Ɩjɩrayɛl jamana Yoramɩ thɩmɩɩ
3
1 Jojafatɩ donɩ Juda jamana dɩ ga cʋʋ yɛna yʋɔr makõther, gɛrra Akabɩɩ bikuun Yoram do Ɩjɩrayɛl jamana Samarɩ dɩɩra. Yoram dor jamana a cʋʋna yɛna yʋɔr yeɲɔ. 2 Yoram cʋʋrɛ gɩrɛ puuronɩ Thãgba Kɔ̃tɩnɩ ƴɛra wer, sɩ ga ho mɔ̃ ɔɔ thɩ na ɔɔ nɩ kɔɔ cʋʋna'. Gɩdonɩ a əle Baalɩ bokaakɛ ɔɔ thɩ kɔɔ gbuunɩ a faa. 3 Sɩ a cʋʋrɛ sopuusɔɔkɛra Nebatɩɩ bikuun Jeroboam kɔɔ cʋʋnɩ a tɔna dakha Ɩjɩrayɛl bɩsana pɛr dɩ wɩ cʋʋ. Yoram na kɛr sa faa ga.Ɩjɩrayɛl bɩsana ke kʋʋr na Moabɩdara
4 Mesaakɛ dɔnɩ Moabɩ jamana n kɔɔ haanɛ nʋma jɔɔ. A n kɔɔ tire bana ɓola gbɩlanɩ tamaa (100.000), na banakena gbɩlanɩ tamaa (100.000) na awɩ suun dɩɩ do lãphookɛ a n hanɩ Akabɩɩkɛ dɔnɩ Ɩjɩrayɛl jamana. 5 Sɩ mɔ̃ Akabɩ khini pɩ, Moabɩ jamana ɩɩrnanɛ lãʋ Ɩjɩrayɛl jamanana. 6 Dɩ Yoramɩkɛ dɔnɩ Ɩjɩrayɛl jamana ther Samarɩ, a kpaar a ther Ɩjɩrayɛl sɔrasɛ fɛw. 7 Dɩ a ther da n jal a thɔ̃ so Jojafatɩraakɛ dɔnɩ Juda jamana ayɩ: «Moabɩ jamana ɩɩrna marɛ lãʋ. Fa n ɩ̃ sɩ jal kha sɩ kena Moabɩdara gaa?» Dɩ Jojafatɩ haa tuur aa : «Ma pɔr. Sa jaal kha na fɛrɛ, ɩ̃ too na afɩ too, ɩ̃ gãgosɔ na afɩ gãgosɔ.» 8 Agɩpɩ dɩ Jojafatɩ bir bulee: «Ʋmɔ̃ɔ hʋ sa jalna?» Dɩ Yoram sʋʋraa: «Edɔ̃ɔ məlsɔɔ bə̃ kpara hʋ sa jalna.»
9 Ɩjɩrayɛl jamana na Juda jamana na Edɔ̃ɔ məlsɔɔ jamana gbaar hʋ gbãa dɩ wa n jal. Wɩ ɩɩrɛ a cʋʋna wire makoɲɔ, sɩ wa hana ɲʋɔn a na ɲɔ wɛr na awɩ nʋmaakɛ wɩ hananɩ bã. 10 Dɩ Ɩjɩrayɛl jamana so aa: «Hu! Thãgba Kɔ̃tɩn kpa sɛr, sɛr jamana yẽtherɩkɛ a ɩna a to Moabɩdaraa ɲɔ̃kɔɔ dɛ!» 11 Sɩ Jojafatɩ bule: «Thãgba Kɔ̃tɩnɩ mɩmɩɩ ʋkha bɩɛl na ha kɩɛr, ʋrɛraakɛ sa punonɩ na bule Thãgba Kɔ̃tɩnnaa?» Dɩ Ɩjɩrayɛl jamanaa sɔrasɩ kɔ̃tɩ̃ bɩɛl so aa: «Safatɩɩ bikuun Elije hakɛ; ɔr n kɔɔ fʋɔn ɲʋɔn dɩ Eli na n hul ɲɛ̃ɛ.» 12 Dɩ Jojafatɩ so : «Ɔhɔ̃ɔ! A na hananɛ thɩmɩɩrɩkɛ thɛnɩ Thãgba Kɔ̃tɩnna a na mɩɩ sɩ.» Dɩ Ɩjɩrayɛl jamana na Jojafatɩ na Edɔ̃ɔ məlsɔɔ jamana ɩɩr a jal ɔɔ pa. 13 Dɩ Elije so Ɩjɩrayɛl jamanana aa: «Aɲe sɩ ha kha na fɛrɛ? Jala afɩ thɩɩ bobonasɔɔra na afɩ nɩɩ bobonasɔɔra.» Dɩ Ɩjɩrayɛl jamana so aa: «Kpei! Thãgba Kɔ̃tɩn kpar sɛr, sɛr jamana yẽtherɩkɛ a ɩna a to Moabɩdaraa ɲɔ̃kɔɔ.» 14 Dɩ Elije so aa: «Na Thãgba Kɔ̃tɩn, kokenaa kɔ̃tɩ̃ɩkɛ dɔnɩ yidaar, ʋrɛ mɩ n doronɩ thɔma! Ado Jojafatɩ Juda jamana, mɩ kɔɔ kpɩɛrna ga, ma kɔɔ therna fa'; dɩ ma kɔɔ hɩɩn fɩ fɩɩʋraka'. 15 Sɩ nɛnɛ̃, nɩ kpa kolõjõa bɩ̃daar a ɛna mar.» Dɩ mɔ̃ kolõjõ bɩ̃daar pɔnɩ da n bɩ̃ kolõjʋʋn, Thãgba Kɔ̃tɩnɩ thu lʋʋn Elijera. 16 Dɩ a sor aa: «Thãgba Kɔ̃tɩn sor ayɩ: “Nɩ kpɛ kora, nɩ kpɛ kora jɔɔ kɔlɔnaakɛ.” 17 Gɩdonɩ Thãgba Kɔ̃tɩn sor ayɩ: “Na yɩ thãgba jɩɛ, dɩ thãgba be ga, sɩ ɲʋɔn na hire kɔlɔ̃ɔkɛ dɩ na ɲɔ; nɛrɛ na anɩ nʋ̃sɔ na anɩ nʋ̃ wɩrɛ n gbaanɩ thɩ̃be.” 18 Sɩrakɛ gele na do thɩ̃ɛ Thãgba Kɔ̃tɩnɩ ƴɛra ga; a na tor Moabɩdara wo anɩ ɲɔ̃kɔɔ. 19 Dɩ na kʋɛrɛ awɩ dɩ kɔ̃tɩ̃sɔɔkɛ dɩ bɛr gʋʋ diironɩ, na dɩ kɔ̃tɩ̃ kpɩɩsɔ fɛw. Na kuure awɩ thɩr bɔsɔ na faa, nɩ ɓɔrna awɩ ɲɔbukana, nɩ dʋʋrna bokana awɩ lɛ bɔsɔraakɛ wɩ kʋʋlnɩ gɩ kʋɛ.» 20 Dɩ dɩwɩlɔ, bɔɔraakɛ wɩ n jini duur bonɩɛ, ɲʋɔn thenanɛ Edɔ̃ɔ məlsɔɔ dɩ bil a pɔ hi paar fɛw.
21 Mɔ̃ Moabɩdara fɛw nɩɛnɩ dɩ jamana yẽtherɩle n pɔr wɩ kena wɩ kʋʋr, wɩ kpar wɩrɛ fɛʋʋkɛ awɩ yɛ nɔ danɩ ko kɩɩr, na wɩrɛɛkɛ awɩ yɛ nɔ kpãasɛnɩ dɩ wɩ jal pɛla a pɩɛr. 22 Mɔ̃ dɩɩ wɩlnɩ duuro phiphi dɩ Moabɩdara ɩɩr, wi phã sɛw caranɛ ɲʋɔnɩle dɩɩ sɩɛr dɩ wɩ yɩɛ dɩɩ ho war tɔmɩn. 23 Dɩ wɩ so aa: «Tɔmɩn gɩ dɛ! Baalɛ na hala', jamanasɔɔra kɩɛn awɩ ha, a kʋʋr kha na bajɩna. Nɛnɛ̃ɛkɛ, Moabɩdara wei, sɩ jala khɩa awɩ thɩ̃sɔ!» 24 Ɔbɔɔkɛ wɩ danɩ Ɩjɩrayɛl bɩsanaa ko jɛw, wɩ ɩɩrna wɛr a puno wɩ, dɩ wɩ caalɛ Ɩjɩrayɛl bɩsanaa ƴɛra. Dɩ Ɩjɩrayɛl bɩsana lʋʋn dɩɩra, a puno Moabɩdara. 25 Wɩ wɩɛlɛ dɩ kɔ̃tɩnasɔ. Wɛr fɛw dʋʋrnanɛ bokana lɛ bɔɩsɔɔraakɛ Moabɩdara kʋʋlnɩ dɩɩ hinə bokana ɓibi. Wɩ ɓɔrrɛ ɲɔbukaasɔ fɛw a faa, a kuurnə thɩr bɔɩsɔ fɛw. Kɩɩr-Harɛsɩ dɩɩ kɔɔ sɛ dɩbara a hana bokana, dɩ sɔrasɩ bãbodara jal diirəə a wɩɛlʋ. 26 Mɔ̃ Moabɩ jamana yɩɛnɩ dɩɩ do kʋʋr jɔr ɔɔ fãgara, a kpar sɔrasɛ taamakoɲɔɔkɛ (700) n kɛnanɩ bajɩna da n ƴaal the paar na fãga bɩɩ ɩnɩ n ca ɩnɩ n dã Edɔ̃ jamana sɩ wa punoə'. 27 Dɩ a fʋrɛ ɔɔ caca bikuunɩkɛ na kɔɔ deaanɩ jamana dʋʋra, a jinə bonɩ thiinə dɩ bɛr gʋʋra ƴũu. Le nĩkhi kɔ̃tɩ̃ɩ fʋlɛ Ɩjɩrayɛl bɩsana dɩɩ kar, dɩ wɩ fagʋʋ sa kɛr kɔ̃ awɩ dʋɔ.