Ejekɩasɩ jamanaa kho phɩ̃ na mɔ̃ a kpɛɛnɩ \ref Eja 38. 1-8; 2 Ch 32. 24-26
20
1 Ga bɔɔlera Ejekɩasɩ jamana kɔɔ jire khoo dɩɩ sɩ gbe sɩ a khi. Dɩ Amɔtɩɩ bikuun Ejayɩɩkɛ dɔnɩ Thãgbaa mɩmɩɩ jaal a yɩɩ, a sʋʋraa aa: «Thãgba Kɔ̃tɩn sor aa: Gbɛbɩrɛ afɩ cɔ ka nɛnɛ̃, gɩdonɩ fa khire, fa le khooraakɛ bã.» 2 Dɩ Ejekɩasɩ kɛrɛ ƴɩɛ a ɓana gʋʋ, sa bɩɛl Thãgba Kɔ̃tɩn ayɩ: 3 «Jɛ mɩ bʋɔra ya Thãgba Kɔ̃tɩn. Jɛna mɔ̃ mɩ kɔɔ ɩɩrnɩ afɩ ƴɛbʋrɔ na sobɔdaar dʋʋr na fɩl telẽe na ɩ̃ ha fɛw, dɩ ma n cʋʋna gɩrɛɛkɛ bʋɔnɔnɩ afɩ ƴɛra!» Agɩpɩ a bɩrɛ jɔɔ ka.4 Mɔ̃ Ejayɩ thenɩ da n jal, sɩ aa kɔɔ dã jamanaa cɔ thɩ̃thɩ̃ gbasara pa', Thãgba Kɔ̃tɩn mɩɩnaanɛ ayɩ: 5 «Kɛra birə sɔ Ejekɩasɩraakɛ dɔnɩ ɩ̃ too thɔthɔɔdaar ayɛ wɔɔ: «Mɛr Thãgba Kɔ̃tɩnɩkɛ dɔnɩ ɔɔ thɩ kɔ̃tɩ̃ Davɩdɩɩ Thãgba sor ayɩ: “Ejekɩasɩ, mɩ nɩɛrɛ afɩ bɩɛl a yɩna afɩ yilẽbi. Gɛr gɩ ma kpɛɛ fɛr, dɩ balãther wirera fa jaal mɛr Thãgba Kɔ̃tɩnɩ cɔ. 6 Ma tɔr yɛna yʋɔr yemɔy a na dɛ̃ɛ far. Ma taa fɛr, a na taana dɩɩkɛ Asiiri jamanaa ɲɔ̃kɔɔ. Ma bɛrɛ dɩɩkɛ gɩ do ɩ̃ thɛthɛɛ i dɔ nɔɔ, gɩ do dakha Davɩdɩ ɩ̃ thɔ̃daar dɔ nɔɔ.” »
7 Agɩpɩ, Ejayɩ sor aa: «Nɩ gba fɩgɩ bi khɩnaakɛ wɩ nanɩ a pɩɛr Ejekɩasɩ jamanaa phɛɛr khora.» Dɩ wɩ gbaar pɩɛraa, dɩ kpɛɛ. 8 Sɩ Ejekɩasɩ kɔɔ bulele Ejayɩ aa: «Jẽ ʋmɔ̃ ma jɩna dɩ Thãgba Kɔ̃tɩn na kpɛɛ mɛr, ɩ̃ bir ɩ̃ jal Thãgba Kɔ̃tɩnɩ cɔ balãther wire wo?» 9 Dɩ Ejayɩ sʋʋraa: «Gɩrɛ dɔnɩ jɩɩnɩkɛ Thãgba Kɔ̃tɩn ha fɩnɩ, kɛ nɛnanɩ Thãgba Kɔ̃tɩn na cʋʋrɛ gɩrɛra a sonɩ dɩ ga dã oti, gɛr dʋɔn ɩtɩɩrɩkɛ jenɩ Akajɩɩ nãcellaakɛ na jaal nɛ kana yʋɔr. Fɩ n ƴaalɛ ɩtɩɩr n jalana ƴɛkʋʋlɛ ya, a birənə khiru?» 10 Dɩ Ejekɩasɩ so aa: Mɔ̃ ɩtɩɩr na jalnanɩ ƴɛkʋʋlɛ nɛ kana yʋɔr, gɩ yɔɔrɛ ka, mɩ n ƴaalɛ a birənə khiru!» 11 Le Thãgbaa mɩmɩɩ Ejayɩ bɩɛl Thãgba Kɔ̃tɩn dɩ cʋʋ dɩ ɩtɩɩr kɛrna khiru nɛ kana yʋɔr Akajɩɩ nãcelaakɛ gɩ kɔɔ jini.
Babɩlɔn jamanaa thɔ̃daraakɛ pʋɔnɩ Ejekɩasɩɩ pa.
12 Ga bɔɔlera Berodakɩ-Baladãakɛ dɔnɩ Baladãa bikuun, a dona Babɩlɔn jamana thɔna lɛtɛrɛ na khaardaa a fʋɔna Ejekɩasɩ jamana. Gɩdonɩ a nɩɛrɛ mɔ̃kɛ gɩ kɔɔ khʋʋnɩ sɩ dɩ kpɛɛ. 13 Dɩ Ejekɩasɩ teere thɔ̃thɔnaale na daw, a nɩna wɩ cʋɔrɩkɛ a n thɩɩnɔnɩ ɔɔ thɩ̃ ɓɔ̃sɔɔkɛ dɔnɩ: dɛ bulo na dɛ na thɩ̃ɛɛkɛ n hʋnanɩ daw, na niinikɛ n hʋnanɩ daw, na ɔɔ koke thɩ̃sɔ fɛw, na thɩ̃ɛ fɛʋʋkɛrakɛ dɔnɩ ɔɔ thɩ̃ ɓɔ̃sɔ. Thɩ̃ bɩɛllakɛ na hale Ejekɩasɩɩ cɔ a sɩ, na ɔɔ dʋɔ, dɩ aa nɩ waraa ga.
14 Agɩpɩ, Thãgbaa mɩmɩɩ Ejayɩ pɔr Ejekɩasɩ jamanaa pa a bulee aa: «Aɲe tɩbɩlaakɛra ɩnanɩ kɛ so far? Dɩ kana wɩ therakɛ tɔr a ɩ̃ far?» Dɩ Ejekɩasɩ so aa: «Wɩ ther ƴɔɔ ka, Babɩlɔn dɩɩra wɩ the.» 15 Dɩ Ejayɩ bir bulee aa: «Dɩ aɲe wɩ yɩ afɩ cɔ?» Dɩ Ejekɩasɩ sʋʋraa: «Wɩ yɩrɛ thɩ̃ɛ fɛʋʋkɛ hanɩ ɩ̃ cɔ. Thɩ̃ bɩɛllakɛ na hakɛ ɩ̃ lẽle thɩ̃sɔɔra a sɩ dɩ ma nɩ waraa ga.»
16 Le Ejayɩ so Ejekɩasɩra aa: «Pɛ nũu thɩmɩɩrɩkɛ Thãgba Kɔ̃tɩn mɩɩnɩ! 17 Hɩnɛ wi bɩɛl na daan, dɩ wa khɩɩrɛ gɩrɛ fɛʋʋkɛra hanɩ afɩ cɔ, na gɩrɛ fɛʋʋkɛ afɩ thɩ kɔ̃tɩ̃sɔ kɔɔ phɔmɩnɩ a thɩɩn a dana nĩ, a na jalna Babɩlɔn dɩɩra. Thɩ̃ bɩɛllakɛ na hale na sa', mɛr Thãgba Kɔ̃tɩn sɔ. 18 Dɩrakɛ wo, wa fʋlɛlɛ tibil ɩkha afɩ məlsɔɔra, kɛ dɔnɩnakɛ afɩ bɩsã bɩnɔsɔɔkɛ fɩ kɔnɩ a na jalna wɩ do thɔ̃dara Babɩlɔn jamanaa cɔ.» 19 Dɩ Ejekɩasɩ jamana birse Ejayɩ aa: «Thãgba Kɔ̃tɩnɩ thɩmɩɩkɛ fɩ mɩɩ mɩnɩ bɔrɛ ka.» Dɩ a bire so wo aa, gɩ bɔrɛ gɩdonɩ ha ɩɩ na ha faarɛ na hale ɩ̃ yi hana bɔɔ.