7
1 Elije sor tɩbɩlala aa: «Nɩ pɛ nũu Thãgba Kɔ̃tɩnɩ thɩmɩra. Thãgba Kɔ̃tɩn sor ayɩ: “Cʋɔ bɔ ʋrɛraakɛra, dɩkɔ na hale Samarɩ dɩ lõfonʋɔra wa n dolõ mɩ̃ phuu kilə yʋɔr yeɲɔ, dɛ bulo bi bɩɛl, ɔrjɩ kilə kpelẽ yenã dɛ bulo bi bɩɛlla dakha.” » 2 Dɩ jamanaa sɔrasɩ bɩɛlɩkɛ dɔnɩ ɔɔ khukhu bɩnɔɔkɛ a n ƴɛlɔnɩ so Thãgbaa tibilə aa: «Adorakɛ Thãgba khɛr jʋ̃ʋkana ƴũu, sɩ gɩrɛɛkɛra fɩ sonɩ na punone na cʋʋ ya?» Dɩ Elije sʋʋraa: «Fa yɩ gɛr wer na afɩ yi, sɩ fa 'lɛ gɩ na khoa'.»Siiri sɔrasɛ caalɛlɛ sa faa dɩkɔ jɛʋ.
3 Gbulo yenã kɔɔ hale n cʋɔnɩ Samarɩ dɩ lõfonʋɔra jɩɛra. Dɩ wɩ mɩɩrɛ kha awɩ ha aa: «Aɲera sɩ too kɩɛra dɩ sa n pɩɛr khir? 4 A sɩ yɩ sɩ lona dɩɩra yo, gɩdonɩ kɔmɛr jɔrɛ ka sa khiire, dɩ a sɩ too kɩɛr yo, sa khiire. Sɩ jala Siiri sɔrasɛɛ jɛw a 'laanɛ asɩbara. Ado wɩ faa sɩ dɩ sɩ hana yire gɛra gɩ, dɩ awɩ kʋʋr sɩ wo, sɩ thʋ̃ sɩ khiir.» 5 Dɩ wɩ ɩɩrɛ dʋɔr birəra dɩ wa n jal Siiri sɔrasɛɛ jɛw. Mɔ̃ wɩ danɩ jɛ lõfonʋɔra, tibil bɩɛlakɛ na hale jɛwa'. 6 Gɩdonɩ Thãgba Kɔ̃tɩn kɔɔ cʋʋrɛ Siiri sɔrasɛ awɩ jɛw, dɩ wɩ nɩɛ heleekɛ hɔnɩ koke hotoro hele, na gãgo nɛ bɩna a ho sɔrasɩ jʋjʋɔ. Dɩ wɩ mɩɩrɛ kha awɩ ha aa: «Ɩjɩrayɛl jamana jaal Hɛtɩɩ məlsɔɔ jamanasɔɔra na Ejipitidaraa jamanasɔɔra a the wɩ da n ɩna wɩ kena sɩ.» 7 Dɩ wɩ ɩɩrɛ dʋɔr birəro a caalɛ sa faa awɩ kẽkẽ wasɔ na awɩ gãgosɔ na awɩ kũkə̃sɔ. Wɩ faarɛ jɩɛ mɔna gɩ kɔɔ hanɩ sa caalɛ wɩ taa awɩ yi. 8 Dɩ gbuloole daan le jɛ lõfonʋɔra a lõ kẽkẽ wa bɩɛla a gba dɩkɔ a kho a ɲɔna, sa khɩɩ dɛ bulo na dɛ na kẽkena a jalna ker. Agɩpɩ, wɩ kɛrɛ bir wo a lõ kẽkẽ wa kpɩɩra a khɩɩ thɩ̃ɛsɔɔkɛ hanɩle a jalna ker.
Gbulo kɛrɛ bir Samarɩ dɩɩra a mɩɩ thɩmɩɩ phaakɛ daanɔnɩ
9 Agɩpɩ gbuloole mɩɩrɛ kha awɩha ayɩ: «Bɔɔ sɩ n cʋʋ gɩrɛra gaa dɛ! Nĩi wiikɛ, thɩmɩɩ da mɩɩ wire gɩ. Ado sɩ pɩr nʋɔ, sɩ na pɩɛr dɩɩ n wɩla duuro, thɩmɩɩr na 'li ser. Sɩ jalla nɛnɛ̃ jamanaa cɔ a mɩa thɩ̃ɛɛkɛra.» 10 Dɩ wɩ jaal a we dɩ lõfonɔ bɛrdara a so war aa: «Sɩ jaal lõ Siiri sɔrasɛɛ jɛw, dɩ tibil bɩɛlakɛ na hala'. Fa n nɩɛrakɛ le tibil wirə'. Gãgona na kũkənə dɩbara hãale dɩ wɩ lisɔ, sɩ kẽkẽ waasɔ too ba mɔ̃kɛra gɩ kɔɔ hanɩ. 11 Dɩ dɩ lõfonɔ bɛrdara thʋɔn dɩ wɩ jal jamanaa cɔ a mɩɩ thɩ̃ɛɛlera. 12 Dɩ jamana ɩɩrɛ dɩtɩnɔ a so ɔɔ thɔ̃darara aa: «Ma mɩɛ nɛr fɩlɛɛkɛ Siiridara n ƴaal sarnɩ. Gɩdonɩ wɩ jɩrɛ kɔmɛra sɩ ha, gɛr gɩ dɩ wɩ faa awɩ jɛ pa sa lõ hʋɔnɔ a wʋɔn. Awɩ kpɩɛr dʋɔn ado sɩ the dɩɩra, wɩ fʋlɛ sɩ na yire, sɩ wɩ lõ dɩɩra.» 13 Dɩ ɔɔ thɔ̃daar bɩɛl so aa: «Ado mɛ̃ gɩ, sɩ fɔ gãgonaakɛ sɛnɩ dɩɩra 'lo na yire yemɔy. Gɩdonɩ a wɩ toorakɛ, sɩ wa khiire mɔna tɩbɩla dɩɩra na khiirni. Sɩ thɔna tibil ɩkha wɩ jalna gãgonaale wɩ hɩɩn gɩrɛ hanɩ le.» 14 Dɩ wɩ gbaar koke hotorosɔ yeɲɔ na awɩ gãgosɔ, dɩ jamana thɔ̃ thɔ̃thɔna, wɩ 'lɔ Siiri sɔrasɛ a kpaanɛ hɩnɛ. 15 Dɩ wɩ 'lor Siiridara foo a kpaan dana Jʋrdɛ̃ mɩɩr. Le wɩ yɩ kẽkenasɔ na thɩ̃besɔɔkɛ wɩ dʋʋrnanɩ a jalna na hʋɛ mɔna wɩ n caalɛnɩ. Dɩ thɔ̃thɔnaale kɛrɛ bir a mɩɛ jamana.
16 Le tɩbɩla the jal Siiridaraa jɛw a khɩɩ thɩ̃ɛ. Dɩ wɩ n dolone mɩ̃ phuu, kilə yʋɔr yeɲɔ dɛ bulo bi bɩɛlla, ɔrjɩ kilə kpelẽ yenã, dɛ bulo bi bɩɛlla dakha mɔ̃kɛra Thãgba Kɔ̃tɩn kɔɔ mɩɩnɩ. 17 Dɩ jamana pɛrɛ ɔɔ sɔrasɩɩkɛ dɔnɩ ɔɔ khukhu bɩnɔɔkɛ a n ƴɛlɔnɩ a na n bɛra dɩ lõfonʋɔ. Sɩ tɩbɩla saarʋrɛ le a kʋ mɔ̃kɛra Thãgbaa tibil kɔɔ sonɩ ɔbɔɔkɛ jamana kɔɔ jalnɩ ɔɔ pa. 18 Thãgbaa tibil kɔɔ mãa sor jamanana aa: «Cʋɔ, bɔ ʋrɛraakɛra, wa dolone ɔrjɩ kilə kpelẽ yenã, dɛ bulo bi bɩɛl, mɩ̃ phuu, kilə yʋɔr yeɲɔ dɛ bulo bɩɛlla le Samarɩ lõfonʋɔra.» 19 Sɩ jamanaa sɔrasɩɩlera dɔnɩ ɔɔ khukhu bɩnɔɔkɛ a n ƴɛlɔnɩ kɔɔ sor Thãgbaa tibilə aa: «Adorakɛ Thãgba Kɔ̃tɩn khɛr jʋ̃ʋkana ƴũu, sɩ gɩrɛɛkɛra fɩ sonɩ na punone na cʋʋ ya?» Dɩ Elije kɔɔ sʋʋraarɛ dakha aa: «Fa yɩ gɛr wer na afɩ yi, sɩ fa 'lɛ gɩ na khoa'.» 20 Dɩ gɛrra dɔ gɩrɛ dananɩ kuunɩle. Tɩbɩla saarʋrɛ le dɩ lõfonʋɔra a kʋ sobɔra.