2 SAMƲƐL 19

Davɩdɩɩ ha hel ɔɔ bikuun Abɩsalɔ̃ɔ khirǝ.

1 Dɩ jamana na n jẽ na tomɩr koo; sa ɩɩr a jʋʋn duurǝǝkɛ hanɩ go gbã pɩɛra ƴũu le dɩ lõfonʋɔra ƴũu da n khɩɩ. Dɩ a n bɩrɛ da n jalna, da n so: «Ɩ̃ bikuun Abɩsalɔ̃ ya! Ɩ̃ bikuun, ɩ̃ bikuun Abɩsalɔ̃ ya! Ado mɛr ka kɔɔ khi afɩ kara, gɩ baar yaa Abɩsalɔ̃! Hu! Abɩsalɔ̃ ya! Ɩ̃ bikuun, ɩ̃ bikuun! 2 Dɩ wɩ mɩɛrɛ Joabɩ ayɩ, jamana hale da n bɩ da n waalna Abɩsalɔ̃. 3 Dɩ dawiile, kǝǝreekɛ sɔrasɛ 'lɛnɩ bir debi a do bɩɩ wɛr fɛʋra, gɩdonɩ wɩ nɩɛrɛ mɔ̃ jamanaa ha kʋɛnɩ koo dɩɩ do ɔɔ bikuuni khi dɔ nɔɔ. 4 Dɩ dawiile sɔrasɛ lʋʋn dɩɩra juu juu a ho yicur sɔrasɛɛkɛ faanɩ kʋʋr sa wolõ caalɛ. 5 Sɩ jamana halerakɛ a thi kɩ̃kɩɩn ƴɩɛ sɩ da n hulẽ: «Ɩ̃ bikuun Abɩsalɔ̃ ya! Abɩsalɔ̃, ɩ̃ bikuun, ɩ̃ bikuun!» 6 Dɩ Joabɩ pɔr lõ jamanana le duu a sʋʋraa: «Afɩ sɔrasɩsɔɔkɛ taa fɩnɩ nĩ, fɛrɛ na afɩ bikũusɔ na afɩ bikhɛrsɔ na afɩ khɛrsɔ na afɩ wɛdaarsɔ, wɛra fɩ n pɛr yicuru. 7 A thɩɛna ga, wɩrɛ n laarɛ fɩnɩ wɛr fɩ n na, sɩ wɩrɛ naan fɩnɩ wɛr fɩ n laar. Fɩ nɩnanɛ nĩikɛ, dɩ afɩ sɔrasɩ kɔ̃tɩ̃sɔ na wɩrɛ fɛʋʋkɛ n dɔ farnɩ thɔma na ha bʋɔ na do far thɩ̃ɛa'. Dɩ mɩ yɩɛrɛ nĩikɛ a jɩ dɩ ado Abɩsalɔ̃ bɩɛlakɛ kɔɔ hana yire, sɩ sɛrɛ fɛw kɔɔ khiir, ga da farɛ na ka. 8 Nɛnɛ̃ a fɩ jɩ thɛ jala a ƴɔla afɩ sɔrasɩsɔ haar! A fa thea', na Thãgba Kɔ̃tɩnɩ i, mɛr sɔ far; tibil bɩɛlakɛ na hale na jɩɩl far dɩtɩnɔɔkɛ bã. Dɩ ga bɔgaarɩkɛ na puu farɛ a na ka na jɔ gɩrɛ fɛʋʋkɛ kɔɔ dana fɩnɩ, afɩ daɓolbir bɔɔ a dana nɛnɛ̃ɛkɛ.» 9 Le dɩphã, jamana the a jal too dɩ lõfonʋɔra. Dɩ wɩ sor sɔrasɛra ayɩ: «Jamana hale a too dɩ lõfonʋɔra.» Dɩ wɩ kpar pʋɔra a jɛ ɔɔ ƴɛbʋrɔ. Sɩ Abɩsalɔ̃ɔ sɔrasɩsɔ mãa caalɛlɛ a kɔ̃ awɩ cɔnanɔ dɩɩ dɩɩ.

Davɩdɩ n gbɛbɩrɛ a kɛr a bir Jerujalɛm

10 Ɩjɩrayɛl caara fɛw, tɩbɩla mar dɩ wa n mɩɩ awɩ ha, dɩ wa n sona: «Davɩdɩ jamana kɔɔ taa sɩ asɩ lãlaardaraa ɲɔ̃kɔɔ, a taana sɩ Fɩlɩsɩtɛ̃sɔɔra ɓoɓo. Sɩ Abɩsalɔ̃ dɔ nɔɔ gɩrɛ dɩ faa dɩɩ sa ca. 11 Sɩ Abɩsalɔna sɩ kɔɔ phiirni, a pɩɛraa niin yʋɔ a dɔ asɩ jamana khi gɩrɛ kʋʋra. Dɩ aɲe sɩ n pɩɛr, sa n kpa Davɩdɩ jamana a ɩna gaa?» 12 Dɩ jamanaa bilo dakha a thʋɔn so bonɩ jidarara, Sadɔkɩ na Abɩataar ayɩ: «Nɩ mɩana Juda kɔ̃tɩna a bulene wɩ wɔɔ, aa mɩ yɩ kpɩɛrɛɛkɛ Ɩjɩrayɛl caar hananɩ ɩnɛ a dã mɩ kɛ ɩ̃ cɔ. Aa mɩ sor, aɲe gɩ dɩ wa n ƴaal wɩ dɔ pɩpɩra, kɛ na kɛrana mɩnɩ a na birnǝ ɩ̃ cɔ ya? 13 Aa mɩ sor, wɛrkɛ kanɩ do ɩ̃ omɩsɔɔkɛ sɩ donanɩ kha tɔmɩn bɩɛl, aɲe gɩ dɩ wa n ƴaal wɩ do pɩpɩra wɩ kɛrna mɩ wɩ birnǝ ya? 14 Nɩ sɔ Amasara dakha wɔɔ, aa mɩ yɩ, ga do tɔmɩn bɩɛl sɩ do kha gaa ya? Aa mɩ sor, ado ma pɩɛraa dɩ do ɩ̃ sɔrasɩsɔɔ kɔ̃tɩ̃ khorr Joabɩɩ kara ga, Thãgba n pɛ mar sor gɩ khɩɩr gɩ ka». 15 Dɩ mɛ̃ Davɩdɩ kɛr Judaa məlsɔ fɛʋʋ ha tɩɩ bɩɛlɩ kha a pɛ ɔɔ pa. Dɩ wɩ thʋɔn a sʋʋraa: «Kɛra ɩna, fɛrɛ na afɩ thɔ̃dara fɛw».

16 Dɩ le jamana gba hʋɛ mɛ̃ a kɛr bir a dã Jʋrdɛ̃ mɩɩr. Dɩ Juda caar caanʋnɛ Gɩlgal khʋra, wɩ bulu a seer Jʋrdɛ̃ mɩɩr.

Davɩdɩ faarɛ Simeyii dɩpa a haa.

17 Dɩ Geraa bikuun Simeyi, kɛ dɔnɩ Bɛ̃jamɛ̃ɛ məl, kɛ thɛnɩ Bahurim, kɔɔ phananɛ a gbũ kha na Judaa məl, Davɩdɩɩ caan pa. 18 Dɩ a kɔɔ hananɛ wɩrɛ thɔgɔɔnɩ, tɩbɩla gbɩlanɩ (1000), kɛ dɔnɩ Bɛ̃jamɛ̃ɛ məlsɔ na Sɩbaakɛ dɔnɩ Sayuli cɔdaraa thɔ̃daar na ɔɔ bikũusɔ yʋɔr yemɔy na ɔɔ thɔ̃dara kpelẽ. Wɩ phananɛ a kɔɔ dã Jʋrdɛ̃ mɩɩr sɩ jamana na dã pa'. 19 Wɩ n ƴaalɛ ɔbɔɔkɛ gborõo na seernanɩ jamanaa cɔdara wɩ puno wɩ hale wɩ bulu gɩrɛraakɛ a na sonɩ wɩ cʋɛ. Dɩ mɔ̃ jamana seernɩ Jʋrdɛ̃ mɩɩr pɩ, Geraa bikuun Simeyi gburõkhure thɩɩra ɔɔ ƴɛra. 20 Agɩpɩ dɩ so jamanana: «Ɩ̃ kɔ̃tɩ̃ yaa, fa n therna ɩ̃ dɩ paakɛ mɛr afɩ thɔ̃daar cʋʋna'. Fa n jɩna dɩ paarɩkɛ mɩ cʋʋnɩ dawiikɛ fɩ n thenɩ Jerujalɛma'. Jamana, fa n gba gɩ pɛ bɩnɔa'. 21 Mɛrɛ, afɩ thɔ̃daar, mɩ jɩnanɛ dɩɩ. Mɩ cʋʋrɛ puure. Gɛr gɩ nĩikɛ dɩ̃ do cacadaar a kʋʋl Ɩjɩrayɛl ca wɩrɛ hanɩ wi phã paar ɲɔ̃bɔ bilo ƴɩɛ a caan fɩ yaa ɩ̃ kɔ̃tɩ̃. 22 Dɩ Seruyaa bikuun Abɩsayɩ 'lɔɔrɔ ayɩ: «Simeyi teenanɛ khir, ga do ʋrɛ Thãgba Kɔ̃tɩn phiirni a sɔ̃aa?» 23 Sɩ Davɩdɩ sor Abɩsayɩra na ɔɔ õkuun Joabɩra ayɩ: «Seruyaa bikũusɔ yaa, aɲe ba nɩ? Aɲe wer gɩ nɛnɛ̃ na n tu ɩ̃da ga? Ma thʋ̃ jɩ tue nĩ dɩ mɛr dʋɔn Ɩjɩrayɛl jamana gaa? Dɩ gɩ teenanɛ wɩ kʋ tibil nĩ Ɩjɩrayɛl dɩɩra ya?» 24 Agɩpɩ dɩ ʋlfɛna Simeyi a sʋʋraa: «Fa khǝ'!»

Davɩdɩ bire kuun kha na Mefibosɛtɩ.

25 Dɩ Sayuli bikuuni bi Mefibosɛtɩ caanɛ dakha jamana. A fʋna dawiikɛ jamana thenɩ a dana ɔɔ kɛr bir wi na ha ɩɩ Jerujalɛm, Mefibosɛtɩ na cɔcɔɔ nɛɛ dɩ nɔ khuusi gɩ dɩ bel, dɩ ɔɔ kẽkẽ gɩ dɩ cɔcɔɔa'. 26 Dɩ ɔbɔɔkɛ a danɩ jamanaa pa Jerujalɛm, jamana buleele ayɩ: «Aɲe dɔ kɩrʋ yaa Mefibosɛtɩ dɩ fa kɔɔ jal kha na mɛrɛa'?» 27 Dɩ Mefibosɛtɩ sʋʋraa: «Ɩ̃ kɔ̃tɩ̃ jamana yaa, ɩ̃ thɔ̃daar fɩlɛ mɩ. Sɩ ado mɛ̃ ga, mɩ kɔɔ sor, mɩɩ gɩdonɩ nɛ kʋɛdaar ha mɩ, ma gbɛbɩrɛ ɩ̃ kũkǝ̃ ɩ̃ jʋʋn ɩ̃ pɔ sɩ jal kha'. 28 Sɩ ɩ̃ thɔ̃daar ɩɩr pɔ far a kuur sɔ̃sɔ pɛ mɛr afɩ thɔ̃daara. Sɩrakɛ yaa ɩ̃ kɔ̃tɩ̃, fɩ hʋrɛ Thãgbaa thɔ̃thɔ̃ thu. Cʋɛ gɩrɛ fɩ yɩnɩ dɩɩ do gɛr bʋɔnɔ. 29 Dɩ wo, ɩ̃ thɩ kɔ̃tɩ̃ Sayuli cɔkara, tibil bɩɛlakɛ na kɔɔ hale saagado khir ntɛ teena fɛr ɩ̃ kɔ̃tɩ̃ jamanaa ƴɛra gaa ga. Sɩrakɛ na gele fɛw fɩ tee mer dɩ ma n kho dɩkɔ na wɩrɛ n khɔnɩ dɩkɔ afɩ dɩko kho pa. Dɩ aɲee bɔna ca ma bir na bɩɛl fɛr jamanana dɩ ga jɔ gele wo?» 30 Dɩ Davɩdɩ sʋʋraa: «Thɩmɩɩ jɔjʋɔ na hala', gɩrɛ mɩ sonɩ dʋɔn wɔɔ: "Fɛrɛ na Sɩba na tɩnɛnɛ Sayuli thɩ."» 31 Dɩ Mefibosɛtɩ so: «A gbarakɛ fɛw. Thɩ̃ kɔ̃tɩɩn dʋɔn yaa jamana, fɩ kɛrnɩ na ha ɩɩ afɩ cɔ gɩ daan».

Davɩdɩ na Barjɩlayɩɩ thɩmɩɩ

32 Dɩ Barjɩlayɩ, kɛ thɛnɩ Rogelɩm, Galaadɩ bǝǝnǝ pɔr dakha le Jʋrdɛ̃. Dɩ a thɔɔrɛ jamana a seerna mɩɩr, ɩnɩ n pɩɛ hʋɛ mɩɩr seero. 33 Kuun kɔ̃tɩ̃ɩ gɩ na sobɔr, a hana yɛna kpalanã. Ɔbɔɔkɛ jamana kɔɔ hanɩ Mahanayɩm, kuunile kɔɔ haanɛɛ na thɩ̃ɛ fɛw, gɩdonɩ lẽledaar kɔ̃tɩ̃ɩ gɩ. 34 Dɩ jamana sʋʋraa: «Sɩ kɔna kha Jerujalɛm ma n hɩɩn fɩ». 35 Sɩ dɩ so jamanana: «Yɛna yemɔ̃ mɩ hana 'lo a na cʋʋ dɩ sa kɔ̃ kha Jerujalɛm? 36 Mɩ hananɛ yɛna kpalanã nĩikɛ. Ma n jɩnɩ dabʋɔ na dapuu dɩ̃ lee 'lo bã, dɩ ma n 'lo dadaa gɩrɛra mɩ n khonɩ, dɩ gɩrɛra mɩ n ɲɔnɩ ga, ma n jɩ kuun nɩ wire kpɩɩ na khɛr nɩ wire kpɩɩa', aɲeraakɛ ma jal a na do far nɩwɛ mɔlɔ? 37 Jʋrdɛ̃ mɩɩr mɩ n do bʋɔ ɩ̃ seerna fɩ yaa jamana. Sɩ aɲera wer fa thʋ̃ na ka mɩ thale ɓoɓo? 38 Ka sɛ mar ɩ̃ kɛr ɩ̃ bir, ɩ̃ khi ɩ̃ dʋɔ, ɩ̃ wɔrɔna ɩ̃ thɩ na ɩ̃ nɩɩ ka. Sɩ yɛ ɩ̃ bikuun Kɩham afɩ thɔ̃daar, ɔr fa kɔna yaa jamana. Cʋɛ ɔra gɩrɛ fɛʋʋkɛ fɩ yɩnɩ dɩɩ bɔr.» 39 Dɩ jamana so: «'Ɔ̃hɔ̃ɔ, ma kɔnanɛ Kɩham. Gɩrɛ daan farnɩ ma cʋʋraarɛ. Dɩ thɩ̃ɛ wo thɩ̃ɛɛkɛ fa ƴaal marnɩ, ma ha fɛr». 40 Mɔ̃ tɩbɩla fɛw seernɩ Jʋrdɛ̃ mɩɩrɩkɛ jamana kɔɔ seernɩ, a palɛ Barjɩlayɩ a bɔnaa, sɩ dɩ Barjɩlayɩ kɛr mɛ̃ a bir ɔɔ pa.

Judaa məlsɔ na Ɩjɩrayɛl ca wɩrɛ sɛnɩɩ thʋ̃kha.

41 Dɩ jamana gbaar jal Gɩlgal khʋra, dɩ Kɩham thɔgʋʋ dɩ wɩ jal. Judaa məlsɔ fɛw na Ɩjɩrayɛl ca kuruukɛ hanɩ wi phã paar ɲɔ̃bɔɔra kɔɔ seernanɛ jamana Jʋrdɛ̃ mɩɩr. 42 Dɩ Ɩjɩrayɛl ca wɩrɛ hanɩ wi phã paar ɲɔ̃bɔɔra pɔr a bule jamana ayɩ: «Afɩ sɔrasɩsɔ fɛw hanɩ kha na fɛrɛ, sɩ aɲe gɩ dɩ asɩ omɩsɔɔkɛ dɔnɩ Judaa məlsɔ ɩ̃, a gba fɩ juu na afɩ cɔ ka fɛw a seerna Jʋrdɛ̃ mɩɩr?» 43 Dɩ Judaa məlsɔ birse Ɩjɩrayɛl ca wɩrɛ sɛnɩ ayɩ: «Sɩ ɩɩrɛ kha na jamana a jɔ nɩ, gɛr gɩ. Dɩ aɲe hãale a fʋlɛ nɩ nĩkhii? Dɩkha jamana ha sɩ dɩ sɩ kho yaa, agɩbo khaardaa a ha sɩ?» 44 Dɩ Ɩjɩrayɛl ca wɩrɛ sɛnɩ birse Judaa məlsɔ ayɩ: «Sɩ hɩnɛ jamana a jɔ nɩ ɲɛ̃be yʋɔr. Davɩdɩ dor anɩ ca wer, sɩ sɩ hɩɩnɛ a jɔ nɩ. Aɲe gɩ dɩ nɩ kpɛ sɩ thale? Ga do sɛr kɔɔ dɔ cacadara sɔnɩ asɩ jamana n kɛra ɩna gaa?» Sɩ Juda məlsɔ n mɩɩrɛ na cɩ̃cɩmanɛ jɔɔ a jɔ Ɩjɩrayɛl ca wɩrɛ sɛnɩ.