Juda jamana Joasɩɩ thɩmɩ \ref 2 Ch 24
12
1 Yɛna makoɲɔ Joasɩ kɔɔ hana sa do jamana. 2 Ɔbɔɔkɛ Jehu donɩ jamana Ɩjɩrayɛlla, dɩ ga cʋʋ yɛna makoɲɔ, gɛrra Joasɩ do Juda jamana. Dɩ a dor jamana a cʋʋna yɛna kpalaɲɔ (40) Jerujalɛm dɩɩra. Ɔɔ nɩɩ i n dʋɔn Sɩbɩa, Bɛɛr-Seba dɩɩra a the. 3 Joasɩ cʋʋrɛ gɩrɛɛkɛ telenenɩ Thãgba Kɔ̃tɩnɩ ƴɛra, bɔɔ fɛw, kɛ a n kɔɔ kpanɩ Yehoyada bonɩ jidaarɩ dɩɩra. 4 Sɩrakɛ Joasɩ na bũburõ sãsɩ paarsɔa'. Dɩ tɩbɩla n jire bonɩɛsɔ na latɩkolo bonɩɛsɔ 'lo sãsɩ paarsɔɔra.Joasɩ pɛrɛ dɩ wɩ gbɛbɩ Thãgba fʋɔr cʋɔr \ref 2 Ch 24.4-14
5 Joasɩ sor bonɩ jidarara aa: «Thãgba mũsumo fɛʋʋkɛ tɩbɩla n tini a na ɩna Thãgba Kɔ̃tɩnɩ cɔ, kɛ tɩbɩlaa tinɩ mũsũ ti caar dɩɩdɩɩkɛ wɩ kpanɩ a pɛr agɩ ti nɔ, na mũsumookɛ dʋɔnɩ khaardaakɛ thɛnɩ ntɛɛ ƴaala, dɩ wa n ɩna Thãgba Kɔ̃tɩnɩ cɔ, 6 nɛr bonɩ jidara, ntɛ na n tea gɩ ɔɔ jɩjɩnasɔɔra, wɩ gbɛbɩna Thãgbaa cɔ, kãkɛ kʋɛanɩsɔ.»
7 Sɩ Joasɩ cʋʋrɛ yɛna kpelẽ yẽther jamana dʋʋra, sɩrakɛ bonɩ jidara na gbɛbɩ cɔ kʋɛ paarsɔ pa'. 8 Dɩ Joasɩ jamana wer Yehoyada bonɩ jidaar na bonɩ jida wɩrɛ sɛnɩ a bule wɩ aa: «Aɲe dɔ kɩrʋ dɩ na gbɛbɩ cɔ kʋɛ paarsɔɔra ga? Nɛnɛ̃ɛkɛ, na n tee mũsumo anɩ jɩjɩnasɔɔ pa a na thɩɩn bã. Nɩ 'laanɛ wɩ gbɛbɩna cʋɔrra.» 9 Dɩ bonɩ jidara ture ɩna bir na tee mũsumo tɩbɩlala na thɩɩn bã, ɩna faarɛ dakha cɔ gbɛbɩ thɔmana ɩkhasɔɔra. 10 Dɩ Yehoyada bonɩ jidaar gbaar khɛɛsʋ buu a cu kaar dathirera ƴũu, a thɩɩn bonɩ ji pa kɩrɔ, Thãgba Kɔ̃tɩnɩ cɔ lõfonɔ ɲɔ̃bɔɔra. Dɩ bonɩ jidaraakɛ n bɛranɩ Thãgba Kɔ̃tɩnɩ cɔ lõfonɔ na n pɛr mũsumo fɛʋʋkɛ tɩbɩla n pɔnanɩ Thãgba Kɔ̃tɩnɩ cɔ. 11 Ɔbɔɔkɛ wɩ yɩɛnɩ dɩɩ do mũsumo jɔrɛ khɛɛsʋ buurəəle, jamanaa sɛbɛ kheredaar na gbõdaar n pɔr a deer mũsumonə hanɩ Thãgba Kɔ̃tɩnɩ cɔ a ther a pɛ lokaara. 12 Agɩpɩ, wɩ n gbaar mũsumonə wɩ thernɩ, a ha kɔ̃tɩnaakɛ n hɩnɛnɩ thɔma Thãgba Kɔ̃tɩnɩ cɔ. Dɩ wɩ n gbaar warɩle a na lɩmɩna wɩrɛ n thelanɩ thɩrasɔ, na wɩrɛɛkɛ n dʋɔnɩ ɲɛ̃ thɔma Thãgba Kɔ̃tɩnɩ cɔ. 13 Gɛrra wɩ n lɩmɩna cɔ mɛ, na wɩrɛ n thelanɩ bokana, dɩ wa n thena thɩra, na boka thelnanɛsɔɔkɛ teananɩ wɩ gbɛbana paarsɔɔkɛ kʋɛanɩ le Thãgba Kɔ̃tɩnɩ cɔ, na thɩ̃ɛ wo thɩ̃ɛ fɛʋʋkɛ dɔnɩ cɔ gbɛbɩdaa. 14 Sɩ wa n gba mũsumookɛ tɩbɩla pɔnanɩ Thãgba Kɔ̃tɩnɩ cɔ a cʋʋna dɛ bulo tasasɔ, na khalasɔ, na gborminəsɔ, na tutuusɔa, na dɛ thɩ̃ dɩkha, dɩ dɛ bulo thɩ̃ɛ ga. 15 Thɔ̃ dona wɩ n ha dɩ wɩ gba wa n gbɛbɩna Thãgba Kɔ̃tɩnɩ cɔ. 16 Wa n bule tɩbɩlaakɛ wɩ n dʋnɩ mũsumonə ɲɔ̃kɔɔ wa n hana thɔ̃ dona wɩ mɩɛnɛ wɩ mɔ̃ wɩ n dona', gɩdonɩ wɩ n kɔɔ cʋʋrɛ dɩ ga n hɩrɛ. 17 Wa n jalna so gbɛbɩ bonɩ mũsumo, na sopuu hɛl bonɩ mũsumo a 'laa Thãgba Kɔ̃tɩnɩ cɔa'. Bonɩ jidara hɩna gele.
Joasɩ jamanaa yi pɩ pa
18 Dabɔɔlera, Ajayɛlɩkɛ dɔnɩ Siiri jamana jaal a ke kʋʋr na Gatɩdara, a taa dɩɩ. Agɩpɩ dɩ ƴaal, ɩnɩ n jal wo ɩnɩ kena Jerujalɛmdara dakha. 19 Dɩ Joasɩɩkɛ dɔnɩ Juda jamana khɩɩrɛ thɩ̃ ɓɔna fɛʋʋkɛ kɔɔ dɔnɩ Thãgbaada, kɛ ɔɔ thɩ Akajɩa na ɔɔ thɩ kɔ̃tɩ̃ Yoram na ɔɔ thɩ kɔ̃tɩ̃ɩ thɩ Jojafatɩɩkɛ kɔɔ dɔnɩ Juda jamanasɔ kɔɔ tini a ha Thãgba, a khɩɩna gɩrɛɛkɛ ɔɔ thɛthɛ kɔɔ tini a ha Thãgba, na dɛ fɛʋʋkɛ kɔɔ hanɩle thɩ̃ ɓɔnasɔɔra Thãgba Kɔ̃tɩnɩ cɔ na jamanaa cɔ a thɔna fɛw a ha Ajayɛlɩkɛ dɔnɩ Siiri jamana. Dɩ Ajayɛl jaal sa faa Jerujalɛm dɩɩ.
20 Joasɩɩ thɩmɩɩ gɩrɛ sɛnɩ na thɩ̃ɛ fɛʋʋkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Juda jamanasɔɔda. 21 Dɩ ɔɔ thɔ̃dara gʋʋrɛ kha nɔ bɩɛl, sa kʋʋ paarɩkɛ wɩ n wenɩ Bɛtɩ-Milo, kɛ hanɩ gbũ paar Sɩla hʋɛra. 22 Ɔɔ thɔ̃daraakɛ kʋɔnɩ dʋɔn Simeatɩɩ bikuun Yojabadɩ, na Somɛɛr bikuun Yehojabadɩ. Dɩ wɩ dʋʋrɛ ka wɩ dʋnɩ ɔɔ thɩ kɔ̃tɩ̃sɔ ɔɔ thɩ kɔ̃tɩ̃ Davɩdɩɩ dʋɔ, sɩ ɔɔ bikuun Amasɩa gba ɔɔ too pa a do jamana.