2 SAMƲƐL 17

Husayɩ gbãgarɛ Ahɩtofɛlɩ fɩlɩkɛ a 'laanɩ.

1 A gɩ too gbe, Ahɩtofɛl sor Abɩsalɔna ayɩ: «Sɛ mar ɩ̃ phiir kona gbɩlanɩ yʋɔr yeɲɔ (12000) ɩ̃ kpaan Davɩdɩra nĩ dɩtɩnɔɔkɛra. 2 Ma phuroore bɔɔraakɛ a vɔɔnɩ jɔɔ ka dɩ ɲɛ̃ɛ khiiru. Ma phərə wer, ɩ̃ pɛr wɩrɛ fɛʋraakɛ a hananɩ maar, wɩ caalɛ sɩ ɩ̃ kʋ ɔr dɩbara. 3 Dɩ thale, ma kɛrɛ tɩbɩla fɛw na pɛ far; gɩdonɩ ado ʋrɛɛkɛɛ yʋ fɩ n ƴaalnɩ 'li khir pɩ, tɩbɩla fɛw na kɛrɛ na ɩ̃ far a na toona ha ɩɩ.» 4 Dɩ fɩl caarɩle dar Abɩsalɔna na Ɩjɩrayɛl kɔ̃tɩnana fɛw.

5 Sɩ Abɩsalɔ̃ bire so: «Nɩ wɛ Husayɩ, Arkɩdaar a 'laa ɔɔ fɩl sɩ hɩɩn.» 6 Dɩ Husayɩ Arkɩdaar pɔr a dã, dɩ Abɩsalɔ̃ sʋʋraa gɩrɛ Ahɩtofɛl sonɩ, sa bulee: «Sɩ cʋɛ mɔna a sonɩ yaa, sa n cʋʋa'? Mɩa afɩda.» 7 Dɩ Husayɩ so Abɩsalɔna ayɩ: «Gekɛ wer dɩphã, ga do fɩl bʋɔ ha gɩrɛ Ahɩtofɛl 'laana'. 8 Fɛrɛɛ thɛthɛ, fɩ jɩrɛ afɩ thɩ na ɔɔ toole, kuun khana wɛ. Nĩkhii n lɩɛr wɛr gɩrɛ a ho Ursi nɩɩkɛ wɩ fʋlɛnɩ ɔɔ bisɔ hʋɔnɔ. Dɩrakɛ wo, afɩ thɩ ker kʋʋr a mɩlɔ, a na cɔna tɩbɩla pa bɩɛla'. 9 Baalɛ na hala'; dɩkhãa pa a ha gɩrɛ a wɔ̃ boka kaara agɩbo pa kpɩɩ. Ado wɩ 'lɛ asɩ too caca fʋ paar a kʋʋr, dapaara ga kpaar paar fɛw, dɩ wa yɩ aa, wɩ punone Abɩsalɔ̃ɔ too. 10 Dɩ ga dor wɩrɛɛkɛ n 'lanɩnakɛ sidũ'ũ khaa sɩ ɲɛ̃ɛ na khiir wer, gɩdonɩ Ɩjɩrayɛl caar fɛw jɩrɛ dɩ koke kpɩɛ ha afɩ thɩ; dɩ a hananɛ dakha kuun khana ga do kpãkpalã ga. 11 Ɩ̃ fɩl dʋɔn wɔɔ: «Kpa Ɩjɩrayɛl sɔrasɛ fɛw wɩ ɩ̃, a fʋna Dã a dana Bɛɛrseba wi phã paar ɲɔ̃bɩlana, wɩ jɔr mɔ̃ɔkɛ gbalãkothɩn hanɩ laɲɔ̃ nʋɔra. Agɩpɩ fɛrɛɛ thɛthɛ n kʋʋl wɩ ƴɩɛ nɩ jal kʋʋrara. 12 Dɩ paar wo paarɩkɛ a hanɩ, sa gbʋmaanɛ a na jiirǝǝ mɔ̃ mɩ̃ɛ n jini thɩɩra. Dɩ sa kʋʋrɛ, ɔr na ɔɔ sɔrasɩsɔ, bɩɛlakɛ na fuuə'. 13 Adorakɛ a lõ dɩ dɔɔra, sɩ Ɩjɩrayɛl sɔrasɛ fɛw na pɔnanɛ pɛ̃ɛ dɩ sa hal dɩ dɔɔ na kpɛɛ ɓɛlɛnɔ, dɩ boka kpũkpunenakɛ na sɩa'.» 14 Dɩ Abɩsalɔ̃ na Ɩjɩrayɛl fɛw so: «Husayɩ fɩlɩkɛ a 'laanɩ baar Ahɩtofɛlɩ fɩl.» Jaa Thãgba Kɔ̃tɩn ƴaalɛ a kʋɛ Ahɩtofɛlɩ fɩl bɔbɔɔkɛ a kanɩ 'laa gɩ do nɔɔ a kɛrna puure a heen Abɩsalɔ̃.

Davɩdɩ seere Jʋrdɛ̃ mɩɩr a puno a taa Abɩsalɔna.

15 Dɩ Husayɩ jaal a mɩɛ Sadɔkɩ na Abɩataar bonɩ jidara fɩlɛɛkɛ Ahɩtofɛl 'laanɩ Abɩsalɔna na Ɩjɩrayɛl kɔ̃tɩnana, na fɩlɛɛkɛ ɔɔ thɛthɛ 'laanɩ dakha. 16 Sa bir so wo: «Nɩ thɔna khǝ̃khǝ̃ a sɔ Davɩdɩra, a na n cɔ nĩikɛ Jʋrdɛ̃ bǝ̃ faana gaa dɛ! A dɔ bʋɔ a seere Jʋrdɛ̃ mɩɩr a jala ƴɔɔ fĩi, gɩ do nɔɔ ɔr na wɩrɛ hanaanɩ na n khiirǝ'». 17 Abɩataar bikuun Yonatã, na Sadɔkɩɩ bikuun Ahɩmasɩ kɔɔ hale a jɩɩl ɲɔ bu ka nʋɔra, kɛ wɩ n wenɩ Eyin-Rogɛl. Dɩ wɩ thʋɔn thɔ̃daar khɛr bɩɛlɩkɛ wɩ n thɔnɩ dɩ jal mɩɛ wɩ gɩrɛ wɩ teenanɩ wɩ jala mɩa Davɩdɩ jamana. Wa kɔɔ 'la na nɩna awɩbara a na lõ dɩɩra ga, gɩdonɩ maar fʋlɛ wɛr, mɔ̃ wa yɩ wɩnɩ. 18 Sɩrakɛ daɓolbir bɩɛl yɩ wɛr a jal so Abɩsalɔna. Sɩ wɩ phananɛ, wɛr yeɲɔra fɛw a jal dã Bahurim dɩɩra, a lõ kuun bɩɛlɩ cɔ, kɛ hananɩ bire le ɔɔ gbasara, dɩ wɩ gbune le a wʋɔn. 19 Dɩ cɔ khɛr gbaar kẽkẽ nɩɩ a bel thi bir nʋɔra, a lɩɩrɔ thɩ̃ bi thʋnanɛ gɩ do nɔɔ wa n ja'. 20 Dɩ Abɩsalɔ̃ɔ thɔ̃dara pɔr a lõ khɛrɩlee cɔ a bulee: «Kana Ahɩmasɩ na Yonatã ha?» Dɩ so war ayɩ: «Wɩ seere poo.» Dɩ wɩ ƴaal wɛr wa yɩ wɩa' a kɛr bir Jerujalɛm. 21 Ɔbɔɔkɛ tɩbɩlaale jalnɩ pɩ, Ahɩmasɩ na Yonatã thɩɩrɛ birera, a jal so Davɩdɩ jamanana ayɩ: «Nɩ ɩrɛ phana a seere mɩɩr kɔrɔ.» Wɩ mɩgʋʋrɛ dakha gɩrɛ dɔnɩ Ahɩtofɛlɩ fɩlɩkɛ a 'laanɩ awɩdara. 22 Dɩ Davɩdɩ na tɩbɩla fɛʋʋkɛ hanɩ kha na ɔr ɩɩrɛ dapaara a seer Jʋrdɛ̃ mɩɩr. Dɩ mɔ̃ dɩɩ na wɩlnɩ, tɩbɩla fɛw seere mɩɩr, bɩɛlakɛ na sɩa'.

23 Ɔbɔɔkɛ Ahɩtofɛl yɩɛnɩ dɩɩ do wa gba ɔɔ fɩlɩkɛ a 'laana', a gbɛbɩrɛ ɔɔ kũkǝ̃ a jal kɔ̃ ɔɔ dʋɔ. Dɩ a mɩɩrɛ ɔɔ kpɩɛr ɔɔ cɔdara, sa jal ju pɔ̃ɔ a khi. Dɩ wɩ dʋʋ ɔɔ thɩɩ kara.

Davɩdɩ daan Mahanayɩm dɩɩra Jʋrdɛ̃ mɩɩr bilo.

24 Davɩdɩ daan Mahanayɩm dɩɩra a pɩ, sɩ Abɩsalɔ̃ na Ɩjɩrayɛl sɔrasɛ fɛw, kɛ hanaanɩ kha ha dɩ wa n seer Jʋrdɛ̃ mɩɩr. 25 Dɩ Abɩsalɔ̃ phiire kuun bɩɛlɩkɛ n dɔnɩ Amasa a pɛr Joabɩɩ kara dɩ do sɔrasɛɛ kɔ̃tɩ̃. Ɩjɩrayɛl kuun bɩɛlɩkɛ n dɔnɩ Yetɛɛr, kɛ kɔɔ hɛnɩ Nahasɩɩ bikhɛr Abɩgayɛlɩkɛ dɔnɩ Joabɩɩ nɩ Seruyaa õkhɛrɩ bikuun gɩ. 26 Dɩ Abɩsalɔ̃ na Ɩjɩrayɛl sɔrasɛ jɛr Galaadɩ bǝǝnǝ.

27 Ɔbɔɔkɛ Davɩdɩ danɩ Mahanayɩm, Nahasɩɩ bikuun Sobi, kɛ thɛnɩ Raba, Amɔ̃ɔ məlsɔɔ dʋɔ na Amɩɛlɩ bikuun Makɩɩr kɛ thɛnɩ Lodebaar, na Barjɩlaɩ, kɛ thɛnɩ Rogelim, Galaadɩ bǝǝnǝ caanʋnɛ. 28 Wɩ pɔnanɛ phɩ̃ paarsɔ na bɩlãkpona na bilə̃se na dɩkɔ: bile na ɔɔjɩ na mɩ̃ɩ na thɩ̃ bi cɩɩnanɛ na hɛ na ƴɔ kukul, 29 na thʋʋr na na ɩlɩ̃ niin na nʋ̃ yɩra na furomaajɩ. Wɩ pɔnanɛ dɩkɔɔle fɛw a ha Davɩdɩ, na tɩbɩlaakɛ kɔɔ hanɩ kha na ɔr, wɩ khɔ; gɩdonɩ wɩ sor awɩ ha ayɩ: «Tɩbɩlaale gaarɛ kɔmɛra na vɔɔrɛra na yɔlkhaara bə̃ kparara, a hi waa phi».