Juda jamana Akajɩɩ thɩmɩɩ \ref 2 Ch 28
16
1 Ɔbɔɔkɛ Remalɩaa bikuun Peka na cʋʋnɩ yɛna yʋɔr makoɲɔ (17) jamana dʋʋra Ɩjɩrayɛlla, gɛrra Yotamɩ bikuun Akajɩ do jamana Juda bəənnə. 2 Yɛna kpelẽ (20) Akajɩ kɔɔ hana sa do jamana. Dɩ a dor jamana Jerujalɛm dɩɩra a cʋʋna yɛna yʋɔr maadõ (16). Aa cʋʋ gɩrɛ telenenɩ Thãgba Kɔ̃tɩn, ɔɔ Thãgbaa ƴɛra, mɔ̃kɛ ɔɔ thɩ kɔ̃tɩ̃ Davɩdɩ kɔɔ cʋʋna'. 3 A cʋʋrɛ Ɩjɩrayɛl jamanasɔɔ kha, a ba gbananakɛ ɔɔ bikuun na yire a thii dɔɔra a jinə bonɩɛ. Cʋʋ pa puunəsɔɔkɛra ca kpɩɩsɔɔkɛ kɔɔ hanɩle dɩɩra n kɔ cʋʋnɩ dɩ Thãgba Kɔ̃tɩn ti wɩ Ɩjɩrayɛl bɩsanaa ƴɛra, gɛrra a n phɛl. 4 A n jire bonɩɛsɔ na latɩkolo bonɩɛsɔ 'lo sãasɩ paarsɔɔra, na gɔ̃gɔ̃ bi yʋɔsɔ, na thɩr hu balɔsɔ fɛw.5 Le Resɩnɩkɛ dɔnɩ Siiri jamana na Remalɩaa bikuun Pekaakɛ dɔnɩ Ɩjɩrayɛl jamana jal wɩ kena Jerujalɛmdara kʋʋr. Dɩ wɩ sɔbɩrɛ Akajɩ jamana, sɩ wa puno a maaraa ga. 6 Dabɔɔlera, Resɩnɩkɛ dɔnɩ Siiri jamana tee Eilatɩ dɩɩ a pɛ Siiri dɩɩsɔɔra. A weelele Juifisɔ Eilatɩ dɩɩra, dɩ Edɔ̃dara gba dɩɩ a tooro foo a dana nĩikɛ. 7 Dɩ Akajɩ thʋɔn thɔ̃thɔna Tegɩlatɩ-Pilejɛɛraakɛ dɔnɩ Asiiri jamana a sʋʋraa: «Mɩ dor afɩ thɔ̃daar, a dona afɩ bikuun. Ɩna taa mɩ Siiri jamanana na Ɩjɩrayɛl jamananaakɛ n kɛna mɩnɩ.» 8 Dɩ Akajɩ khɩɩrɛ dɛ bulo na dɛɛkɛ kɔɔ hanɩle Thãgba Kɔ̃tɩnɩ cɔ, na jamanaa thɩ̃bi thɩɩn cɔra a thɔna ha Asiiri jamana khaar. 9 Dɩ Asiiri jamana ture, a jal kena Damasɩdara a tee dɩɩ. Dɩ a fʋlɛlɛ dɩdara jalna Kɩɩr dɩɩra, sa kʋ Resɩn jamana.
10 Le Akajɩ jamana jal Damasɩ a caana Asiiri jamana Tegɩlatɩ-Pilejɛɛr. Mɔ̃ a yɩnɩ bonɩ ji paarɩkɛ hanɩle Damasɩ dɩɩra, a kherere mɔna a hanɩ 'lɩm na ɔɔ thɩ̃ yɩra yɩra fɛw a thɔna ha Urɩ bonɩ jidaar. 11 Dɩ Urɩ bonɩ jidaar mɩrɛ bonɩ ji paara mɔna Akajɩ jamana kɔɔ kherenɩ Damasɩ dɩɩra a thɔna haa. A kɔɔ mɩrɛ bonɩ ji paarɩle a pɩrakɛ, sɩ Akajɩ jamana pɩɩrɔ the Damasɩ a pɔ. 12 Mɔ̃ jamana thenɩ Damasɩ a pɔ yɩ bonɩ ji paarɩle, a tɔr dã a jʋʋn; 13 a jiro ɔɔ bonɩ thiinə, na ɔɔ thɩ̃ bi bonɩ, a deero ɔɔ dɩvɛ̃ bonɩsɔ, na ɔɔ 'likha bonɩsɔɔ tɔmɩn. 14 Agɩpɩ, a gbaar ther sɛ bonɩ ji paarɩkɛ kɔɔ hanɩle Thãgba Kɔ̃tɩnɩ ƴɔɔ, Thãgba Kɔ̃tɩnɩ cɔ lõfonɔ na bonɩ ji pa phaalee thɩ̃thɩɩn a thɩɩn bonɩ ji pa phaalee gɛllɔ, ka wire na n jalnɩ dɩ pɛr ɲɔ̃bɔɔ. 15 Agɩpɩ Akajɩ jamana mɩɩrɛ sor Urɩ bonɩ jidaara aa: «Na je duur bonɩ thiinə na thɩ̃ bi bonɩɛ bonɩ ji pa kɔ̃tɩɩnaakɛ. Na jero jamanaa bonɩ thiinə na ɔɔ thɩ̃ bi bonɩ, na dʋɔdara fɛʋʋ bonɩ thiinə, na awɩ thɩ̃ bi bonɩ. Na jero awɩ dɩvɛ̃ bonɩsɔ, a na deerero bonɩ thiinə tɔmɩ̃sɔ fɛw na bonɩ tɔmɩ̃sɔ fɛw. Sɩ ado ther sɛ bonɩ ji paarɩkɛɛda gɩ, ma hɩɩnɛ ɔɔda.» 16 Dɩ Urɩ bonɩ jidaar cʋʋrɛ mɔna Akajɩ jamana kɔɔ kpãkpaanaanɩ fɛw.
17 Akajɩ jamana wɩɛlɛ dakha ther sɛ phɛlɛ pɛnasɔɔkɛ hanɩ thɩ̃ tɔ hotorosɔɔra, sa tiir ther sɛ ɓalãgasɔɔkɛ dɛɛnɛ garnɩ ƴũu. A gbune ther sɛ ɓalãga kɔ̃tɩ̃ɩkɛ kɔɔ dɛɛnɛnɩ na yʋɔr yeɲɔraakɛ wɩ cʋʋnanɩ ther sɩɛ a dɛ̃ɛ thɩɩraakɛ wɩ kpanɩ na bokana. 18 Asiiri jamana dor nɔɔ dɩ Akajɩ debi jɛ̃bɛrɛ̃ birikɛ wɩ kɔɔ mɩnɩ Thãgba Kɔ̃tɩnɩ cɔ bɩnɔ dɩɩ do hɩɩr widaa, a debɩna dakha lõfonʋɔɔkɛ kɔɔ hanɩ jɩɛra, kãkɛ jamana n kɔɔ lonanɩ.