<<    <     2 JAMANASƆ     17     >    >> 
Ɩjɩrayɛldaraa pɩpɩɩ jamana Ojee thɩmɩɩ.
17
1 Ɔbɔɔkɛ Akajɩ donɩ Juda Jamana dɩ ga cʋʋ yɛna yʋɔr yeɲɔ (12), gɛrra Elaa bikuun Oje do Ɩjɩrayɛl jamana Samarɩ dɩɩra. Dɩ a dor jamana a cʋʋna yɛna yʋɔr phe bire (9). 2 Dɩ a cʋʋrɛ gɩrɛ puuronɩ ka Thãgba Kɔ̃tɩnɩ ƴɛra, sɩ ga ho Ɩjɩrayɛl jamana wɩrɛ kɔɔ kʋlɛɛnɩ ƴɩɛa'. 3 Dɩ Salmanajaarɩkɛ dɔnɩ Asiiri jamana pɔr a kenaa, a puno Oje dɩ wur jʋʋraa, da n lɩmʋʋ lãpho. 4 Sɩ Oje thɔnanɛ thɔ̃thɔna Ejipiti jamananaakɛ wɩ n wenɩ So, dɩ wɩ gʋʋr kha, dɩ aa n lɩmɩ Asiiri jamana lãpho yɛna yɛna 'lo bã. Gɛr gɩ dɩ Asiiri jamana fʋʋ li na jɔrkɔ̃̃ a to khaɩra. 5 Agɩpɩ Asiiri jamana gbaar dɩɩ fɛw, a sɔbɩ Samarɩdara a cʋʋna yɛna yẽther. 6 Ojee yɛna yʋɔr phe birera a cʋʋnɩ jamana dʋʋra, ga yɛɛle Asiiri jamana tee Samarɩ dɩɩ. Dɩ a fʋlɛlɛ Ɩjɩrayɛldara a jalna Asiiri dɩɩra, a pɛ wɩ Hala bəənnə, na Habɔɔr mɩɩr nʋɔraakɛ dʋɔnɩ Gojã bəən, na Mɛɛdɩdaraa dɩsɔɔra.
Gɩrɛ dɔnɩ kɩrʋ dɩ Ɩjɩrayɛl jamana dɩɩ wɩɛl
7 Gelela daan gɩdonɩ Ɩjɩrayɛldara cʋʋrɛ sopuu Thãgba Kɔ̃tɩn awɩ Thãgbaraakɛ kɔɔ te wɩnɩ Ejipiti dɩɩra, a taana wɩ Faarɔ̃ɔkɛ dɔnɩ Ejipiti jamanaa fãgara, na dakha gɩdonɩ wɩ bire wa n fʋɔr thãgba kpɩɩsɔ. 8 Wɩ n kpaanɛ ca kpɩɩsɔɔ fɩlla, kɛ dɔnɩ caaarsɔɔkɛ Thãgba Kɔ̃tɩn kɔɔ tini sa gba dɩɩ ha wɛr Ɩjɩrayɛl bɩsana, dɩ wa n kpaana fɩlɛlaakɛ Ɩjɩrayɛl jamanasɔ pɛrnɩ. 9 Ɩjɩrayɛldara wolone cʋʋ Thãgba Kɔ̃tɩn awɩ Thãgbara thɩ̃ɛɛkɛ na teananɩ cʋʋra'. Wɩ mɩrɛ sãsɩ paarsɔ awɩ dʋɔsɔ fɛw, a fʋna bɛbɛraa cɔ gbãsɔɔra a gbana dɩ kɔ̃tɩnasɔraakɛ dɩ bɛr gʋʋsɔ diironi. 10 Wɩ gar thɩl bokanasɔ na Aseraa thɩl gã gɔ̃gɔ̃ bi gbanasɔɔra fɛw, na thɩr hu balɔsɔ fɛw. 11 Dɩ wɩ n jire latɩkolo bonɩɛsɔ sãasɩ paarsɔraale fɛw, a hona caarsɔɔkɛ Thãgba Kɔ̃tɩn kɔɔ weelenɩ wɛr Ɩjɩrayɛldaraa ƴɛra. Wɩ cʋʋrɛ thɩ̃ puunə ka, dɩɩ fʋ Thãgba Kɔ̃tɩn nĩkhii. 12 Wɩ n fʋɔrɛ thãgbasɔɔkɛ Thãgba Kɔ̃tɩn kɔɔ so warnɩ wa n fʋɔra'. 13 Dɩ Thãgba Kɔ̃tɩn thʋɔn ɔɔ mɩmɩɩsɔɔ fɛw na bobonasɔ fɛw a kpãkpaan Ɩjɩrayɛldarara na Judadarara a so war aa: «Nɩ faa anɩ cʋʋ pa puusɔ sa kɛra birə. Na n hɩnɛ ɩ̃ nɔ thɩmɩsɔ, na ɩ̃ jɔfʋsɔɔkɛ kherenenɩ. Na n kpaanɛ bɔɔbɔɔ ɩ̃ jɔfʋraakɛ mɩ kɔɔ hanɩ anɩ thɩ kɔ̃tɩ̃sɔ, kɛ dɔnɩ gɩrɛ mɩ hanɩ ɩ̃ thɔ̃darasɔɔkɛ dɔnɩ ɩ̃ mɩmɩɩsɔ dɩ wɩ ha nɩ. 14 Sɩ wa kɔɔ pɛ nũə'. Wɩ nʋʋrɛ nũ awɩ thɩ kɔ̃tɩ̃sɔɔ kha, kɛ na kɔɔ pɩɛrnɩ haar Thãgba Kɔ̃tɩn awɩ Thãgbara ga. 15 Wɩ bʋʋrɛ ɔɔ jɔfʋ kherenasɔ, na nɔ bɩɛl ʋlfɛrɛɛkɛ a kɔɔ ʋlfɛnanɩ awɩ thɩ kɔ̃tɩ̃sɔ, a bʋʋrna kpãkpaanɛɛkɛ a kɔɔ kpãkpaan warnɩ. Wɩ n kpaanɛ mɔlɔ thɩ̃ɛsɔɔra, a fi awɩ thɛthɛrakɛ a do mɔlɔ thɩ̃ɛsɔɔra. Wɩ phɛllɛ ca kpɩɩsɔɔkɛ diə warnɩɩ cʋʋ pasɔɔra, kɛ Thãgba Kɔ̃tɩn kɔɔ pɩɛr wɩnɩ wa n phɛlla'. 16 Wɩ bʋʋrɛ Thãgba Kɔ̃tɩn awɩ Thãgbaa jɔfʋsɔ fɛw, sa hɩl ther a cʋʋ na keminə yeɲɔ. Wɩ cʋʋrɛ Aseraa thɩl gãsɔ, dɩ wa n gburõkhunə thɩ̃ɛsɔɔ fɛʋʋraakɛ hanɩ le thãgbara, dɩ wa n fʋɔrna Baal. 17 Wɩ thiire awɩ bikũusɔ na awɩ bikhɛrsɔ na yire dɔɔra a jinə bonɩɛ. Wɩ n ƴaalɛ bʋraa, dɩ wɩ n cʋʋrɛ dakha sidumone. Wɩ faarɛ awɩbara dɩ wa n cʋʋ gɩrɛ puuronɩ ka Thãgba Kɔ̃tɩnɩ ƴɛra dɩ nĩkhii n fʋʋ. 18 Gɛr dɔ kɩrʋ nĩkhi khɩɩ fʋnɩ Thãgba Kɔ̃tɩn Ɩjɩrayɛldarara, dɩ hɛl wɩ faa dɩ wɩ hʋnɔna ɔɔ ƴɛ, sa sɩ Judaa məlsɔ dɩbara. 19 Judaa məlsɔɔrakɛ dakha na cʋʋ Thãgba Kɔ̃tɩn awɩ Thãgbaa jɔfʋa'. Wɩ kpaanɛ fɩlɛlaakɛra Ɩjɩrayɛldara kɔɔ hananɩ. 20 Gɛr dɔ kɩrʋ Thãgba Kɔ̃tɩn bonɩ Ɩjɩrayɛlɩ məlsɔ fɛw a faa. A wur wer, a gba wɩ to tɩɩ phʋ̃ʋdaraa ɲɔ̃kɔɔ. Pɩpɩɩ paar, dɩ weele wɩ fɛw dɩ wɩ hʋnɔna ɔɔ ƴɛ. 21 Gɩdonɩ ɔbɔɔkɛ Thãgba kɔɔ hɛlnɩ Ɩjɩrayɛldara Davɩdɩɩ cɔ toora, wɩ pɛrɛ Nebatɩɩ bikuun Jeroboam dɩ do jamana, dɩ Jeroboam kɛr wɩ dɩ wɩ faa Thãgba Kɔ̃tɩn, dɩ tɔ wɩ pɛr dɩ wɩ cʋʋ sopuu kɔ̃tɩ̃ɩ na sobɔr. 22 Ɩjɩrayɛldara faarɛ awɩbara sopuusɔ fɛʋraakɛ Jeroboam kɔɔ cʋʋnɩ, wa kɛr sa faa ga. 23 Dɩ Thãgba Kɔ̃tɩn hɛlɛ Ɩjɩrayɛldara a faa dɩ wɩ hʋnɔna ɔɔ ƴɛ, mɔna a kɔɔ thɔnɩ ɔɔ thɔ̃darasɔ fɛʋʋkɛ dɔnɩ ɔɔ mɩmɩɩsɔ dɩ wɩ mɩɩ. Thale wɩ fʋlɛ Ɩjɩrayɛldara a jalna Asiiri dɩɩra dɩ wɩ hʋnɔna awɩ dɩ; dɩ wɩ too le foo a dana nĩikɛ.
Samarɩdaraa the pa
24 Asiiri jamana jalnanɛ tɩbɩlaakɛ thɛnɩ Babɩlɔn dɩɩra, na Kuta dɩɩra, na Ava dɩɩra, na Hamatɩ dɩɩra, na Sefavayɩm dɩɩra. A pɛ wɛr Samarɩ dɩɩsɔɔra Ɩjɩrayɛldaraa kara. Dɩ tɩbɩlaale gbaar Samarɩ dɩɩsɔ a too le. 25 Fʋ paar, mɔ̃ wɩ toonɩ le dɩɩra, wa n kɔɔ fʋɔr Thãgba Kɔ̃tɩnna'. Dɩ Thãgba Kɔ̃tɩn tire sidũ'unə a pɛ war dɩ wa n kʋʋr wɩ. 26 Dɩ wɩ sor Asiiri jamanana aa: «Caarsɔɔkɛra fɩ jalnanɩ pɛr Samarɩ dɩɩsɔɔra, wa jɩ mɔ̃ wɩ n fʋɔrnɩ dɩɩlee thãgba ga. Dɩ a tire sidũ'unə pɛ war dɩ wa n kʋʋr wɩ, gɩdonɩ wa jɩ mɔ̃ wɩ n fʋɔrʋna'. 27 Dɩ Asiiri jamana sor a kpãkpaanɔ aa: Nɩ kɛrana bonɩ jidaar bɩɛlɩkɛ nɩ kɔɔ fʋnɩ le, a bir a too le dɩɩra a dɩɩr wɩ mɔ̃ wɩ n fʋɔrnɩ dɩɩlee thãgba. 28 Dɩ bonɩ jidaar bɩɛlɩkɛ wɩ kɔɔ fʋnɩ Samarɩ a jalna kɛrɛ bir a too Betɛl dɩɩra a dɩɩr wɩ mɔ̃ wɩ n fʋɔrnɩ Thãgba Kɔ̃tɩn.
29 Sɩ caarsɔɔle fɛw bɩɛlbɩɛl cʋʋrɛ awɩ thɛthɛɛ thãgbasɔ. Wɩ cʋʋ wɛr a thɩɩn cɔnasɔraakɛ Samarɩ caca dʋɔdara kɔɔ mɩnɩ le sãasɩ paarsɔ, awɩ dʋɔsɔɔkɛ wɩ toonɩ. 30 Babɩlɔndara cʋʋrɛ awɩ thãgbaakɛ wɩ n wenɩ Sukɔtɩ-Benɔtɩ, dɩ Kutɩdara cʋʋ awɩ thãgbaakɛ wɩ n wenɩ Nɛrgal, dɩ Hamatɩdara cʋʋ awɩ thãgbaakɛ wɩ n wenɩ Asɩma, 31 dɩ Avadara cʋʋ awɩ thãgbasɔɔkɛ wɩ n wenɩ Nɩbaajɩ na Tartakɩ. Dɩ Sefavayɩmdara n thiire awɩ bɩsãsɔ na yire dɔɔra a na jinə bonɩɛ awɩ thãgbaraakɛ dɔnɩ Adɩramɛlɛkɩ na Anamɛlɛkɩ. 32 Wɩ n fʋɔrɛ dakha Thãgba Kɔ̃tɩn. Sɩ awɩ thɩ̃thɩɩn wɩ n ti awɩ bonɩ jidaraakɛ na n jenɩ bonɩɛ sãasɩ pa cɔnasɔɔra wa n pɛ war.
33 Thale wɩ n fʋɔr Thãgba Kɔ̃tɩn, dɩ wɩ bir na fʋɔrna awɩ thɛthɛɛ thãgbasɔ, mɔ̃kɛra caarsɔɔkɛ wɩ theronɩ n kɔɔ cʋʋnɩ sɩ dɩ wɩ fʋlɛ wɩ.
34 Na nĩikɛrakɛ 'lo, sɩ awɩ fɩl tɩna wɩ fʋrɔ. Wa n fʋɔr Thãgba Kɔ̃tɩn bɔɔbɔɔ woa', wa n cʋʋ awɩ jɔfʋ na awɩ kpam mɔ̃ gɩ teenanɩ woa'. Wa n kpaan Thãgba Kɔ̃tɩnɩ jɔfʋra dɩ ɔɔ nɔ thɩmɩsɔɔraakɛ a kɔɔ hanɩ Jakɔbɩɩ məlsɔ gɩ, ʋrɛɛkɛ a kɔɔ dʋnɩ ire Ɩjɩrayɛlla'. 35 Thãgba Kɔ̃tɩn kɔɔ ʋlfɛna wɛr nɔ bɩɛl ʋlfɛrɛ, a hana wɩ ɔɔ nɔka ayɩ: «Na n fʋɔr thãgba kpɩɩsɔa', na n gburõkhu war a fʋɔr wa', na n do war thɔma ga, na n ji war bonɩɛa'. 36 Sɩ na n fʋɔrɛ mɛr Thãgba Kɔ̃tɩnɩkɛ te nɩnɩ na ɩ̃ fãga ɲɔ̃ dɩ nɩ the Ejipiti dɩɩra. Na n gburõkhune a na fʋɔrɛ mɛrɛ, na n je mɛrɛra bonɩɛsɔ. 37 Na n hɩnɛ a na cʋɛna jɔfʋsɔɔkɛ kherenenɩ wire fɛw na ɩ̃ so, na ɩ̃ jɔfʋ, na ɩ̃ nɔ thɩmɩɩkɛ mɩ kherenɩ a ha nɩ. Sɩ na n fʋɔr thãgba kpɩɩsɔa'. 38 Na n diinə nɔ bɩɛl ʋlfɛrɛɛkɛ mɩ kɔɔ ʋlfɛna nɩna'; dɩ na n bir na fʋɔr thãgba kpɩɩsɔa'. 39 Sɩ na n fʋɔrɛ mɛr Thãgba Kɔ̃tɩn anɩ Thãgba, dɩ ma taa nɛr anɩ lãlaardarasɔ fɛʋʋ ɲɔ̃kɔɔ.» 40 Sɩ wa pɛ nũə', wɩ bor sɩ wa n jalna awɩ fɩl tɩna. 41 Caarsɔɔle n fʋɔrɛ Thãgba Kɔ̃tɩn dɩ wɩ bir na fʋɔrna awɩ thɩl bisɔ. Gɩrɛɛkɛra thɛ kɔɔ cʋʋnɩ, gɛrra awɩ bɩsãsɔ na awɩ bɩsãsɔɔ bɩsãsɔ fʋrɔ a cʋʋ foo, a ba dana nĩikɛ.