Elije kpɛɛrɛ Naamã gbuul khoora
5
1 Siiri jamanaa sɔrasɩsɔɔ kɔ̃tɩ̃ɩkɛ wɩ n wenɩ Naamã kɔɔ dar ɔɔ kɔ̃tɩnna haar ka. A n kɔɔ cʋʋrɛ na sobɔr, gɩdonɩ ɔr Thãgba Kɔ̃tɩn kɔɔ gba a taana Siiridara. Sɩ gbuul khoo ɩnɛ a fʋ kuun khaalera khɩɩnɔnɩ ka. 2 Sɩɩdo Siiri sɔrasɩ gbulona kɔɔ jaal kʋʋra Ɩjɩrayɛl dɩɩra, a fʋ khebir bu bɩɛl a kɔna. Dɩ khebirile hale da n do Naamãa khɛrɩ thɔ̃. 3 Dɩ wi bɩɛl, a sor ɔɔ kɔ̃tɩnnaakɛ dɔnɩ Naamãa khɛr aa: «Ado ɩ̃ kɔ̃tɩ̃ punone jal Thãgbaa mɩmɩɩraakɛ hanɩ Samarɩ dɩɩra, a na kɔɔ kpɛsɛɛrɛ gbuul khookɛ hanaanɩ.» 4 Dɩ Naamã jaal mɩɛ ɔɔ kɔ̃tɩ̃ gɩrɛ khebirikɛ thɛnɩ Ɩjɩrayɛl dɩɩra sonɩ. 5 Dɩ Sɩɩrɩ jamana sʋʋraa: «Dɩ jala le Samarɩ. Ma thɔnanɛ sɛbɛ na ha Ɩjɩrayɛl jamana.» Dɩ Naamã gbaar dɛ bulo be kilə tãather (300), a gbana dɛ, kilə kpalãther yʋɔr (70), na kẽkẽ ɓɔna yʋɔr a jalna. 6 Dɩ jamana haarɛ sɛbɛra dɩ jalna ha Ɩjɩrayɛl jamana. Gɩ sor le sɛbɛrara aa: «Ɔbɔɔkɛ sɛbɛɛkɛ na dã fɩnɩ, jɛ mɩ n thɔna farɛ ɩ̃ thɔ̃daar Naamãakɛ dɔnɩ sɔrasɛsɔɔ kɔ̃tɩ̃ fɩ kpɛɛnɛɛ gbuul khookɛ hanaanɩ.» 7 Ɔbɔɔkɛ Ɩjɩrayɛl jamana hɩɩnɩ sɛbɛɛle na pɩ, a ɓəəre ɔɔ thɛthɛɛ kẽkẽsɔ sa so aa. «Thãgba ha mɩ dɩ̃ 'laa khir, dɩ̃ 'laana yire, dɩ thɔna mar tibil ɩ̃ kpɛɛnɛɛ gbuul khoo ya? Nɩ jɛ bɔɔbɔɔ hʋɛ a n ƴaal sɩ a kena mɩ sʋʋ.» 8 Ɔbɔɔkɛ Elijeekɛ dɔnɩ Thãgbaa tibil nɩɛnɩ dɩ wɩ so Ɩjɩrayɛl jamana ɓəəre ɔɔ thɛthɛɛ kẽkẽsɔ, a thʋɔn sʋʋraa aa: «Aɲe dɔ nɔɔ dɩ fɩ ɓəər afɩ kẽkẽsɔ? Sɩɛraa a ɩ̃ mar kɛ, a na jɩrɛ Thãgbaa mɩmɩɩ hakɛ Ɩjɩrayɛl dɩɩra.» 9 Dɩ Naamã pɔr na ɔɔ gãgosɔ na ɔɔ gãgo hotoro a jɩɩl Elijee cɔ, lõfonʋɔra. 10 Dɩ Elije thʋɔn thɔ̃thɔ̃ bɩɛl a sʋɔraa wɔɔ: «Jala Jʋrdɛ̃ mɩɩra a hɔ ɲʋɔn ɲẽbe makoɲɔ, fa kpɛɛrɛ, afɩ tomɩr n bir gɩ ha bɔɔbɔɔ.» 11 Dɩ nĩkhii fʋrɛ Naamã dɩ kɛr da n kɔ̃ sa so: «Mɩ kɔɔ kpɩɛrɛ ɔɔ thɛthɛ na ther na pɔ na jɩɩl mar, a na bɩɛl Thãgba Kɔ̃tɩn ɔɔ Thãgba, sɩ a 'laa ɲɔ̃ɔ a tha kãkɛra dɔnɩ khoo, a kpɛɛ mɩ gbuul khoora. 12 Abana mɩɩr na Parpar mɩɩrɩkɛ dɔnɩ Damasɩ mɩɩrsɔ na ba Ɩjɩrayɛl ɲʋ̃ɔsɔ fɛʋaa? Ma n kɔɔ hʋ ɲʋɔn le a kpɛaa? Dɩ a kɛrɛ da n kɔ̃ na nĩkhii. 13 Dɩ ɔɔ thɔ̃dara tɔr dã a mɩɩnaa ayɩ wɔɔ: «Asɩ thɩ ya, ado Thãgbaa mɩmɩɩra kɔɔ sor fɩ cʋɛ thɩ̃ɛɛkɛ khiinonɩ a jɔ, fa kɔɔ cʋaa? Dɩ mɔ̃ gɩrɛ a kanɩ so, fɩ hɔ ɲʋɔn a kpɛɛnɛ ha?» 14 Liir a gbũ Jʋrdɛ̃ mɩɩrara a mʋʋ ɲʋɔnɔ ɲẽbe makoɲɔ mɔna Thãgbaa tibil kɔɔ sonɩ. Dɩ a kpɛɛrɛ, dɩ ɔɔ tomɩr bir debi a ho bɩsã bu tomɩr.15 Dɩ Naamã kɛrɛ na wɩrɛ fɛʋʋkɛ n kpaaraanɩ a bir Thãgbaa tibililee pa. Ɔbɔɔkɛ a danɩ le, a jɩɩlɛ ɔɔ ƴɛbʋrɔ a so wɔɔ: «Nɛnɛ̃ dɩphã mɩ jɩrɛ dɩ thɩɩra fɛw Thãgba na hale, saagado Ɩjɩrayɛl dɩɩra gaa ga. Gɛr gɩ nɛnɛ̃ mɩ n bɩɛl fɛr gba khaardaakɛ mɛr afɩ thɔ̃daar ɩnanɩ.» 16 Sɩ Elije sʋʋraa: «Na Thãgba Kɔ̃tɩnɩkɛ dɔnɩ yidaar, ʋrɛɛkɛ mɩ n doronɩ thɔma, ma gba thɩ̃a'.» Dɩ Naamã fɛrɛɛrɛ a gba, sɩ dɩ bo. 17 Dɩ Naamã so aa: «Dɩ gɩdonɩ fɩ bor, 'laanɛ hʋɛ wɩ tha thɩɩ kɛkɛ wɩ ha mɛr afɩ thɔ̃daar, kũkə̃-gãgona yeɲɔ n gba. Gɩdonɩ mɛr afɩ thɔ̃daar, ma n ƴaal ma n ji nʋ̃ thii bonɩɛ na bonɩ kpɩɩsɔ 'lo thãgba kpɩɩsɔɔra, saagado Thãgba Kɔ̃tɩnna dɩbara gaa ga. 18 Thĩ bɩɛl dʋɔn wo, Thãgba Kɔ̃tɩn n faa mɛr afɩ thɔ̃daarɩ dɩpa ʋrɛ a hana mɩ: Gɛr dʋɔn ɔbɔɔkɛ ɩ̃ kɔ̃tɩ̃ na lonɩ ɔɔ thɩlɩkɛ dɔnɩ Rɩmɔ̃ɔ fʋɔr cɔra a na n gburõkuraa, ɩ̃ yɛna a n ƴɛl, gɛr gɩ Thãgba Kɔ̃tɩn n faa sopuu caarɩle a hana mɩ, ɔbɔɔkɛ ma gburõkhuni Rɩmɔ̃ɔ fʋɔr cɔra.» 19 Dɩ Elije sʋʋraa: «Kɔna na ha ɩɩ.» Dɩ Naamã fagʋʋrɛ sɩ da n kɔ̃.
Naamãa gbuul kho mar Geyajɩ
20 Elijeekɛ dɔnɩ Thãgbaa tibil, ɔɔ thɔ̃daarɩkɛ wɩ wenɩ Geyajɩ sor ɔɔ hara aa: «Hɩnɛ, ɩ̃ kɔ̃tɩ̃ ɓolnanɛ Naamã, Siiridaarɩkɛra dɛ, aa teeraa thɩ̃ɛɛkɛ a ɩnanɩ bɩɛllaka'. Na Thãgba Kɔ̃tɩnɩkɛ dɔnɩ yidaar! Ma car na kpaaraa, a na tee dɩkha.» 21 Dɩ a car da n kpaan Naamana. Mɔ̃ Naamã yɩɩnɩ dɩ ca da n kpaaraa khiro, a gbune khə̃khə̃ ɔɔ gãgo hotorora a caan bulee: «Daw gɩ bɛ?» 22 Dɩ Geyajɩ so: «Daw gɩ. Ɩ̃ kɔ̃tɩ̃ thɔna mɩ ɩ̃ sɔ far: “Daɓola yeɲɔ ther Thãgbaa mɩmɩaa gbulonaakɛ hanɩ Efɩrayɩm gɔ̃gɔ̃ bəənnə a pɔ nɛnɛ̃ ɩ̃ pa, mɩ n bɩɛl fɛr, 'laanɛ dɛ bulo be kilə kpelẽ yʋɔr na kẽkẽ ɓɔna yeɲɔ ɩ̃ ha wɩ.” » 23 Dɩ Naamã sor Geyajɩra: «Gba kilə kpalãther.» Dɩ a fɛrɛɛrɛ a pɛr dɛ bulo bera lokana yeɲɔra, a hanaa kẽkẽ ɓɔna yeɲɔra, a pɛr ɔɔ thɔ̃daar kona yeɲɔ dɩ wɩ gba a kʋʋlna Geyajɩ ƴɩɛ. 24 Ɔbɔɔkɛ Geyajɩ danɩ gɔ̃gɔ̃ birə, a teere khaardaara awɩ ɲɔ̃kɔɔ a thɩɩn cʋɔrɔ, sa faa tɩbɩlaale dɩ wɩ kɛr jal. 25 Agɩpɩ a kɛrɛ jal ɔɔ kɔ̃tɩ̃ Elijee pa. Dɩ Elije bulee: «Kana fɩ the yaa Geyajɩɩ?» Dɩ Geyajɩ so aa: «Mɛr afɩ thɔ̃daar, ma jal paara'.» 26 Dɩ Elije so : «Ɩ̃ thu na kɔɔ hale ɔbɔɔkɛ kuunnɩle thenɩ ɔɔ gãgo hotorora da n caan faa? Bɔɔ daan dɩ fa tee dɛ bulo na kẽkenasɔ na olɩvɩ thɩrasɔ na dɩvɛ̃ thɩrasɔ na nʋ̃ yɩrasɔ na nʋ̃ kɔ̃tɩnasɔ na thɔ̃daar konasɔ na thɔ̃daar khɛrasɔ bɛɛ? 27 Naamãa gbuul khora na ma fɛr na afɩ məlsɔ bɔɔ khorr.» Dɩ Geyajɩ ther Elijee ƴɛra na gbuul khoo phõophõophõo a ho nɛɛjɩ.a