Davɩdɩ pɛrɛ dɩ wɩ ther Ɩjɩrayɛl bɩsana
24
1 Wi bɩɛl Thãgba Kɔ̃tɩnɩ nĩkhi ɩɩrɛ Ɩjɩrayɛldarara wo. Dɩ gɩ car Davɩdɩ a pɛr, dɩ pɛr wɩ thera tɩbɩla, Judaa məlsɔ fɛw na Ɩjɩrayɛlda wɩrɛ sɛnɩ fɛw.2 Dɩ jamana sor Joabɩraakɛ dɔnɩ sɔrasɛɛ kɔ̃tɩ̃, kɛ hanɩ le ɔɔ kɩrɔ ayɩ: «Kpaarɛ Ɩjɩrayɛl caarsɔɔra fɛw. Fɔna Dã a jala danana Bɛɛrseba. Thera tɩbɩla fɛw, ɩ̃ jɩ yemɔ̃ wɩ hanɩ.» 3 Dɩ Joabɩ sʋʋraa: «Ɩ̃ ƴaal dʋɔn yaa jamana, Thãgba Kɔ̃tɩn, afɩ Thãgba n cʋɛ tɩbɩla, mɔ̃ wɩ hanɩ nĩ wɩ bir wɩ dɛbɩrɔ ɔmɛna yẽbe tamaa (100) der paar yemɔ̃, fɩ yɩ gɩ na yire! Sɩ aɲe wer gɩ yaa jamana dɩ fa n ƴaal fɩ ther tɩbɩlala?» 4 Sɩ jamana bor sa yɩ phubi, ga cʋʋrɛ; dɩ Joabɩ na sɔrasɩ kɔ̃tɩna tha thʋnɔ sa tu ɔɔda. Dɩ wɩ faarɛ jamana sa the jal wɩ ther tɩbɩlala. 5 Dɩ mɔ̃ wɩ seernɩ Jʋrdɛ̃ mɩɩr, wɩ fʋrɛ there Aroyɛɛr dɩɩra, kɛ hanɩ wi phã paar ɲɔ̃bɩlana. Agɩpɩ, wɩ lʋʋn Gadɩɩ mǝlsɔɔ bǝnǝ, a kpãasɛ dɩ wa n jalna Yajɛɛr dɩ bilo. 6 Dɩ wɩ ther le a jal Galaadɩ bəənə. Agɩpɩ dɩ wɩ jal Tahɩtɩm-Hosɩ bǝǝnǝ. Dɩ wɩ ther liir a jal Dã-Yaan na Dã-Yaan dɩ khuirəsɔ, phapha a jalna dana Sɩdɔ̃ khuirǝ. 7 Dɩ le wɩ jal a dã Tɩɩr dɩɩraakɛ gʋʋ kpalalɔnɩ, a bir the le a jal Hɩvɩtɩsɔɔ dɩsɔɔra na Kanãadaraa dɩsɔɔra. Agɩpɩ wɩ pɩɩrnanɛ Bɛɛrseba dɩɩ, kɛ hanɩ Negɛvɩ bəənə, kɛ dɔnɩ Judaa məlsɔɔ bə̃. 8 Dɩ sɩpora yʋɔr phe bire na wire kpelena wɩ kpaarɛ dɩɩ a cã dɩphã; sa kɛr bir Jerujalɛm. 9 Dɩ Joabɩ gbaar tibil nʋɔra a mɩɛ jamana ayɩwɔɔ: «Ɩjɩrayɛl caarsɔɔra, konaakɛ dananɩ ko kɩɩr, wɩ har gbɩlanɩ der paar taamakõther (800.000). Judaa cara, wɩ har gbɩlanɩ der paar taamɔy (500.000).
Thãgba thɔnanɛ kho mananɛ ɔɔ toora dɩɩ do Davɩdɩɩ dɩpa dɔ nɔɔ.
10 Ɔbɔɔkɛ Davɩdɩ thernɩ tɩbɩla thale a na pɩ, haar thʋʋrɛ jɔɔ ka. Dɩ a sor Thãgba Kɔ̃tɩnna ayɩ: «Mɩ cʋʋrɛ sopuu kɔ̃tɩ̃ɩ cʋʋ caarɩkɛra mɩ cʋʋnɩ. Mɩ n bɩɛl fɛr, faa ɩ̃ dɩpa a ha mɩ yaa Thãgba Kɔ̃tɩn; gɩdonɩ dǝ̃bǝǝlela mɩ cʋʋ.»
11 Dɩ mɔ̃ Davɩdɩ na ɩɩrnɩ duuro Thãgba thʋɔn ɔɔ mɩmɩɩ Gadɩ, kɛ dɔnɩ Davɩdɩɩ fɩl 'laadaar a sʋʋraa thakɛ: 12 «Jala Davɩdɩɩ pa a sʋɔraa wɔɔ: "Mɩ thɩɩn farɛ thɩlkena yẽther; te bɩɛl gɛr yẽthera, ɩ̃ gba ɩ̃ pɛ far."» 13 Dɩ Gadɩ jaal Davɩdɩɩ pa, a mɩɛ ɩ, sa bulee: «Ʋmɔ̃ɔ thɩlke ca fɩ n ƴaal Thãgba n pɛ far? Yɛna makoɲɔɔ kɔmɛr fɩ n ƴaal afɩ dʋɔ yaa, sodara fɩ n ƴaal wɩ weelene fɩ a cʋɛna sɩpora yẽther? Dɩ agɩbo wo kho mananɛɛkɛ n kɔnɩ fɩ n ƴaal gɩ lona afɩ dʋɔ a cʋɛna wire yẽther? Kpɩɛrɛ hɩnɛ, sa sɔ mar gɩrɛ mɩ teenanɩ ɩ̃ birǝ sɔ ʋrɛraakɛ thɔna mɩnɩ.» 14 Dɩ Davɩdɩ so Gadɩra: Haar kʋɛ mɛr koo. Sɩ nɩ dɔ sɩ ka sɩ ji Thãgba Kɔ̃tɩnɩ ɲɔ̃kɔɔ gɩdonɩ a jɔrɛ bɔ fʋʋr na sobɔr. Sɩ ma n ji tɩbɩlaa ɲɔ̃kɔɔ wer kpɩɩraka'.»
15 Dɩ Thãgba Kɔ̃tɩn thɔnanɛ Ɩjɩrayɛl dɩɩra kho mananɛɛkɛ n kɔnɩ. Dɩ gɩ fʋrɛ duuro a jalna dana bɔɔkɛra wɩ pɛrnɩ. Dɩ a fʋna Dã a dana Bɛɛrseba, tɩbɩla gbɩlanɩ kpalãther yʋɔr (70.000) khiire. 16 Mɔ̃ thɔ̃thɔ̃ thuiile 'laanɩ ɲɔ̃ɔ gɩ do Jerujalɛmdara a n kʋʋr, gɩ thʋrɛ Thãgba Kɔ̃tɩn thɩlke caaraale. Dɩ a sor thɩ̃ kʋɛ thɔ̃thɔ̃ thuirǝǝlera hanɩ tɩbɩlaa thɩ̃thɩɩn a yɩ: «Gɩ dãa dɩphã! Te afɩ ɲɔ̃ mɛ̃». Dabɔɔle, Aravɩnaakɛ dɔnɩ Jebusɩdaarɩ bile gbol khɔra Thãgba Kɔ̃tɩnɩ thɔ̃thɔ̃ thuule kɔɔ ha.
17 Ɔbɔɔkɛ Davɩdɩ yɩnɩ thɔ̃thɔ̃ thuiile da n kʋʋr tɩbɩla, a sor Thãgba Kɔ̃tɩnna ayɩ: «Pha, mɛr cʋɛ puure! Mɛr cʋɛ dɩ paar. Sɩ tɩbɩlaakɛ, aɲe wɩ cʋʋ? Dɩ ka pɛ mɛra sor, mɛrɛ na ɩ̃ cɔdara.»
Davɩdɩ mɩrɛ bonɩ ji paar Thãgba Kɔ̃tɩnna.
18 Ga wiilera Gadɩ pɔr Davɩdɩra a sʋʋraa: «Jala Aravɩnaakɛ dɔnɩ Jebusɩdaarɩ bile gbola a mɛ bonɩ ji paar Thãgba Kɔ̃tɩnna.» 19 Dɩ Davɩdɩ jaal mɔna Thãgba Kɔ̃tɩn kɔɔ sonɩ Gadɩra dɩ sʋʋraa. 20 Dɩ le bile gbʋʋla ƴũu, Aravɩna na hɩɩnɛ, a yɩ Davɩdɩ jamana na ɔɔ thɔ̃dara dɩ wa n pʋɔraa. Dɩ a tɔr a thɔɔ jamana, a gburõkhu ɔɔ ƴɛbʋrɔ, a gʋɛ ƴɩɛ thɩɩra. 21 Agɩpɩ a buleele ayɩ: «Aɲe gɩ dɩ fɛr ɩ̃ kɔ̃tɩ̃ jamana na n ɩ̃ mar thaa?» Dɩ Davɩdɩ sʋʋraa: «Afɩ gbolɩkɛra mɩ n ƴaal fɩ ha mɩ ɩ̃ the, ɩ̃ mɩrɔ bonɩ ji paar Thãgba Kɔ̃tɩnna, gɩ do nɔɔ thɩlkɩɩrɩkɛra n the sɩ gɩ faa tɩbɩla.» 22 Dɩ Aravɩna sʋʋraa: «Thɩmɩɩ na halaa yaa ɩ̃ kɔ̃tɩ̃. Gba gbʋʋlla, a je bonɩ dɔɔkɛ fɩ nanɩ fɩ ji Thãgba Kɔ̃tɩnna. Yɛ nasɔ, gba; gɩ do gɩrɛ fa jinǝni bonɩ thiinǝ. Gba dakha thɩr pɛnaakɛ na n halnɩ dɩ ga n be bile na na kpelele gɩ do dɛɛ fɩ gbɔɔna dɔɔ. 23 Jamana, mɛr Aravɩna hana fɩ fɛw. Ɩ̃ ƴaal ka dʋɔnakɛ Thãgba Kɔ̃tɩn afɩ Thãgba n tea afɩ bonɩra bɔɔbɔɔ.» 24 Sɩ jamana so Aravɩnana ayɩ: «Kpei! Mɩ n ƴaalɛ fɩ dolone mar mɔ̃ the nʋɔ hanɩ ɩ̃ the; ɩ̃ lɩmɩ fɩ oti. Ma gba khaar thɩ̃ɛ, kɛ na nɛ mɩnɩ yɩra ga ɩ̃ jinǝ bonɩɛ Thãgba Kɔ̃tɩn ɩ̃ Thãgbara ga». Dɩ Davɩdɩ gbaar paarra na nasɔɔra a the sikile mũsũ be kpalaɲɔ yʋɔr. 25 Dɩ a mɩrɛ le bonɩ ji paarra Thãgba Kɔ̃tɩnna a jiro bonɩ thiinǝsɔ, na 'likha bonɩɛsɔ. Liir Thãgba Kɔ̃tɩnɩ nĩkhi ie dɩphã dɩɩ bilo, dɩ thɩlkɩɩrɩle the dɩɩra sa faa Ɩjɩrayɛldara.