Ejekɩasɩ bɩɛlɛ bulle Thãgbaa mɩmɩɩr Ejayɩra
19
1 Ɔbɔɔkɛ Ejekɩasɩ jamana nɩɛnɩ gele, a ɓəəre ɔɔ thɛthɛɛ kẽkẽsɔ dɩbara, sa to bɔrɔ kɩ̃kɩɩn a jal Thãgba Kɔ̃tɩnɩ cɔ. 2 Dɩ a thʋɔn Elɩakɩmɩkɛ dɔnɩ jamanaa cɔ thɩ̃ hɩɩndaar na Sebɩnaakɛ dɔnɩ sɛbɛ kheredaar na bonɩ jidaraakɛ maanɛnɩ thɔmana a jɔ fɛw. Dɩ wɩ tor bɔrɔ kẽkena dakha wer a jalna Amɔtɩɩ bikuun Ejayɩraakɛ dɔnɩ Thãgbaa mɩmɩɩ. 3 Dɩ wɩ sor Ejayɩra aa, Ejekɩasɩ sor ayɩ wɔɔ: Nĩi wiikɛ dor ha kʋɛ wire na gaar wire, a dona yicur kɔ̃tɩ̃ wire, gɩdonɩ wɩ n sor, bi daan the bɔɔ pɩ, sɩ nɩrɛ na hana fãga na kɔna birə ga. 4 Agakpaan, Thãgba Kɔ̃tɩn afɩ Thãgba na thernanɛ thɩmɩaakɛ Asiiri jamana thɔnanɩ ɔɔ thɔ̃daar Rabɩsake, kɛ dɔnɩ ɔɔ sɔrasɩsɔɔ kɔ̃tɩ̃ɩ khukhu dɩ ɩ̃ a nɩɩr Thãgba yidaar. Agakpaan a na heenʋʋne sor gɩ do thɩmɩaalera ɔr Thãgba Kɔ̃tɩn afɩ Thãgba nɩɛnɩ dɔ kɩrʋ. Gɛr gɩ bɩɛlɛ Thãgba a pɛ tɩbɩlalaakɛ sɛnɩ gbe na yire.5 Dɩ Ejekɩasɩɩ thɔ̃dara gbaar jal Ejayɩɩ pa. 6 Dɩ Ejayɩ so warɛ aa: «Nɩ birə mɩɛnɛ anɩ kɔ̃tɩ̃ gɩrɛɛkɛ Thãgba Kɔ̃tɩn sonɩ ayɩ: “Fa n do maar n fʋ fɩ Asiiri jamanaa thɔ̃daarɩ nɩɩrsɔɔraakɛ fɩ nɩɛnɩ dɩ nɩɩr ma'. 7 Ma tʋʋraarɛ kpɩɛrɛ, gɩ do nɔɔ a nɩɛ thɩmɩɩr dɩkhaakɛ na cʋgɛɛnɩ a kɛr a kɔ̃ ɔɔ dʋɔ. Dɩ ma cʋʋrɛ wɩ kʋʋ na bajɩna le ɔɔ dʋɔ.” »
8 Dɩ Rabɩsakeekɛ dɔnɩ Asiiri jamanaa sɔrasɩ kɔ̃tɩ̃ɩ khukhu nɩɛrɛ dɩ ɔɔ jamana ther Lakɩsɩ a jal sɔbɩ Lɩbɩna dɩɩ. Dɩ a kpaanɛ a 'lii le. 9 Dabɔɔlera Asiiri jamana nɩɛrɛ thɩmɩɩ dɩ wɩ sʋʋraa aa: «Tɩrakaakɛ dɔnɩ Etiopi jamana hale da n pɔ a kena fɩ kʋʋr.» 10 Ɔbɔɔkɛ a nɩɛnɩ thɩmɩɩrɩle, a bire thɔna thɔ̃thɔna Ejekɩasɩraakɛ a so: «Nɩ sɔ Ejekɩasɩraakɛ dɔnɩ Juda jamana ayɛ wɔɔ: “Fa n do afɩ Thãgbaakɛra fɩ dɛɛnɔnɩ ha pɛrɛ n fɩɩl fɩ aa, mɛr Asiiri jamana na puno na gba Jerujalɛm dɩa'.” 11 Fɛrɛɛ thɛthɛ nɩɛrɛ gɩrɛɛkɛ Asiiri jamanasɔ kɔɔ cʋʋnɩ dɩ kpɩɩsɔɔra fɛw. Wɩ bũburõ wer a ti, dɩ fe wer n kpɩɛr dɩ fa 'lɛ taarɛ bɛɛ! 12 Ca kpɩɩsɔɔ dɩsɔɔkɛ ɩ̃ thɩ kɔ̃tɩ̃sɔɔ kɔɔ bũburonɩ, kɛ dɔnɩ: Gojã dɩɩ na Harã dɩɩ na Resɛfɩ dɩɩ na Edɛ̃ɛ məlsɔɔkɛ hanɩ Telasaar, awɩ thãgbasɔ kɔɔ punone a taa wɩ ya? 13 Kana Hamatɩ jamana na Arpaadɩ jamana na Layɩɩr jamana na Sefavayɩm jamana na Hena jamana na Ɩva jamanasɔ ha gɩrɛ nĩ?»
Ejekɩasɩ jamanaa Thãgba bɩɛl \ref Eja. 37. 14
14 Ejekɩasɩ teere lɛtɛrɛra thɔ̃thɔnaalee ɲɛna a hɩɩn. Agɩpɩ dɩ jalna Thãgba Kɔ̃tɩnɩ cɔ, a bel Thãgba Kɔ̃tɩnɩ ƴɛra. 15 Dɩ Ejekɩasɩ bɩɛlɛ Thãgba Kɔ̃tɩn thaa ayɩ: «Thãgba Kɔ̃tɩn, kɛ dɔnɩ Ɩjɩrayɛlɩ Thãgba, kɛ n tɔɔnɩ seribɛ̃sɔɔra ƴũu. Fɛr bɩɛl dɩbara dʋɔn Thãgba jamana dɩɩsɔɔra fɛʋʋkɛ hanɩ thɩɩra. Fɛr cʋɛ thãgbara ƴũu na thɩɩ. 16 Thãgba Kɔ̃tɩn wei ! Pɛ nũu bɔɔbɔɔ a nɩɛnɛ ! Thãgba Kɔ̃tɩn wei ! Khɛra yinə a jɩɛ hɩɩn! Nɩɛnɛ thɩmɩa fɛʋʋkɛ Senakerɩbɩ thɔnanɩ a nɩɩrna fɛr Thãgba yidaar! 17 Sobɔr gɩ wer Thãgba Kɔ̃tɩn, Asiiri jamanasɔ kɔɔ bũburone ca kpɩɩsɔ fɛw na awɩ dɩsɔ. 18 Wɩ thiire awɩ thãgbasɔ dɔɔra, gɩdonɩ wa kɔɔ do thãgba bʋɔsɔɔraka'. Sɩ thɩra wɛ na bokana dɩ tɩbɩla cʋʋ na awɩ ɲɛ̃. Gɛr dɔ kɩrʋ dɩ wɩ puno a kʋɛ wɩ. 19 Nɛnɛ̃, Thãgba Kɔ̃tɩn asɩ Thãgba, taa sɩ Senakerɩbɩɩ ɲɔ̃kɔɔ, gɩ do nɔɔ jamana dɩɩsɔ fɛw thɩɩraakɛ n jɩ fɛr Thãgba Kɔ̃tɩn bɩɛl dɩbara dʋɔn Thãgba!
Ejayɩ mɩɛrɛ Ejekɩasɩ jamana gɩrɛ dɔnɩ Thãgbaa tuur \ref Eja 37. 21
20 Le Amɔtɩɩ bikuun Ejayɩ thɔ̃ a so Ejekɩasɩ jamanana aa: Hɩnɛ gɩrɛɛkɛ Thãgba Kɔ̃tɩnɩkɛ dɔnɩ Ɩjɩrayɛlɩ Thãgba sonɩ bɩɛllɛlaakɛ fɩ kɔɔ bɩɛlʋnɩ Senakerɩbɩɩkɛ dɔnɩ Asiiri jamanaa thɩmɩɩra. 21 Thãgba Kɔ̃tɩn mɩɩrɛ thɩmɩɩrɩkɛ a pɩɛraa aa:
«Sɩyɔ̃ dɩ bɔbʋɔ beesi fer,
A mã fɛr ya Senakerɩbɩ.
Jerujalɛm dɩ bɔbʋɔ,
Didiəre yʋʋ afɩdara.
22 Amɛ fɩ kpɛ a nɩɩrnaa?
Amɛra fɩ phaan?
Mɛr Ɩjɩrayɛlɩ Thãgba Phu,
Mɛr fɩ lõ yiro.
23 Fɩ thʋɔn afɩ thɔ̃darasɔ,
Dɩ wɩ nɩɩr mɛr Kɔ̃tɩn.
Fɩ sor aa:
«Ɩ̃ koke hotoro jɔjɔɔkɛ dɔ nɔɔ,
Dɩ̃ puno a jʋʋn gɔ̃gɔ̃ yʋɔsɔ,
A ba jallakɛ foo a dã Lɩbã gɔ̃gɔ̃ yʋ thɩ̃thɩɩn.
Ma kuure sɛɛdɩrɩ thɩr gbana,
Ɩ̃ kuurnə sɩpɩrɛsɩ thɩr bɔy.
Ma jʋʋnɛ foo na dã Lɩbã gɔ̃gɔ̃ yʋ pɩɩr paar,
kɛ dɔnɩ thɩr luu gbibi.
24 Mɛrɛ, mɩ kper biresɔ kpakpal dɩɩra a ɲɔ ga ɲɔ̃,
Ma saarɛ Ejipiti mɩɩr nɛɛsɔ fɛw na nɛɛ dɩ gɩ ɩ.
25 Senakerɩbɩ ya, fa jɩ mɛr kɔɔ pɩɛr ga thɩ̃sɔɔkɛra mamara gaa?
Fa jɩ mɛr kɔɔ mãa gbɛbɩ gar mama bɔɔ kɛkɛkɛ a thɩɩn gɩ dana thakɛra gaa?
Mɛr 'laanɛ hʋɛ nɛnɛ̃ dɩphã gɩ cʋɛ mɛ̃,
Mɛr pɛ far fɩ wɩɛlɛ dɩ kɔ̃tɩnasɔɔkɛ dɩ bɛr gʋʋsɔ diironi gɩ debi gɩ do dɩ kpoloosɔ.
26 Fãga pɩrɛ dɩdara,
Dɩ maar fʋlɛ wɩ na yicuru.
Wɩ hor hʋɔnɩkɛ hanɩ hʋɔnɔ, a hona fa ƴolo.
Wɩ hor gajɔ̃ hʋɔnɩkɛ n phonɩ nãsʋrɔsɔɔ.
Wɩ hor bile pholookɛ khɩɛnɩ.
27 Sɩ mɩ jɩrɛ bɔ ʋmɔ̃ fɩ n toonɩ,
Mɩ jɩrɛ bɔ ʋmɔ̃ fɩ n jalnɩ kʋʋra. Mɩ jɩrɛ bɔ ʋmɔ̃ fɩ n kɛrnɩ.
Mɩ jɩrɛ dakha bɔ ʋmɔ̃ fɩ n cɩ̃cɩmanɩ mɛrɛra.
28 Gɩdonɩ fɩ ɩɩrna marɛ cɩ̃cɩmanɛ,
Dɩ afɩ fãga kho thɩmɩɩsɔ jʋʋn lõ ɩ̃ nũkara,
Ma to farɛ ɩ̃ ɓɔ̃ɓɔ̃ mɩ̃kaara,
Ɩ̃ pɛ far ɩ̃ thera nʋɔra,
Ɩ̃ cʋʋ fɩ, fɩ kɛr fɩ birnə hʋɛɛkɛra fɩ kɔɔ ɩnanɩ.
29 Gɩrɛɛkɛ na dʋɔn farnɩ jɩɩn ha gɩrɛ Ejekɩasɩ:
Lɛ thɩ̃ɛɛkɛ jɛnɩ thɩɩra a phu dɩbara, gɛr na dʋɔn dɩkɔ tɩbɩlala dɛʋʋkɛ,
Dɩ mɛna ga ha dakha nayɩɛr wo,
Sɩ balãther yɩɛra,
Nɩ dire anɩ thɩ̃ a kha oti,
A dire dɩvɛ̃ thɩra gɩ se be oti nɩ kho.
30 Judaa məlsɔɔkɛ na sɛnɩ na yire,
Wa 'lire fãga na ho thɩrʋʋkɛ n jaanɛnɩ nɛɛ thɩɩra tɩɛr,
Sɩ dɩ se be jɛɛna ƴũu.
31 Gɩdonɩ tɩbɩla na sɩrɛ gbe na yire Jerujalɛm dɩɩra.
Tɩbɩla gbe na 'lɛ taarɛ sobɔr Sɩyɔ̃ gɔ̃gʋɔna.
Gɛr dɔ gɩrɛɛkɛ Thãgba Kɔ̃tɩn kokenaa kɔ̃tɩ̃ na cʋʋnɩ gɩ do ɔɔ naw kɔ̃tɩ̃ dɔ kɩrʋ.
32 Gɛr dɔ kɩrʋ dɩ Thãgba Kɔ̃tɩn so Asiiri jamanaadara ayɩ wɔɔ:
A na lõ dɩɩraaka'.
A na tha sõo kɩɛr dɩɩraaka',
A na ti ɔɔ tomɩr phida na kɛɛna tomɩr kɩɛra',
Dɩ a na pɛrakɛ koke nãcele dɩɩraakɛ na yɩ ga.
33 A na kɛrɛ na bir na hʋ ʋrɛɛkɛra a na ɩnanɩ,
A na lõ dɩɩraaka',
Mɛr Thãgba Kɔ̃tɩn sɔ.
34 Ma bɛrɛ dɩɩkɛ, a na tagʋʋ,
Gɩ do mɛrɛɛ thɛthɛ na Davɩdɩ ɩ̃ thɔ̃daar dɔ nɔɔ.
Asiiridaraa kɛr bir awɩ dʋɔ na Senakerɩbɩɩ khi \ref Eja 37.36
35 Ga dɩtɩnɔɔlera, Thãgba Kɔ̃tɩnɩ thɔ̃thɔ̃ thu gbune Asiiridaraa sɔrasɩ jɛw a kʋʋr sɔrasɛ gbɩlanɩ taamaa na gbɩlanɩ kpalanã yemɔy (185.000).
Dɩ mɔ̃ wa ɩɩrnɩ duuro, dɩɩ do khe phɩla fɛw thɩɩra. 36 Dɩ Senakerɩbɩ Asiiri jamana ɩɩrɛ a kɛr bir Nɩnɩvɩ dɩɩra a too le. 37 Sɩ wi bɩɛl, mɔ̃ a hanɩle a gburõkhu ɔɔ thãgbaakɛ wɩ n wenɩ Nɩsɩrɔkɩɩ fʋɔr cɔra da n bɩɛl ɔɔ thãgba, ɔɔ thɛthɛɛ bikona yeɲɔ: Adɩramelɛkɩ na Saresɛɛr kʋʋrɛ na bajɩna sa caalɛ jal Arara dɩɩra. Dɩ ɔɔ bikuun bɩɛlɩkɛ wɩ n wenɩ Asaradɔ̃ gbaar ɔɔ too pa a do jamana.