Juda jamana Amasɩaa thɩmɩ \ref 2 Ch 25 et 26.1-2
14
1 Ɔbɔɔkɛ Joakajɩɩ bikuun Joasɩ cʋʋnɩ yɛna yeɲɔ (2) jamana dʋʋra Ɩjɩrayɛlla, gɛrra Joasɩɩ bikuun Amasɩa do jamana Judaa məlsɔɔra. 2 Yɛna kpelẽ yemɔy (25) a kɔɔ hana sa do jamana. Dɩ a dor jamana Jerujalɛm dɩɩra a cʋʋna yɛna kpelẽ yʋɔr phe bire (29). Ɔɔ nɩɩ i n dʋɔn Yehoadã, kɛ thɛnɩ Jerujalɛm. 3 Amasɩa cʋʋrɛ gɩrɛɛkɛ telenenɩ Thãgba Kɔ̃tɩnɩ ƴɛra wer, sɩ ga ho mɔ̃ ɔɔ thɩ kɔ̃tɩ̃ Davɩdɩ kɔɔ cʋʋna'. A cʋʋrɛ mɔ̃kɛra ɔɔ thɩ Joasɩ kɔɔ cʋʋnɩ fɛw. 4 Aa bũburõ sãsɩ paarsɔa'. Dɩ tɩbɩla n jire bonɩɛsɔ na latɩkolo bonɩɛsɔ 'lo sãsɩ paarsɔɔra.5 Ɔbɔɔkɛ Amasɩa 'lini fãga ɔɔ jamana dora, a kʋʋrɛ ɔɔ thɔ̃darasɔɔkɛ kɔɔ kɔnɩ ɔɔ thɩ Joasɩɩkɛ kɔɔ dɔnɩ jamana. 6 Sɩ aa kʋʋr tɩɩ kʋʋrdaraalee bɩsãsɔa'. Dɩ gɩ har mɔna gɩ kɔɔ kherenɩ Mʋɩjɩɩ jɔfʋ sɛbɛra, kãkɛ Thãgba Kɔ̃tɩn 'laanɩ jɔfʋʋkɛ ayɩ: «Na n kʋʋr thɛ awɩ bisɔɔ sopuurə ga, dɩ na n kʋʋr bɩsana dakha awɩ thɩsɔɔ sopuurə ga. Sɩ nɩ kɔ ntɛ ɔɔ thɛthɛɛ sopuurǝa.»
7 Amasɩa punone Edɔ̃ sɔrasɛ gbɩlanɩ yʋɔr (10.000) ɓɛlɛnɔɔkɛ wɩ n wenɩ Lã ɓɛlɛ̃. A teere Sela dɩɩ koke bɔɔlera a dʋʋ ire Yɔkɩteyɛl, kɛ dɔnɩ ireekɛ a toonanɩ a dana nĩikɛ.
Ɩjɩrayɛl jamana Joasɩ punone Amasɩa, kɛ dɔnɩ Juda jamana \ref 2 Ch 25.17-24
8 Le Amasɩaakɛ dɔnɩ Juda jamana thɔna thɔ̃thɔna a so Ɩjɩrayɛl jamana Joasɩraakɛ dɔnɩ Joakajɩɩ bikuun a dona Jehuu məl ayɩ: «Ɩna sɩ nɩna kha fãga.» 9 Dɩ Ɩjɩrayɛl jamana Joasɩ thɔ̃ a birse Juda jamana Amasɩa aa: «Lɩbã u thɩrʋ gɩ a thɔ̃ so Lɩbã sɛɛdɩrɩ thɩrʋra: “Ha mɩ afɩ bikhɛr ɩ̃ ha ɩ̃ bikuun a he!” Sɩ hɔ̃ nʋmaakɛ hanɩ Lɩbã jaal a saar u thɩrʋle a fɔfɔrɔ. 10 Fɩ punone Edɔ̃ɔ məlsɔ gɛr gɩ dɩ i ƴaalɛ hi fɩ haara. Tɔɔ le afɩ pa, a na kãkanɛ afɩ i dʋbɩra. Aɲera fɩ n lõ thɩlkɩɩraakɛ na ɛna farnɩ bũburone na Judaa məlsɔɔra?» 11 Sɩ Amasɩa na pɩɛ nũuə'. Dɩ Ɩjɩrayɛl jamana, Joasɩ jaal dɩ wɩ ke kʋʋr na Amasɩaakɛ dɔnɩ Juda jamana Bɛtɩ-Semɛsɩ dɩɩraakɛ hanɩ Judaa məlsɔɔ dʋɔ. 12 Dɩ Ɩjɩrayɛldara punone Judaa too, dɩ wɩ caalɛ fɛw bɩɛlbɩɛl a kɔ̃ awɩ cɔnanɔ. 13 Dɩ Ɩjɩrayɛl jamana Joasɩ fʋrɛ Joasɩɩ bikuun Amasɩaakɛ dɔnɩ Juda jamana a dona Akajɩaa məl dɩ do khaɩdaar. Agɩpɩ Ɩjɩrayɛl jamana jaal Jerujalɛm a wɩɛl dɩ bɛr gʋʋ, dɩ gbãʋ thɔɔ mɛtɛrɛ tãaɲɔ (200), a fʋ Efɩrayɩmɩ məlsɔɔ lõfonɔra, a jalna dana lõfonɔrakɛ hanɩ go kɛr paar. 14 Agɩpɩ, a khɩɩrɛ dɛ na dɛ bulo na thɩ̃be fɛʋʋkɛ hanɩle Thãgba Kɔ̃tɩnɩ cɔ, na jamanaa thɩ̃bi ɓɔ̃ thɩɩn cɔra, a fʋlɛna tɩbɩla a kɛr bir Samarɩ.
15 Joasɩɩ thɩmɩɩ gɩrɛ sɛnɩ, gɩrɛɛkɛ a cʋʋnɩ, na ɔɔ kuun kha do, na kʋʋrɩkɛ a kenanɩ kha Amasɩaakɛ dɔnɩ Juda jamana, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda. 16 Agɩpɩ Joasɩ khire a gbũ ɔɔ thɩ kɔ̃tɩ̃sɔɔra. Dɩ wɩ dʋʋrɛ Samarɩ dɩɩra, kãkɛ wɩ n dʋnɩ Ɩjɩrayɛl jamanasɔ, sɩ ɔɔ bikuun Jeroboam gba ɔɔ too pa a do jamana.
17 Ɔbɔɔkɛ Joakajɩɩ bikuun Joasɩɩkɛ dɔnɩ Ɩjɩrayɛl jamana khini pɩ, Amasɩaakɛ dɔnɩ Juda jamana a dona Joasɩɩ bikuun bire cʋʋ yɛna yʋɔr yemɔy (15) a dɛɛnɔ wo. 18 Amasɩaa thɩmɩɩ gɩrɛ sɛnɩ, gɩ hale dɩ wɩ khere sɛbɛraakɛ n mɩanɩ Juda jamanasɔɔda. 19 Dɩ wɩ gʋʋrɛ kha nɔ bɩɛl Jerujalɛm Amasɩaadara, dɩ ca jal Lakɩsɩ dɩɩra, dɩ wɩ weguu kpaan lera a kʋʋ. 20 Dɩ wɩ gbaar ɔɔ khi a pɛ gãgonana a birnə Jerujalɛm a dʋʋ kãkɛ wɩ dʋnɩ ɔɔ thɩ kɔ̃tɩ̃sɔ Davɩdɩɩ dʋɔ. 21 Dɩ Judadara fɛw gbaar Ajarɩaakɛ hananɩ yɛna yʋɔr maadõ (16) a pɛr dɩ do jamana ɔɔ thɩ Amasɩaa kara. 22 Mɔ̃ ɔɔ thɩ jamana khinɩ pɩ, ɔr dɔ ʋrɛ teanɩ Eilatɩ dɩɩ a pɛr Juda dɩɩsɔɔra, a bir mɩɩ.
Ɩjɩrayɛl jamana Jeroboam yeɲɔdaarɩ thɩmɩ
23 Ɔbɔɔkɛ Joasɩɩ bikuun Amasɩa na cʋʋnɩ yɛna yʋɔr yemɔy (15) jamana dʋʋra Judadarara, gɛr Joasɩɩ bikuun Jeroboam do jamana Ɩjɩrayɛlla Samarɩ dɩɩra. Dɩ a dor jamana a cʋʋna yɛna kpalaɲɔ bɩɛl (41). 24 Dɩ a cʋʋrɛ gɩrɛ puuronɩ ka Thãgba Kɔ̃tɩnɩ ƴɛra. Aa kɛr sa faa Nebatɩɩ bikuun Jeroboamɩ sopuu bɩɛlakɛ, kɛ dɔnɩ sopuusɔɔkɛ a tɔnɩ Ɩjɩrayɛldara pɛr dɩ wɩ cʋʋa'. 25 Ɔr tea Ɩjɩrayɛl dɩɩsɔ fɛw, a fʋna Lɛbɔtɩ-Hamatɩ dɩ lõ paar, a jalna dana laɲʋɔnɩkɛ wɩ n wenɩ laɲɔ̃ khire. Gɩdonɩ gɛr dɔ gɩrɛ Thãgba Kɔ̃tɩn Ɩjɩrayɛlɩ Thãgba kɔɔ thɔnɩ Amɩtayɩɩ bikuun Jonasɩɩkɛ dɔnɩ ɔɔ mɩmɩɩ, kɛ thɛnɩ Gatɩ-Hefɛɛr, dɩ so. 26 Gɩdonɩ Thãgba Kɔ̃tɩn kɔɔ yɩrɛ mɔ̃ Ɩjɩrayɛldara hanɩ ha hel kɔ̃tɩɩna. Dee na hale dɩ waɩ gɩ, dɩ tibil ʋkha gɩrakɛ a na bul Ɩjɩrayɛlla'. 27 Sɩ Thãgba Kɔ̃tɩn na kɔɔ sonɩ ɩna pɩɩnɛ awɩ i kɛ thɩɩra na faa ga, gɛr dɔ kɩrʋ dɩ gba Joasɩɩ bikuun Jeroboam a taana wɩ.
28 Jeroboamɩ thɩmɩɩ gɩrɛ sɛnɩ, na thɩ̃ɛ fɛʋʋkɛ a cʋʋnɩ, na mɔ̃ a donɩ kuun khaa kʋʋrra, na mɔ̃ a teenɩ Damasɩ dɩɩ na Hamatɩ dɩɩ, kɛ Juda hɩnɩ, a ɓã Ɩjɩrayɛlla, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda. 29 Agɩpɩ Jeroboam khire a gbũ ɔɔ thɩ kɔ̃tɩ̃sɔraakɛ dɔnɩ Ɩjɩrayɛl jamanasɔ. Dɩ ɔɔ bikuun Jakarɩ gbaar ɔɔ too pa a do jamana.