Kʋʋr Davɩdɩɩ toora na Abɩsalɔ̃ɔ toora.
18
1 Davɩdɩ there sɔrasɛɛkɛ hanɩ kha na ɔr, a phiir ɩkha dɩ wɩ do kɔ̃tɩna sɔrasɛ gbɩlanɩsɔɔra (1000), dɩ ɩkha do kɔ̃tɩna sɔrasɛ tamaasɔɔra (100). 2 Dɩ a tɩnɛnɛ sɔrasɛ gbulona yẽther. Dɩ a pɛrɛ Joabɩ, Seruyaa bikuun dɩ do gbulõ bɩɛlɩ kɔ̃tɩ̃, dɩ Abɩsayɩ, Joabɩɩ õkuun do gbulõ bɩɛlɩ kɔ̃tɩ̃, dɩ Ɩtayɩ, kɛ thɛnɩ Gatɩ dɩɩra do gbulõ yẽtherdaraa kɔ̃tɩ̃. Agɩpɩ dɩ so sɔrasɛsɔɔra: «Mɛrɛ dakha, ma jaal kha na nɛrɛ.» 3 Sɩ sɔrasɛ bor sa yɩ: «Ga teena dɩ sa jal kha na fɛrɛa'. Ado sɛra gɩ, a sa caalɛ, lãlara na therna gɩ yemɔ̃a'. Adorakɛ asɩ thɩ̃thɩɩn wɩ kʋʋr dakuru, sɩ wa therna gɩ yemɔ̃a'. Sɩ fɛrɛ, fɛr bɩɛl 'lẽ'lẽ fɩ mãkhananɛ sɔrasɛ gbɩlanɩ yʋɔr (10000) asɩ thɩ̃thɩɩn. Dɩ wo, gɩ ka baar fɩ too dɩɩra, sɩ fa n thɔna sar bule». 4 Dɩ jamana so war: «Mɩ nɩɛrɛ, ma cʋʋrɛ gɩrɛ nɩ yɩnɩ dɩɩ do gɛr bʋɔnɔ.» Dɩ a toore dɩ lõfonʋɔra, sɩ sɔrasɛ na n the: tama gbulonesɔ kpɩɩ, gbɩlã gbulonesɔ kpɩɩ. 5 Dɩ jamana har Joabɩ na Abɩsayɩ na Ɩtayɩ, kɛ dɔnɩ sɔrasɛɛ kɔ̃tɩ̃sɔ ɔɔ nɔ ka thɩmɩɩ a yɩ: «Nɩ na na mɩ sɩ na n cʋʋ ɩ̃ bikuun Abɩsalɔ̃ puurə'.» Dɩ sɔrasɛ fɛw nɩɛrɛ jamanaa nɔ ka thɩmɩɩle a hanɩ sɔrasɛɛ kɔ̃tɩ̃sɔ.6 Dɩ Davɩdɩɩ sɔrasɩsɔ jaal Abɩsalɔ̃ɔ sɔrasɩsɔɔ cãa pa, wɩ ke kʋʋr. Dɩ kʋʋr khar le Efɩrayɩm bǝǝnǝ, lu bɩnɔ. 7 Dɩ Davɩdɩɩ sɔrasɩsɔ puno Abɩsalɔ̃ɔ sɔrasɩsɔ. Ga wiile ko ɲɔ̃ɔ ɓɛlɛ Abɩsalɔ̃ɔ toora a kɔ̃tɩ̃ ka; tɩbɩla gbɩlanɩ kpelẽ (20.000) khiire. 8 Dɩ kʋʋr malalɛ dɩɩ ɓibi. Dɩ wɩrɛ khiireni le lu bɩnɔ bire jɔr a jɔ wɩrɛ wɩ kʋʋrnɩ na bajɩna.
Joabɩ kʋrɛ Abɩsalɔ̃.
9 Dɩ Abɩsalɔ̃ gbelene kha na Davɩdɩɩ sɔrasɩsɔ na ɔɔ kũkə̃-gãgookɛ a jʋʋnɩ. Dɩ kũkə̃-gãgʋʋ ca lõ sɛn thɩr wãwayãa balɔ a kpãasɛ, sɩ Abɩsalɔ̃ɔ yʋ ti thɩr jɛɛna, dɩ ju ƴũu. 10 Dɩ Davɩdɩɩ sɔrasɩsɔ bɩɛl yɩɩrɛ a jal mɩɛ Joabɩ aa, ɩnɩ yɩrɛ Abɩsalɔ̃, aa a hale dɩ yʋʋ ti sɛn thɩr jɛɛna. 11 Dɩ Joabɩ bulee: «Aɲee? Fɩ yɩɩrɛ yaa? Aɲe gɩ dɩ fa kɔɔ kʋʋ dapaara liirǝ? Ma kɔɔ ha fɛr dɛ bulo be yʋɔr na lophɛrɛ bɩɛl.» 12 Sɩ kuunile sor Joabɩra: «Adorakɛ fa ha mɩ dɛ bulo be gbɩlanɩ, sɩ ma tha jamanaa bikuuna ɲɔ̃ɔa'. Sɛrɛ fɛw, sɩ kɔɔ nɩɛrɛ jamanaa nɔ ka thɩmɩɩkɛ a ha nɩnɩ, fɛrɛ na Abɩsayɩ na Ɩtayɩ ayɩ, nɛrɛ fɛw, na n cʋʋ ɩnɩɩ bikuun Abɩsalɔ̃ puurə'. 13 Dɩrakɛ wo, ado mɩ kɔɔ cʋʋrɛ dɩɩ ho ma kɔɔ nɩɛr gɩrɛ jamana sona', sa kʋʋ, sɩ pɩpɩɩ paar a na jɩrɛ dɩ mɩ sõsʋʋr, gɩdonɩ thɩ̃ɛ na n keraa ga; sɩ wo ga do fɛrɛɛ thɛthɛ fa teere na pɛ mara'. 14 Dɩ Joabɩ so: «Ma too farakɛ ma n kʋɛ bɔɔ khaara'.» Dɩ Joabɩ gbaar gbola yẽther, nʋɔ sɩba sɩba a jalna, a kpa Abɩsalɔ̃ɔ ha 'lo'lobiro, kɛ hanɩ le 'lo na yire, ka yʋʋ tini sɛn thɩr jɛɛna. 15 Dɩ daɓola yʋɔrɩkɛ n gbaanɩ Joabɩɩ koke thɩ̃sɔ diire Abɩsalɔna a pɩɩrʋ.
16 Agɩpɩ, Joabɩ pɛrɛ dɩ wɩ ʋ̃ tutuu kʋʋrɩ n faa mɛ̃. Dɩ Davɩdɩɩ sɔrasɩsɔ faarɛ Abɩsalɔ̃ɔ sɔrasɩsɔ, wa kpa war bã, gɩdonɩ Joabɩ pɩɛr wɛr. 17 Dɩ Wɩ gbaar Abɩsalɔ̃ɔ khi a dʋna kõkor kɔ̃tɩɩna le lu bɩnɔ; a khɩɩ bokana a wɔɔraa tulululu. Ga bɔɔle, ɔɔ sɔrasɩsɔ fɛw caalɛlɛ dɩ wa n kɔ̃ awɩ cɔnanɔ dɩɩdɩɩ. 18 Abɩsalɔ̃ kɔɔ hananɩ yire, a thele boka kɔ̃tɩ̃ɩ tẽgbelẽe, lele paarɩkɛ wɩ n wenɩ jamanaa ɓɛlɛnɔ, a so, aa ɩna hana bikuun wa n wena ɩnɩɩ iǝ'. Dɩ a gbaar ɔɔ thɛthɛɛ i a dʋ bokaarɩlera, dɩ wa n wɩɩ Abɩsalɔ̃ɔ jɩ̃jɩna boka a dana nĩ 'lo.
Davɩdɩ nɩɛrɛ ɔɔ bikuun Abɩsalɔ̃ɔ khi.
19 Dɩ Sadɔkɩɩ bikuun Ahɩmasɩ sor Joabɩra: «Ma car na kɔ̃, a na mɩɛ jamana na yɩ Thãgba Kɔ̃tɩn teere pɩɛraa, a tagʋʋ ɔɔ lãlaardaraa ɲɔ̃kɔɔ.» 20 Dɩ Joabɩ sʋʋraa: «Kpei! Nĩikɛ, ga do fɛr na dʋɔn thɔ̃thɔnɩkɛ na mɩanɩ jamana gɩrɛ danana'. Dɩkhõo fa do; sɩ nĩikɛ wer, fa n jala', gɩdonɩ jamanaa bikuun khire. 21 Agɩpɩ, Joabɩ sor Etiopi dee kuun bɩɛla ayɩ: «Fɛrɛ, jala a mɩɛnɛ jamana gɩrɛɛkɛ fɩ toronɩ yire.» Dɩ kuunile gburõkhu Joabɩɩ ƴɛra, sa ɩɩr a ca jal. 22 Sɩ Ahɩmasɩ, Sadɔkɩɩ bikuun bire so Joabɩra wo: «Mɩ yɩɛrɛ wer, sɩ sɛrɔ ɩ̃ ca ɩ̃ kpaan Etiopidaarɩlee khiro.» Dɩ Joabɩ bir bulee: «Ɩ̃ bikuun, aɲe gɩ dɩ fa n ƴaal phubi fɩ ca fer? Thɩmɩɩ ca ʋrɛ na hana kakor dɩ fa 'la'.» 23 Sɩ Ahɩmasɩ borakɛ sa yɩ: «Mɩ yɩɛrɛ wer, sɩ mɩ n ƴaalɛ ɩ̃ ca ɩ̃ kpaan». Dɩ Joabɩ sʋʋraa: «Ee, dɩ ca kpaanɛ! Dɩ Ahɩmasɩ ca na hʋɛɛkɛ dɔnɩ Jʋrdɛ̃ pobã hʋɛ a kɔɔ ka Etiopi kuunile.
24 Davɩdɩ kɔɔ hale dabɔɔle a too fʋɔlala, lõfonɔ ʋrɛ thɛnɩ dɩɩra, na lõfonɔ ʋrɛ lonanɩ dɩɩraa thɩ̃thɩɩn. Dɩ dɩ bɛrdaar hale bɛbɛr cɔ nãsʋrɔɔkɛ hanɩ go gbã pɩɛra ƴũu, le dɩ lõfonʋɔra da n jʋʋr paar fɛw. Dɩ dapaara a yɩrɛ tibil bɩɛl da n ca dɩbara. 25 Dɩ bɛbɛrɩle hulene a so jamanana. Dɩ jamana so: «Ado ɔr bɩɛl gɩ, thɩmɩɩ bʋɔ a na n ɩna a mɩɩ». Dɩ kuunile n wɔrɔnɛ gbe gbe. 26 Dɩ Bɛbɛrɩle yɩrɛ tɩɩ kpɩɩ wo da n ca; dɩ hulẽ a so ʋrɛraakɛ n bɛranɩ dɩ lõfonʋɔ ayɩ: «Hɩnɛ, Tibil bɩɛl hale wo da n ɩ̃ dɩbara na caar .» Dɩ jamana so: «Ɔr dakha, thɩmɩɩ bʋɔra a na n ɩna a mɩɩ.» 27 Dɩ bɛbɛrɩle bir so: «Ado ma sõsɔa', cacadaar n car Sadɔkɩɩ bikuun Ahɩmasɩ kha». Dɩ jamana so: «Bɩsã bʋɔ gɩ ka, thɩmɩɩ daa a na n ɩna a mɩɩ.» 28 Dɩ Ahɩmasɩ daan a fʋɔr jamana na nɔ kheu ayɩ: «Daw gɩ», sa gburõkhu ɔɔ ƴɛbʋrɔ a gʋɛ ƴɩɛ, sa so: «Thãgba Kɔ̃tɩn, afɩ Thãgba hɩna khɩɩrɛ. Wɩrɛɛkɛra kɔɔ ɩrɛna farnɩ yʋ bʋʋn a gba wɛr a to afɩ ɲɔ̃kɔɔ yaa jamana». 29 Dɩ jamana bulee: «Sɩ Abɩsalɔ̃ daɓolbir, a bɔrɛ caca bɛ?» Dɩ so: «Mɩ kɔɔ yɩrɛ wilǝ wilǝ wer ɔbɔɔkɛ Joabɩ n thɔ̃ sɩnɩ, afɩ thɔ̃daar bɩɛlɩle na mɛrɛ, sɩ ma jɩ thɩ̃doo wera'.» 30 Dɩ jamana sʋʋraa: «Dɩ tɔ ka khokhɩara a jɩlɛ.» Dɩ Ahɩmasɩ tɔr ka khokhɩara a jɩɩl. 31 Dapaara dɩɩ do Etiopidaarɩle daan dakha a so jamanana: «Nɩɛnɛ thɩmɩɩ bʋɔkɛ yaa ɩ̃ kɔ̃tɩ̃! Nĩikɛ Thãgba Kɔ̃tɩn teere a pɛ far. A taa fɛr afɩ lãlaardarasɔɔra fɛw.» 32 Dɩ jamana bule Etiopidaarɩle: «Sɩ Abɩsalɔ̃ daɓolbir, a bɔrɛ caca bɛ?» Dɩ Etiopidaarɩle sʋʋraa: «Ɩ̃ kɔ̃tɩ̃, a ho ga n hana afɩ lãlaardarara fɛw na wɩrɛ fɛʋraakɛ n ɩrɛna farnɩ lãʋ, mɔ̃ gɩ hanɩ daɓolbirǝǝle.»