Elii ƴũu jʋʋn na Elijee thɔ̃ fʋ pa
2
1 Wireekɛ Thãgba Kɔ̃tɩn gbanɩ Eli na jɛkhur a jʋʋna ƴũu, Gɩlgal a kɔɔ the na Elije dɩ wa n jal. 2 Dɩ Eli sor Elijera: «Mɩ n bɩɛl fɛr tɔɔ kɩɛr, gɩdonɩ Thãgba Kɔ̃tɩn thɔ̃ mɛr foo Betɛl dɩɩra.» Dɩ Elije birsee aa: «Na Thãgba Kɔ̃tɩnɩkɛ dɔnɩ yidaar, na fɛrɛ dakha, dɔnɩ yidaar, ma faa fɩ sɩ na kɛra'.» Dɩ wɩ cʋrɛ kha a jal Betɛl.3 Dɩ Thãgbaa mɩmɩa gbulõokɛ kɔɔ hanɩ Betɛl dɩɩra caanɛ a bule Elije aa: «Fɩ jɩrɛ Thãgba Kɔ̃tɩn na gbaar afɩ kɔ̃tɩ̃ nĩikɛ a na jʋʋna ƴũu bɛ?» Dɩ birse wɩ: «Ɔɔ mɛrɛ dakha mɩ jɩrɛ, nɩ pɩra nʋɔ.» 4 Dɩ Eli bir so Elijera wo: «Mɩ n bɩɛl fɛr tɔɔ kɩɛr, gɩdonɩ Thãgba Kɔ̃tɩn thɔ̃ mɛr Jeriko dɩɩra.» Dɩ Elije birsee aa: «Na Thãgba Kɔ̃tɩnɩkɛ dɔnɩ yidaar, dɩ fɛrɛ dakha do yidaar, ma faa fɩ sɩ na kɛra'.» Dɩ wɩ cʋrɛ kha wo a jal dã Jeriko dɩɩra.
5 Dɩ Thãgbaa mɩmɩaa gbulõokɛ kɔɔ hanɩ le Jeriko dɩɩra pɔr a bule Elije aa: «Fɩ jɩrɛ Thãgba Kɔ̃tɩn na gbaar afɩ kɔ̃tɩ̃ nĩikɛ a na jʋʋna ƴũu bɛ?» Dɩ birse wɩ : «Ɔɔ, mɛrɛ dakha mɩ jɩrɛ, nɩ pɩra nʋɔ.» 6 Dɩ Eli so Elijera: «Mɩ n bɩɛl fɛr, tɔɔ kɩɛr, gɩdonɩ Thãgba Kɔ̃tɩn thɔ̃ mɛr Jʋrdɛ̃ mɩɩra.» Dɩ Elije birsee aa: «Na Thãgba Kɔ̃tɩnɩkɛ dɔnɩ yidaar, na fɛrɛ dakha dɔnɩ yidaar, ma faa fɩ sɩ na kɛra'.» Dɩ wɩ cʋrɛ kha wɛr yeɲɔra fɛw a jal. 7 Dɩ tɩbɩla kpalaɲɔ yʋɔr Thãgbaa mɩmɩaa gbulona pɔr jɩɩl ƴɔɔ gbe, sɩ Eli na Elije jɩɩl Jʋrdɛ̃ mɩɩr nʋɔra. 8 Dɩ Eli forre ɔɔ gbɔɔlɔ̃ a pur a bena mɩɩr ɲʋɔn, dɩ ɲʋɔn vaar yeɲɔ sa faa thɩ khɩɩ, dɩ wɛr yeɲɔ seer. 9 Ɔbɔɔkɛ wɩ seernɩ mɩɩr pɩ, Eli sor Elijera: «Bɩɛlɛ gɩrɛ fɩ n ƴaalnɩ ɩ̃ cʋɛ far bɔɔraakɛ Thãgba na gba mɩnɩ jʋʋna ƴũu pɩ dɩ sɩ hʋnɔ kha ga.» Dɩ Elije sʋʋraa aa: «Thãgbaa thuukɛ haan farnɩ ɔɔ yeɲɔ mɩ n ƴaal ɩ̃ 'lɛ!» 10 Dɩ Eli sʋʋraa aa: «Fɩ bɩɛlɛ thɩ̃ khɩɩr ka. Sɩ ado fɩ yɩ mɩ bɔɔraakɛ Thãgba na gba mɩnɩ a na jʋʋna ƴũu dɩ sa hʋnɔ kha, fa 'lɛr gɩrɛra fɩ bɩɛlnɩ, sɩ ado fa yɩ ma', fa puno na 'lɛ ga.» 11 Mɔ̃kɛ wɩ n mɩɩnɩ kha dɩ wa n jalna, hɩnɛ gãgo hotorookɛ dɔnɩ dɔɔ na gãgonaakɛ dɔnɩ dɔɔ lʋʋn awɩ thɩ̃thɩɩn a lee wɩ dɩɩdɩɩ. Dɩ Eli jʋʋnɛ ƴũu na jɛkhur. 12 Dɩ Elije n hɩɩnʋʋnɛ, sɩ da n hulẽ aa: «Ɩ̃ thɩ! Ɩ̃ thɩ! Fɩ mãkhananɛ Ɩjɩrayɛl koke hotorosɔ, na awɩ gãgo jʋʋn sɔrasɩsɔ fɛw!» Agɩpɩ aa yɩɩ bã'. Dɩ a fʋrɛ ɔɔ thɛthɛɛ kẽkẽsɔ a ɓəər yeɲɔ. 13 Agɩpɩ a gbaar Elii gbɔɔlɔ̃ɔkɛ a kɔɔ faanɩ dɩɩ ji, a kɛr bir dã Jʋrdɛ̃ mɩɩr nʋɔra a jɩɩl. 14 Dɩ a gbaar gbɔɔlɔna Eli kɔɔ faanɩ dɩɩ ji a bena ɲʋɔn sa so: «Kana Thãgba Kɔ̃tɩnɩkɛ dɔnɩ Elii Thãgba ha?» Mɔ̃ Elije benɩ ɲʋɔn thale, gɩ vaarɛ dɩɩdɩɩ, dɩ seer.
15 Dɩ Thãgbaa mɩmɩaa gbulõokɛ kɔɔ hanɩ Jeriko dɩɩra 'laarɛ yɩɩ awɩ ƴɛbʋrɔ a so: «Thãgbaa thuukɛ kɔɔ hanɩ Elirə haan Elijera nɛnɛ̃ɛkɛ dɛ!» Dɩ wɩ caanʋʋnɛ, a gburõkhu ɔɔ ƴɛbʋrɛ. 16 Agɩpɩ wɩ sor Elijera aa: «Hɩnɛ, kuun khena kpalaɲɔ yʋɔr har kɛ nakha sɛr afɩ thɔ̃dara. Dɔ wɩ jal wɩ ƴaal afɩ kɔ̃tɩ̃! Agakpaana' gɩ do gɔ̃gɔ̃ ʋkhara agɩbo ɓɛlɛ̃ ʋkhara Thãgba Kɔ̃tɩnɩ Thu gbaa a jalna dʋna faa!» Dɩ so war: «Na n thɔ̃ wa'!» 17 Sɩ wɩ n fɛrɛɛrɛ jɔɔ, dɩ so war: «Dɩ nɩ thɔna wɩ bɛɛ!» Dɩ wɩ thʋɔn kona kpalaɲɔ yʋɔrra, dɩ wɩ jal ƴaal Eli a cʋʋna wire yẽther, sɩ wa yɩa'. 18 Dɩ wɩ kɛrɛ bir Elijera le Jeriko dɩɩra, dɩ so war aa: «Ma kɔɔ so nar na n jalaa gaa?»
Jeriko ɲʋɔnɩkɛ Elije phʋɔlnɩ
19 Jerikodara sor Elijera aa: «Dɩɩkɛ daarɛ toorera ka mɔna fɩ yɩɛnɩ yaa kɔ̃tɩn, sɩ ɲʋɔn na bɔr fɩɩʋraka', dɩɩ cʋʋ thɩɩ a n bɔr thɩ̃a'.» 20 Dɩ Elije so warɛ aa: «Nɩ pɩɛr laan bilẽsi phaara a ɛna ha mɩ.» Dɩ wɩ pɔnanɛ a haa. 21 Dɩ a jalnanɛ laanɩle ɲɔ bu kaara a dʋnanɔ sa so: «Thãgba Kɔ̃tɩn sor thaa ayɩwɔɔ: “Mɩ cʋʋrɛ ɲʋɔnɩkɛ dɩɩ bɔr. Ga bir na kʋʋr thɩ̃ ye bã, thɩɩ dakha na n bɔrɛ thɩ̃ɛ.”» 22 Dɩ ɲʋɔn bire bɔr gerra a dana nĩikɛ mɔ̃kɛra Elijee thɩmɩɩkɛ a kɔɔ mɩɩnɩ hanɩ.
Betɛl daɓolminəəkɛ Elije sɔnɩ
23 Elije ther Jeriko da n jal Betɛl dɩɩra. Dɩ mɔ̃ a n kanɩ na hʋɛ, bɩsã ɓola ther dɩɩra dɩ wa n maanʋ, dɩ wa n sona aa: «Yʋ pɔlɔ na jala! Yʋ pɔlɔ na jala!» 24 Dɩ Elije kɛrɛ a hɩɩn wɩ sa sɔ̃ wɩ na Thãgba Kɔ̃tɩnɩ i. Dɩ ursia yeɲɔ ther luu a cɛcɛbɛ daɓolminə kpalaɲɔ yeɲɔ awɩ thɩ̃thɩɩn. 25 Agɩpɩ Elije ther le a jal Karmɛl gɔ̃gʋɔna, a bir the le a kɛr jal Samarɩ dɩɩra.