Juda jamana Jojɩasɩɩ thɩmɩ
22
1 Yɛna makõther Jojɩasɩ kɔɔ hana sa do jamana. Dɩ a dor jamana Jerujalɛm dɩɩra a cʋʋna yɛna kpelẽ yʋɔr bɩɛl. Ɔɔ nɩɩ i n dʋɔn Yedɩda, Adayaakɛ thɛnɩ Bɔsɩkatɩ dɩɩra, ɔɔ bikhɛr gɩ. 2 Jojɩasɩ cʋʋrɛ gɩrɛɛkɛ telenenɩ Thãgba Kɔ̃tɩnɩ ƴɛra mɔ̃kɛra ɔɔ thɩ kɔ̃tɩ̃ Davɩdɩ kɔɔ cʋʋnɩ fɛw. Aa kɛrna ɲɔ̃bɔɔ, dɩ ɲɔ̃bɩlã ga.Jojɩasɩ gbɛbɩrɛ Thãgba fʋɔr cʋɔr \ref 2 Fãg. 12. 5-16
3 Yɛna yʋɔr makõther Jojɩasɩ jamana kɔɔ cʋʋ jamana dʋʋra, sa thɔ̃ Asalɩaa bikuun Safan, kɛ dɔnɩ sɛbɛ kheredaar Thãgba Kɔ̃tɩnɩ cɔ. Safanɩ thɩ kɔ̃tɩ̃ɩ i n dʋɔn Mesulam. A sʋʋraarɛ aa: 4 «Jala Hɩlkɩaraakɛ dɔnɩ gbõdaar, a sʋɔraa a thera Thãgba Kɔ̃tɩn cɔ mũsumookɛ lõfonɔ bɛbɛra teenɩ tɩbɩlala. 5 Wɩ hana kɔ̃tɩnaakɛ n hɩnɛnɩ thɔma Thãgba Kɔ̃tɩnɩ cɔ. Dɩ mɛ̃ wa gba a na lɩmɩna wɩrɛ n dʋɔnɩ thɔma le Thãgba Kɔ̃tɩnɩ cɔ; wɩ puno wɩ gbɛbɩna paarsɔɔkɛ kʋɛanɩ le cʋɔrɔ. 6 Wɩ hana wɩrɛ n thelanɩ thɩrasɔ, na wɩrɛɛkɛ n dʋɔnɩ ɲɛ̃ thɔma, na cɔ mɛ, wɩ thena dakha thɩra, na boka thelnanɛsɔɔkɛ teananɩ wɩ gbɛbana cʋɔrra. 7 Sɩ wa n bule thɩ̃ɛ tɩbɩlaakɛ wɩ n dʋnɩ mũsumo ɲɔ̃kɔɔ wa n dɔna thɔma ga, gɩdonɩ wɩ n kɔɔ cʋʋrɛrakɛ na fɩl telẽe.»
Jɔfʋ sɛbɛɛkɛ gbõdaar yɩnɩ Thãgba fʋɔr cʋɔrɔ
8 Dabɔɔlera Hɩlkɩa gbõdaar so sɛbɛ kheredaaraakɛ n dʋɔnɩ Safan ayɩ: «Mɩ yɩrɛ jɔfʋ sɛbɛ Thãgba Kɔ̃tɩnɩ cɔ bɩnɔ!» Dɩ Hɩlkɩa gbaar jɔfʋ sɛbɛra a ha Safan dɩ hɩɩn. 9 Agɩpɩ Safan, kɛ dɔnɩ sɛbɛ kheredaar, jaal mɩɛ jamana aa: «Afɩ thɔ̃dara deere mũsumonə hanɩle Thãgbaa cɔ a jalna ha kɔ̃tɩnaakɛ n hɩnɛnɩ thɔma Thãgba Kɔ̃tɩnɩ cɔ.» 10 Agɩpɩ Safan bire so jamanana aa: «Hɩlkɩa bonɩ jidaar ha mɛr sɛbɛ dɩkha.» Agɩpɩ dɩ so sɛbɛra jamanaa ƴɛra. 11 Mɔ̃ jamana nɩɛnɩ jɔfʋ sɛbɛɛlee thɩmɩsɔ, a ɓəəre ɔɔ thɛthɛɛ kẽkẽsɔ.
12 Agɩpɩ jamana ha Hɩlkɩaraakɛ dɔnɩ bonɩ jidaar, na Safanɩ bikuun Ahɩkamɩna, na Misee bikuun Akɩbɔɔra, na Safannaakɛ dɔnɩ sebɛ kheredaar, na Asayaraakɛ dɔnɩ ɔɔ thɔ̃daar jɔfʋ ayɩ: 13 «Nɩ jala bulene Thãgba Kɔ̃tɩn a ha mɩ, mɛrɛ na tɩbɩla na Judaa məlsɔ fɛw jɔfʋ sɛbɛɛle wɩ yɩnɩɩ thɩmɩɩsɔɔdara, gɩdonɩ nĩkhii fʋrɛ Thãgba Kɔ̃tɩn jɔɔ ka. A gbana sɛr nĩkhii jɔɔ, gɩdonɩ asɩ thɩ kɔ̃tɩ̃sɔ na nɩ nũu jɔfʋ sɛbɛɛlee thɩmɩɩsɔɔra, a cʋʋ mɔ̃kɛ gɩ sonɩ sɩ cʋɛa'.»
14 Dɩ Hɩlkɩa bonɩ jidaar, na Akɩbɔɔr, na Safan, na Asaya jaal khɛrɩkɛ wɩ n wenɩ Huldaa pa. Tɩkɩvaa bikuun Salumikɛ n hɩnɛnɩ kẽkẽ sãsɩnanɛsɔ, ʋrɛ ɔɔ thɩ kɔ̃tɩ̃ n donɩ Harasɩ, ɔɔ khɛr gɩ, a hale Jerujalɛm dɩ seer phaara a do Thãgbaa mɩmɩɩ. Dɩ wɩ mɩgʋʋrɛ mɔ̃ thɩ̃ɛ hanɩ. 15 Dɩ Hulda so warɛ aa: «Thãgba Kɔ̃tɩn Ɩjɩrayɛlɩ Thãgba sor ayɩ: “Nɩ kɛra birə sɔ ʋrɛraakɛ thɔna nɩnɩ ɩ̃ pa ayɛ wɔɔ: 16 Mɛr Thãgba Kɔ̃tɩn sor ma pɛrɛ thɩlkɩɩr paarɩkɛ na ɔɔ toora mɔna thɩmɩaakɛra fɛr Juda jamana hɩɩnɩ jɔfʋ sɛbɛraale fɛw. 17 Gɩdonɩ wɩ bo mer faa, sɩ wa n ji latɩkolo bonɩɛsɔ thãgba kpɩɩsɔɔra, wɩ cʋʋrɛ dɩ nĩkhii fʋ mɩ dɩɩ do awɩ ɲɛ̃ thɔ̃sɔ dɔ nɔɔ. Gɛr gɩ mɩ gbaar nĩkhi khɩɩ na paarɩkɛ, dɩ ga puno na ie kpɩɩraka".» 18 Sɩ Juda jamanaakɛ wer thɔna nɩnɩ nɩ bulene mɛr Thãgba Kɔ̃tɩn, nɩ sʋɔraa aa: “Mɛr Thãgba Kɔ̃tɩn, Ɩjɩrayɛlɩ Thãgba sor thakɛ ayɩwɔɔ: Fɩ nɩɛrɛ mɔ̃ thɩmɩaalera hanɩ jɔfʋ sɛbɛra sonɩ. 19 Gɩ thʋ fɛr haar, dɩ fɩ wur mɛr Thãgba Kɔ̃tɩnɩ ƴɛra, mɔ̃ fɩ nɩɛnɩ thɩmɩaakɛ mɩ mɩɩnɩ paarɩkɛɛdara na ɔɔ toora. Mɩ sor paarɩkɛ na kpolole, a na fi na do paarɩkɛ sʋɔn 'lini. Sɩ gɩdonɩ fɩ ɓəəre afɩ thɛthɛɛ kẽkẽsɔ dɩbara, a khɩɩ ɩ̃ ƴɛbʋrɔ, mɛrɛ dakha, mɩ nɩɛrɛ afɩda, mɛr Thãgba Kɔ̃tɩn sɔ. 20 Gɛr dɔ kɩrʋ ma sɩ farɛ, fɩ khi na ha ɩɩ, fɩ gbũ afɩ thɩ kɔ̃tɩ̃sɔɔra, wɩ dʋ fɩ afɩ kara, afɩ yisɔ na yɩ thɩlkɩɩrɩkɛ ma pɛnɩ paarɩkɛ bɩɛllaka'. Dɩ wɩ kɛrɛ bir a mɩɛ jamana thɩmɩalera fɛw.”»