Davɩdɩɩ pɩpɩɩ thɩmɩɩsɔ.
23
1 Yɛkɛ Davɩdɩɩ pɩpɩɩ thɩmɩɩsɔ:Davɩdɩɩkɛ dɔnɩ Ɩjaɩɩ bikuuni thɩmɩɩsɔ gɩ.
Kuunɩkɛ wɩ khǝini dakpɛ kheire ƴũu phɛbɩ,
ɔɔ thɩmɩɩsɔ gɩ,
Kɛ dɔnɩ ʋrɛ Jakɔbɩɩ Thãgba phiirni jamana dʋʋra;
a dona ʋrɛ Ɩjɩrayɛl bɩsana n kpãganɩ na nɩ daʋsɔ.
2 A sor: «Thãgba Kɔ̃tɩnɩ thu gbaan mɩ da n mɩɩna,
A pɛrɛ ɔɔ thɩmɩɩ ɩ̃ delẽbirǝ.
3 Ɩjɩrayɛlɩ Thãgba mɩɩrɛ,
Ɩjɩrayɛlɩ nãabõ so marɛ ayɩ:
Jamanaakɛ n thɔɔnɩ tɩbɩla na fɩl sarʋ,
kɛ dɔnɩ ʋrɛ n maanɩ Thãgba ɔɔ tɩɩ thɔɔra,
4 a hʋrɛ duur dahɩrɛ, a hona duur wireekɛ n caranɛnɩ ƴũukɛ ndɔlɔ̃pana na hana'.
A Thãgba ɲʋɔn dã a khɩl, ɔɔ carã n cʋʋrɛ thɩ̃ phulole dɩɩ phã.
5 Ɔmɛ̃ Thãgba cʋʋna ɩ̃ cɔdara:
Khorr ʋlfɛrɛ gɩ, dɩ ʋlfɛna mɩ.
Ʋlfɛrɛ gɩ a tɩ, a hana jɔfʋ da n ɔ gar bɔɔ khorr.
A n cʋʋrɛ ɩ̃ taa dɩɩ phã paar fɛw,
mɔ̃ thɩ̃ phulole n phanɩ thɩɩra.
A n ha mɛr thɩ̃ bʋɔɔkɛ ɩ̃ ha n ƴaalnɩ.
6 Sɩ dakhabaasɔɔkɛ na n therananɩ Thãgba ga,
wer hʋrɛ uukɛ wɩ n dʋnanɩ ƴɔɔ.
Tibil na n gba gɩ na ɲɛ̃ khɩɩa'.
7 Ado tibil ƴaal a tha gar, ther a n hana agɩbo kpɩla sar, dɩ kpana dɩ thii dɔɔra dapaara dɩɩ hɩ̃.»
Davɩdɩɩ sɔrasɩ khasɔɔ isɔ.
8 Yɛkɛ wɩrɛ dɔnɩ Davɩdɩɩ sɔrasɩ kuun khasɔɔ isɔ: Yoseba-Sebɛtɩ, kɛ thɛnɩ Takemɔ̃ dɩɩra. A dor kɔ̃tɩ̃ sɔrasɛ khana yẽtheraakɛ n bɛranɩ jamana. Wɩ n wɩɩrɛ dakha Adino Ɛsɩnɩtɩ. Ɔr dɔ ʋrɛ gbaanɩ ɔɔ kpɩla a kʋʋrna kona taamakõther (800) ko bɩɛla.
9 A a karɔ, Ahoaa bikuun Dodo, ɔɔ bikuun Eleajaar kpaanɛ. Ɔr dʋɔn bɩɛl sɔrasɩ khana yẽtheraakɛ kɔɔ thɔɔnɩ Davɩdɩ. Wɛr kɔɔ phiilene Fɩlɩsɩtɛ̃sɔ ɔbɔɔkɛ Fɩlɩsɩtɛ̃sɔ kpanɩ a jɛ wɩ ke kʋʋr, dɩ Ɩjɩrayɛl sɔrasɛ na n caalɛ. 10 Sɩ Eleajaar jɩɩl kɩbɩ, sa kʋ Fɩlɩsɩtɛ̃sɔ dɩ ɲɔ̃ɔ ƴɔl, a tã, a ma bajɩna. Dɩ Thãgba Kɔ̃tɩn 'laa taarɛ dawiile a ha ɔɔ too dɩɩ ɓɔ̃ ka. Ɔbɔɔkɛ Ɩjɩrayɛl sɔrasɛ kɛrnɩ na pɔ Eleajaara, khee thɩ̃ wɩ pɔ a fʋʋr dɩbara.
11 A a karɔ Ageekɛ thɛnɩ Haraar, ɔɔ bikuun Sama kpaanɛ. Wi bɩɛl, Fɩlɩsɩtɛ̃sɔ kpar jɛ ƴɔkul lɛ nʋɔra, Lehi bǝǝnǝ. Dɩ Ɩjɩrayɛl sɔrasɛ caalɛlɛ Fɩlɩsɩtɛ̃sɔɔ ƴɛra. 12 Sɩ Sama jɩɩl lɛ thɩ̃thɩɩn kɩbɩ a tee lɩɛ, sa kʋʋr Fɩlɩsɩtɛ̃sɔ. Dɩ Thãgba Kɔ̃tɩn 'laa kǝǝre a ha Ɩjɩrayɛl dɩɩ ɓɔ̃ ka.
13 Bɔ bɩɛla wo bile kha bɔ khʋra, sɔrasɩ kɔ̃tɩna yẽther, sɔrasɩ kɔ̃tɩna kpelẽ yʋɔraakɛ dɔnɩ Davɩdɩɩ kobisɔ pʋɔraarɛ le Adulam boka kaara, ɔbɔɔkɛ Fɩlɩsɩtɛ̃ sɔrasɛ kɔɔ kpanɩ a jɛ paarɩkɛ wɩ n wenɩ Refayɩmɩsɔɔ ɓɛlɛ̃. 14 Davɩdɩ wer kɔɔ har dabɔɔle ɔɔ wɔ̃ pa, kɛ dɔnɩ fãga paar. Sɩɩ do dabɔɔlera Fɩlɩsɩtɛ̃ sɔrasɛ hale a tee Bɛtɩlɛhɛm dɩɩ.
15 Dapaara dɩkhaa thu fʋrɛ Davɩdɩ dɩ ɩɩ sa so: «Amɛ na hana mɩ ɲɔ̃ tɛ kor ɲʋɔnɩkɛ hanɩ Bɛtɩlɛhɛm dɩ lõfonʋɔra dɩ ma ɲɔ ya fɛ?» 16 Dɩ kuun khana yẽther ɩɩr dapaara a lõ Fɩlɩsɩtɛ̃ sɔrasɛɛ jɛw na fãga a kpãasɛ, a cɛ ɲɔ tɛ koruulee ɲɔ̃ na fãga bɩɩ. Dɩ wɩ jalnanɛ a ha Davɩdɩ, sɩ aa tu na ɲɔa'. A teere a deer thɩɩra bonɩ khaa Thãgba Kɔ̃tɩnɩ ƴɛra. 17 Agɩpɩ dɩ so: «Ma cʋʋ thɩ̃ɛ thale yuuraka', Thãgba Kɔ̃tɩn! Ga do konaakɛra tuoni khir a jal, gɩ hor awɩ thɛthɛɛ tɔmɩn wɩ cɛ ɩna gaa?» Dɩ aa tu a na ɲɔa'. Gɛr dʋɔn kona yẽtherilee dakpɛ thɔ̃ɔkɛ wɩ cʋʋnɩ.
18 Joabɩɩ õkuun Abɩsayɩ, kɛ dɔnɩ Seruyaa bikuun kɔɔ dʋɔn kɔ̃tɩn kuun khana yẽtherɩ gbulonaale. Ɔr gbaan ɔɔ kpɩla a kʋʋrna lãlara tãather (300) wi bɩɛl. Dɩ a 'lɛr ire kuun khana yẽtherilee thɩ̃thɩɩn. 19 Kuun khana kpelẽ yʋɔraale, Abɩsayɩ 'lɛ cʋʋr a jɔ wɩ fɛw. Gɛrra gɩ dɩ debi do awɩ kɔ̃tɩ̃, sɩ aa 'li caca kuun khana yẽtherilee i kpɩɩraka'.
20 Dɩ Yehoyada, kɛ thɛnɩ Kabɩsɛl, ɔɔ bikuun Benaya kpaan. Sʋrasɩ kuun khaa ɔɔ thɩ kɔ̃tɩ̃ kɔɔ do. A kɔɔ dor dakha dakpɛ thɔma na sobɔr. Benaya kɔɔ kʋrɛ Moabɩ kuun khana yeɲɔɔkɛ wɩ n wenɩ Arɩɛlsɔ, kɩrʋ dʋɔn sidũ'unǝ. Ɔrra kɔɔ gbunǝ ɲɔ tɛ koro dawiikɛ nɛɛjɩa n jɛnɩ a kʋ sidũ'ũu. 21 Ɔrra kɔɔ kɔ Ejipiti kuun bɩɛl. Kuun khe wabʋʋ kɔɔ gɩ da n kɔɔ kʋ maar, a hana kpɩla, sɩ Benaya caanʋ na gbol haar dɩbara. Dɩ a tagɩrɛ ɔɔ kpɩllala a fi a kʋnaa. 22 Gɛr dʋɔn Benayaa dakpɛ thɔ̃sɔɔkɛ a kɔɔ cʋʋnɩ. Dɩ a 'lɛr ire kuun khana yẽtherilee thɩ̃thɩɩn. 23 Kuun khana kpelẽ yʋɔraale, ɔr 'lɛ cʋʋr a jɔ wɩ fɛw, sɩrakɛ aa 'li caca kuun khana yẽtherilee i kpɩɩraka'. Dɩ Davɩdɩ pɩɛraa dɩ do kɔ̃tɩn ɔɔ sɔrasɩsɔraakɛ n bɛraanɩ. 24 Wɩrɛ fɛʋʋkɛ hanɩ kpelẽ yʋɔr gbulonenaale dʋɔn: Ajaɛl, Joabɩɩ õkuun na Dodoo bikuun Ɛlana, Bɛtɩlɛhɛmdaar gɩ,
25 na Sama na Elɩkaakɛ thɛnɩ Harɔɔdɩ,
26 na Elɛsɩ, kɛ thɛnɩ Pelɛtɩ, na Ɩɩra, kɛ thɛnɩ Tekoa, Ɩkɛsɩɩ bikuun gɩ,
27 na Abɩɛjɛɛr, kɛ thɛnɩ Anatɔtɩ na Mebunaɩ, kɛ thɛnɩ Husa,
28 na Salmɔ̃, kɛ thɛnɩ Ahoa na Marayɩ, kɛ thɛnɩ Netofa,
29 na Helɛbɩ, Baanaa bikuun gɩ, kɛ thɛnɩ Netofa na Ɩtayɩ, Rɩbayɩɩ bikuun gɩ, kɛ thɛnɩ Gibea, Bɛ̃jamɛ̃ɛ mǝlsɔɔ bǝnǝ gɩ,
30 na Benaya, kɛ thɛnɩ Pɩratɔ̃ na Hɩdayɩ, kɛ thɛnɩ Nahale-Gasɩ,
31 na Abɩalbɔ̃, kɛ thɛnɩ Bɛtɩ-Araba na Ajɩmavɛtɩ, kɛ thɛnɩ Bahurim,
32 na Elɩaba, kɛ thɛnɩ Salbɔ̃ na Yasɛnɩɩ bikũusɔ na Yonatã, 33 na Sama, kɛ thɛnɩ Haraar na Ahɩam, Saraar bikuun gɩ, kɛ thɛnɩ Araar,
34 na Elifelɛtɩ, Ahasɩbayɩɩ bikuun gɩ. Kuun bɩɛlɩkɛ thɛnɩ Maaka, ɔɔ bikuuni bi gɩ, na Elɩam, kɛ dɔnɩ Ahɩtofɛlɩ bikuun, Gilo a the;
35 na Hesɩrayɩ, kɛ thɛnɩ Karmɛl, na Parayɩ, kɛ thɛnɩ Arabɩ,
36 na Ɩgal, kɛ thɛnɩ Soba, Natãa bikuun gɩ, na Banɩ, kɛ thɛnɩ Gadɩɩ cara,
37 na Selɛkɩ, Amɔ̃ɔ mǝlǝ a the na Narayɩ, kɛ thɛnɩ Berɔtɩ. Ɔr n gbaan Joabɩɩ koke thɩ̃bi. Joabɩɩ nɩ n dʋɔn Seruya;
38 na Ɩɩra na Garɛbɩ, kɛ thɛnɩ Yetɛɛrɩ cɔkara,
39 na Iirɩ, kɛ thɛnɩ Hɛtɩɩ mǝlǝ, wɩ gbɛbɩnɩ fɛw, kpelẽ yʋɔr makoɲɔ wɩ kɔɔ ha.