Jamana khɛrɩkɛ thɛnɩ Saba dɩɩra jaal Salomɔ̃ɔ pa \ref 2 Kur. 9. 1-12; Mat. 12. 42; Luc 11. 31
10
1 Jamana khɛrɩkɛ hanɩ Saba nɩɛrɛ dɩ wa n mɩɩ mɔ̃ Salomɔ̃ɔ I thenɩ na kpɛsɛrɛɛkɛ a 'lɛnɩ dɩɩ the Thãgbaa bɔjɩra. Dɩ a pɔr a bɩɩ bɩnɛ na bulelesɔɔkɛ babaranɛnɩ a hɩɩn. 2 A daan Jerujalɛm na sɩka kpana tə̃tə̃tə̃ na ɲɔɔmɛ̃sɔɔkɛ gbaanɩ thɩ̃ɛsɔɔkɛ n hʋnanɩ daw na dɛ tə̃tə̃tə̃ na boka ɓɔna. Mɔ̃ a danɩ Salomɔ̃ɔ pa a buleele gɩrɛ fɛʋʋkɛ a kɔɔ hananɩ ɔɔ ha bɩnɔ. 3 Dɩ Salomɔ̃ mɩɛɛrɛ gɩrɛ fɛʋʋkɛra a buleenɩ. Thɩ̃ bɩɛllakɛ na hale a ker dɩ aa puno mɩɛ khɛrɩlaa ga.4 Dɩ jamana khɛrɩle yɩrɛ kpɛsɛrɛ fɛʋʋkɛ Salomɔ̃ hananɩ na jamana cʋɔrɩkɛ a mɩnɩ. 5 A yɩrɛ dakha dɩkɔɔkɛ Salomɔ̃ n khonɩ. A yɩrɛ ɔɔ thɔ̃darasɔɔ cɔ pa na thɔmaakɛ wɩ n cʋʋnɩ, na kẽkenaakɛ wɩ n tonɩ. A yɩrɛ dakha ɔɔ ta sɛdarasɔ, a yɩna bonɩ thiinəsɔɔkɛ a n jini Thãgba Kɔ̃tɩnɩ cɔra, dɩ nʋɔ kpagʋ jɔɔ ka. 6 Dɩ a sor jamanana aa: «Jaa gɩrɛ fɛʋʋkɛ mɩ kɔɔ nɩɛnɩ ɩ̃ dʋɔ dɩ wa n mɩɩ afɩ thɩmɩsɔɔra na afɩ kpɛsɛdara, sobɔra gɩ koe! 7 Ma n kɔɔ pɛr haar, a ga do mɔ̃ mɩ ɩnɩ a yɩɛ na ɩ̃ yi gaa ga. Jaa gɩrɛ wɩ kɔɔ mɩɩnɩ na do thɩ̃ɛa'. Afɩ kpɛsɛ na afɩ ɲɔ̃korbɔ və̃viəne a kpãasɛ gɩrɛraakɛ mɩ kɔɔ nɩɛnɩ afɩ i thedara. 8 Daw n fɔ afɩ toosɔ, daw n fɔ dakha afɩ thɔ̃daraakɛ n hanɩ afɩ kɩrɔ bɔɔ fɛw dɩ wa n nɩɛ afɩ kpɛsɛ thɩmɩ. 9 Thãgba Kɔ̃tɩnɩkɛ dɔnɩ afɩ Thãgba hɩna khɩɩrɛ, mɔ̃ fɩ daaraanɩ dɩ pɛ far jamana dʋʋr Ɩjɩrayɛlɩ məlsɔɔ jamana too para. Thãgba Kɔ̃tɩn nar Ɩjɩrayɛlɩ məlsɔ khorr. Gɛr gɩ dɩ pɛ far dɩ fɩ do jamana, gɩ do nɔɔ fa n thɔɔ dɩɩ na fɩl telẽ na fɩl sarʋ!» 10 Dɩ a har Salomɔ̃ dɛ tɔn yẽther na dakuru, a hanaa thɩ̃ɛsɔɔkɛ n hʋnanɩ daw tə̃tə̃tə̃ nakha boka ɓɔna. Wa bir 'lɛ thɩ̃ɛɛkɛ n hʋnanɩ daw dɩɩ jɔr thale a ho gɩrɛ Saba jamana khɛrɩle hanɩ Salomɔ̃ jamana kpɩɩ bã.
11 Hɩramɩ batosɔɔkɛ pʋɔnɩ na dɛɛkɛ wɩ thenanɩ Ofɩɩr, wɩ pɔnanɛ dakha thɩraakɛ wɩ thenanɩ Ofɩɩr tə̃tə̃tə̃, kɛ wɩ n wenɩ sãtal na boka ɓɔnasɔ. 12 Dɩ jamana gbaar thɩraale a cʋʋna thɩrkara Thãgba Kɔ̃tɩnɩ cɔra na ɔɔ jamana cɔra. A gbaar ɩkha a cʋʋ bɩ̃ bɩ̃ thɩ̃ɛsɔɔkɛ dɔnɩ kolõjʋ̃ʋsɔ na kãkarmasɔ a ha nɩ khɩna. Wa bir 'lɛ sãtal thɩra thale dɩɩ hona gele bã, wa bir 'lɛ ga carakɛ a dana nĩikɛ bã.
13 Salomɔ̃ jamana dakha har Saba jamana khɛrɩle gɩrɛ fɛʋʋkɛ a n ƴaalnɩ, na gɩrɛ fɛʋʋkɛ a bɩɛlnɩ. A haarɛ dakha khaardaasɔ dɩɩ tee kha na mɔ̃ ɔr Salomɔ̃ jamanaa puno hanɩ. Agɩpɩ khɛrɩle kɛrɛ kɔ̃ ɔɔ dʋɔ, ɔr na ɔɔ thɔ̃dara.
Salomɔ̃ɔ lẽle thɩ̃ \ref 2Chr. 9. 13-29; Ps. 62. 11; Ec. 5. 12
14 Dɛ kilə nʋɔɔkɛ Salomɔ̃ n 'lɛnɩ yɩɛr wo yɩɛr fɛw, gɩ har tɔn kpelẽsɔ. 15 Sɩrakɛ gɩrɛ ƴaƴabɩ kɔ̃tɩna n lɩmɩnɩ hale a ɓanɔ, na gɩrɛ ƴaƴabɩ kpãkparasɔ n lɩmɩnɩ, na gɩrɛ ca kpɩɩsɔɔ jamanasɔ n lɩmɩnɩ, na lãphosɔɔkɛ gobanɛrsɔɔkɛ a pɛrnɩ le dɩɩra n teenɩ.
16 Salomɔ̃ jamana pɛrɛ dɩ wɩ cʋʋ tomɩ phida kɔ̃tɩna taaɲɔɔkɛ (200) wɩ cʋʋnanɩ dɛ, a be gɩ na ɲɛ̃ɛ. Bɩɛlɩ dʋbɩ daan dɛ kilə maadõsɔ. 17 A cʋʋrɛ dakha dɛ tomɩ phida yɩrasɔ tãatherɩkɛ wɩ benɩ na ɲɛ̃ɛ. Dɩ dɛɛkɛ wɩ calnɩ bɩɛl daan kilə bɩɛl na dakuru, dɩ jamana thɩɩn gɛr le cʋɔraakɛ wɩ n wenɩ “Lɩbã thɩr lu cʋɔr”. 18 Dɩ jamana pɛrɛ dɩ wɩ cʋʋ jamana too pa kɔ̃tɩ̃ɩ tə̃ə na thũgbu khɛla, a calʋ dɛ kile haar koo. 19 Jamana too paarɩle hananɛ jʋʋn paar nɛ kana maadõ. Wɩ pɛrɛ gɔr ƴɛl paar bilə̃ bilə̃. A hananɛ ɲɛ̃ dɛ̃ɛ paarsɔ gɛllɔ fɛw, na sidũ'unə yeɲɔɔkɛ wɩ cʋʋnɩ dɩ wɩ jɩɩl khunə ɲɛ̃ dɛ̃ɛ paarsɔɔle. 20 Dɩ sidũ'ũ kpɩɩsɔ yʋɔr yeɲɔ hale wo jʋʋn paara, nɛ kana maadonaale gɛllɔ gɛllɔ fɛw. Wa cʋʋ thɩ̃ caar thale jamana dɩ kpɩɩra yuurəka'. 21 Dɛ wɩ cʋʋna Solomɔ̃ɔ ɲɔ ɲɔdasɔ fɛw. Dɩ thɩ̃beekɛ hanɩle cʋɔraakɛ wɩ n wenɩ “Lɩbã thɩr lu cʋɔrɔ”, dɛ kile haar wɩ cʋʋna gɩ fɛw. Wa cʋʋ thɩ̃ bɩɛllakɛ na dɛ buloə'. Gɩdonɩ Salomɔ̃ɔ bɔɔ wa n therna dɛ buloə'. 22 Gɩdonɩ Salomɔ̃ jamana kɔɔ hananɛ Tarsɩsɩ batosɔɔkɛ n jalanɩ ƴɔɔ na Hɩramɩ batosɔ, yɛna yẽther wo yɛna yẽthera, wɩ n pɔnanɛ dɛ na dɛ bulo na thũgbu khɛla na kɔkɔ na 'lominəəkɛ hɔnɩ kulukulu.
23 Salomɔ̃ jamana 'lɛr kɔ̃tɩɩnɛ a jɔ thɩɩkɛɛ jamanasɔ fɛw dɩɩ the ɔɔ lẽle thɩna na ɔɔ kpɛsɛra. 24 Dɩ tɩbɩla fɛw n ƴaalɛ wɩ yɩɩ wa n pɛ kpɛsɛrɛɛkɛ Thãgba haanɩ nũu. 25 Dɩ yɩɛr fɛw tɩbɩl wo tibil n pɔnanɛ khaardaasɔɔkɛ dɔnɩ thɩ̃ɛsɔɔkɛ wɩ cʋʋnanɩ dɛ bulo na dɛ na kẽkena na koke thɩ̃ɛsɔ na thɩ̃ɛsɔɔkɛ n hʋnanɩ daw na gãgona na kũkə̃-gãgona.
26 Salomɔ̃ gbɛbɩrɛ koke hotorosɔ na gãgo jʋʋn sɔrasɛ dɩ wɩ ha pa bɩɛl. A kɔɔ hananɛ koke hotorosɔ gbɩlanɩ taanã (1 400) na gãgo jʋʋn sɔrasɛ gbɩlanɩ yʋɔr yeɲɔ (12 000). Dɩ a pɛr ɩkha dɩɩsɔɔraakɛ hananɩ sɔrasɩ jɩɛsɔ, a pɛ ɩkha le Jerujalɛm, dɩ wɩ wɔrɔnaa. 27 Salomɔ̃ cʋʋrɛ dɛ bulo dɩɩ ƴɔ Jerujalɛm a ho bokana, a cʋʋ sɛɛdɩrɩ thɩra dɩɩ ƴɔ a ho sɩkomɔɔr thɩraakɛ hanɩ ɓẽtɛ bəənnə. 28 Ejipiti na Silisi dɩɩra wɩ n thena Salomɔ̃ɔ gãgosɔ a pɔna, dɩ ɔɔ ƴaƴabɩdara n jal le a the wɩ gbulona gbulona nʋɔraakɛ wɩ pɛrnɩ. 29 Koke hotorosɔɔkɛ wɩ n thenanɩ Ejipiti a pɔna, bɩɛlɩ the nɔ har dɛ bulo be taamaadõ (600), dɩ gãgo bɩɛlɩ the nɔ ha dɛ bulo be tamaa na kpalaɲɔ yʋɔr. Ɔmɛna wɩ n pɔna a dolõ Hɛtɩɩ məlsɔɔ jamanasɔɔra fɛw na Siiri jamanasɔɔra fɛw.