2 JAMANASƆ 9

Ɩjɩrayɛl jamana Jehuu thɩmɩ

1 Wi bɩɛl, Thãgbaa mɩmɩɩ Elije wer tɩɩ bɩɛl Thãgbaa mɩmɩaa gbulona a sʋʋraa: «Gbɛba a gba butelɩkɛ na niin a jala Ramɔtɩ dɩɩraakɛ hanɩ Galaadɩ bəənnə. 2 A fɩ dã le, yɛ Jojafatɩɩ bikuun Jehu. Ɔɔ thɩ kɔ̃tɩ̃ wɩ n we Nɩmɩsɩ. Wɩɛ ɔɔ alãkhasɔɔ thɩ̃thɩɩn a thɛna nɩ lõ du kpɩɩra kəli. 3 Agɩpɩ, gba niinə na butel a pɩɛraa yʋɔ sa sɔ: Thãgba Kɔ̃tɩn sor: «Mɩ pɛ farɛ niinikɛ fɩ do jamana Ɩjɩrayɛlla. Agɩpɩ khɛra lõo a thɛ ca, fa n jɩɩla'.» 4 Dɩ Thãgbaa mɩmɩɩ daɓolbirile jaal Ramɔtɩ dɩɩrara le Galaadɩ bəənnə. 5 Mɔ̃ a na danɩ le, gɛr sɔrasɩ kɔ̃tɩna n fʋrɔ gbɛbɩ kha. Dɩ a sor aa: Mɩ hananɛ thɩmɩɩr a ƴaal ɩ̃ mɩɩ fɩ ya kɔ̃tɩn.» Dɩ Jehu bullee: «Amɛ sɛrɛ fɛʋraakɛ fɩ ƴaal fɩ mɩɩna?» Dɩ so aa: «Fɛr gɩ.» 6 Dɩ Jehu ɩɩrɛ a lõ cɔ bɩnɔ, dɩ daɓolbirile pɩɛraa niinə yʋɔ, sa so aa: «Thãgba Kɔ̃tɩnɩkɛ dɔnɩ Ɩjɩrayɛlɩ Thãgba sor aa: “Mɩ pɛ farɛ niinikɛ yʋɔ fɩ do jamana Ɩjɩrayɛldararaakɛ dɔnɩ mɛr Thãgba Kɔ̃tɩnɩ too. 7 Kʋʋrɛ Akabɩɩ cɔdara, kɛ kɔɔ dɔnɩ afɩ kɔ̃tɩ̃, ɩ̃ tiir ɩ̃ thɔ̃daraakɛ dɔnɩ ɩ̃ mɩmɩɩsɔɔ tɔmɩ̃ hel Jejabɛlla, ɩ̃ tiirnənəə mɛr Thãgba Kɔ̃tɩnɩ thɔ̃dara fɛʋʋ tɔmɩ̃ hel. 8 Akabɩɩ cɔdara fɛw na bũburone. Ma bũburonenakɛ kuuminə fɛw Akabɩɩ toora Ɩjɩrayɛl dɩɩra, dee kona na waya ɓibi. 9 Ma cʋʋrɛ Akabɩɩ cɔka mɔ̃ mɩ cʋʋnɩ Nebatɩɩ bikuun Jeroboamɩ cɔka, na Ahɩyaa bikuun Baesaa cɔka. 10 Bena na khɔ Jejabɛl Jɩjɩreyɛl lɔɔ. Tibil bɩɛlakɛ na hale a na dʋa'.”» Agɩpɩ, daɓolbirile khɛrɛ lõo a the ca.

11 Ɔbɔɔkɛ Jehu kɛrnɩ the ɔɔ kɔ̃tɩ̃ɩ sɔrasɩ welee pa, wɩ buleele aa: «Daw gɩ bɛ? Aɲe kpãkpũdaarɩkɛ hana da n ƴaalna fɩ?» Dɩ Jehu birse wɩ aa: «Aɩ, nɩ jɩnɩ tibil ca wele wo, awɩ thɩmɩɩsɔɔra gɩ ya fɛr!» 12 Dɩ wɩ sʋʋraa: «Sõsor gɩ, sɔ sar gɩrɛɛkɛ a mɩɩ fɩnɩ.» Dɩ Jehu so war aa: «A mɩɩ mɛr thɩ̃doosɔɔra, sa so mar aa Thãgba Kɔ̃tɩn sor ɩnɩ pɛ marɛ niin yʋɔ ɩ̃ do Ɩjɩrayɛl jamana.» 13 Dapaara dɩ wɛr fɛw bɩɛlbɩɛl tiir awɩ kẽkẽsɔ a pɛ Jehuu nɛ balɔ liirə nãcelela ƴũu, dɩ wa n ʋ̃ tutuu dɩ wa n sona aa: «Jehu dʋɔn jamana yoo!»

Jehu kʋrɛ Yoramɩkɛ dɔnɩ Ɩjɩrayɛl jamana

14 Thale Jojafatɩɩ bikuun Jehuukɛ ɔɔ thɩ kɔ̃tɩ̃ n donɩ Nɩmɩsɩ gʋʋr kha na tɩbɩla, sa tɔ tɩbɩla pɛ Yoramɩna. Sɩ Yoram na Ɩjɩrayɛl fɛw n kɔɔ bɛrɛ Ramɔtɩ dɩɩkɛ hanɩ Galaadɩ bəənnə dɩɩ do Ajayɛlɩkɛ dɔnɩ Siiri jamana dɔ kɩrʋ. 15 Le Yoram jamanaa the a kɛr bir Jɩjɩreyɛl dɩɩra da n cʋʋ thɩɩ, gɩdonɩ Siiridara kɔɔ pɩɛraarɛ khoo ɔbɔɔkɛ a n kɔɔ kenɩ kʋʋr na awɩ jamana Ajayɛl. Dɩ Jehu so aa: «Ado thale nɩ n ƴaal, tibil bɩɛllakɛ na n the kɩɛr dɩɩra a kɔɔ jal Jɩjɩreyɛl a mɩɛ thɩ̃ɛa'.» 16 Agɩpɩ, Jehu gbaar ɔɔ koke hotoro da n jal Jɩjɩreyɛl dɩɩra, gɩdonɩ le Yoram kɔɔ ha phɩ̃ paara, dɩ Akajɩaakɛ dɔnɩ Juda jamana jal ɩnɩ n yɩɩ.

17 Dɩ bɛbɛrɩkɛ wɩ pɛnɩ jɩjɩreyɛl dɩ bɛr cʋɔra ƴũu yɩrɛ Jehu n pʋɔnɩ na tɩbɩla dɩ so: «Mɩ yɩrɛ tɩbɩla dɩ wa n ɩ̃ dɛ!» Dɩ Yoram jamana so: «Thɔna gãgodaar bɩɛl a caan a bule wɩ ado daw wɩ n ɩna.» 18 Dɩ gãgodaar jaal a caan Jehu a so: «Jamana n bulele aa, daw gɩ bɛ?» Dɩ Jehu birsee: «Dɩ a ga do daw ga, aɲe ba fɩ? Kɛrra, fe kɛ ɩ̃ khiro.» Dɩ bɛbɛr sor aa: «Thɔ̃thɔn jaal dã wɩ, sɩ aa n ɩ̃a' dɛ!» 19 Dɩ Yoram jamana thɔna balaɲɔ gãgodaar wo dɩ jal dã, a so: «Jamana n bulele aa, daw gɩ bɛ?» Dɩ Jehu birsee: «Dɩ a ga do daw ga, aɲe ba fɩ? Kɛrra, fe kɛ ɩ̃ khiro.» 20 Dɩ bɛbɛr sor wo aa: «Thɔ̃thɔn jaal dã wɩ, sɩ aa n ɩ̃a' dɛ! Sɩ thɔthɔɔdaar n car a ho Jehuukɛ dɔnɩ Nɩmɩsɩɩ bikuuni bi, gɩdonɩ a n car koke hotoro kpãkpũda khaa.»

21 Le Yoram so wɩ gbɛba ɩnɩɩ koke hotoro a ha nɩ. Dɩ wɩ gbɛbɩrɛ ɔɔ koke hotoro. Dɩ Yoramɩkɛ dɔnɩ Ɩjɩrayɛl jamana na Akajɩaakɛ dɔnɩ Juda jamana gbaar awɩ koke hotorosɔ a the wa n caan Jehu. Dɩ wɩ caanaanɛ Nabɔtɩɩ lɔɔ, kɛ dɔnɩ Jɩjɩrɛyɛldaar. 22 Mɔ̃ Yoram na yɩnɩ Jehu, a buleele aa: «Daw gɩ bɛɛ Jehuu?» Dɩ Jehu birsee: «Aɲee da ca! Kana wer daʋra na the, ado afɩ nɩ Jejabɛl bo fʋrɔ ɔɔ bɔdɛl thɔ̃, na ɔɔ sidumo cʋʋ jɔjɔɔkɛra a na jalna?» 23 Dɩ Yoram kɛrna khiru a ca, sa phã nʋɔ Akajɩara aa: «Wɩ gʋʋrɛ kha dɛ Akajɩa!» 24 Dɩ Jehu 'la ɔɔ tha a thaa gɔra ɲɛ̃gbɛgbɛla yeɲɔɔ thɩ̃thɩɩn, dɩ sõo lõ foo a 'lɛ kpʋʋr a kpãasɛ, dɩ Yoram ji le ɔɔ koke hotorora a khi. 25 Dɩ Jehu so ɔɔ sɔrasɩ kɔ̃tɩnaakɛ wɩ n wenɩ Bɩdɩkaar aa: «Gbaanɛɛ dɔna Nabɔtɩɩ lɔɔ, kɛ dɔnɩ Jɩjɩrɛyɛldaar. Jɛna gɩ bɔɔkɛ fɛrɛ na mɛrɛ na tibil ɩkhasɔɔkɛ sɩ kɔɔ jʋʋnɩ gãgo hotoro dɩ sa n kpaana ɔɔ thɩ Akabɩɩ khiro, liir Thãgba Kɔ̃tɩn kɔɔ so ayɩ: 26 “Mɩ yɩrɛ Nabɔtɩ na ɔɔ bikũusɔɔ tɔmɩ̃, kɛ fɩ kʋʋrnɩ delẽ delẽ, mɛr Thãgba Kɔ̃tɩn sɔ. Ma lɩmɩ fɛr ɔmɛ̃ lɛ ʋrɛraakɛra. Mɛr Thãgba Kɔ̃tɩn sɔ!” Gɛr gɩ gbaanɛ a dɔna faa lɔɔra mɔna Thãgba Kɔ̃tɩn kɔɔ mɩɩnɩ.»

Jehu kʋrɛ Akajɩaakɛ dɔnɩ Juda jamana

27 Mɔ̃ Akajɩaakɛ dɔnɩ Juda jamana yɩnɩ gele, a cananɛ Bɛtɩ-Hagan hʋɛ da n jal. Dɩ Jehu weguure kpaan a so, ɔr dakha wɩ kʋɔ le ɔɔ koke hotorora ƴũu! Dɩ wɩ 'liire hʋɛrakɛ jʋnɛnɩ Guur, kɛ wɔrɔnanɩ Yibileyam a pɩɛraa khoo, sɩ dɩ ca lõ Megido dɩɩra a khi le. 28 Dɩ ɔɔ thɔ̃dara gbaarɛ pɛ koke hotorora a jalna Jerujalɛm a dʋʋ ɔɔ kara ɔɔ thɩ kɔ̃tɩ̃sɔɔ kɩrɔ, le Davɩdɩɩ dʋɔ.

29 Akabɩɩ bikuun Yoram kɔɔ cʋʋrɛ yɛna yʋɔr bɩɛl jamana dʋʋra Ɩjɩrayɛl dɩɩra, sɩ Akajɩa do jamana Judaa məlsɔɔra.

Jehu kʋrɛ Jejabɛl

30 Jehu lʋʋn Jɩjɩreyɛl dɩɩra. Dɩ mɔ̃ Jejabɛl nɩɛnɩ, a gbaar yi khii a khi yinə, a gbɛbɩna yʋʋ bɔɔbɔɔ, sa jɩɩl da n hɩɩna fɛnɛtɩrɩ kaar. 31 Mɔ̃ Jehu lonɩ Jɩjɩreyɛl dɩ lõfonʋɔra na pɩ, Jejabɛl buleele aa: «Jɩmɩrɩ phaakɛra dɔnɩ ɔɔ kɔ̃tɩ̃ɩ kʋkʋ ya, daw gɩ bɛ?» 32 Dɩ Jehu ɓar ƴɩɛ a hɩɩn fɛnɛtɩrɩra, sa so aa: «Amɛ haan ɩ̃ khiro? Amɛ gɩ?» Dɩ jamanaa sɔrasɩ kɔ̃tɩna yeɲɔ yaa yẽther tɔr dã a jɩɩl fɛnɛtɩrɩ kɩrɔ dɩ wa n hɩɩn Jehu. 33 Dɩ Jehu so wɩ tɔ Jejabɛl a kpɛa le thɩɩra! Dɩ wɩ tʋɔrɛ kpɛɛ, dɩ ɔɔ tɔmɩ̃ bã a mala gʋʋ na gãgona. Dɩ Jehu jʋʋnaa a saarʋʋ na ɔɔ koke hotoro. 34 Agɩpɩ a lʋʋn jamana cʋɔrɔ a kho dikor a ɲɔna, sa so ɔɔ toora: Nɩ jala hɩnɛ khɛrɩlera sʋɔn 'lini, a gbaanɛ dɔ, gɩdonɩ jamanaa bikhɛr gɩ. 35 Dɩ wɩ jaal wɩ gbaa wɩ dʋ, dɩɩ do yʋ khubire na nɛ pɛla na ɲɛ̃ pɛla dɩbara wɩ 'li. 36 Dɩ wɩ kɛrɛ bir a mɩɛ Jehu dɩ so aa: «Gɛr dɔ thɩmɩɩrɩkɛra Thãgba Kɔ̃tɩn kɔɔ thɔnɩ ɔɔ thɔ̃daar Eliikɛ thɛnɩ Tisebe dɩɩra dɩ mɩɩ ayɩ: "Bena na khɔ Jejabɛl Jɩjɩreyɛl lɔɔ". 37 Jejabɛlɩ khi na dor beethɩn le hʋɔnɔ Jɩjɩreyɛl lɔɔ, gɩ do nɔɔ wa puno na so nayɩ Jejabɛl ha ʋra'.” »