Kpãkpo bireekɛ jenɩ ɲʋɔnɔ
6
1 Wi bɩɛl Thãgbaa mɩmɩaa gbulõ sor Elijera aa: «Hɩnɛ paarɩkɛra sɩ n gbɛbɩnɩ kha na fɛrɛ, gɩ 'lune ka. 2 Dɔ sɩ jal Jʋrdɛ̃ mɩɩr nʋɔra sɩ kur kparɛ bɩɛlbɩɛl sɛrɛ fɛw, sɩ gbɛbɩna paar sa n tooro.» Dɩ Elije so wɩ jala. 3 Sɩ tɩɩ bɩɛl wɛra so Elijera aa: «Mɩ n bɩɛl fɛr, dɔ sɩ jal kha.» Dɩ so: «Ma jaal». 4 Dɩ a jalna wɛr. Dɩ mɔ̃ wɩ danɩ Jʋrdɛ̃ wɩ mar dɩ wa n kuur thɩra. 5 Mɔ̃kɛ bɩɛl wɛra hanɩ da n kur kpar bɩɛl, kpãkpo bire kpɩrɛ a ji ɲʋɔnɔ, dɩ hulẽ aa: «Hu ɩ̃ kɔ̃tɩ̃! Mɩ pemine Kpãkpookɛra dɛ!» 6 Dɩ Thãgbaa tibil bulee: «Kana a ji?» Dɩ a nɩɩraarɛ dapa. Dɩ Elije kure thɩrʋ a dʋnanɔ a cʋʋ kpãkpo bire dɩ phe. 7 Agɩpɩ dɩ sʋʋraa: «Te.» Dɩ kuunɩle 'laa ɲɔ̃ɔ a ti.Elije yaarɛ Siiri sɔrasɛ dɩ wɩ fʋlɛ wɩ
8 Kʋʋr kɔɔ hale Siiri jamana na Ɩjɩrayɛl bɩsanana. Dɩ Siiri jamana cʋʋrɛ gbɛbɩ kha na ɔɔ sɔrasɩ kɔ̃tɩ̃sɔ a ti kpɩɛrɛ ayɩ : "Kɩɛr ma jɛ na ɩ̃ sɔrasɩsɔ". 9 Dɩ Thãgbaa tibil thʋɔn a so Ɩjɩrayɛl jamanana aa: «Dɔ bʋrɛ, fa n kana paarɩla', gɩdonɩ Siiri sɔrasɛ jɛr le.» 10 Dɩ Ɩjɩrayɛl jamana thʋɔn tɩbɩla wɩ jala na jʋrɛ paarɩlera Thãgbaa tibil kɔɔ nɩɩraanɩ.
A kpãkpaanaanɛ gelela, ga do babɩɛl gɩ dɩ balaɲɔ ga. 11 Dɩ ga thɩ̃ɩle ɲaɲaanɛ Siiri jamana kpɩɛrɛ jɔɔ ka, dɩ a wer ɔɔ thɔ̃darasɔ a bule wɩ aa: «Na n mɩɛ mɩ ntɛɛkɛra hanɩ asɩ thɩ̃thɩɩn da n liirnə sɩ na Ɩjɩrayɛl jamana gaa ya?» 12 Dɩ ɔɔ thɔ̃daar bɩɛl sʋʋraa aa: «Lĩlir na ha asɩ thɩ̃thɩɩna' yaa ɩ̃ kɔ̃tɩ̃ jamana! Thãgbaa mɩmɩɩ Elijeekɛ hanɩ Ɩjɩrayɛl dɩɩra, ɔr gɩ. Ɔr n mɩɛnɛ Ɩjɩrayɛl jamana thɩmɩaakɛrakɛ fɩ n mɩɩnɩ afɩ du bɩnɔɔkɛ fɩ n phɩnɩ.» 13 Dɩ Siiri jamana so aa: «Nɩ jala jʋrɛ a jɛ kãakɛ a hanɩ, ɩ̃ pɛr wɩ fʋʋ.» Dɩ wɩ pɔr sʋʋraa aa: «Dotã dɩɩra a ha.» 14 Dɩ jamana thɔnanɛ gãgona na koke hotorosɔ na sɔrasɛsɔ tə̃tə̃tə̃ dɩ wɩ jal dɩtɩnɔ a kpala dɩɩra. 15 Dɩ Elijee khukhu ɩɩrɛ duuro phiphiphi da n the, a yɩ sɔrasɛ dɩ wɩ kpala dɩɩra na gãgona na koke hotorosɔ. Dɩ thɔ̃daarɩle so aa: «Hu! Mɔ̃ sa do yaa ɩ̃ kɔ̃tɩ̃ ?» 16 Dɩ Elije sʋʋraa: «Fa n do maar n fʋ fa', gɩdonɩ wɩrɛɛkɛ hanɩ kha na sɛrɛ, wɩ jɔrɛ a jɔ wɩrɛɛkɛ hanɩ kha na wɛr.» 17 Dɩ Elije bɩɛlɛ Thãgba aa: «Thãgba Kɔ̃tɩn, mɩ n bɩɛl fɛr, khɛraa yinə a yɩɛ.» Dɩ Thãgba Kɔ̃tɩn khɛrɛ thɔ̃daarɩle yinə, dɩ yɩ gãgonasɔ na dɔ koke hotorosɔ tə̃tə̃tə̃ gɔ̃gʋɔnna, dɩ wɩ kpala Elijera.
18 Siiri sɔrasɛ n pɔr Elijera, dɩ bɩɛl Thãgba Kɔ̃tɩn aa: «Mɩ n bɩɛl fɛr, yaarɛ sɔrasɛɛ kɛ!» Dɩ Thãgba Kɔ̃tɩn yaar wɛr mɔna Elije mɩɩnɩ. 19 Dɩ Elije so warɛ aa: «Nɩ buure hʋɛra, dɩɩraakɛ nɩ n jalnɩ, ga do ɔr ha ʋra'! Na n kpa mar, ma nɩ narɛ tibilikɛ nɩ n ƴaalnɩ.» Sɩ jaa Samarɩ dɩɩra a thɔɔ wɩ jalna. 20 Ɔbɔɔkɛ wɩ lonɩ Samarɩ dɩ bɩnɔ pɩ, Elije bire bɩɛl Thãgba wo aa: «Thãgba Kɔ̃tɩn, khɛra tɩbɩlaakɛ yinə.» Dɩ Thãgba Kɔ̃tɩn khɛr wɛr yinə, dɩ wɩ yɩɛ dɩɩ do Samarɩ dɩ bɩnɔ wɩ ha. 21 Ɔbɔɔkɛ Ɩjɩrayɛl jamana na yɩ wɩnɩ, a bulele Elije aa: «Ɩ̃ thɩ, ɩ̃ kʋrɛ wɩ ya?» 22 Dɩ Elije sʋʋraa: «Kpei, fa n kʋʋr wa'. Wɩrɛɛkɛ fɩ n kɔɔ fʋlɛnɩ ɔbɔɔkɛ fɩ n kɔɔ kenɩ kʋʋr na afɩ bajɩna na afɩ sẽ, fɩ n kʋʋr wɛr ya? Hana wɩ dɩkɔ wɩ kho, a hana wɩ ɲʋɔn wɩ ɲɔ, sɩ wɩ kɛr wɩ bir awɩ kɔ̃tɩ̃ɩ pa.» 23 Dɩ Ɩjɩrayɛl jamana cʋʋrɛ dɩkɔ tə̃tə̃tə̃ a ha wɩ dɩ wɩ kho, dɩ ha wɩ ɲʋɔn dɩ wɩ ɲɔ. Agɩpɩ, a faa wɛr dɩ wɩ kɔ̃ awɩ kɔ̃tɩ̃ɩ pa. A fʋna dabɔɔle, Siiri sɔrasɩ gbulona na n lõ Ɩjɩrayɛl dɩɩra 'lo bã.
Kɔmɛr kɔ̃tɩ̃ɩ jire Samarɩ dɩɩra
24 A gele karɔ pɩ, Siiri jamanaakɛ wɩ n wenɩ Bɛn-Hadadɩ kpar ɔɔ sɔrasɩsɔ fɛw a jal sɔbɩ Samarɩ dɩɩ. 25 Dɩ kɔmɛr kɔ̃tɩ̃ɩ jire Samarɩ na sobɔr. Wɩ sɔbɩrɛ dɩɩ a pʋɔrna ƴɛrr, dɩɩ do nɔɔ dɩ wa n dolõ kũkə̃ yʋ bɩɛl dɛ bulo be kpalanã, dɩ wa n dolõ kʋlãpubi pɩɩn, kilə kuru dɛ bulo be yemɔy.a
26 Wi bɩɛl, mɔ̃ Ɩjɩrayɛl jamana n kanɩ dɩ bɛr gʋʋra ƴũu, khɛr bɩɛl hulene a sʋʋraa: «Ɩna taa mɩ ya, ɩ̃ kɔ̃tɩ̃ jamana.» 27 Dɩ jamana birsee: «Agado Thãgba Kɔ̃tɩn taa fa', aɲe ma gba na taana fɩ. Ɩ̃ taa fɩ na bile yaa, ɩ̃ taa fɩ na dɩvɛ̃?» 28 Dɩ jamana bire bulee aa: «Aɲe hana fɩ?» Dɩ khɛrɩle sʋʋraa, khɛrɩkɛ kɔɔ sɔ mar ɩ̃ 'laanɛ ɩ̃ bikuun sɩ kʋ sɩ kho; a dɩɩ wɩl ɩnɩ n 'laa dakha ɩnɩ bikuun sɩ kʋ sɩ kho. 29 Dɩ mɩ 'laarɛ ɩ̃ bikuun dɩ sɩ kʋ a thɩɩ kho. Sɩ mɔ̃ dɩɩ wɩlnɩ, dɩ mɩ so a 'laanɛ dakha ɔɔ bikuun sɩ kʋ sɩ kho, dɩ gba ɔɔ bikuun a ker. 30 Mɔ̃ jamana nɩɛnɩ khɛrɩlee thɩmɩ, a ɓəəre ɔɔ thɛthɛɛ kẽkẽsɔ, dɩ mɔ̃ a n kanɩ gʋʋra ƴũu, tɩbɩla yɩɩrɛ a jɩ bɔrɔ kẽkɩɩn hale dɩ to tɩɛr ɔɔ tomɩrab. 31 Dɩ jamana ʋlfɛrɛ aa: «Thãgba n pɛ mar sor gɩ khɩɩr na sobɔr, ado ma kur Safatɩɩ bikuun Elijee yʋ nĩika'.»
Elije mɩɩrɛ kɔmɛr kɔ̃tɩ̃ɩlee khu pa
32 Elije kɔɔ hale ɔɔ cɔ a too, dɩ dʋɔ kɔ̃tɩna pɔ a toonaa. Dɩ jamana thʋɔn kuun bɩɛl ɔɔ totoosɔɔra Elijee pa. Sɩ mɔ̃ thɔ̃thɔnɩle na danɩ le pa', Elije kɔɔ sor dʋɔ kɔ̃tɩnanaale aa: «Nɩ yɩ gɛr bɛ, tɩɩ kʋdaarɩ bikuuna thʋɔn tibil a ɩna kuro mɩ yʋʋ. Na n hɩnɛ. Na n jʋrɛ; ɔbɔɔkɛ thɔ̃thɔnɩle na danɩ, nɩ khaanɛ lõo, sa tɔnaa loona a faa. Dɩrakɛ ɔɔ kɔ̃tɩ̃ɩ nɛ bɩ̃ ha gele a n kpananɩ ɔɔ khiro. 33 Mɔ̃ a hanɩ da n mɩɩna wɩ 'lo, jamana daan a so: «Ga do Thãgba Kɔ̃tɩn pɛ sar thɩlkenaakɛra fɛw gaa, dɩ aɲee nũ pɛ ca ma bir na hana Thãgba Kɔ̃tɩnna 'lo?»