Juda jamana Atalɩɩ thɩmɩ \ref 2 Ch 22.10-12
11
1 Ɔbɔɔkɛ Akajɩa jamanaa nɩ Atalɩ nɩɛnɩ ɔɔ bikuun khire, a fʋlɛlɛ wɩrɛ fɛʋʋkɛ dɔnɩ jamanaa bɩsãsɔ a kʋʋr. 2 Sɩ Yehosebaakɛ dɔnɩ Yoram jamanaa bikhɛr, a dona Akajɩa jamanaa õkhɛr wolone a ti Akajɩaa bikuunikɛ wɩ n wenɩ Joasɩ, a ker ɔbɔɔkɛ wɩ n kʋʋrnɩ jamanaa bikũusɔ. Pa bɩɛl a keruu na ɔɔ hãhaan duuraakɛ wɩ n thɩɩnɩ phɩ̃ paarsɔ, dɩ Atalɩ na yɩɩ a kʋa'. 3 Dɩ Joasɩ wʋɔn le Thãgba Kɔ̃tɩnɩ cɔ Yehosebaa pa a dana yɛna maadõ, dabɔɔlera Atalɩ donɩ jamana dɩɩra.Atalɩɩ khi na Joasɩɩ jamana do Judara \ref 2 Ch 23
4 Yɛna makoɲɔ yɩɛra, Yehoyada thʋɔn we sɔrasɛ tamaa kɔ̃tɩ̃sɔɔkɛ wɩ n wenɩ karɩ̃ɛ,a na jamanaa bɛbɛr sɔrasɩ kɔ̃tɩ̃sɔ, a kpa wɩ pɔna ɔɔ pa Thãgba Kɔ̃tɩnɩ cɔ. Dɩ a ʋlfɛna wɛr nɔ bɩɛl ʋlfɛrɛ, a cʋʋ wɩ dɩ wɩ ʋlfɛ Thãgba Kɔ̃tɩnɩ cɔ bɩnɔ, sɩ dɩ nɩna wɩ jamanaa bikuun. 5 Agɩpɩ, dɩ ha wɩ jɔfʋ aa: «Nɩ hɩnɛ mɔ̃ na cʋʋnɩ: Anɩ toosɔɔkɛ na gbaanɩ thɔma hɩɩr wire, nɩ tɩnɛnɛ wɩ gbulona yẽther, gbulõ bɩɛl na n bɛr jamanaa cɔ. 6 Sɩ balaɲɔ gbulone n jɩlɛ lõfonʋɔraakɛ wɩ n wenɩ Suur, balãther gbulone n jɩɩl bɛbɛraa khiro, nɩ bɛr jamana cʋɔr na n dee kha. 7 Sɩ anɩ gbulõ yeɲɔɔkɛ dɔnɩ wɩrɛ fɛʋʋkɛ n gbunonɩ thɔma hɩɩr wire, wa n bɛra Thãgba Kɔ̃tɩnɩ cɔ, kãkɛ daɓolbirikɛra dɔnɩ jamana hanɩ. 8 Nɩ jɩlɛ diə jamanana bilə fɛw. Nɩ fɔrɔ koke thɩ̃ɛsɔ ɲɔ̃kɔɔ, nɛrɛ fɛw bɩɛlbɩɛl. Ado tibil tɔ ɩnɩ n wɔrɔ̃ nɩ, nɩ kʋɔ. Nɩ hana jamanaa kɩrɔ bɔɔkɛ a na n thenɩ jɩɛra, na bɔɔkɛ a na n lonɩ cʋɔrɔ.»
9 Sɔrasɛ tamaa kɔ̃tɩ̃sɔ cʋʋrɛ gɩrɛ fɛʋʋkɛ Yehoyada bonɩ jidaar kɔɔ so warnɩ. Wɛr fɛw bɩɛlbɩɛl kpar awɩ sɔrasɩsɔɔkɛ n gbaanɩ thɔma hɩɩr wire, na wɩrɛɛkɛ n gbunonɩ thɔma hɩɩr wire a jalna bonɩ jidaar Yehoyadaa pa. 10 Dɩ bonɩ jidaar Yehoyada har sɔrasɛ tamaa kɔ̃tɩ̃sɔ kpɩlasɔ na tomɩ phidaasɔɔkɛ kɔɔ dɔnɩ Davɩdɩ jamanaada, kɛ wɩ kɔɔ thɩɩnɩ le Thãgba Kɔ̃tɩnɩ cɔ. 11 Dɩ bɛbɛra fɛw bɩɛlbɩɛl fʋrɔrɛ awɩ koke thɩ̃sɔ ɲɔ̃kɔɔ. Wɩ jɩɩlɛ bonɩ ji paar na cɔ ƴɛbʋrɔ ɲɔ̃bɔ khʋra a jalna dana ɲɔ̃bɩlã khʋra mɔ̃ wa kpalanɩ jamanana. 12 Dɩ Yehoyada bonɩ jidaar kpar jamanaa bikuunna a thena, a subuu jamana kpɩɛr, a hanaa nɔ bɩɛl ʋlfɛ thɩmɩɩr. Dɩ wɩ pɩɛraarɛ niin yʋɔ dɩ do jamana. Dɩ wɩ n phor ɲɛ̃ɛ dɩ wa n hulena aa: «Jamana n hanana yire a pʋɔrɛ!»
13 Mɔ̃ Atalɩ nɩɛnɩ jamanaa bɛbɛrsɔɔ wi na tɩbɩlaa wi, a gbaar pɔ le tɩbɩlala Thãgba Kɔ̃tɩnɩ cɔ. 14 Dɩ a na hɩɩnɛ a yɩ jamana dɩ jʋʋn jɩɩl paarɩkɛ wɩ gbɛbɩnɩ mɔ̃kɛ ga thɔ̃ n cʋʋnɩ. Dɩ kɔ̃tɩnasɔ na tutuu ʋ̃dara hale a jɩɩl jamanaa kɩrɔ. Dɩ daw fʋlɛ dɩdara fɛw, dɩ wa n ʋ̃ tutuusɔ. Dɩ Atalɩ ɓəər ɔɔ thɛthɛɛ kẽkẽsɔ, sa hulẽ aa: «Wɩ gʋʋrɛ kha! Wɩ gʋʋrɛ kha ! » 15 Le Yehoyada bonɩ jidaar ha sɔrasɛ tamaa kɔ̃tɩ̃sɔɔkɛ dɔnɩ sɔrasɩ kɔ̃tɩna jɔfʋ ayɩ: «Nɩ fʋɔnɛɛ thɛna jɩɛra. Dɩ tibil wo tibilikɛ na kpaaraanɩ nɩ kɔ ntɛ na bajɩna.» Bonɩ jidaar kɔɔ sor, wa n kʋʋ Thãgba Kɔ̃tɩnɩ cɔ bɩnɔa'. 16 Dɩ wɩ fʋʋrɛ a halʋ na hʋɛɛkɛ n jalanɩ gãgonaa lõfonɔra. Mɔ̃ wɩ danaanɩ jamanaa cɔ, liir wɩ kʋʋ.
17 Yehoyada cʋʋrɛ dɩ jamana na tɩbɩla ʋlfɛ nɔ bɩɛl ʋlfɛrɛ nakha Thãgba Kɔ̃tɩn. Ʋlfɛrɛ gɩɩkɛ n nɛnanɩ dɩ Thãgba Kɔ̃tɩnɩ too wɩ do. A cʋʋrɛ dakha dɩ jamana na tɩbɩla ʋlfɛ kha nɔ bɩɛl ʋlfɛrɛ. 18 Dɩ dʋɔdara fɛw jaal Baalɩ fʋɔ cɔra a wɩɛl Baal, a cʋɔr ɔɔ bonɩ ji pasɔ na ɔɔ thɩl bisɔ, a kʋna Matãakɛ dɔnɩ Baalɩ bonɩ jida le bonɩ ji paarsɔɔ ƴɛbʋrɔ. Agɩpɩ, Yehoyada bonɩ jidaar pɛrɛ bɛbɛra wa n bɛra Thãgba Kɔ̃tɩnɩ cɔ. 19 Dɩ Yehoyada kpar sɔrasɛ tamaa kɔ̃tɩ̃sɔ, na karɩ̃ɛsɔ, na jamanaa bɛbɛrsɔ, a kpana dʋɔdara fɛw, dɩ wɩ thɔɔ jamana le Thãgba Kɔ̃tɩnɩ cɔ na hʋɛɛkɛ n jalanɩ jamanaa bɛbɛraa lõfonɔra, a dana jamana cʋɔrɔ. Dɩ Joasɩ too jamana too paara dɩphã. 20 Dɩ tɩbɩla fɛw dɩɩra n kãkarɛ. Dɩ dɩɩ ier dɩphã, gɩdonɩ wɩ kʋrɛ Atalɩ na bajɩna jamanaa cɔ.