Juda jamana Manasee thɩmɩ \ref 2 Ch 33. 1-20
21
1 Yɛna yʋɔr yeɲɔ Manase kɔɔ hana sa do jamana. A dor jamana Jerujalɛm dɩɩra a cʋʋna yɛna kpalaɲɔ yʋɔr yemɔy (55). Ɔɔ nɩɩ i n dʋɔn Hɛfɩsɩba. 2 A cʋʋrɛ gɩrɛ puuronɩ ka Thãgba Kɔ̃tɩnɩ ƴɛra. A phɛlɛ cʋʋ pa puunəsɔɔkɛ caarsɔɔkɛ kɔɔ hanɩle dɩɩra n kɔɔ cʋʋnɩ, dɩ Thãgba Kɔ̃tɩn weele wɩ Ɩjɩrayɛl bɩsanaa ƴɛra. 3 Sɩ Manase bire mɩ sãasɩ paarsɔɔkɛ ɔɔ thɩ Ejekɩasɩ kɔɔ bũburonɩ faa. A bire mɩ Baalɩ bonɩ ji pasɔ, a bir ga Aseraa thɩl gã mɔ̃kɛra Akabɩɩkɛ kɔɔ dɔnɩ Ɩjɩrayɛl jamana kɔɔ cʋʋnɩ. A n gburõkhure ƴũu kokenasɔɔra fɛw, da n fʋɔr wɩ. 4 A mɩrɛ thɩl bonɩ ji paarsɔ Thãgba Kɔ̃tɩnɩ cɔ bɩnɔ; sɩrakɛ Thãgba Kɔ̃tɩn kɔɔ mɩɩnɩ aa le Jerujalɛm dɩɩra ɩna pɛr ɩnɩ i. 5 A mɩrɛ bonɩ ji paarsɔ Thãgba Kɔ̃tɩnɩ cɔ gbasa yeɲɔra dɩ wa n fʋɔrɔ ƴũu kokenasɔ fɛw. 6 A gbaaraakɛ ɔɔ bikuun na yire a thii dɔɔra a jinə bonɩɛ. A n ƴaalɛ bʋraa, da n cʋʋna sidumone. A pɛrɛ tɩbɩlaakɛ n mɩananɩ khe, na wɩrɛɛkɛ n bʋɔnɩ a so gɩrɛ na dananɩ ƴɛkʋʋlɔ. A cʋʋrɛ gɩrɛ puuronɩ jɔɔ ka Thãgba Kɔ̃tɩnɩ ƴɛra, dɩ nĩkhii fʋʋ. 7 A lonanɛ Asera thɩl kɛ a kɔɔ cʋʋnɩ Thãgba Kɔ̃tɩnɩ cɔ bɩnɔ a thɩɩn. Sɩrakɛ Thãgba Kɔ̃tɩn kɔɔ sor Davɩdɩra na ɔɔ bikuun Salomɔna ayɩ: «cʋɔrɩkɛɛ bɩnɔ, na Jerujalɛmɩkɛ mɩ phiirnɩ Ɩjɩrayɛl caarsɔ fɛʋʋ thɩ̃thɩɩn ɩ̃ i na too waa khorr vʋ̃ʋ. 8 Ma bir na cʋʋ Ɩjɩrayɛl bɩsana wɩ the wɩ hʋnɔna dɩɩkɛ mɩ kɔɔ hanɩ awɩ thɩ kɔ̃tɩ̃sɔa'. Thɩ̃ bɩɛl dɩbara dʋɔn wa n hɩnɛ, a na cʋɛna ɩ̃ nɔ thɩmɩɩsɔ fɛʋʋkɛ mɩ ha wɩnɩ, na jɔfʋ fɛʋʋkɛ ɩ̃ thɔ̃daar Mʋɩjɩ kɔɔ ha wɩnɩ. 9 Sɩrakɛ wa kɔɔ nɩ nũuə'. Manase tɔ wɛr pɛr dɩ wɩ cʋʋ puure a ka jɔ ca kpɩɩsɔɔkɛ Thãgba Kɔ̃tɩn kɔɔ bũburonɩ Ɩjɩrayɛl bɩsanaa ƴɛra.10 Le Thãgba Kɔ̃tɩn thɔ̃ ɔɔ thɔ̃darasɔɔkɛ dɔnɩ ɔɔ mɩmɩɩsɔ a so war aa: 11 «Gɩdonɩ Manaseekɛ dɔnɩ Juda jamana cʋʋrɛ puure ka. A cʋʋrɛ puure a ka jɔrakɛ Amɔɔr məlsɔɔkɛ kɔɔ kʋlɛɛnɩ ƴɩɛ. A tɔrakɛ dakha Judaa məlsɔ a pɛr sopuu cʋʋrɛra dɩɩ do ɔɔ thɩlsɔ dɔ kɩrʋ. 12 Gɛr dɔ kɩrʋ, mɛr Thãgba Kɔ̃tɩnɩkɛ dɔnɩ Ɩjɩrayɛlɩ Thãgba sor ayɩ: «Ma pɛr thɩlke dɩkha Jerujalɛm dɩɩra, na Judaa məlsɔɔra, foo tibil wo tibilikɛ na nɩɛnɛnɩ, nũu na nʋʋrʋʋrɛ. 13 Ma bũburone Jerujalɛm dɩɩ mɔ̃kɛ mɩ kɔɔ bũburonɩ Samarɩ dɩɩ na Akabɩɩ too. Ma kpabɩrɛ Jerujalɛmdara cacaca mɔ̃kɛ wɩ n dɩɩnɩ bʋlaa sa subi. 14 Ma bor ɩ̃ too wɩrɛ na sɛnɩ gbe na yire na faa. Ma to wer awɩ lãlaardaraa ɲɔ̃kɔɔ, wɩ khɩɩ wɩ thɩ̃ɛ, wɩ phʋʋna wɩ cacaca. 15 Gɩdonɩ wɩ cʋʋ marɛ puure ka, dɩ nĩkhii fʋ mɩ, dɩɩ fʋna wireekɛ awɩ thɩ kɔ̃tɩ̃sɔ kɔɔ thenɩ Ejipiti dɩɩra foo a dana nĩikɛ.” » 16 Manase kʋʋrɛ dɩpa 'leedara Jerujalɛm dɩ bɩnɔ jɔɔ ka, dɩ dɩɩ do tɔmɩ̃ haar, a ɓã sopuu gɩrɛraakɛ a kɔɔ tɔnɩ Judaa məlsɔ a pɛr dɩ wɩ cʋʋ Thãgba Kɔ̃tɩnna.
17 Manasee thɔ̃ kpɩɩsɔɔkɛ sɛnɩ, na thɩ̃ɛ fɛʋʋkɛ a cʋʋnɩ, na sopuukɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Juda jamanasɔɔda. 18 Agɩpɩ Manase khire a gbũ ɔɔ thɩ kɔ̃tɩ̃sɔɔra dɩ wɩ dʋʋ ɔɔ nãkʋɔraakɛ hanɩle ɔɔ jamana cɔra, kɛ wɩ n wenɩ dakha Ujaa nãkʋɔr. Sɩ ɔɔ bikuun Amɔ̃ gba ɔɔ too pa a do jamana.
Juda jamana Amɔ̃ɔ thɩmɩ \ref Ch 33. 21-25
19 Yɛna kpelẽ yeɲɔ Amɔ̃ kɔɔ hana sa do jamana. Dɩ a dor jamana Jerujalɛm dɩɩra a cʋʋna yɛna yeɲɔ. Ɔɔ nɩɩ i n dʋɔn Mesulemɛtɩ, Harusɩɩkɛ thɛnɩ Yɔtɩba dɩɩra, ɔɔ bikhɛr gɩ. 20 Dɩ a cʋʋrɛ gɩrɛ puuronɩ ka Thãgba Kɔ̃tɩnɩ ƴɛra, mɔ̃kɛra ɔɔ thɩ Manase kɔɔ cʋʋnɩ. 21 Ɔɔ thɩɩ hʋra a n jalna fɛw. A n jire thɩlaakɛra ɔɔ thɩ kɔɔ jini, dɩ gburõkhu da n fʋɔr wɩ. 22 A bor Thãgba Kɔ̃tɩnɩkɛ dɔnɩ ɔɔ thɩ kɔ̃tɩ̃sɔɔ Thãgba a faa, a n ɩɩr Thãgba Kɔ̃tɩnɩ hʋra ga. 23 Dɩ Amɔ̃ɔ thɔ̃dara gʋʋrɛ kha sa kʋʋ ɔɔ cɔ bɩnɔ. 24 Sɩ dʋɔdara kʋʋrɛ wɩrɛ fɛʋʋkɛ kɔɔ gʋrɛnɩ kha sa kʋ Amɔ̃. Agɩpɩ, wɩ pɛrɛ ɔɔ bikuun Jojɩasɩ dɩ do jamana ɔɔ kara.