Seba ɩɩrnanɛ lãʋ Davɩdɩra
20
1 Dɩ kuun kpãkpol bɩɛl ha lera Gɩlgal dɩ wɩ wɩɩ Seba, Bikirii bikuun gɩ, a do Bɛ̃jamɛ̃ɛ məl. A ɩɩrɛ a ʋ̃ tutuu sa hulẽ ayɩ: «Aɲe sɩ ha kha na Davɩdɩ? Sa n gba kha thɩ̃ɛ na Ɩjaɩɩ bikuuna'. Ɩjɩrayɛl caar, nɩ kɔna anɩ cɔsɔ!» 2 Dɩ Ɩjɩrayɛl sɔrasɛ hɛl Davɩdɩra a ma Bikirii bikuun Seba. Judaa məlsɔ dɩbara sɛ kɛ manɩ awɩ jamana a thɔgʋʋ le Jʋrdɛ̃ mɩɩra phaphapha a dana Jerujalɛm. 3 Dɩ ɔbɔɔkɛ a lonɩ ɔɔ cɔ pɩ, a kpar ɔɔ wɛdara yʋɔrɩkɛ a kɔɔ pɛrnɩ wa n hɩnɛ cʋɔr a thɩɩn cɔ bɩɛla, ka wɩ n bɛr wɩnɩ bɔɔbɔɔ. Dɩ a n ha wɛr thɩ̃ɛ fɛʋʋkɛ wɩ n yaalnɩ. Sɩ aa phɩna wɩ kpɩɩ bã. Thalera wɩ too khikhɛr khaa a dana awɩ khiir wi, sɩrakɛ awɩ ko na khǝ'.Joabɩ kʋrɛ Amasa
4 Agɩpɩ jamana sor Amasara ayɩ: «Kɩɛr na wire yẽther, kpa Juda sɔrasɛ wɩ ɩ̃ kɛ; sɩ fɛrɛ dakha hana kɛ.» 5 Dɩ Amasa jaal a kpa Juda sɔrasɛ, sa dɛɛnɔ wi nʋɔɔkɛ jamana kɔɔ dʋʋnɩ. 6 Dɩ Davɩdɩ sor Abɩsayɩra ayɩ: «A sa dʋ bʋrɛa', Bikirii bikuun Seba na cʋʋ sɛr puure na jɔ Abɩsalɔ̃. Gbana ɩ̃ kobisɔ ƴɩɛ a 'lʋɔnɛɛ kpaan; a mɛ̃ ga a na lʋʋn dɩ ʋkharaakɛ wɩ mɩnɩ go kɔ̃tɩ̃ɩ kpalalɔ a na bu sar». 7 Dɩ Joabɩɩ sɔrasɩsɔ na Kɩrɛtɩ sɔrasɛ na Pelɛtɩ sɔrasɛɛkɛ dɔnɩ jamanaa bɛbɛrsɔ na kuun khana fɛw ther a kpa Abɩsayɩra. Dɩ wɩ ther Jerujalɛm a 'lo Seba dɩ wa n kpaan.
8 Ɔbɔɔkɛ wɩ wɔrɔnɩ boka kɔ̃tɩ̃ɩkɛ hanɩ le Gabãɔ, Amasa ther awɩ ƴɛbʋrɔ, dɩ wɩ caan. Joabɩ kɔɔ tor ɔɔ koke thɩ̃. Dɩ lophɛrɛ hale dɩ khɩmɩna, kɛ a saananɩ bajɩnaakɛ hanɩ khalkparra. Dɩ mɔ̃ Joabɩ tɔnɩ da n pɔ dɩɩ do bajɩna tǝǝre ji. 9 Dɩ a bulele Amasa bɔɔ ayɩ: «Fɩ khɩɩrɛ bɔɔbɔɔ bɛɛ ɩ̃ omɩɩ?» Sa 'laa na ɲɔ̃bɔɔ a fʋ Amasaa nɔkhuusɩ ɩnɩ n palʋ. 10 Amasa na kɔɔ dʋ bʋrɛ a jɩ dɩ Joabɩ kɔɔ gbaar bajɩna na ɲɔ̃bɩlã ga. Dɩ a gɔr Amasa bɩnɛna dɩ pɛɛ the a der thɩɩra dɩ khi, sɩ aa bir dɛbʋʋ balaɲɔdaa bã. Agɩpɩ Joabɩ na ɔɔ õkuun Abɩsayɩ bir 'lo Seba, bikirii bikuun dɩ wa n kpaan.
11 Dɩ Joabɩɩ sɔrasɩ bɩɛl jɩɩlɛ khirera da n so: «Ntɛɛkɛ dɔnɩ Joabɩɩ kuun na ntɛɛkɛ n kpaanɩ Davɩdɩra a na n kpa Joabɩra.» 12 Ga bɔɔle, Amasa kɔɔ hale a phɩ̃ ɔɔ tɔmɩna le hʋ bɩnɔ. Dɩ mɔ̃ sɔrasɩ kuunɩle yɩɛnɩ dɩɩ do a tɩbɩla dã wɩ n jɩɩlɛ, a halɛ khire hʋɛra a thena lɛ bɩɛlaakɛ hanɩ le a thii kɩ̃kɩɩn. 13 Ɔbɔɔkɛ a halnɩ khire hʋɛra pɩ tɩbɩla na n jɩɩl bã, wɩ phor dɩ wa n kpa Joabɩra, dɩ wɩ 'lo Seba dɩ wa n kpaan.
Sebaa khi
14 Dɩ Joabɩ 'lɔɔrɛ Ɩjɩrayɛl caarsɔ fɛw a ba jal dã Abɛl-Bɛtɩ-Maaka dɩɩra. Dɩ Berɩmɩdara fɛw kpar gbɛbɩ a ma Joabɩ dɩ wɩ jal. 15 Dɩ wɩ pɔr a sɔbɩ Seba Abɛl-Bɛtɩ-Maaka. Dɩ wɩ kɔlɔ̃kɔɩrɛ thɩn nãcel khaa a dana dɩ bɛr gʋʋ. Agɩpɩ Joabɩɩ too mar dɩ wa n cɩɩn gʋʋ wɩ tɔ wɩ kpɛɛ. 16 Dɩ khɛr fɩl jɩn bɩɛl hale dɩɩra a ma da n hulẽ ayɩ: «Nɩ pɛ nũu, nɩ pɛ nũu! Mɩ n bɩɛl nɛr, nɩ sɔ Joabɩra a tɔ wɔrɔnɛ, mɩ hananɛ thɩ̃ɛ a na mɩɩnaa.» 17 Dɩ Joabɩ tɔr pɔ a wɔrɔ̃ɔ. Dɩ khɛrɩle bulee: «Fɛr dʋɔn Joabɩɩ?» Dɩ Joabɩ tu: «Ɔɔ, mɛrra gɩ.» Dɩ khɛrɩle sʋʋraa: «Mɩ n bɩɛl fɛr, pɛ nũu gɩrɛɛkɛ mɛr afɩ thɔ̃daar hananɩ dɩ ma n so far.» Dɩ Joabɩ so: «Mɩ n pɛr nũu.» 18 Dɩ khɛrɩle so ayɩ: «Mamara, sokpaa hale dɩ wɩ so aa, wɩ bulene Abɛl-Bɛtɩ-Maakadara, aa thɩ̃ɛ na jire kha. 19 Ɩjɩrayɛl dɩɩsɔɔra fɛw, asɩ dɩɩkɛ na n ƴaal sʋʋa'; Ɩjɩrayɛl dɩ bɩɛl gɩ, kɛ hananɩ fɩl bʋɔ ka. Sɩ dɩ fa n ƴaal fɩ kʋɛ dɩ kʋkʋʋkɛ hɔnɩ nɩrɛ Ɩjɩrayɛla bɛɛ? Aɲe gɩ dɩ fa n kʋɛ thɩ̃ɛɛkɛ Thãgba Kɔ̃tɩn hɩnɩ?» 20 Dɩ Joabɩ sʋʋraa: «Kpei! Thale ga. Ma hana thɩ̃ kʋɛ kpɩɛra'.» 21 Ga do thale ga. Sɩ tibil bɩɛl gɩ a the Efɩrayɩm gɔ̃gɔ̃ bəənə da n do Seba, Bikirii bikuun gɩ. Ɔr ɩrɛna lãʋ Davɩdɩ jamanana. Nɩ ha mɩ ɔr dɩbara, ma jaal sɩ na sɩ nɩ.» Dɩ khɛrɩle so Joabɩra: «Ga puuroǝ', fa yɩrɛ ɔɔ yʋ dɩ ga thena go kpune ƴũu.» 22 Dɩ khɛrɩle jaal mɩɩna ɔɔ too fɛw na ɔɔ fɩlla, dɩ wɩ kur Sebaa yʋ a dʋna na go kpune. Dɩ le Joabɩ ʋ̃ tutuu dɩ ɔɔ sɔrasɩsɔ faa dɩɩ sa bɩlã a kɔ̃ awɩ cɔsɔ bɩɛlbɩɛl. Dɩ Joabɩ dakha kɛrɛ bir jamanaa pa Jerujalɛm.
Davɩdɩɩ thɔ̃daraa isɔ.
23 Joabɩ kɔɔ dʋɔn Ɩjɩrayɛl sɔrasɛ ɓibii kɔ̃tɩ̃, dɩ Yehoyadaa bikuun Benaya na n hɩɩn Kerɛtɩ na Pelɛtɩ sɔrasɛ; 24 dɩ Adoramɩ na n hɩɩn gɩrɛ dɔnɩ pɔtɔrɔ thɔma; dɩ Ahiludɩɩ bikuun Jojafatɩ do jamanaa mɩmɩɩ; 25 dɩ Seva do sɛbɛ kheredaar; dɩ Sadɔkɩ na Abɩataar do bonɩ jidara; 26 dɩ Ɩra, kɛ dɔnɩ Yayɩɩrɩ mǝl, do dakha Davɩdɩɩ bonɩ jidaar.