Ɩjɩrayɛl jamana Joakajɩɩ thɩmɩ
13
1 Ɔbɔɔkɛ Akajɩaa bikuun Joasɩ donɩ Juda Jamana dɩ ga cʋʋ yɛna kpelẽ yẽther (23), gɛrra Jehuu bikuun Joakajɩ do Ɩjɩrayɛl jamana, Samarɩ dɩɩra. Dɩ a dor jamana a cʋʋna yɛna yʋɔr makoɲɔ. 2 A cʋʋrɛ gɩrɛ puuronɩ ka Thãgba Kɔ̃tɩnɩ ƴɛra. A phɛlɛ sopuusɔɔkɛra Nebatɩɩ bikuun Jeroboamɩ kɔɔ tɔnɩ Ɩjɩrayɛldara pɛr dɩ wɩ cʋʋ, aa kɛr sa faa ga. 3 Dɩ nĩkhii fʋrɛ Thãgba Kɔ̃tɩn Ɩjɩrayɛldarara, dɩ bo wɩ to Ajayɛlɩkɛ dɔnɩ Siiri jamanaa ɲɔ̃kɔɔ, na ɔɔ bikuun Bɛn-Hadadɩɩ ɲɔ̃kɔɔ awɩ jamana do bɔɔ fɛw. 4 Sɩ Joakajɩ ƴɛɛrɛ Thãgba Kɔ̃tɩn, dɩ Thãgba Kɔ̃tɩn pɩɛ nũu, gɩdonɩ a yɩrɛ hʋɔlɛɛkɛ Siiridara n hʋɔlnɩ Ɩjɩrayɛldarara. 5 Dɩ Thãgba Kɔ̃tɩn thɔnanɛ tataa a ha wɩ. Le Ɩjɩrayɛldara for dɩphã a the Siiridaraa ɲɔ̃kɔɔ, dɩ wa n cɔ awɩ kẽkẽ waʋsɔ, mɔ̃kɛra gɩ kɔɔ hanɩ mamara. 6 Sɩrakɛ wa kɛr sa faa sopuusɔɔkɛra Jeroboam na ɔɔ cɔdara kɔɔ tɔnɩ Ɩjɩrayɛldara pɛr dɩ wɩ cʋʋa'. Mɛna wɩ faarɔ awɩbara, dɩ wa n kpaan ga hʋrara. Dɩrakɛ Aseraa thɩl gãakɛ wɩ ganɩ halerakɛ 'lo Samarɩ dɩɩra. 7 Sɔrasɛɛkɛ Thãgba Kɔ̃tɩn kɔɔ sɩnɩ Joakajɩra dʋɔn gãgo jʋʋn sɔrasɛ kpalaɲɔ yʋɔr (50), na koke hotorosɔ yʋɔr (10), na sɔrasɩ nɛdara gbɩlanɩ yʋɔr (10.000) dɩbara; gɩdonɩ Siiri jamana kʋʋrɛ wɩrɛ sɛnɩ, a cʋʋ wɩrakɛ dɩ wɩ ho thɩlãkobeekɛ wɩ n saarnɩ na nɛɛ. 8 Joakajɩɩ thɩmɩɩ gɩrɛ sɛnɩ, thɩ̃ɛ fɛʋʋkɛ a cʋʋnɩ, na ɔɔ kuun kha do, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda. 9 Agɩpɩ Joakajɩ khire a gbũ ɔɔ thɩ kɔ̃tɩ̃sɔɔra. Dɩ wɩ dʋʋrɛ Samarɩ dɩɩra, sɩ ɔɔ bikuun Joasɩ gba ɔɔ too pa a do jamana.Ɩjɩrayɛl jamana Joasɩɩ thɩmɩ
10 Joasɩ kɔɔ cʋʋrɛ yɛna kpelẽ yʋɔr makoɲɔ (37) jamana dʋʋra Juda məlsɔɔra, sɩ Joakajɩɩ bikuun Joasɩ do jamana Ɩjɩrayɛlla Samarɩ dɩɩra. Dɩ a dor jamana a cʋʋna yɛna yʋɔr maadõ. 11 Dɩ a kɔɔ cʋʋrɛ gɩrɛ puuronɩ ka Thãgba Kɔ̃tɩnɩ ƴɛra. Aa kɛr sa faa sopuu bɩɛllakɛ, kɛ dɔnɩ sopuusɔɔkɛ Nebatɩɩ bikuun Jeroboam kɔɔ tɔnɩ Ɩjɩrayɛldara pɛr dɩ wɩ cʋʋa'. Ga hʋʋlera a n jalna. 12 Joasɩɩ thɔ̃ kpɩɩsɔɔkɛ sɛnɩ, na thɩ̃ɛ fɛʋʋkɛ a cʋʋnɩ, na ɔɔ kuun kha do, na kʋʋrɩkɛ a kɔɔ kenɩ kha na Amasɩaakɛ dɔnɩ Juda jamana, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda. 13 Agɩpɩ Joasɩ khire a gbũ ɔɔ thɩ kɔ̃tɩ̃sɔɔra, sɩ ɔɔ bikuun Jeroboam gba ɔɔ jamana too pa. Dɩ wɩ dʋrɛ Joasɩ Samarɩ dɩɩra, ka wɩ n dʋnɩ Ɩjɩrayɛl jamanasɔ.
Elijee khi
14 Ɔbɔɔkɛ Elije phɩnɩ khookɛ kʋɔnɩ, Joasɩɩkɛ dɔnɩ Ɩjɩrayɛl jamana jaal ɔɔ pa a gʋɛraa a khɩɩ da n sona: «Ɩ̃ thɩ! Ɩ̃ thɩ! Fɩ mãkhananɛ Ɩjɩrayɛl koke hotorosɔ, na awɩ gãgo jʋʋn sɔrasɩsɔ fɛw!» 15 Dɩ Elije sʋʋraa: «Gba thaa na sẽe !» Dɩ Joasɩ gba. 16 Agɩpɩ Elije sor Ɩjɩrayɛl jamanana aa: «Jʋnɛ thaa!» Ɔbɔɔkɛ a jʋʋnɩ pɩ, Elije dɛɛnɛ ɔɔ ɲɛ̃ jamanaa ɲɛna. 17 Agɩpɩ dɩ so: «Khɛra fɛnɛtɩrɩ wi phã pa bilo.» Dɩ jamana khɛr. Dɩ Elije bir so aa: «Tha sõo» Dɩ jamana tha. Dɩ Elije so: «Kəkəə sõo gɩ, kɛ thɛnɩ Thãgba Kɔ̃tɩnna! Kəkəə sõo gɩ, kɛ na punonenɩ Siiridara! Fa punone Siiridara Afɛkɩ dɩɩra a na bũburõ wɩ na ti fɛw.» 18 Dɩ Elije bir so: «Gba seena» Dɩ jamana gba. Dɩ Elije bir so Ɩjɩrayɛl jamanana aa: «Bɛna thɩɩ!» Dɩ jamana bena thɩɩ balãther sa jɩɩl. 19 Dɩ nĩkhii fʋrɛ Thãgbaa tibil ɔra dɩ so: «Gɩ kɔɔ teenanɛ fɩ bena thɩɩ gɩ dã balamɔy, agɩbo ɲɛ̃be maadõ, dɩ fa kɔɔ punone Siiridara ɔmɛ̃ phaphapha wɩ pɩ fɛw. Sɩ nɛnɛ̃ɛkɛ ɲẽbe balãthera dɩbara fa puno wɩ.»
Elijee khubisɔ jaarɛ khire
20 Elije khire dɩ wɩ dʋʋ. Dɩ mɔ̃ yɩɛr finɩ, Moabɩ sɔrasɩ gbulona lʋʋn Ɩjɩrayɛl dɩɩra. 21 Dɩ wi bɩɛl mɔ̃ kuun bɩɛl khinɩ dɩ wa n dʋ, a 'laa yɩ sɔrasɩ gbulõ bɩɛl dɩ wa n pɔ, wɩ gbaar khire a dʋna Elijee kara. Dɩ khireele jaal a thʋ Elijee khubisɔ, a pal ɩɩr jɩɩl.
Ɩjɩrayɛldara punone Siiridara
22 Ajayɛlɩkɛ dɔnɩ Siiri jamana kɔɔ hʋɔlɛ Ɩjɩrayɛldarara a pɩna Joakajɩɩ jamana do bɔɔ fɛw. 23 Sɩ Thãgba Kɔ̃tɩn jɩ wɛr bʋɔra, gɩdonɩ bʋɔ fʋʋrɛ wɛra. Dɩ a kɛrɛ ƴɩɛ a pɛ war dɩɩ do ɔɔ nɔ bɩɛl ʋlfɛɛkɛ a kɔɔ ʋlfɛnanɩ Abɩraham, na Ɩjakɩ, na Jakɔbɩ dɔ nɔɔ. Aa ƴaal a bũburõ wa', aa bo wɩ dakha faa dɩ wɩ hʋnɔnaa ga. 24 Agɩpɩ Ajayɛlɩkɛ dɔnɩ Siiri jamana khire, sɩ ɔɔ bikuun Bɛn-Hadadɩ gba ɔɔ too pa a do jamana. 25 Dɩ dɩɩsɔɔkɛ Bɛn-Hadadɩɩ thɩ Ajayɛl kɔɔ taanɩ Joakajɩraakɛ dɔnɩ Joasɩɩ thɩ, koke bɔɔ, Joasɩ taarɛ dɩɩsɔɔle Bɛn-Hadadɩraakɛ dɔnɩ Ajayɛlɩ bikuun. A punone Bɛn-Hadadɩ balãthera oti, sa taa Ɩjɩrayɛl dɩɩsɔ.