Davɩdɩɩ Thãgba khɩɩ nɩ, kǝǝreraakɛ a 'lɛnɩ ɔɔ lãlaardarara.
22
1 Ɔbɔɔkɛ Thãgba Kɔ̃tɩn taanɩ Davɩdɩ ɔɔ lãlaardarara, a taanaa dakha Sayuli ɲɔ̃kɔɔ pɩ, gɛr a dʋrɔ nɩɛɛkɛ a fʋɔrna Thãgba Kɔ̃tɩn.2 ayɩ: «Thãgba Kɔ̃tɩn dʋɔn ɩ̃ nãabõ, a dona ɩ̃ fãga pa, a dona ɩ̃ teteedaar.
3 Nãabʋ̃ʋ ɩ̃ Thãgba do mar dɩ̃ wɔnɔ.
Tomɩr phidaa gɩ, kɛ n bɛra mɩnɩ.
Fãga paar gɩɩkɛ mɩ n wɔnɩ a 'lɛ taarɛ.
Wɔ̃ pa bʋɔ a do mar ɔbɔɔkɛ mɩ hanɩ caara.
Ɔɔ ya ɩ̃ tataa! Fɛr n taa mɩ gbõgolõdarara.
4 Mɩ hulene : “Dɔ Thãgba Kɔ̃tɩn n 'lɛ kpãgarɛ”,
Ɔrkɛ mɩ n hanɩ na we, dɩɩ do a taa mɛr ɩ̃ lãlaardarara.
5 Khir kɔɔ ibi mer, ɲɔ kalbi khaa.
A fuu mer haar a ho thɩ̃ kʋɛ mɩɩrɩkɛ nĩkhii fʋnɩ.
6 Khĩdi dɩ jɔrkɔ̃sɔ kɔɔ dii marɛ,
dɩ khi kẽkẽ wi phera na n kɔɔ fʋ mɩna waa.
7 Ɩ̃ ha kʋɛra, mɩ hulene a wena Thãgba Kɔ̃tɩn.
Mɩ wer ɩ̃ Thãgba.
Dɩ lele ɔɔ fʋɔr cɔra, a nɩɛrɛ ɩ̃ wi.
Ɩ̃ hulẽbi jaal a lʋʋn nuunǝ.
8 Dɩ jẽu fʋrɛ thɩɩ dɩ yɛyɛɛ,
dɩ go kʋʋrɩkɛ ƴũu dɛɛnɔnɩ gbugbuyore,
dɩ ƴũu na thɩɩ na n jẽ gɩdonɩ Thãgbaa nĩkhi car.
9 Dɩ isiir na n bãa mɩ̃kanana.
Dɩ thɩ̃ kʋɛ dɔɔ na n thɩɩ nʋɔra a
gbɛbɩna kha dɔ khǝ̃be yǝǝyǝǝ.
10 Dɩ a kpɛlɛnɛ ƴũu sa gbũ,
a gbune na ndɔlɔ̃pa bir kɔ̃tɩ̃ɩ himǝ himǝ ɔɔ nɛ balɔ.
11 A jʋʋnɛ Seribɛ̃ hotorora da n ubinəə.
Dɩɩ ho jɛ gbɛllala a too da n dɛ.
12 Dabirǝ a thi a dii kẽkẽ wa khaa,
ndɔlɔ̃pa dʋba gɩ jirbirii a hana
ɲʋɔn a phii.
13 Dɔ khǝ̃be hale dɩ ga n the
dahɩrɛ carbaraaraakɛ kʋlɛɛnɩ ƴɩɛ,
14 Dɩ Thãgba Kɔ̃tɩn phaan nʋɔ le ƴũu
thãgba phɛɛ khaa, Ƴũu Pǝrdaar phaan nʋɔ dɩɩ tii.
15 Thãgba Kɔ̃tɩn thar sẽe paar fɛw a bɩ̃bɩlã lãlara fɛw.
A lɩrɛ dɔɔ, dɩ lãlara bɩ̃bɩlã na hʋɛ dɩɩ dɩɩ.
16 Dɩ laɲɔ̃ thɛrɛɛ yɩrrɛ, dɩ dɩ thɛrɛɛ carã,
Dɩɩ the Thãgba Kɔ̃tɩnɩ phaana,
Dɩɩ the fesu jɩɛraakɛ n thɛnɩ ɔɔ mɩ̃kasɔɔra.
17 Dɩ le ƴũu Thãgba Kɔ̃tɩn 'laarɛ ɲɔ̃ɔ a fʋ mɩ.
A vǝ̃ mer ti puu kʋkʋʋraakɛ n ibǝ mɩnɩ ɲɔ khaa.
18 A taa mɛr ɩ̃ lãlaardararaakɛ hananɩ fãga ka,
kɛ dɔnɩ ɩ̃ sodaraakɛ n laarɛ mɩnɩ, kɛ hananɩ fãga a jɔ mɩ.
19 Ɩ̃ thɩlke wi wɩ hɩɩnɔ sa ɩɩrna mɩ,
sɩ Thãgba Kɔ̃tɩn hale a do ɩ̃ nɔ sa pa.
20 A ti mer puurera, ɩ̃ puno ɩ̃ fe;
a na mɛr, gɛr gɩ dɩ taa mɩ.
21 Thãgba Kɔ̃tɩn cʋʋ marɛ mɔna ɩ̃ fɩl sar hanɩ,
a lɩmɩ mɛr mɔna ɩ̃ bɔ cʋʋ hanɩ.
22 Gɩdonɩ mɩ fʋrɛ ɔɔ hʋsɔ bɔɔbɔɔ,
Ma lɛ̃ a lõ puurera sa faa ɩ̃ Thãgba ga.
23 Mɩ gar yire ɔɔ jɔfʋsɔɔra fɛw dɩ ma n hɩɩn,
Ma khokhɩa sa faa ɔɔ nɔ thɩmɩɩsɔa'.
24 Mɩ telene ɔɔ ƴɛra,
mɩ n jɩɛ jʋʋr ɩ̃ɩbara, ɩ̃ 'lee dɩ paar.
25 Gɛr Thãgba Kɔ̃tɩn cʋʋ mar mɔna ɩ̃ fɩl sar hanɩ,
a ka mɛr mɔna a yɩnɩ ɩ̃ fɩl dɩɩ bɔr.
26 Ʋrɛ dʋɔnɩ sobɔdaar ya Kɔ̃tɩn, fɩ n nɩnaanɛ afɩ sobɔdaar do,
ʋrɛ telenenɩ fɩ n nɩnaanɛ afɩ telẽ.
27 Fɩ n nɩnanɛ afɩ phu ʋrɛraakɛ phonɩ,
sɩ tɩɩ gõgolõ wer, fɩ n nɩnaanɛ cɩarɛ.
28 Fɩ n bulle caarɩkɛ wuronɩ dɩbara,
sɩ dɩ fɩ wur i kadara na afɩ yi hɩɩn ha.
29 Thãgba Kɔ̃tɩn ya, fɛr dʋɔn ɩ̃ dahɩrɛ,
ɔɔ, fɛr n caranɛ mɩ ɩ̃ dabirǝrǝ.
30 Fɛr n haan kha na mɛrɛ dɩ̃ 'la lõ sɔrasɩ lãlararaakɛ dɔnɩ koke thɩ̃ haar,
afɩ fãga mɩ n kãasɩna go gbã pɩɛ.
31 Thãgbaa hʋsɔ bɔrɛ a dã thu,
sobɔr haar ɔɔ thɩmɩɩsɔ do.
Tomɩr phidaa a do na sobɔr wɩrɛ fɛʋraakɛ faaraanɩ awɩbara.
32 Amɛ dʋɔn Thãgba,
saagado Thãgba Kɔ̃tɩn ga?
Dɩ amɛ dʋɔn nãabʋ̃ʋ,
saagado asɩ Thãgba ga?
33 Thãgba dʋɔn mar bɛrbɛr bʋɔ, na sobɔr,
ɔr n phɛlla mar hʋɛɛkɛ bʋɔnɔnɩ.
34 A cʋʋrɛ ɩ̃ nɛ dɩɩ phe jʋwala khaa,
a n cʋʋ mɛr dɩ n jɩɩl kɩbɩ gĩgĩ gbanana.
35 Ɔr n dɩrɛ mɩ ɲɛ̃bi jɩɩr kʋʋrra,
dɩ cʋʋ mɩ dɩ̃ puno a jʋʋn tha khɩɩkɛ wɩ sanɩ na ther sɩɛ.
36 Fɩ do marɛ tomɩr phidaakɛ n taanɩ yaa Kɔ̃tɩn,
Mɔ̃ fɩ n tunɩ ɩ̃ bɩɛl, gɩ n ha mɛr fãga.
37 Fɛr n cʋɛ mɩ dɩ ma n ɩɩr na phananɛ,
sɩ ɩ̃ nɛ na n ƴʋɔlla'.
38 Mɩ n weere ɩ̃ sodara a kpaan a bũburõ wɩ;
a ma bũburõ wɩ a tǝ', ma n kɛr sa faa wa'.
39 Mɩ n kʋʋr wɛr, a cɩ wɩ yɩra yɩra,
wa puno na ɩɩr bã;
thɩɩra wɩ ha ɩ̃ nɛ ballɔ,
40 Fɩ n to mer fãga kʋʋrra,
dɩ fɩ cʋʋ ɩ̃ sodara dɩ wɩ pupur ɩ̃ nɛ ballɔ.
41 Fɛr n dɔ nɔɔ ɩ̃ lãlaardara n pɛ marnɩ khiru,
Mɩ bũburone ɩ̃ sodara a pɩ fɛw.
42 Wɩ hɩɩnɛ thʋnɔ wa n yɩ tataa ga,
a ɓa hɩɩn Thãgba Kɔ̃tɩn, dɩ aa dee war nʋɔa'.
43 Mɩ n nã wɛr thɩlãkobi khaa,
mɩ n nã wɛr, a saar wɩ,
mɔ̃ wɩ n saarnɩ hʋ thɩ̃thɩ̃ pɔsɔ.
44 Fɩ taa mɛr ɩ̃ too cɩ̃cɩmana,
fɩ thɩɩn mɛr ɩ̃ dɔ ca kpalaa kɔ̃tɩ̃,
caarɩkɛ ma kɔɔ jɩnɩnakɛ mamara ga,
wɩ n do marɛ thɔma.
45 Kpakpala n ɩnɛ dɩ wa n fɩɩl mɩ,
sɩ a mɩ so nʋɔ babɩɛl, wɩ n nɩ mɛr nũu.
46 Ɲɛ̃ɛ khiir wer koo,
Wɩ jɩɩn dɩ wa n thɩɩrna awɩ fãga para.
47 Yidaar Thãgba Kɔ̃tɩn do,
Ɔrkɛ dɔnɩ ɩ̃ nãabõ hɩna khɩɩrɛ!
Dɔ Thãgbaakɛ dɔnɩ ɩ̃ tataa nãabõ na n 'lɛ kpãgar.
48 Ɔr dʋɔn Thãgbaakɛ n tirenɩ ɩ̃ hel,
ɔr n wuro caarsɔ dɩ wɩ jo mar.
49 Fɩ ti mer ɩ̃ lãlaardarara yaa Kɔ̃tɩn,
fɩ ha mɛr kǝǝre ɩ̃ sodarara;
fɩ vǝ̃ mer a ti ha khãyɩdarara.
50 Gɛr gɩ ma n kpãga fɛr ca kpalaa
thɩ̃thɩɩn yaa Thãgba Kɔ̃tɩn!
Afɩ i dʋbɩ nɩ ma n khɩ̃.
51 Thãgba Kɔ̃tɩn n cʋʋrɛ thɩ̃ kɔ̃tɩna,
Dɩ taa jamanaakɛ a phiirni.
A bulole haar ʋrɛraakɛ a pɛnɩ niin yʋɔ a phiiruu;
Mɛr Davɩdɩra gɩ, na ɩ̃ mǝlsɔɔra bɔɔ fɛw waa khorr wʋ̃ʋ.»