Juda jamana Ajarɩaa thɩmɩɩ \ref 2 Ch 25
15
1 Ɔbɔɔkɛ Jeroboam na cʋʋnɩ yɛna kpelẽ makoɲɔ (27) jamana dʋʋra Ɩjɩrayɛlla, gɛrra Amasɩaa bikuun Ajarɩa do jamana Judadarara. 2 Yɛna yʋɔr maadõ (16) a kɔɔ hana sa do jamana. Dɩ a dor jamana Jerujalɛm dɩɩra a cʋʋna yɛna kpalaɲɔ yʋɔr yeɲɔ (52). Ɔɔ nɩɩ i n dʋɔn Yekolɩaakɛ thɛnɩ Jerujalɛm. 3 Ajarɩa cʋʋrɛ gɩrɛɛkɛ fɛʋʋkɛ telenenɩ Thãgba Kɔ̃tɩnɩ ƴɛra mɔna ɔɔ thɩ Amasɩa kɔɔ cʋʋnɩ. 4 Sɩrakɛ aa bũburõ sãsɩ paarsɔa'. Dɩ tɩbɩla n jire bonɩɛsɔ na latɩkolo bonɩɛsɔ 'lo sãsɩ paarsɔɔra. 5 Thãgba Kɔ̃tɩn pɛr Ajarɩa jamanana gbuul khoo, kɛ wɩ n wenɩ dakha Ojɩasɩ, da n cɔ cɔ bɩɛlaakɛ hanɩ khuirə foo a jalna dana ɔɔ khi wi. Ɔɔ bikuun Yotam kɔɔ dʋɔn kɔ̃tɩn le jamana cʋɔrɔ, da n thɔɔ dɩɩ.6 Ajarɩaa thɩmɩɩ gɩrɛ sɛnɩ na thɩ̃ɛ fɛʋʋkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Juda jamanasɔɔda. 7 Agɩpɩ Ajarɩa khire a gbũ ɔɔ thɩ kɔ̃tɩ̃sɔɔra. Dɩ wɩ dʋʋrɛ kãkɛ wɩ dʋnɩ ɔɔ thɩsɔ Davɩdɩɩ dʋɔ, sɩ ɔɔ bikuun Yotam gba ɔɔ too pa a do jamana.
Ɩjɩrayɛl jamana Jakarɩɩ thɩmɩ
8 Ɔbɔɔkɛ Ajarɩa na cʋʋnɩ yɛna kpelẽ yʋɔr makõther (38) jamana dʋʋra Juda dɩɩra, gɛrra Jeroboamɩ bikuun Jakarɩ do jamana, Ɩjɩrayɛlla Samarɩ dɩɩra. A do jamana a cʋʋna sɩpora maadõ. 9 Dɩ a cʋʋrɛ gɩrɛ puuronɩ ka Thãgba Kɔ̃tɩnɩ ƴɛra, mɔna ɔɔ thɩ kɔ̃tɩ̃sɔ kɔɔ cʋʋnɩ. Aa kɛr sa faa Nebatɩɩ bikuun Jeroboamɩ sopuusɔɔkɛ a kɔɔ tɔnɩ Ɩjɩrayɛldara pɛr dɩ wɩ cʋʋa'. 10 Dɩ Yabɛsɩɩ bikuun Salum gʋʋrɛ kha na tɩbɩla sa kʋʋ tɩbɩlaa ƴɛra. Agɩpɩ dɩ gba ɔɔ too pa a do jamana. 11 Jakarɩɩ thɩmɩɩ gɩrɛ sɛnɩ, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda.
12 Gɩ daan a ha mɔna Thãgba Kɔ̃tɩn kɔɔ mɩɩnɩ Jehu ayɩ: «Afɩ məlsɔ na dor jamanasɔ Ɩjɩrayɛl jamana too paara a na dana balanã məlle!» Dɩ mɛna gɩ ha oti.
Ɩjɩrayɛl jamana Salumɩ thɩmɩ
13 Ɔbɔɔkɛ Ojɩasɩ na cʋʋnɩ yɛna kpalaɲɔ phe bire (39) jamana dʋʋra Juda dɩɩra, gɛrra Yabɛsɩɩ bikuun Salum do jamana Ɩjɩrayɛlla. Dɩ a dor jamana Samarɩ dɩɩra a cʋʋna sɩpor bɩɛl. 14 Sɩ Gadɩɩ bikuun Menahɛm ther Tɩɩrsa dɩɩra a pɔ a kʋ Salum le Samarɩ dɩɩra, sa gba ɔɔ too pa a do jamana. 15 Salumɩ thɩmɩɩ gɩrɛ sɛnɩ, na mɔ̃ a gʋʋrnɩ kha na tɩbɩla sa kʋ Jakarɩ, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda.
16 Dɩ Menahɛm wɩɛlɛ Tɩfɩsa dɩɩ a kʋʋr wɩrɛ fɛʋʋkɛ hanɩle dɩɩra; na dakha ɔɔ bənə a jalna foo a dana Tɩɩrsa dɩɩra, gɩdonɩ dɩdaraale bor ɩna khɛrʋ ɩnɩ lõsɔ a lõa'. Dɩ a pəle khɛr pɛmɛdarasɔ fɛw na yire.
Ɩjɩrayɛl jamana Menahɛmɩ thɩmɩɩ
17 Ɔbɔɔkɛ Ajarɩa na cʋʋnɩ yɛna kpalaɲɔ phe bire (39) jamana dʋʋra Juda dɩɩra, gɛrra Gadɩɩ bikuun Menahɛm do Ɩjɩrayɛl jamana. Dɩ a dor jamana Samarɩ dɩɩra a cʋʋna yɛna yʋɔr (10). 18 A cʋʋrɛ gɩrɛ puuronɩ ka Thãgba Kɔ̃tɩnɩ ƴɛra. Ɔɔ yi hanana fɛw, a kɛr sa faa sopuusɔɔkɛ Nebatɩɩ bikuun Jeroboam kɔɔ tɔnɩ Ɩjɩrayɛldara pɛr dɩ wɩ cʋʋa'. 19 Dɩ Pulɩkɛ dɔnɩ Asiri jamana pɔr lõ dɩɩra dɩ Menahɛm haa dɛ bulo tɔn kpelẽ yʋɔr (30), sɩ a buluu ɔɔ jamana dɩ n 'li fãga. 20 Ɩjɩrayɛl lẽledarara Menahɛm pɛr dɩ wɩ ti dɛ buloolera fɛw. Tɩɩ bɩɛl n tire dɛ bulo be kpalaɲɔ yʋɔr (50) dɩ ha Asiiri jamana. Dɩ Asiiri jamana kɛrɛ kɔ̃, aa too le dɩɩra bã.
21 Menahɛmɩ thɩmɩɩ gɩrɛ sɛnɩ na thɩ̃ɛ fɛʋʋkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda. 22 Agɩpɩ Menahɛm khire a gbũ ɔɔ thɩ kɔ̃tɩ̃sɔɔra, sɩ ɔɔ bikuun Pekahɩa gba ɔɔ too pa a do jamana.
Ɩjɩrayɛl jamana Pekahɩaa thɩmɩɩ
23 Ɔbɔɔkɛ Ajarɩa na cʋʋnɩ yɛna kpalaɲɔ yʋɔr jamana dʋʋra Judaa dɩɩra, gɛrra Menahɛmɩ bikuun Pekahɩa do jamana Ɩjɩrayɛlla, Samarɩ dɩɩra. Dɩ a dor jamana a cʋʋna yɛna yeɲɔ. 24 A cʋʋrɛ gɩrɛ puuronɩ ka Thãgba Kɔ̃tɩnɩ ƴɛra. Aa kɛr sa faa sopuusɔɔkɛ Nebatɩɩ bikuun Jeroboam kɔɔ tɔnɩ Ɩjɩrayɛldara pɛr dɩ wɩ cʋʋa'. 25 Dɩ Remalɩaa bikuun Peka, kɛ dɔnɩ jamanaa sɔrasɩ kɔ̃tɩ̃, gʋʋrɛ kha na tɩbɩla sa kʋʋ du bɩnɔ jamana cʋɔra le Samarɩ dɩɩra, a kʋna dakha Argɔbɩ na Arɩye. Peka kɔɔ hananɛ Galaadɩdara kpalaɲɔ yʋɔr kɛ bulloonɩ. Thale a kʋ Pekahɩa, sa gba ɔɔ too pa a do jamana. 26 Pekahɩaa thɩmɩɩ gɩrɛ sɛnɩ na thɩ̃ɛ fɛʋʋkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda.
Ɩjɩrayɛl jamana Pekaa thɩmɩɩ
27 Ɔbɔɔkɛ Ajarɩa na cʋʋnɩ yɛna kpalaɲɔ yʋɔr yeɲɔ (52) jamana dʋʋra Juda dɩɩra, gɛrra Remalɩaa bikuun Peka do jamana Ɩjɩrayɛlla, Samarɩ dɩɩra a cʋʋna yɛna kpelẽ (20). 28 Dɩ a cʋʋrɛ gɩrɛ puuronɩ ka Thãgba Kɔ̃tɩnɩ ƴɛra. Aa kɛr sa faa sopuusɔɔkɛ Nebatɩɩ bikuun Jeroboam kɔɔ tɔnɩ Ɩjɩrayɛldara pɛr dɩ wɩ cʋʋa'. 29 Pekaa jamana do bɔɔ Ɩjɩrayɛlla, dabɔɔlera Asiiri jamanaakɛ wɩ n wenɩ Tegɩlatɩ-Pilejɛɛr pɔ a tee Ɩyɔ̃ dɩɩ, na Abɛl-Bɛtɩ-Maaka dɩɩ, na Yanoa dɩɩ, na Kedɛsɩ dɩɩ, na Hasɔɔr dɩɩ. A teere Galaadɩ bəən, na Galɩle bəən, a teena Nɛfɩtalɩɩ məlsɔɔ dɩ fɛw, a khɩɩ dɩdara jalna Asiiri dɩɩra. 30 Dɩ Elaa bikuun Oje gʋʋrnanɛ kha tɩbɩla sa kʋ Pekaakɛ dɔnɩ Remalɩaa bikuun, sa gba ɔɔ too pa a do jamana ɔbɔɔkɛ Ojɩasɩɩ bikuun Yotam kɔɔ cʋʋnɩ yɛna kpelẽ (20) jamana dʋʋra Juda bəənnə. 31 Pekaa thɩmɩɩ gɩrɛ sɛnɩ na thɩ̃ɛ fɛʋʋkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda.
Juda jamana Yotamɩ thɩmɩɩ \ref Ch 27
32 Ɔbɔɔkɛ Remalɩaa bikuun Peka na cʋʋnɩ yɛna yeɲɔ jamana dʋʋra Ɩjɩrayɛl dɩɩra, gɛrra Ojɩasɩɩ bikuun Yotam do jamana Juda bəənnə. 33 Yɛna kpelẽ yemɔy a kɔɔ hana sa do jamana. Dɩ a dor jamana Jerujalɛm dɩɩra a cʋʋna yɛna yʋɔr maadõ. Ɔɔ nɩɩ i n dʋɔn Yerusa, Sadɔkɩɩ bikhɛr gɩ. 34 Yotam cʋʋrɛ gɩrɛɛkɛ telenenɩ Thãgba Kɔ̃tɩnɩ ƴɛra mɔna ɔɔ thɩ Ojɩasɩ kɔɔ cʋʋnɩ fɛw. 35 Sɩrakɛ aa bũburõ sãasɩ paarsɔa'. Dɩ tɩbɩla n jire bonɩɛsɔ na latɩkolo bonɩɛsɔ 'lo sãasɩ paarsɔɔra. Yotam mɛ lõfonʋɔɔkɛ hanɩ Thãgba Kɔ̃tɩnɩ cɔ yʋɔ. 36 Yotamɩ thɩmɩɩ gɩrɛ sɛnɩ na thɩ̃ɛ fɛʋʋkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Juda jamanasɔɔda.