Jehu bũburone Akabɩɩ cɔdara
10
1 Akabɩɩ bikũusɔ kpalãther yʋɔr kɔɔ hale Samarɩ dɩɩra. Dɩ Jehu kherere sɛbɛsɔ a thɔna Samarɩ dɩɩra a ha Jɩjɩreyɛl kɔ̃tɩna, na dʋɔ kɔ̃tɩna, na wɩrɛɛkɛ n hɩnɛnɩ Akabɩɩ bɩsãsɔ. A sor le sɛbɛrara aa: 2 «Ɔbɔɔkɛ sɛbɛɛkɛ na dã nɩnɩ, gɩdonɩ nɩ hananɛ le anɩ kɔ̃tɩ̃ɩ bikũusɔ, a hana koke hotorosɔ na gãgonasɔ, na dɩ kɔ̃tɩ̃ɩkɛ dɩ bɛr gʋʋ diironi, a hanana koke thɩ̃ɛsɔ, 3 nɩ hɩnɛ anɩ kɔ̃tɩ̃ɩ bikũusɔɔrara, ʋrɛɛkɛ baanɩ a telena, a pɩɛraa a do jamana ɔɔ thɩɩ jamana too para, sɩ nɩ kɛ̃kɛrɛ̃ nɩ pɛ anɩ kɔ̃tɩ̃ɩ cɔdarara.» 4 Dɩ ma kɔ̃tɩ̃ɩ fʋlɛ wɛr na sobɔr dɩ wɩ so aa: «Jamana yeɲɔ na puno a pɩɛrʋa', dɩ sɛr na punone na pɩɛrʋ ya?» 5 Dɩ jamanaa thɩ̃ hɩ̃ɩdaar na gobanɛrɩkɛ hanɩle dɩɩra, na dʋɔ kɔ̃tɩnasɔ, na wɩrɛɛkɛ n hɩnɛnɩ Akabɩɩ bɩsãsɔ thɔnanɛ sɛbɛ a so Jehura: «Afɩ thɔ̃dara ha sɩ. Sa cʋʋrɛ gɩrɛ fɛʋʋkɛ fa so sarnɩ. Sa pɛr tibil bɩɛlalakɛ a dɔ jamana ga. Cʋɛ gɩrɛɛkɛ fɩ yɩnɩ dɩɩ bɔr.»6 Dɩ Jehu bire khere war balaɲɔ sɛbɛ wo a so le aa: «Ado ɩ̃ khiro nɩ ha dɩɩ do nɩ n nɩ mɛr nũu, nɩ kuure anɩ kɔ̃tɩ̃ɩ bikũusɔɔ yʋsɔ a ɛna kɛkɛ ɩ̃ pa cʋɔ wɛ̃ɛbɔɔkɛra Jɩjɩreyɛl dɩɩra.» Sɩ jamanaa bikũusɔ kpalãther yʋɔrɩlera kɔɔ har tɩɩ kɔ̃tɩnasɔɔ pa dɩɩra, dɩ wa n hɩɩn wɩ. 7 Ɔbɔɔkɛ sɛbɛɛle dã wɩnɩ, wɩ fʋlɛlɛ jamanaa bikũusɔɔra a kʋʋr wɛr tɩbɩla kpalãther yʋɔrra fɛw. Dɩ wɩ gbaar awɩ yʋsɔ a pɛr kpɛ̃jɛrɛ̃sɔɔra a thɔna ha Jehu le Jɩjɩreyɛl dɩɩra. 8 Dɩ thɔ̃thɔn jaal mɩɛ Jehu aa, wɩ pɔnanɛ jamanaa bikũusɔɔ yʋsɔɔra. Dɩ Jehu so wɩ dera gɩ gbulona yeɲɔ dɩ lõfonʋɔra gɩ dana duuro. 9 Dɩ Jehu ther duuro, a jɩɩl tɩbɩla fɛʋʋ ƴɛra sa so aa: «Nɩ telene waa khoraa! Me wer, mɛr ɩrɛna lãʋ a kʋ ɩ̃ kɔ̃tɩ̃, sɩ wɩrɛ fɛʋʋkɛ amɛ kʋʋrɛ wɩ?» 10 Nɩ jɛ gɩ do Thãgba Kɔ̃tɩnɩ thɩmɩ bɩɛllakɛ, kɛ dɔnɩ thɩmɩaakɛ ɔr Thãgba Kɔ̃tɩn kɔɔ mɩɩnɩ Akabɩɩ cɔdarara na ji thɩɩra ga. Thãgba Kɔ̃tɩn cʋɛ gɩrɛɛkɛra a kɔɔ thɔnɩ ɔɔ mɩmɩɩ Eli dɩ mɩɩ dɩɩ ha oti.
11 Jehu kʋʋrɛ wɩrɛ fɛʋʋkɛ dɔnɩ Akabɩɩ cɔdara, kɛ kɔɔ sɛnɩ le Jɩjɩreyɛl dɩɩra, na ɔɔ tɩɩ kɔ̃tɩ̃sɔ fɛw, na ɔɔ totoosɔ, na ɔɔ bonɩ jidarasɔ aa faa bɩɛl 'lẽ'lenakɛ dɩ fuuə'.
Jehu kʋʋrɛ Akajɩaa tibilsɔ
12 Agɩpɩ dɩ Jehu ɩɩr da n jal Samarɩ. Mɔ̃ a danɩ Bɛtɩ-Ekɛdɩ dɩɩraakɛ dɔnɩ bana khedaraa dʋɔ, 13 a caananɛ Juda jamana Akajɩaa tibilsɔ a bule wɩ aa: «Amɛsɔ ha nɩ?» Dɩ wɩ sʋʋraa: «Akajɩaa tibilsɔ ha sɩ, dɩ sa n jal sɩ fʋɔr jamanaa bikũusɔ, sɩ fʋɔrna dakha Jejabɛlɩ bɩsãsɔ.» 14 Dɩ Jehu so wɩ fʋlɛnɛ wɩ na yire, dɩ wɩ fʋlɛ wɩ. Dɩ wɩ kuur wer ulebe fɛw, a khɩɩ wɩ dʋʋrna Bɛtɩ-Ekɛdɩ ɲɔ tɛ korura. Tɩbɩla kpalaɲɔ yeɲɔ wɩ kɔɔ ha, sɩ Jehu na faa bɩɛllakɛ dɩ fuuə'.
Jehu caanɛ kha na Yonadabɩ
15 Mɔ̃ Jehu thenɩ le da n jal, a caananɛ Rekabɩɩ bikuun Yonadabɩ da n pɔ ɔɔ ƴɛkʋʋlɔ, dɩ fʋɔrʋ sa bulee aa: «Afɩ bɩ̃ hɩrɛrɛ bɔɔbɔɔ ɩ̃ bilo mɔ̃kɛ ɩ̃ bɩ̃ hɩrɛnɩ bɔɔbɔɔ afɩ bilo bɛ?» Dɩ Yonadabɩ so ɩnɩ bɩ̃ hɩrɛrɛ bɔɔbɔɔ. Dɩ Jehu sʋʋraa: «Ado gɩ hɩrɛrɛ sobɔr, 'laanɛ ɲɔ̃ɔ.» Dɩ Yonadabɩ 'laa ɲɔ̃ɔ, dɩ Jehu fʋʋ dɩ jʋʋn le ɔɔ koke hotorora. 16 Dɩ Jehu sʋʋraa aa: «Ɩna sɩ jal fɩ hɩɩn gbɛ̃gbɛrɛnɛɛkɛ mɩ hananɩ Thãgba Kɔ̃tɩnɩdara.» Thale a gbaa na ɔɔ koke hotoro a jalna. 17 Mɔ̃ Jehu danɩ Samarɩ dɩɩra, a kʋʋrɛ wɩrɛ fɛʋʋkɛ dɔnɩ Akabɩɩ cɔdara le Samarɩ dɩɩra, a bũburõ wɩ cacaca, mɔ̃kɛra Thãgba Kɔ̃tɩn kɔɔ sonɩ Elirə.
Jehu bũburone Baal thãgba fʋɔrɛ
18 Agɩpɩ Jehu kpar tɩbɩla fɛw a jɛ sa so war: «Akabɩ fʋɔrɛ Baal wer, sɩ gbe gɩ. Mɛr Jehu, ma fʋɔrʋrɛ gɩ jɔ mɛ̃. 19 Nɛnɛ̃ɛkɛ, nɩ wɛ Baalɩ bobonasɔ fɛw, na ɔɔ thɔ̃darasɔ fɛw, na ɔɔ bonɩ jidarasɔ fɛw, bɩɛlakɛ na n ɓɔra', gɩdonɩ mɩ n ƴaalɛ ɩ̃ ji Baalɩ bonɩ kɔ̃tɩ̃. Ntɛɛkɛ na ɓɔranɩ, wa kʋʋrɛ. Sɩɩdo fɩɩlɛ Jehu n pɛr sɩ a kʋʋr wɩrɛɛkɛ n fʋɔrɛnɩ Baal. 20 Dɩ Jehu so wɩ pɩɛr gbɛbɩkha kɔ̃tɩ̃ wire wɩ dʋbɩna Baal, dɩ wɩ pɛr wire. 21 Dɩ Jehu thʋɔn thɔ̃thɔna Ɩjɩrayɛl dɩɩra fɛw, dɩ wɩrɛ fɛʋʋkɛ n fʋɔrɛnɩ Baal pɔ fɛw, tɩɩ bɩɛlakɛ na hale a sɩ, kɛ na pʋɔnaa ga. Dɩ wɩ lʋʋn Baalɩ fʋɔr cɔra a hi fɛw phi. 22 Dɩ Jehu sor ʋrɛraakɛ dɔnɩ bonɩjɩ kẽkẽ hɩ̃ɩdaar aa: «Te kẽkena a tɩnɛnɛ wɩrɛ fɛʋʋkɛ n fʋɔrɛnɩ Baal.» Dɩ a tire kẽkena oti a tɩnɛ wɩ fɛw. 23 Dɩ Jehu nakha Rekabɩɩ bikuun Yonadabɩ pɔr lõ Baalɩ fʋɔr cɔra, dɩ Jehu so Baalɩ fʋɔrdarasɔɔra aa: «Nɩ jɩɛ hɩɩn bɔɔbɔɔ, na n do wɩrɛɛkɛ n fʋɔrɛnɩ Thãgba Kɔ̃tɩn n ha kɩɛr na nɛrɛa' dɛ. Nɩ dɔ gɩ do nɛr Baalɩ fʋɔrdarasɔ dɩbara.» 24 Agɩpɩ wɩ pɔr wɩ ji bonɩɛsɔ na nʋ̃ thii bonɩɛsɔ. Sɩɩ do Jehu kɔɔ kere sɔrasɛ kpalanã khuirə, a so war aa: «Ado ntɛ nɛrɛra faa tɩbɩlaakɛ mɩ n tonɩ anɩ ɲɔ̃kɔɔ dɩ bɩɛl fuu, ntɛ na khe ɔɔ kara.» 25 Ɔbɔɔkɛ wɩ gbɛbɩnɩ nʋ̃ thii bonɩɛ pɩ, Jehu sor bɛbɛrara na sɔrasɩ kɔ̃tɩnasɔra aa: «Nɩ lona kʋʋrɛ wɩ fɛw, na n do bɩɛllakɛ n fuuə'.» Dɩ wɩ kʋʋr wɛr na bajɩna. Dɩ sɔrasɩ kɔ̃tɩna na bɛbɛraale khɩɩ wɛr a dʋʋrna faa, sa lõ dɩɩra ka Baalɩ cɔ hanɩ. 26 Dɩ wɩ gbaar thɩl bokanaakɛ wɩ gbuuni Baalɩ cɔ bɩnɔ a thena a pɛr dɔɔra. 27 Wɩ cʋɔrɛ Baalɩ thɩl bokaakɛ wɩ kɔɔ gbuuni, a wɩɛlna dakha Baalɩ cɔ, sa mɩrɔ pẽkanasɔ, dɩɩ hale foo a dana nĩikɛ.
Ɩjɩrayɛl jamana Jehuu thɩmɩ
28 Jehu bũburone Baalɩ fʋɔr Ɩjɩrayɛl dɩɩra. 29 Sɩ aa kɛr sa faa Nebatɩɩ bikuun Jeroboamɩ sopuusɔa'. Gɛr dʋɔn na ɓol thɩlaakɛ a cʋʋnanɩ dɛ a thɩɩn Betɛl dɩɩra na Dã dɩɩra, a tɔ Ɩjɩrayɛldara pɛr dɩ wa n fʋɔr.
30 Dɩ Thãgba Kɔ̃tɩn sor Jehura aa: «Gɩdonɩ fɩ cʋʋrɛ gɩrɛ telenenɩ ɩ̃ ƴɛra, a cʋʋ Akabɩɩ cɔdara mɔna ɩ̃ ƴaal hanɩ fɛw, afɩ məlsɔ na dor jamanasɔ Ɩjɩrayɛl jamana too paara, foo a na dana balanã məlle. 31 Sɩrakɛ Jehu na dʋ bʋrɛ a kpaan Thãgba Kɔ̃tɩn Ɩjɩrayɛlɩ Thãgbaa jɔfʋra na ɔɔ ha fɛʋa'. Aa kɛr sa faa sopuusɔɔkɛ Jeroboam kɔɔ tɔnɩ Ɩjɩrayɛldara a pɛr dɩ wɩ cʋa'.
32 Ga bɔɔlera Thãgba Kɔ̃tɩn fʋ a tɔ Ɩjɩrayɛl dɩɩ dɩ ga n 'lũ. Dɩ Ajayɛlɩkɛ dɔnɩ Siiri jamana punone Ɩjɩrayɛl a tee awɩ dɩsɔkɛ hanɩ awɩ pɛlla fɛw. 33 A teere Galaadɩ bəən fɛʋʋkɛ hanɩ wi phã paar Jʋrdɛ̃ mɩɩr seero, a fʋ Aroyɛɛr dɩɩra kɛ hanɩ Arnɔ̃ kɔlɔ̃ nʋɔra a jalna foo a dana Galaadɩ bəən na Basã bəən fɛw. Gɛr dʋɔn Gadɩɩ məlsɔɔ dɩ na Ribɛ̃ɛ məlsɔɔ dɩ, na Manasee məlsɔɔ dɩ. 34 Jehuu thɩmɩɩ gɩrɛ sɛnɩ, thɩ̃ɛ fɛʋʋkɛ a cʋʋnɩ na ɔɔ kuun kha do fɛw, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda. 35 Agɩpɩ Jehu khire a gbũ ɔɔ thɩ kɔ̃tɩ̃sɔɔra. Dɩ wɩ dʋʋrɛ Samarɩ dɩɩra, sɩ ɔɔ bikuun Joakajɩ gba ɔɔ too pa a do jamana. 36 Yɛna kpelẽ makõther Jehu kɔɔ cʋʋ jamana dʋʋra Samarɩ, le Ɩjɩrayɛl dɩɩra.