Yɛnã yẽther kɔmɛrɩkɛ jeni na gɩrɛ kɔɔ dananɩ na Gabãɔdara na Sayuli mǝlsɔɔra.
21
1 Davɩdɩɩ jamana do bɔɔ, kɔmɛr kɔ̃tɩ̃ɩ kɔɔ jire a cʋʋna yɛna yẽther. Dɩ Davɩdɩ bulele Thãgba Kɔ̃tɩn dɩ sʋʋraa ayɩ: «Sayul na ɔɔ too tɩɩ kʋʋr dɔ kɩrʋ dɩ kɔmɛr ji; gɩdonɩ Sayul kɔɔ kʋʋrɛ Gabãɔdara.» 2 Dɩ jamana wer Gabãɔdara, a mɩɩna wɩ. Gabãɔdara na kɔɔ do Ɩjɩrayɛl caara', sɩ Amɔɔr məlsɔ gɩ a sɩ; dɩ Ɩjɩrayɛl bɩsana kɔɔ ʋlfɛna wɩ ɩna kʋʋr wa'. Sɩ Sayuli gbɛ̃gbɛrɛ̃ɛkɛ a hananɩ Ɩjɩrayɛl na Judaa məlsɔɔra dɔ nɔ dɩ ƴaalakɛ a kʋʋr wɩ a ti.3 Dɩ Davɩdɩ bule wer a yɩ: «Aɲe teana ɩ̃ cʋɛ nar tɔr? Dɩ aɲe ma gba a na phʋɔlna puureekɛ wɩ cʋʋ nɩnɩ, sɩ nɩ puno nɩ bɔna Thãgba Kɔ̃tɩnɩ too?» 4 Dɩ Gabãɔdara birsee: «Asɩ so na Sayul na ɔɔ cɔdara, ga do dɛ na war na gʋrɛ ga; dɩ ga do wo asɩ pa gɩ ha dɩ sa kʋ Ɩjɩrayɛl bɩsaana'.» Dɩ jamana so war: «Dɩ nɩ sɔ mar gɩrɛ nɩ n ƴaalnɩ ma cʋʋ narɛ.» 5 Dɩ Gabãɔdara so Davɩdɩra ayɩ: «fɩ jɩrɛ dɩ Sayul kɔɔ ƴaalɛ a kʋʋr sɩrakɛ a ti. A ƴaalɛlakɛ a bũburõ sɩ Ɩjɩrayɛl dʋɔ ɓibi; bɩɛlakɛ na n sɩa'. 6 Dɩ gɛr gɩ, wɩ hana sɩ kona makoɲɔ ɔɔ mǝlsɔɔra, sɩ ju wɩ Thãgba Kɔ̃tɩnɩ ƴɛra Gɩbea dɩɩra, ka dɔnɩ Sayulɩkɛ Thãgba Kɔ̃tɩn phiirnɩɩ dʋɔ.» Dɩ jamana so war: «Ma ha nɛr.» 7 Dɩ Davɩdɩ borore Mefibosɛtɩ, kɛ dɔnɩ Sayuli bikuun Jonatãa bi; gɩdonɩ Davɩdɩ kɔɔ ʋlfɛrɛ kha na ɔɔ thɩ Jonatã a wena Thãgba Kɔ̃tɩnɩ i. 8 Sa fʋ Armonɩ na Mefibosɛtɩa , kɛ dɔnɩ Sayuli bikona yeɲɔɔkɛ Ayaa bikhɛr Rɩsɩpa kɔnɩ. A fʋlɛlɛ dakha Sayuli bikhɛr Mɩkalɩb bikũusɔ yemɔɩɩkɛ Barjɩlayɩɩkɛ thɛnɩ Abɛl-Meholaa bikuun Adɩrɩɛl kʋɔnaanɩ. 9 Dɩ a gba wɛr a dʋ Gabãɔdaraa ɲɔ̃kɔɔ dɩ wɩ ju wɩ gɔ̃gʋɔna, Thãgba Kɔ̃tɩnɩ ƴɛra. Wɩ kʋʋr wɛr caca wiresɔɔkɛ wɩ n tɔ̃tʋɔnɩ ɔɔjɩ khar, dɩ wɩ gbɛbɩrɛ khiir, wɛr makoɲɔra fɛw.
10 Dɩ Rɩsɩpa, kɛ dɔnɩ Sayuli khikhɛr gbaar bɔrɔ kɩ̃kɩɩnɩkɛ a n kɔɔ tonɩ a bel bokaara ƴũu a too liirrǝ, a fʋna ɔɔjɩ khar tɔ̃tʋɔnɩ a ba dana bɔɔkɛ thãgba ɲʋɔn danɩ a pɛ kherǝ. Dɩwɩlɔ, a n pɩɛrɛ 'lominǝ wa n ji kherǝ ga, a dɩɩ tɩ̃ da n pɩɛr hɔ̃ nʋma wa n wɔrɔ̃ wa'. 11 Dɩ wɩ mɩɩrɛ Davɩdɩ gɩrɛɛkɛ Rɩsɩpa, Sayuli khi khɛrɩkɛ dɔnɩ Ayaa bikhɛr kɔɔ cʋʋnɩ.
12 Le Davɩdɩ ɩɩr jal a tee Sayul na ɔɔ bikuun Jonatãa khubisɔ Yabɛsɩ Galaadɩdarara; gɩdonɩ mɔ̃ Fɩlɩsɩtɛ̃sɔ punonɩ Sayul Gɩlboa gɔ̃gʋɔna pɩ, wɩ gbaar ɔɔ khi na Jonatãa khi a ju Bɛtɩ-Sẽa dɩɩra dahɩrɛ paar. Le Yabɛsɩdara kɔɔ jal a yu wɩ a tiir. 13 Dɩ a khɩɩrɛ Sayul na ɔɔ bikuun Jonatãa khubisɔ le Yabɛsɩ. Agɩpɩ wɩ khɩɩrɛ dakha tɩbɩla makoɲɔɔkɛ wɩ kɔɔ junɩɩ khubisɔ. 14 Dɩ wɩ gbɛbɩnanɛ Sayul na ɔɔ bikuun Jonatãa khubisɔ a jalna Sela dɩɩra, Bɛ̃jamɛ̃ɛ məlsɔɔ dʋɔ a dʋ Kɩsɩɩkɛ dɔnɩ Sayuli thɩɩ kaw. Ɔbɔɔkɛ wɩ cʋʋnɩ gɩrɛ jamana sonɩ fɛw a pɩ, Thãgbaa nĩkhi ier.
Davɩdɩɩ kuun khasɔɔ kookɛ wɩ kenɩ na Fɩlɩsɩtɛ̃sɔ
15 Fɩlɩsɩtɛ̃sɔ bire ɩɩrna kʋʋr wo Ɩjɩrayɛldarara. Dɩ Davɩdɩ na ɔɔ sɔrasɩsɔ jaal a kena Fɩlɩsɩtɛ̃sɔ. Bɔɔ gbe dɩɩ do Davɩdɩ vɔɔrɛ. 16 Dɩ Rafaa mǝl bɩɛl hale da n do Isebi-Benɔbɩ, a saa bajɩna phaa ɔɔ lophɛrɛra, sa hana ther sɛ kpɩla. Kpɩla kpulobiree harakɛ kɔɔ dʋbɩrɔrɛ a ka kilǝ yẽther. Dɩ a ƴaalɛ a kʋ Davɩdɩ. 17 Dɩ Seruyaa bikuun Abɩsayɩ car pɔ a bul Davɩdɩ a kʋ Fɩlɩsɩtɛ̃ kuunile. Liir Davɩdɩɩ sɔrasɩsɔ ʋlfɛ a sʋʋraa: «Fa n bir jal kha na sɛrɛ kʋʋra 'lo bã. Sa tu dɩ fa khiir jamana dʋʋr Ɩjɩrayɛla lãphã khaa ga.»
18 Gele kanɩ pɩ, ko kpɩɩ bire ɩɩr Gobɩ bǝǝnǝ na Fɩlɩsɩtɛ̃sɔɔra wo. Dɩ Rafaa mǝl bɩɛl kɔɔ hale da n do Safɩ, dɩ Sɩbɩkayɩ, kɛ thɛnɩ Husa dɩɩra kʋʋ.
19 Dɩ ko kpɩɩ bire ɩɩr Gobɩra wo na Fɩlɩsɩtɛ̃sɔɔra. Dɩ kuun bɩɛl kɔɔ hale da n do Golɩatɩc, a the Gatɩ dɩɩra. A kɔɔ hananɛ kpɩla dɩ sar curo a ho kẽkẽ le ther ɓalãɓʋɔ. Dɩ Yaarɩ-Oregɩmɩkɛ thɛnɩ Bɛtɩlɛhɛm, ɔɔ bikuun Ɛlana kʋʋ.
20 Dɩ ko kpɩɩ bire ɩɩr Gatɩ dɩɩra. Dɩ kuun gbã bɩɛl kɔɔ hale a do Rafaa mǝllǝ wo, a hana ɲẽbe maadõ maadõ ɲɛɛna na nɛɛra fɛw, dɩɩ gbɛbɩ ha kpelẽ yenã. 21 Dɩ a phiilele Ɩjɩrayɛl. Dɩ Yonatãakɛ dɔnɩ Davɩdɩɩ õkuun Samã, ɔɔ bikuun kʋʋ. 22 Fɩlɩsɩtɛ̃ kona yenãale fɛw kɔɔ hanɩ Gatɩ, Rafaa mǝlsɔ wɛ. Dɩ Davɩdɩ na ɔɔ sɔrasɩsɔ kʋʋr wɩ fɛw na awɩ ɲɛ̃.