2 JAMANASƆ 18

WƖRƐ DƆNƖ JUDAA PƖPƖƖ JAMANASƆ

Juda jamana Ejekɩasɩɩ thɩmɩ \ref 2Ch 29

1 Ɔbɔɔkɛ Elaa bikuun Oje donɩ Ɩjɩrayɛl jamana dɩ ga cʋʋ yɛna yẽther, gɛrra Akajɩɩ bikuun Ejekɩasɩ do Juda jamana. 2 Yɛna kpelẽ yemɔy a kɔɔ hana sa do jamana. Dɩ a dor jamana Jerujalɛm dɩɩra a cʋʋna yɛna kpelẽ yʋɔr phe bire. Ɔɔ nɩɩ i n dʋɔn Abɩ, Jakarɩɩ bikhɛr gɩ. 3 Ejekɩasɩ cʋʋrɛ gɩrɛ fɛʋʋkɛ telenenɩ Thãgba Kɔ̃tɩnɩ ƴɛra mɔ̃kɛ ɔɔ thɩ kɔ̃tɩ̃ Davɩdɩ kɔɔ cʋʋnɩ. 4 A bũburone sãasɩ paarsɔ, a cʋɔrna thɩl bokanasɔɔkɛ wɩ kɔɔ gbuuni, a khaarna Aseraa thɩl gãakɛ wɩ kɔɔ ganɩ, a khaarna ther siikɛ Mʋɩjɩ kɔɔ benɩ na ther sɩɛ, gɩdonɩ Ɩjɩrayɛldara n kɔɔ jiirəəre latɩkolo bonɩɛsɔ a dana dabɔɔle 'lo. Siilera wɩ n we Nehusitã. 5 Ejekɩasɩ dɛɛnɛ ɔɔ ha pɛ Thãgba Kɔ̃tɩnaakɛ dɔnɩ Ɩjɩrayɛlɩ Thãgba. Juda jamanasɔ fɛʋʋkɛ kɔɔ kʋlɛɛnɩ ƴɩɛ, na wɩrɛɛkɛ kpaaraanɩ, bɩɛllakɛ na hale a honaa ga. 6 Ejekɩasɩ mar Thãgba Kɔ̃tɩnna, aa khokhɩaraa ga. A nɩrɛ nũu jɔfʋraakɛ Thãgba Kɔ̃tɩn kɔɔ hanɩ Mʋɩjɩ. 7 Dɩ Thãgba Kɔ̃tɩn har kha na ɔr. Dɩ ɔɔ thɩ̃sɔɔkɛ a n cʋʋnɩ fɛw n jaal bɔɔ. Dɩ a ɩɩrnanɛ lãʋ Asiiri jamanana, a bir wurəə kpɩɩ bã. 8 Ejekɩasɩ punone Fɩlɩsɩtɛ̃sɔ a jalna dana Gaja dɩɩ na ɔɔ bənə fɛw, a fʋ bɛbɛraa cɔ gbãsɔɔra a gbana dɩ kɔ̃tɩnasɔɔkɛ dɩ bɛr gʋʋsɔ diironi.

9 Ejekɩasɩɩ balanã yɛra a donɩ jamana, kɛ dɔnɩ Elaa bikuun Ojee yɛna makoɲɔ yɛraakɛ a cʋʋnɩ jamana dʋʋra Ɩjɩrayɛlla, Salmanajaarɩkɛ dɔnɩ Asiiri jamana pɔr a sɔbɩ Samarɩdara. 10 Dɩ a teere dɩɩ balãther yɩɛrɩ pɩpɩɩ pa, ɔbɔɔkɛ Ejekɩasɩ cʋʋnɩ yɛna maadõ jamana dʋʋra. Wɩ teere Samarɩ dɩɩ ɔbɔɔkɛ Ojee cʋʋnɩ yɛna yʋɔr phe bire jamana dʋʋra Ɩjɩrayɛlla. 11 Dɩ Asiiri jamana fʋlɛlɛ Ɩjɩrayɛldara a jalna le Asiiri dɩɩra, a pɛ wɩ Hala bəənnə, na Habɔɔr mɩɩr nʋɔraakɛ dʋɔnɩ Gojã bəən, na Mɛɛdɩdaraa dɩsɔɔra. 12 Gɩdonɩ wa kɔɔ nɩ Thãgba Kɔ̃tɩn awɩ Thãgbaa thɩmɩɩra nũə', gɛr dɔ nɔɔ. Wɩ kʋɛrɛ ɔɔ nɔ bɩɛl ʋlfɛ. Wa nɩ nũə', wa cʋʋ gɩrɛ fɛʋʋkɛ Thãgba Kɔ̃tɩnɩ thɔ̃daar Mʋɩjɩ kɔɔ so warna'.

Senakerɩbɩ sɔbɩrɛ Juda jamana dɩɩ

13 Ejekɩasɩɩ ɲẽbe yʋɔr yenã yɛraakɛ a donɩ Juda jamana, Senakerɩbɩɩkɛ dɔnɩ Asiiri jamana pɔr a sɔbɩ Juda dɩɩsɔ fɛʋʋkɛ dɩ bɛr gʋʋsɔ diironi a tee dɩɩ. 14 Dɩ Ejekɩasɩɩkɛ dɔnɩ Juda jamana thʋɔn Lakɩsɩ dɩɩra a so Asiiri jamanana aa: «Mɩ dɩrɛ! Jala sa faa mɩ. Sɩ gɩrɛɛkɛ fa so marnɩ, ma cʋʋrɛ.» Dɩ Asiiri jamana pɩɛraarɛ da n ti lãpho: dɛ bulo kilə gbɩlanɩ yʋɔr phe bire (9000), na dɛ kilə gbɩlanɩ phe tamaa (900). 15 Dɩ Ejekɩasɩ haarɛ dɛ bulo fɛʋʋkɛ kɔɔ hanɩ Thãgba Kɔ̃tɩnɩ cɔ na jamanaa lẽle thɩ̃bi thɩɩn cɔra. 16 Dabɔɔlera Ejekɩasɩ hɩɛl dɛɛkɛ a kɔɔ calnɩ Thãgba Kɔ̃tɩnɩ cɔ lõsɔ na lõfonɔ kpabɩdaasɔ a ha Asiiri jamana.

Senakerɩbɩ sɔbɩrɛ Jerujalɛm dɩɩ

17 Asiiri jamana har Lakɩsɩ dɩɩra sa thɔ̃ Tartã kɛ dɔnɩ yʋʋ sɔrasɛsɔɔra na Rabɩ-Sarɩ, kɛ dɔnɩ sɔrasɛɛ kɔ̃tɩ̃ na Rabɩsakeekɛ dɔnɩ sɔrasɛ kɔ̃tɩ̃ɩ khukhu na sɔrasɛsɔ tə̃tə̃tə̃ Ejekɩasɩɩ pa Jerujalɛm dɩɩra. Dɩ wɩ jaal a dã Jerujalɛm. Mɔ̃ wɩ danɩ le wɩ jɩɩlɛ ɲɔ cel nʋɔra, ka dʋɔnɩ per yʋʋ, kẽkẽ khidaraa lɛ hʋra. 18 Dɩ wɩ wer jamana, dɩ Hɩlkɩya bikuun Elɩakɩmɩkɛ dɔnɩ jamanaa thɩ̃ hɩ̃ɩdaar, na Sebɩnaakɛ dɔnɩ sɛbɛ kheredaar, na Yoaakɛ dɔnɩ Asafɩɩ bikuun, a dona jamanaa mɩmɩɩ ther dɩɩra a caan wɩ. 19 Dɩ Rabɩsakeekɛ dɔnɩ sɔrasɛɛ kɔ̃tɩ̃ɩ khukhu so war aa: «Mɩ n thɔ̃ nɛr, nɩ jala sɔ Ejekɩasɩra ayɛ wɔɔ: “Jamana kɔ̃tɩ̃ɩkɛ dɔnɩ Asiiri jamana sor ayɩ: 'Aɲe dɔrakɛ gɩrɛɛkɛ fɩ dɛɛnɔnɩ afɩ ha pɛ ya?' 20 Nɔfa haar fɩ mɩɩ pɔy sa kpɩɛr gɛr dʋɔn fɩlɛ na fãga fɩ hananɩ fɩ kena kʋʋr bɛɛ? Amɛra wer fɩ dɛ̃ɛ afɩ ha pɛra sa ɩɩrna lãʋ mɛrɛra? 21 Mɩ jɩrɛ Ejipiti jamanana fɩ dɛ̃ɛ ha pɛrɛ. Sɩ Ejipiti jamanana hor 'larʋʋkɛ kpananɩ kɛ n thʋɔnɩ tibil wo tibilikɛ n gbugoonɩ ɲɔ̃ pɩɛl. Thale Faarɔ̃ jamana ha wɩrɛ fɛʋraakɛ hananɩ ha pɛrɛ ɔrra. 22 Agɩbo na so marɛ aa: “Thãgba Kɔ̃tɩn asɩ Thãgbara sɩ hana ha pɛrɛ.” Sɩ ga do Thãgba olela, ɔɔ sãasɩ pasɔ na ɔɔ bonɩ ji pasɔ Ejekɩasɩra bũburõ, sa so Judadarara na Jerujalɛmdarara, wa n fʋɔrɛ Thãgba bonɩ ji pa ʋrɛraakɛ dɩbara hanɩ Jerujalɛm dɩɩra gaa? 23 Nɛnɛ̃ɛkɛ, kuro baranɛ nakha ɩ̃ kɔ̃tɩ̃ Asiiri jamana. Dɩ ma ha fɛr gãgona gbɩlanɩ yeɲɔ (2000), ɩ̃ hɩɩn ado fa punone na yɩ tɩbɩla dɩ wa dã wa n jʋʋn wɩ. 24 Fa punone na wee ɩ̃ kɔ̃tɩ̃ɩ sɔrasɩ kɔ̃tɩ̃ bɩɛllakɛ a ca ya? Ntɛ n thʋ̃ a sʋʋr mɔ̃ ? Dɩ aɲera fɩ dɛ̃ɛ afɩ ha pɛ Ejipitira dɩ fa n ƴaal koke hotorosɔ na gãgo jʋʋn sɔrasɛsɔ mɔlɔ? 25 Dɩ wo, ga do Thãgba Kɔ̃tɩn tuon ɩ̃ ɩna kɛna dɩɩkɛra a bũburonee gaa ya? Thãgba Kɔ̃tɩn sɔ mar aa: “Jala kɛna dɩɩle, a bũburonee.” »

26 Dɩ Hɩlkɩyaa bikuun Elɩakɩm na Sebɩna na Yoa so Rabɩsakeraakɛ dɔnɩ Asiiri sɔrasɛɛ kɔ̃tɩ̃ɩ khukhu aa: «Sɩ n bɩɛl fɛr, na mɩana sɛr afɩ thɔ̃dara Aramɛ̃ thɩmɩɩr, gɩdonɩ sɩ n nɩ gɛr. Fa n mɩɩna sɩ ebirə thɩmɩɩr tɩbɩlaakɛ hanɩ go pɩɛra ƴũu na n nɩɛra'.» 27 Sɩ Rabɩsakeekɛ dɔnɩ sɔrasɛɛ kɔ̃tɩ̃ɩ khukhu birse wer aa: «Fɩ kpɩɛrɛ afɩ kɔ̃tɩnna na fɛrɛra dɩbara ɩ̃ kɔ̃tɩ̃ thɔ̃ mɩ ɩ̃ ɩna mɩa nɩ thɩmɩaakɛra ya? Ga do tɩbɩlaakɛra hanɩ go pɩɛra ƴũu, kɛ na nɛnɩ pɩɩn dɩkhõo wa n kho, wɩ sel sɩɩn wa n ɲɔ anɩ kha, wɛra a thɔ̃ mɩ dakha gaa?» 28 Agɩpɩ dɩ Rabɩsakeekɛ dɔnɩ Asiiri sɔrasɛɛ kɔ̃tɩ̃ɩ khukhu ɩɩr jɩɩl ƴũu sa be hulẽbire na ɔɔ fãga fɛw na ebirə thɩmɩɩr aa: «Nɩ pɛ jamana kɔ̃tɩ̃ɩ thɩmɩɩr nũu, Asiiri jamanaa thɩmɩɩr gɩ! 29 Jamana sor ayɩ wɔɔ: “Na n do Ejekɩasɩ n fɩɩlnaa dɛ! A na puno na taa nɩ ɩ̃ ɲɔ̃kɔa'. 30 A n do Ejekɩasɩ n fɩɩl nɩ nɩ dɛ̃ɛ Thãgba Kɔ̃tɩnna ha pɛrɛ na n so, baalɛ na hala', Thãgba Kɔ̃tɩn na taa nɛr, dɩ Asiiri jamana na puno dɩɩkɛ na teaa ga. 31 Na n pɛ Ejekɩasɩ nũə', gɩdonɩ, Asiiri jamana sor aa, nɩ wuro jɔ nar, a gba anɩbara hana nɩ. Dɩ nɛrɛ fɛw bɩɛlbɩɛl na 'lɛr anɩ dɩvɛ̃ na anɩ fɩgɩ thɩr bisɔ na n kho, nɛrɛ fɛw bɩɛlbɩɛl na 'lɛr anɩ bir ɲɔ̃sɔ na n ɲɔ. 32 Agɩpɩ, ma pɔr na kpa nɩ na jalna dɩ bɩɛlaakɛ hɔnɩ anɩ dɩra. Gɩdonɩ dɩɩ gɩɩkɛ hananɩ bile na dɩvɛ̃, na dɩkɔ na dɩvɛ̃ lɩɛsɔ, na olɩvɩ thɩrasɔɔkɛ n 'laanɛnɩ niin, a hanana thʋʋr. Dɩ thale na too na yire, na khiirə'. Gɛr gɩ na n pɛ Ejekɩasɩ nũu, a fɩɩl nɩ, nɩ so nɩ yɩ Thãgba Kɔ̃tɩn na taa nɛra'. 33 Ca kpɩɩsɔɔ thãgbasɔ punone a taa awɩ dɩsɔ Asiiri jamanaa ɲɔ̃kɔɔ ya? 34 Kana Hamatɩdaraa thãgbasɔ na Arpadɩdaraa thãgbasɔ ha ? Dɩ kana Sefavayɩmdaraa thãgbasɔ, na Henaa thãgbasɔ, na Ɩvaa thãgbasɔ ha? Wɩ punone taa Samarɩ dɩɩ ɩ̃ ɲɔ̃kɔɔ ya? 35 Dɩɩsɔɔlee thãgbasɔɔra ɓibi, wɩmɔ̃ punone taa awɩ dɩsɔ ɩ̃ ɲɔ̃kɔɔ, dɩ Thãgba Kɔ̃tɩn na taa Jerujalɛm dɩɩ ɩ̃ ɲɔ̃kɔɔ?”» 36 Sɩ tɩbɩla pɩrɛ kɩrkɩrkɩr, wa birsee thɩmɩɩr bi bɩɛla'. Gɩdonɩ Ejekɩasɩ jamana kɔɔ so warɛ wa n so thɩ̃ɛa'. 37 Dɩ Hɩlkɩyaa bikuun Elɩakɩmɩkɛ dɔnɩ jamanaa cɔ thɩ̃ hɩ̃ɩdaar, na Sebɩnaakɛ dɔnɩ sɛbɛ kheredaar, na Yoaakɛ dɔnɩ Asafɩɩ bikuun, a dona jamanaa mɩmɩɩ ɓəəre awɩ thɛthɛɛ kẽkẽsɔ, sa kɛr bir jamanaa pa a mɩɛɛ thɩmɩaakɛ Rabɩsakeekɛ dɔnɩ Asiiri sɔrasɛɛ kɔ̃tɩ̃ mɩɩnɩ.