkɛ fɛw.” »Thɔ̃ kɔ̃tɩ̃ ɩkhasɔɔkɛ Salomɔ̃ɔ cʋʋnɩ
10 Salomɔ̃ mɩrɛ cɔna yeɲɔɔlera dɔnɩ Thãgba Kɔ̃tɩnɩ cɔ na jamana cʋɔr a pɩ yɛna kpelẽe bɩnɔ. 11 Dɩ gɩdonɩ Hɩramkɛ dɔnɩ Tɩɩr jamana kɔɔ har Salomɔ̃ sɛɛdɩrɩ thɩra na sɩpɩrɛsɩ thɩra na dakha dɛ jɔɔ mɔ̃ a n ƴaalnɩ, Salomɔ̃ jamana haarɛ dɩ kɔ̃tɩna kpelẽ Galile bəənnə. 12 Dɩ Hɩram ther Tɩɩr dɩɩra a jal ɩnɩ n hɩɩn dɩɩsɔɔkɛra Salomɔ̃ n haanɩ, dɩ dɩɩsɔɔra na daaraa ga. 13 Dɩ a sor Salomɔna aa: «Aɲee dɩsɔ ha gɩrɛ thaa fɩ ha mɩnɩ ya ɩ̃ õkuun?» Dɩ a ha gɛr ire “Kabul dɩɩ.” Kɩrʋ dʋɔn “dɩɩ na ire gɩ pɔy”. Dɩ dɩɩsɔɔle toore na ireelera a dana nĩikɛ. 14 Sɩ dɛɛkɛ Hɩram kɔɔ thɔnanɩ a ha Salomɔ̃ daan kilo gbɩlanɩ yẽther na dakuru.
15 Yɛkɛ mɔ̃ gɩ hanɩ na tɩbɩlaakɛ Salomɔ̃ jamana kɔɔ pɛrnɩ fãga thɔmanaakɛ dɔnɩ Thãgba Kɔ̃tɩnɩ fʋɔr cɔ mɩ thɔma na ɔɔ thɛthɛɛ cɔ mɩ thɔma na ɓɛlɛ̃ɛkɛ wɩ ɓɔrnɩ, kɛ wɩ n wenɩ Milo na Jerujalɛm go gbãa na Hasɔɔr dɩɩ na Megido dɩɩ na Gejɛɛr dɩ mɩr. 16 Mamara, Faarɔ̃ɔkɛ dɔnɩ Ejipiti jamana kɔɔ jaal a kena Gejɛɛrdara, a tee dɩɩ. A kɔɔ kʋʋrɛ Kanãadaraakɛ kɔɔ hanɩle dɩɩra sa thii dɩɩ. Pɩpɩɩ paar dɩ ha dɩɩra ɔɔ bikhɛr dɩɩ do khaardaa ɔbɔɔkɛ a henɩ Salomɔ̃. 17 Dɩ Salomɔ̃ bire mɩ Gejɛɛr dɩɩ na Bɛtɩ-Horɔ̃-Ɓɛlɛ̃-Dɩɩ. 18 A mɩrɛ dakha Baalatɩ dɩɩ, na Tadɩmɔɔr dɩɩkɛ hanɩ bə̃ kparaaraakɛ hanɩ le dɩɩra. 19 Dɩ a mɩrɛ dɩɩsɔ, kãkɛ a n thɩɩnɩ dɩkɔ na dɩɩsɔɔkɛ a n thɩɩnɔnɩ koke hotorosɔ na dɩ gɩrɛ gãgona harnɩ. A mɩrɛ dakha gɩrɛ fɛʋʋkɛ a hananɩ ƴaalɛ le Jerujalɛm na Lɩbã na dɩɩsɔɔra fɛw, kãkɛ a n hɩɩnɩ. 20 Ca wɩrɛ fɛʋʋkɛ kɔɔ sɛnɩ dɩɩra, kɛ dɔnɩ Amɔɔrɩ məlsɔ na Hɛtɩɩ məlsɔ na Perejɩɩ məlsɔ na Hɩvɩtɩsɔ na Jebusɩdara, kɛ na dɔnɩ Ɩjɩrayɛlɩ məlsɔa', 21 awɩ məlsɔɔkɛ kɔɔ sɛnɩ le dɩɩra, kɛ Ɩjɩrayɛl bɩsana na kɔɔ punonɩ a bũburõə', wɛr Salomɔ̃ pɛr dee thɔ̃ khenana dɩ wa n do. Dɩ mɛna wɩ ha foo a dana nĩikɛ. 22 Sɩ Salomɔ̃ na pɛ Ɩjɩrayɛlɩ məlsɔ bɩɛllakɛ dee thɔmana ga. Wɛr a ka pɛr dɩ wɩ do kokena na ɔɔ minisisɔ na sɔrasɩ kɔ̃tɩna na gãgo hɩɩn sɔrasɛ na koke hotoro hɩɩn sɔrasɛ na gãgo jʋʋn sɔrasɛ. 23 Kɔ̃tɩnaakɛ wɩ pɛrnɩ dɩ wa n hɩɩn tɩbɩlaakɛ n dʋɔnɩ Salomɔ̃ɔ thɔ̃, wɩ har taamɔy na kpalaɲɔ yʋɔr (550). Wɛr n hɩnɛ tɩbɩlaakɛ n dʋɔnɩ thɔma.
24 Ɔbɔɔkɛ Faarɔ̃ɔ bikhɛr thenɩ Davɩdɩɩ dʋɔ a jal cʋɔraakɛ Salomɔ̃ mɩnɩ a haa, gɛr Salomɔ̃ ɓɔrɔ ɓɛlɛ̃ɛkɛ wɩ n wenɩ Milo.
25 Salomɔ̃ n jire bonɩ thiinəsɔ na 'likha bonɩɛsɔ balãther yɛ bɩɛlla Thãgba Kɔ̃tɩnɩ bonɩ ji paaraakɛ a mɩnɩ, dɩ thiinə latɩkolosɔ bonɩ ji paaraakɛ hanɩ Thãgba Kɔ̃tɩnɩ ƴɛbʋrɔ. Dɩ mɛ̃ Thãgba Kɔ̃tɩnɩ fʋɔr cɔ khɛr dɩ Thãgba fʋɔr thɔma fʋ.