2 JAMANASƆ 8

Kɔmɛrɩɩkɛ jenɩ yɛna makoɲɔ

1 Elije kɔɔ sor khɛraakɛ a kɔɔ jaanɩ ɔɔ bikuun khirera ayɩ: «Thɛ kɩɛr, fɛrɛ na afɩ cɔdara a jala tɔɔ kãkɛ fɩ jɩnɩ fa punone, gɩdonɩ Thãgba Kɔ̃tɩn pɛrɛ kɔmɛr dɩɩra, dɩ ga cʋʋrɛ yɛna makoɲɔ.» 2 Dɩ khɛrɩle cʋʋrɛ mɔna Thãgbaa tibil kɔɔ sonɩ. A jaal Fɩlɩsɩtɛ̃sɔɔ dʋɔ, ɔr na ɔɔ cɔdara a too le a dana yɛna makoɲɔra. 3 Mɔ̃ yɛna makoɲɔ kanɩ pɩ, khɛrɩle ther Fɩlɩsɩtɛ̃sɔɔ dʋɔ a kɛr bir. Dɩ a jaal bɩɛl jamana wɩ hananɩ ɩnɩ cɔ na ɩnɩ lɛ. 4 Dɩɩ do jamana kɔɔ har da n mɩɩna Geyajɩɩkɛ dɔnɩ Thãgbaa tibili thɔ̃daar aa, a mɩɛnɛ nɩ nɔ kpaa thɩ̃ kɔ̃tɩnasɔ fɛʋʋkɛ Elije kɔɔ cʋʋnɩ. 5 Ɔbɔɔkɛ Geyajɩ fʋnɩ da n mɩɛ jamana mɔ̃ Elije kɔɔ jaanɩ tibil khirera, dɩɩ do khɛrɩkɛra Elije kɔɔ jaanɩ ɔɔ bikuun khirera n pɔr ɩnɩ n bɩɛl jamana wɩ ha nɩ ɩnɩ cɔ na ɩnɩ lɛ. Dɩ Geyajɩ so: «Ɔ̃hɔ̃ɔ ɩ̃ kɔ̃tɩ̃ jamana ya, yɛ khɛrra na ɔɔ bikuunna Elije kɔɔ jaanɩ khirera.» 6 Dɩ jamana bulele khɛrɩle, dɩ mɩɛɛ mɔ̃ thɩ̃ɛ fɛw kɔɔ kanɩ. Agɩpɩ dɩ jamana pɩɛraa ɔɔ sɔrasɩ kɔ̃tɩ̃ bɩɛlɩkɛ a soronɩ aa: «Cʋɛ wɩ birse thɩ̃ɛ fɛʋʋkɛ khɛrɩkɛ hɩnɩ wɩ haa, na khorɩkɛ a na kɔɔ 'lɛnɩ ɔɔ lɔɔ a fʋna wireekɛ a thenɩ dɩɩra foo a dana nɛnɛ̃ɛkɛ.»

Ajayɛl gbaar jamana dʋʋr Siiri dɩɩra

7 Elije jaal Damasɩ dɩɩra, sɩ dabɔɔlera, gɩ n kɔɔ khor Bɛn-Hadadɩɩkɛ dɔnɩ Siiri jamana. Dɩ wɩ sʋʋraarɛ aa: «Thãgbaa tibil ɩnɛ kɛ.» 8 Dɩ jamana sor Ajayɛlla: «Gba khaardaa a jalana hana Thãgbaa tibililera, sa bɩɛlnɛɛ a bule Thãgba Kɔ̃tɩn a hɩɩn, ado ma kpɛɛrɛ khookɛra.» 9 Dɩ Ajayɛl gbaar Damasɩ thɩ̃ ɓɔ̃ caar dɩɩdɩɩ fɛw a pɛ ɲɔɔmɛ̃ kpalaɲɔra a jalna ɩnɩ n ha Elije khaardaa. Ɔbɔɔkɛ a danɩ le, a jɩɩlɛ Elijee ƴɛra a sʋʋraa: «Afɩ bikuun Bɛn-Hadadɩɩkɛ dɔnɩ Siiri jamana thɔna mɩ ɩ̃ bulene fɩ hɩnɛ, ɩna kpɛɛrɛ khookɛ ɩnɩ phɩnɩ ya?» 10 Dɩ Elije sʋʋraa: «Kɛra birə sʋɔraa, a na kɔɔ kpɛɛrɛra.» Sɩ Thãgba Kɔ̃tɩn nɩ marɛ aa, a na khire baalɛ na hala'. 11 Agɩpɩ dɩ Thãgbaa tibil ga Ajayɛlla yire da n hɩɩnʋ kirkirkir, sa ma da n khɩɩ. 12 Dɩ Ajayɛl bulee: «Aɲe fɩ n khɩɩrɔ ya ɩ̃ kɔ̃tɩ̃ɩ?» Dɩ Elije sʋʋraa: «Gɩdonɩ mɩ jɩrɛ puureekɛ fa cʋʋnɩ Ɩjɩrayɛl bɩsana, gɛra mɩ n khɩɩ: Fa thiilele awɩ dɩ kɔ̃tɩ̃sɔɔkɛ dɩ bɛr gʋʋsɔ diironɩ na dɔɔ, fɩ kʋʋr awɩ daɓolsɔ na bajɩna, fɩ cʋ̃baan awɩ bɩsãsɔ, fɩ pəlnə awɩ khɛr pɛmɛdarasɔ na yire.»

13 Dɩ Ajayɛl sor aa: «Aɲe mɛr afɩ thɔ̃daarɩkɛ hɔnɩ bɩɩn do, a na puno na cʋʋ thɩ̃ kɔ̃tɩ̃ caarɩle?» Dɩ Elije sʋʋraa: «Thãgba Kɔ̃tɩn nɩ marɛ aa, fa dor jamana Siiri dɩɩra.» 14 Dɩ Ajayɛl faarɛ Elije sa kɛr bir ɔɔ kɔ̃tɩ̃ɩ pa, dɩ bulee: «Aɲe Elijera so far?» Dɩ so aa: «A sor marɛ fa kpɛɛrɛ!» 15 Sɩ dɩwɩlɔ, Ajayɛl gbaar kẽkẽ nɩɩ a mʋʋ ɲʋɔnɔ a thi jamanana ƴɩɛra dɩ khi. Agɩpɩ, dɩ gba ɔɔ too pa a do jamana.

Juda jamana Yoramɩ thɩmɩ \ref 2 Ch 21.5-20

16 Akabɩɩ bikuun Yoram kɔɔ cʋʋrɛ yɛna yemɔy jamana dʋʋra Ɩjɩrayɛlla, sɩ Jojafatɩɩ bikuun kɛ n dɔnɩ dakha Yoram do jamana Judaa məlsɔɔra. Sɩ ɔɔ thɩ Jojafatɩ hale dabɔɔlera jamana dʋʋra 'lo. 17 Yoram kɔɔ hananɛ yɛna kpelẽ yʋɔr yeɲɔ sa do jamana. Dɩ a dor jamana a cʋʋna yɛna makõther Jerujalɛm dɩɩra. 18 Dɩ a cʋʋrɛ Ɩjɩrayɛl jamanasɔɔ kha, mɔ̃kɛra Akabɩɩ cɔ too kɔɔ cʋʋnɩ, gɩdonɩ a kɔɔ her Akabɩɩ bikhɛr bɩɛl. Dɩ a cʋʋrɛ gɩrɛ puuronɩ ka Thãgba Kɔ̃tɩnɩ ƴɛra. 19 Sɩ Thãgba Kɔ̃tɩn na kɔɔ ƴaal a bũburõ Judaa məlsɔa' dɩɩ do ɔɔ thɔ̃daar Davɩdɩ dɔ kɩrʋ. Gɩdonɩ a kɔɔ sor Davɩdɩra ɩna haarɛ dedee ɔɔ jamana too para, ɔr na ɔɔ məlsɔ waa khorr vʋ̃ʋ.

20 Yoram jamana do bɔɔle Edɔ̃ɔ məlsɔ ɩɩrna lãʋ Judaa məlsɔɔra, kɛ n kɔɔ punone wɩnɩ, a thɩɩn awɩ thɛthɛɛ jamana kpɩɩ. 21 Dɩ Yoram jaal Sayɩɩr dɩɩra na ɔɔ koke hotorosɔ fɛw. A ɩɩrɛ dɩtɩnɔ a phuro Edɔ̃ɔ məlsɔɔkɛ kɔɔ kpalalaanɩ ɔr na ɔɔ koke hotoro sɔrasɩ kɔ̃tɩ̃sɔ. Dɩ ɔɔ sɔrasɩsɔ caalɛlɛ a kɔ̃ awɩ cɔsɔ. 22 Thale Edɔ̃ɔ məlsɔ lã Judaa məlsɔɔra khorr a dana nĩikɛ. Dɩ bɔ bɩɛllaalera Lɩbɩnadara ɩɩr dakha wer a lã.

23 Yoramɩ thɩmɩɩ gɩrɛ sɛnɩ na thɩ̃ɛ fɛʋʋkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Juda jamanasɔɔda. 24 Agɩpɩ Yoram khire a gbũ ɔɔ thɩ kɔ̃tɩ̃sɔɔra. Dɩ wɩ dʋʋrɛ ka wɩ dʋnɩ ɔɔ thɩ kɔ̃tɩ̃sɔ, Davɩdɩɩ dʋɔ, sɩ ɔɔ bikuun Akajɩa gba ɔɔ too pa a do jamana.

Juda jamana Akajɩaa thɩmɩ \ref 2Ch 22.1-6

25 Ɔbɔɔkɛ Akabɩɩ bikuun Yoram donɩ Ɩjɩrayɛl jamana dɩ ga cʋʋ yɛna yʋɔr yeɲɔ gɛr Yoramɩ bikuun Akajɩa do Juda jamana. 26 Akajɩa kɔɔ hananɛ yɛna kpelẽ yeɲɔ sa do jamana. Dɩ a dor jamana a cʋʋna yɛ bɩɛl Jerujalɛm dɩɩra. Ɔɔ nɩɩ i n dʋɔn Atalɩ. Omɩrɩkɛ kɔɔ dɔnɩ Ɩjɩrayɛl jamana, ɔɔ bikhɛr gɩ. 27 Akajɩa cʋʋrɛ Akabɩɩ cɔ too kha, a cʋʋna gɩrɛ puuronɩ ka Thãgba Kɔ̃tɩnɩ ƴɛra, mɔ̃kɛ Akabɩɩ cɔ toora kɔɔ cʋʋnɩ, gɩdonɩ a lire kha hera na Akabɩɩ cɔ too. 28 Akajɩa na Akabɩɩ bikuun Yoram jaal Ramɔtɩ dɩɩraakɛ hanɩ Galaadɩ bəənnə wɩ ke kʋʋr na Ajayɛlɩkɛ dʋɔnɩ Siiri jamana. Dɩ Siiridara 'lɛr Yoram a pɩɛraa khoo. 29 Dɩ Yoram kɛrɛ bir Jɩjɩreyɛl dɩɩra ɩnɩ n cʋʋ thɩɩ khooraakɛ Siiridara kɔɔ pɩɛraanɩ Rama dɩɩra, ɔbɔɔkɛ a n kɔɔ kenanɩ Ajayɛl kʋʋr, kɛ dɔnɩ Siiri jamana. Dɩ Yoramɩ bikuun Akajɩaakɛ dɔnɩ Juda jamana jaal le Jɩjɩreyɛl dɩɩra ɩnɩ n yɩ Akabɩɩ bikuun Yoram, gɩdonɩ gɩ n khʋʋrɛ.