Nɔ kpaa thɩ̃ɛsɔɔkɛ Elije cʋʋnɩ
khikhɛr bɔdaarɩ nĩ
4
1 Wi bɩɛl, tibil bɩɛlɩɩkɛ kɔɔ hanɩ Thãgbaa mɩmɩaa gbulona, ɔɔ khɛr sor Elijera aa: «Ɩ̃ kookɛ kɔɔ dɔnɩ afɩ thɔ̃daar khire. Dɩ fɩ jɩrɛ a n kɔɔ mar Thãgba Kɔ̃tɩn bɔɔbɔɔ. Sɩ ʋrɛɛkɛ a hananɩ hellu ɩnɛ ɩnɩ n fʋlɛ ɩ̃ bɩsãsɔ yeɲɔɔkɛ wɩ do ɩnɩ deesɔ.» 2 Dɩ Elije bulee : «Dɩ aɲe ma puno na cʋʋ far? Sɔ mar gɩrɛ fɩ hananɩ cʋɔrɔ.» Dɩ khɛrɩle sʋʋraa: «Mɛr afɩ thɔ̃daar khɛr na hana thɩɛnakɛ cʋɔrɔ, sɩ a ga do niin gɩ fɩɩʋ bilẽsiro gaa ga.» 3 Dɩ Elije sʋʋraa : «Jala jɩɛra afɩ cɔ khudarasɔɔra fɛw a bɩɛlɛ war bʋla khɩna, sɩ bɩɛlɛ gɩ jɔr dɛ ! 4 Dɩ ɔbɔɔkɛ fa kɛrnɩ na bir, lona cʋɔrɔ a khaanɛ lõo pɛ afɩbarara na afɩ bikũusɔɔra. Agɩpɩ gba niinə a na ƴema bʋla khɩnasɔɔrara fɛw gɩ hi fa n thɩɩn khokhɩara.» 5 Dɩ khɛrɩle fagʋʋrɛ sa kɔ̃ a lõ cʋɔrɔ, a khaan lõo pɛ ɔɔbarara na ɔɔ bikũusɔɔra. Dɩ wɩ n 'laaraarɛ bʋlaasɔɔra da n ƴemino niinə. 6 Ɔbɔɔkɛ bʋlaasɔɔle hini fɛw pɩ, a so ɔɔ bikuun bɩɛla a 'laanɛ nar bʋla khɩɩ wo, dɩ ɔɔ bikuun sʋʋraa: «Bʋla khɩɩ na hakɛ bã», dɩɩ do liir niin pɩ. 7 Dɩ a jaal mɩɛ Thãgbaa tibil Elije, dɩ sʋʋraa: «Kɔna dolone niinile a lɩma afɩ hella, sɩ gɩrɛɛkɛ sɛnɩ n do afɩ hãada fɛrɛ na afɩ bikũusɔ.»Elije har Sunɛm khɛr bɩɛlɩ cɔ
8 Wi bɩɛl Elije n kɔɔ kar Sunɛm dɩɩra. Khɛr nũfe bɩɛl kɔɔ hale dɩɩraale a bɩɛlʋ a pɔ a khɔ dikor. Dɩ a fʋna dabɔɔle, bɔɔ fɛʋʋkɛ Elije n kanɩ le Sunɛm dɩɩra, a n jaal le ɔɔ pa da n kho dikor. 9 Dɩ khɛrɩle sor ɔɔ kora aa: «Hɩnɛ, mɩ jɩrɛ dɩɩ do kuunikɛra n ɩnanɩ kɛ asɩ pa bɔɔ fɛw, Thãgbaa tɩɩ phu a do.» 10 Mɩ n bɩɛl fɛr, sɩ kurə dubir nãsʋrɔ ƴũu a thɩnɛnɔ phɩ̃ paar na tabal na too paar na dɔ carãa, ado a bir ɩ̃ asɩ pa, a na n too le.
11 Wi bɩɛl, mɔ̃ Elije pɔnɩ le Sunɛm dɩɩra, a jʋʋnɛ le nãsʋrɔra a lõ duurə a phɩ̃. 12 Agɩpɩ a sor ɔɔ thɔ̃daar Geyajɩra aa: «Wɛ Sunɛm khɛrɩkɛra a ɩ̃.» Dɩ Geyajɩ wɩɩrɛ dɩ pɔ jɩɩl ɔɔ ƴɛra. 13 Dɩ Elije sor Geyajɩra a sʋɔraa ayɛwɔɔ: «Fɩ dona sɛr bʋɔ jɔɔ ka; aɲe fɩ n ƴaal sɩ cʋɛ far? Sɩ mɩa afɩda bɔ jamanana yaa, sɩ mɩa gɩ sɔrasɛsɔɔ kɔ̃tɩnna?» Dɩ khɛrɩle so: «Kpei gɩ bɔrɛ, gɩdonɩ ɩ̃ too thɩ̃thɩɩn mɩ ha.» 14 Dɩ Elije bule Geyajɩ aa: «Dɩ aɲe sa cʋʋraa tɔrrakɛ?» Dɩ Geyajɩ so: «Aa hana bɩsaan gɩrɛra ga, sɩ ɔɔ ko tɩ̃.» 15 Dɩ Elije sʋʋraa: «Dɩ wɩɛ a ɩ̃.» Dɩ Geyajɩ wɩɩ dɩ lõ a jɩɩl lõfonʋɔra. 16 Dɩ Elije sʋʋraa aa: «Nayɩɛr wɛ̃ɛbɔɔkɛra, fa hananɛ kũubir ɲɔ̃kɔɔ.» Dɩ khɛr so aa: «Kpei, ɩ̃ kɔ̃tɩ̃ fɛr Thãgbaa tibil, fa n fɩɩl mɛr afɩ thɔ̃daar khɛra'.»
17 Dɩ sobɔra ger, khɛrɩle hananɛ pɛmɛr. Dɩ yɩɛr na fire dɩ kɔ̃ kũubir bɔ bɩɛlaalera mɔ̃kɛ Elije kɔɔ sʋʋraanɩ.
Elije jaarɛ Sunɛm khɛr bɩɛlɩ bikuun khirera
18 Dɩ bɩsaana khʋɔn. Dɩ wi bɩɛl a kpaanɛ ɔɔ thɩra lɔɔ, kɛ hananɩ jʋ khadara. 19 Dɩ le a so ɔɔ thɩra aa: «Yʋʋ n kho mer ka! Yʋʋ n kho mer ka!» Dɩ ɔɔ thɩ so ɔɔ thɔ̃daar kuun bɩɛlla a kɔnanaa khə̃khə̃ ɔɔ nɩra. 20 Dɩ thɔ̃daarɩle gbaarɛ a kɔna ɔɔ nɩra, dɩ too ɔɔ nɛra a dana ʋlkhɔɔ, agɩpɩ dɩ khi. 21 Dɩ ɔɔ nɩ gbaarɛ jʋʋna a pɛ Thãgbaa tibililee phɩ̃ para a khaan lõo pɩɛraa sa the. 22 Agɩpɩ a thʋɔn ɔɔ kora ayɩ: «Thɔnana thɔ̃daar kuun bɩɛl na kũkə̃ khɛr bɩɛl a ha mɩ ɩ̃ jal Thãgbaa tibililee pa khə̃khə̃ sɩ ɩ̃ ɩ̃.» 23 Dɩ ɔɔ ko bulee: «Aɲee do fɩ n jal le nĩ ɔɔ pa, ga donɩ sɩpo pha fɛtɩ gɩ, dɩ hɩɩr wire ga?» Dɩ so: «Daw gɩ. Thɩ̃ɛ na hala'» 24 Agɩpɩ a pɛrɛ dɩ wɩ gbɛbɩ kũkə̃ khɛrra, dɩ so ɔɔ thɔ̃daaraale aa: «Thɔa mɩ khə̃khə̃ sɩ jal. Fa n jɩɩlna mɩ hʋɛra sɩ a ga do mɛr sɔaa ga.»
25 Mɛ̃ khɛrɩle jal Karmɛl gɔ̃gʋɔna Thãgbaa tibililee pa. Ɔbɔɔkɛ Thãgbaa tibilile yɩɩnɩ ƴɔɔ, a sor Geyajɩraakɛ dɔnɩ ɔɔ thɔ̃daar aa: «Yɛ Sunɛm khɛrra n ɩnanɩ! 26 Ca caanɛɛ a bulenee yɛ: “Fɩ khɩɩrɛ bɛ? Mɔ̃ afɩ ko ha? Afɩ bɩsã khɩɩrɛ bɛ?» Dɩ khɛrɩle so aa: «Sɩ khɩɩrɛ fɛw.» 27 Ɔbɔɔkɛ a danɩ Thãgbaa tibililee pa gɔ̃gɔ̃ yʋɔ, a fʋʋrɛ nɛɛ. Dɩ Geyajɩ pɔr ɩnɩ n tʋɔ ɩnɩ n faa. Dɩ Thãgbaa tibil sʋʋraa: «Sɩɛraa, gɩdonɩ aa ha daʋra ga, sɩ Thãgba Kɔ̃tɩn kɔɔ ker mar, aa nɩ mara'.» 28 Dɩ khɛrɩle so aa: «Mɩ kɔɔ bɩɛl farɛ bɩsaan yaa ɩ̃ kɔ̃tɩ̃ɩ? Ma kɔɔ so far fa n fɩɩl maa gaa?»
29 Dɩ Elije sor Geyajɩra: «Gbɛbɩrɛ, a gba ɩ̃ gbolbi a jala. A fɩ caana tibil, fa n fʋɔrʋa', dɩ a tibil fʋɔr fɩ, fa n tuə'. Jalana ɩ̃ gbolbiikɛ a dɛɛnɛ bɩsaanɩle ƴɩɛra.» 30 Dɩ bɩsaanɩlee nɩ so Elijera: «Na Thãgba Kɔ̃tɩnɩkɛ dɔnɩ yidaar, dɩ fɛrɛ dakha hana yire, ma faa fɩ sɩ na kɔ̃a'. Dɩ Elije ɩɩrɛ a kpaaraa. 31 Geyajɩ kɔɔ kʋʋl wɛr ƴɩɛ a jalna gbolbirə a dɛ̃ɛ bɩsaanɩle ƴɩɛra, sɩ bɩsaan na sorakɛ nʋɔa', aa tutuo woa'. Dɩ a kɛrɛ bir caan Elije a sʋʋraa: «Bɩsaanna na jaa ga.» 32 Ɔbɔɔkɛ Elije danɩ cʋɔrɔ, bɩsaan kɔɔ khire dɩ wɩ pɩɛ le Elijee phɩ̃ para. 33 Dɩ a lʋʋn a khaan lõo a pe wɛr yenyɔra, sa bɩɛl Thãgba Kɔ̃tɩn. 34 Agɩpɩ a phɩnɛ dɛɛn bɩsaana, a thi ɔɔ nɔ bɩsaanɩ nɔra, ɔɔ yisɔ bɩsaanɩ yisɔɔra, ɔɔ ɲɛ̃ bɩsaanɩ ɲɛ̃sɔɔra. A phɩɩnaanɛ dɩ bɩsaanɩ tomɩ bir a phʋrɔ. 35 Dɩ Elije ɩɩrɛ da n kpaar le duu, dɩ jal, dɩ kɛr dɩ bir. Agɩpɩ dɩ bir jʋʋn a phɩɩnaa, dɩ bɩsaan ɩsa ɲẽbe makoɲɔ sa khɛr yinə. 36 Dɩ Elije wer Geyajɩ aa: «Wɛ Sunɛm khɛrra a ɩ̃.» Dɩ Geyajɩ wɩɩrɛ dɩ pɔ Elijera dɩ sʋʋraa: «Gba afɩ bikuun!» 37 Dɩ khɛrɩle pɔr a gburõkhu ɔɔ nɛra a gʋɛ ƴɩɛ, sa gba ɔɔ bikuun a the.
Dɩkorɩkɛ hananɩ kpalʋ
38 Elije kɛrɛ bir Gɩlgal. Sɩ kɔmɛr n kɔɔ kʋrɛ dɩɩra ka. Dɩ mɔ̃kɛ Thãgbaa mɩmɩaa gbulõ kpanɩ jɛ Elijee pa, a sor ɔɔ thɔ̃daara aa : «Thɩa bʋla kɔ̃tɩ̃ɩ a cʋɛ dikor a hana wɩ.» 39 Dɩ bɩɛl wɛra lʋʋn hʋɔnɔ ɩnɩ n khʋʋn bii, a yɩ ƴẽbi caarɩkɛ wa n khona', hɔ̃ dɩvɛ̃ thɩrʋra dɩɩ se. Dɩ a khʋʋnɛ a hi kɩ̃kɩɩn a kɔna. Ɔbɔɔkɛ a danɩ cʋɔr, a cɩrɛ pɛ bʋlaala, sɩrakɛ wa kɔɔ jɩ thɩ̃doo gɩ dona'. 40 Dɩ wɩ tɩnɛnɛ tɩbɩlaale wɩ khɔ. Sɩ ɔbɔɔkɛ tɩbɩla 'lɛ gɩnɩ, wɩ hulene aa: «Dɩkora hananɛ kpalʋ ya Thãgbaa tibil!» Dɩ wa puno na khoa'. 41 Dɩ Elije sor wɩ kpɛ mɩɩn a pɔna. Dɩ a gbaar mɩɩna a pɛ bʋlalɔla, sa so: «Tɩnɛnɛ tɩbɩlaakɛ dikora wɩ kho.» Dɩɩ do thɩ̃ puu na bir hale bã.
Elije cʋʋrɛ buru dɩɩ ƴɛr dɩ ha tɩbɩla
42 Kuun bɩɛl ther Baal-Salɩsa dɩɩra a pɔna caca thɩ̃ɛɛ buru ɩnɩ n ha Thãgbaa tibil: ɔɔjɩ buru be kpelẽ na bile phaakɛ a pɛnɩ lokaara. Dɩ Elije so aa: «Hana tɩbɩlaakɛ wɩ kho.» 43 Dɩ ɔɔ thɔ̃daar bule: «Mɔ̃ ma tɩnɛ sɩ gɩ puno gɩ dã tɩbɩla tamaa?» Dɩ Elije so aa: «Tɩnɛnɛ tɩbɩlaakɛ wɩ kho. Gɩdonɩ Thãgba Kɔ̃tɩn sor aa: “Wa khor na hi sɩ gɩ sɩ.” » 44 Dɩ thɔ̃daarɩle tɩnɛ wɛr dɩ wɩ kho, sɩ dɩɩ sɩ mɔna Thãgba Kɔ̃tɩn kɔɔ sonɩ.