Jojɩasɩɩ nɔ bɩɛl ʋlfɛ na Thãgba
23
1 Jojɩasɩ jamana thʋɔn a kpa Juda kɔ̃tɩna fɛw, na Jerujalɛm kɔ̃tɩna a gbɛbɩ ɔɔ pa. 2 Agɩpɩ, a jaal Thãgba Kɔ̃tɩnɩ cɔ, ɔr na Juda kona fɛw, na Jerujalɛmdara fɛw, na bonɩ jidara, na Thãgbaa mɩmɩɩsɔ, na tɩbɩla fɛw, a fʋna bɩsã bii a gbana kɔ̃tɩna. Dɩ Jojɩasɩ jamana sor thɩmɩa fɛʋʋkɛ hanɩ nɔ bɩɛl ʋlfɛ sɛbɛraalera wɩ kɔɔ yɩnɩ Thãgba Kɔ̃tɩnɩ cɔ a ha wɩ. 3 Jamana jʋʋnɛ a jɩɩl paarɩkɛ wɩ gbɛbɩnɩ a ti kpɩɛrɛ ɩna kpar Thãgba Kɔ̃tɩnna, ɩna hɩɩnɛ ɔɔ jɔfʋsɔ, na ɔɔ fɩl dɩɩrsɔ, na ɔɔ jɔfʋ kherenasɔ na ɩnɩɩ ha fɛw, na ɩnɩɩ kpɩɛr fɛw, aa ɩna fʋrɛ nɔ bɩɛl ʋlfɛ thɩmɩaakɛra kherenenɩ sɛbɛraakɛ. Dɩ tɩbɩla fɛw ture nɔ bɩɛl ʋlfɛrɛɛlera nɔ bɩɛl.4 Jojɩasɩ jamana sor Hɩlkɩa gbõdaara, na bonɩ jidarasɔraakɛ n khuoni fɛw, na Thãgba fʋɔr cɔ lõfonɔ bɛbɛrara, aa wɩ tiire Baalɩ thɩ̃bisɔɔkɛ wɩ kɔɔ cʋʋnɩ fɛw, na Aseraa thɩ̃bisɔ, na ƴũu kokenaa thɩ̃bisɔ fɛw le Thãgba Kɔ̃tɩnɩ fʋɔr cɔ. Dɩ a thii ger Sedʋrɔ̃ ɓɛlɛnɔ, a khɩɩ thoo a jalna Betɛl dɩɩra.
5 Jojɩasɩ jamana weelele thɩlaa bonɩ jidasɔɔkɛ Juda jamanasɔ kɔɔ pɛrnɩ wa n je latɩkolo bonɩɛ sãasɩ paarsɔɔkɛ hanɩ Juda dɩɩrasɔ, na Jerujalɛm dɩ khuirəsɔ. A weelele dakha wɩrɛɛkɛ n jenɩ latɩkolo bonɩɛsɔ Baala, na wirera, na sɩpora, na ƴepələ̃beraakɛ wɩ n wenɩ kpeere na ƴũu kokenasɔɔra fɛw. 6 A pher Aseraa thɩl gãakɛ kɔɔ hanɩ Thãgba Kɔ̃tɩnɩ cɔ bɩnɔ a thena Jerujalɛm dɩ khuirə, a gbunə Sedʋrɔ̃ ɓɛlɛnɔ a thii dɩ do thoo. Dɩ a gbaar thoole a deer dɩdaraa khi dʋ pa. 7 Jojɩasɩ wɩɛrɛ dakha cʋɔrɩkɛ kɔɔ dɔnɩ thɩl ji bɔdɛl cʋʋdaraa cɔ, kɛ kɔɔ hanɩle Thãgba Kɔ̃tɩnɩ cɔ, kãkɛ khɛra n kɔɔ lenɩ Aseraa thɩlɩ gbɔɔlɔ̃sɔ. 8 Jojɩasɩ wer bonɩ jidara fɛʋʋkɛ kɔɔ hanɩ Juda dɩɩsɔra a pɔna, sa kpɔ̃kpɔrɔ̃ sãasɩ paarsɔɔkɛ bonɩ jidara n kɔɔ jironɩ latɩkolo bonɩɛsɔ, kɛ hanɩ Geba dɩɩra a jalna foo a ba dana Bɛɛr-Seba dɩɩra. A wɩɛrɛ sãasɩ paarsɔɔkɛ hanɩ Jerujalɛm lõfonʋɔsɔɔra, a wɩɛrna sãasɩ pa ʋrɛ hanɩ lõfonʋɔraakɛ wɩ n wenɩ Jojue gobanɛrɩ lõfonɔ, kɛ hanɩle dɩ lõ paar ɲɔ̃bɩlana. 9 Sɩ bonɩ jidaraakɛ wer kɔɔ jenɩ bonɩɛ sãasɩ paarsɔɔrale na hana hʋɛ a na ji bonɩɛ Thãgba Kɔ̃tɩnɩ bonɩ ji para Jerujalɛm bã. Sɩ wɩ n gbɛbɩrɛ kha na awɩ omɩsɔɔkɛ dɔnɩ bonɩ jidara a kho buruukɛ na hananɩ tabɩɩra'. 10 Jamana kpɔ̃kpɔrɔnɛ sãasɩ paarsɔɔkɛ wɩ n wenɩ Tofɛtɩ, kɛ hanɩle ɓɛlɛnɔɔkɛ wɩ n wenɩ Hɩnɔmɩ bikuuni ɓɛlɛ̃, gɩ do nɔɔ tibil na n puno a thiiro ɔɔ bikuun na yire, dɩ ɔɔ bikhɛr gɩ na yire a jinə bonɩɛ Mɔlɔkɩɩ i dʋbɩra 'lo bã. 11 Jojɩasɩ jamana bũburone gãgonaakɛ Juda jamanasɔ kɔɔ pɛnɩ wi thãgbaa ƴɔɔ, dɩ wɩ jɩɩl Thãgba Kɔ̃tɩnɩ cɔ lõfonɔra a khunə Netã-Melɛkɩ du hɩ̃ɩdaarɩ duukɛ hanɩle cɔ ɓanasɔɔra. A thiire dakha wi thãgbaa gãgo hotorosɔ dɔɔra. 12 Jojɩasɩ jamana wɩɛrɛ bonɩ ji paarsɔɔkɛ Juda jamanasɔ kɔɔ mɩnɩ Akajɩ jamanaa nãsʋrɔ ƴũu, a wɩɛrna bonɩ ji paarsɔɔkɛ Manase kɔɔ mɩnɩ gbasa yeɲɔraakɛ hanɩle Thãgba Kɔ̃tɩnɩ cɔ. A wɩɛr gɛr, a bɩɩr cʋɔr, a khɩɩ ɓurore a deer faa Sedʋrɔ̃ ɓɛlɛnɔ. 13 Jamana kpɔ̃kpɔrɔnɛ dakha sãasɩ paarsɔɔkɛ hanɩle Jerujalɛm ƴɛbʋrɔ, ka gɔ̃gʋɔnɩkɛ wɩ n wenɩ Kʋɛ paar pɛnɩ ɲɔ̃bɔɔ. Salomɔ̃ɔkɛ dɔnɩ Ɩjɩrayɛl jamana kɔɔ mɛ gɩ dɩ wa n fʋɔrɔ Asɩtarte thɩlɩkɛ dɔnɩ Sɩdɔ̃daraa kpɔ̃kpɔrɔ̃ thɩ̃, na Kɛmɔsɩɩkɛ dɔnɩ Moabɩdaraa kpɔ̃kpɔrɔ̃ thɩ̃, na Mɩlkɔ̃ɔkɛ dɔnɩ Amɔ̃ɔ məlsɔɔ kpɔ̃kpɔrɔ̃ thɩl. 14 A cʋɔrɛ dakha Baalɩ thɩl bokasɔɔkɛ wɩ kɔɔ gbuuni, a khaarna Aseraa thɩl gãsɔɔkɛ wɩ kɔɔ ganɩ, sa khɩɩ tɩɩ khubə a hi kãkɛ gɩ kɔɔ hanɩ.
Jojɩasɩ naarɛ Thãgba fʋɔrɛ Ɩjɩrayɛl dɩɩra
15 Jojɩasɩ wɩɛrɛ dakha bonɩ ji paarɩkɛ kɔɔ hanɩle Betɛl dɩɩra, a wɩɛrna sãasɩ paarɩkɛ Nebatɩɩ bikuun Jeroboam kɔɔ mɩnɩ, a tɔ Ɩjɩrayɛldara pɛr dɩ wɩ cʋʋ sopuu. Jojɩasɩ wɩɛrɛ bonɩ ji paarɩle, a wɩɛrna sãasɩ paarɩle. Dɩ a thiire sãasɩ paarɩle dɩɩ hɩ̃ a do thoo, a thiinə dakha Aseraa thɩl gã.
16 Mɔ̃ Jojɩasɩ na kɛrnɩ a yɩ kanaakɛ hanɩle gɔ̃gʋɔna, a thʋɔn dɩ wɩ jal khɩɛl khubə a pɔna dɩ thii bonɩ ji paaraale, a kpɔ̃kpɔrɔ̃ɔ faa, mɔna Thãgba Kɔ̃tɩnɩ thɩmɩɩkɛ Thãgbaa tibil kɔɔ mɩɩnɩ hanɩ. Gɩdonɩ thalera a kɔɔ mɩɩ waa cɔ. 17 Dɩ Jojɩasɩ bire bule aa: «Aɲee boka ca ha olera mɩ yɩnɩ thale?» Dɩ dʋɔdara sʋʋraa aa: «Thãgbaa tibilikɛ kɔɔ thɛnɩ Juda bəənnə a ɩ̃, ɔɔ ka gɩ. Ɔr kɔɔ hulene a pɛ Betɛl bonɩ ji paaraakɛra gɩrɛɛkɛra fɩ cʋʋnɩ gɩrɛ. 18 Dɩ Jojɩasɩ so aa: «Nɩ sɛ gar, tibil na n thar ɔɔ khubisɔɔra gaa dɛ!» Dɩ wɩ sɩrɔrɛ ɔɔ khubisɔ, na Thãgbaa mɩmɩɩ ʋrɛ thɛnɩ Samarɩ dɩɩraa khubisɔ.
19 Jojɩasɩ bũburone sãasɩ pa cɔna fɛʋʋkɛ kɔɔ hanɩ Samarɩ dɩɩsɔɔra, kɛ Ɩjɩrayɛl jamanasɔ kɔɔ mɩnɩ, dɩ nĩkhii fʋ Thãgba Kɔ̃tɩn. A bũburõ ger fɛw, mɔna a bũburonɩ Betɛldaasɔ. 20 Jojɩasɩ kʋʋrɛ bonɩ jidara fɛʋʋkɛ kɔɔ hanɩle sãasɩ paarsɔɔra awɩ bonɩ ji pasɔɔrara, a khɩɩ tibil khubə a thiirosɔ. Agɩpɩ, a kɛrɛ bir Jerujalɛm.
Wɩ cʋʋrɛ Pakɩ fɛtɩ Jerujalɛm dɩɩra
21 Agɩpɩ, Jojɩasɩ jamana sor tɩbɩlala fɛw aa: «Nɩ cʋɛ Pakɩ fɛtɩ a dʋbana Thãgba Kɔ̃tɩn anɩ Thãgba, mɔ̃kɛra gɩ kherenɩ nɔ bɩɛl ʋlfɛ sɛbɛraakɛ.» 22 Wa kɔɔ cʋʋ Pakɩ fɛtɩ dɩɩ hona fɛtɩ ʋrɛ kɛkɛra, ɔbɔɔkɛ sogʋʋrdara n kɔɔ thɔɔnɩ Ɩjɩrayɛl foo, a dana Ɩjɩrayɛl na Juda jamanasɔɔ bɔɔa'. 23 Sɩ Jojɩasɩ cʋʋnɩ yɛna yʋɔr makõther jamana dʋʋra, gɛr wɩ cʋʋrɔ Pakɩ fɛtɩ thale Jerujalɛm dɩɩra a dʋbɩna Thãgba Kɔ̃tɩn.
Pɩpɩɩ thɩmɩa Jojɩasɩ jamanaadara
24 Jojɩasɩ weelele dakha wɩrɛɛkɛ n mɩananɩ khe, na wɩrɛɛkɛ n bʋɔnɩ a so gɩrɛ na dananɩ ƴɛkʋʋlɔ a faa. A bũburone cɔ bɛr thɩlasɔ, na thɩlasɔ, na kpɔ̃kpɔrɔ̃ thɩ̃ɛsɔɔ fɛʋʋkɛ wɩ n kɔɔ yɩnɩ Juda bəənnə, na Jerujalɛm dɩɩra, a cʋʋ mɔna gɩ kherenɩ jɔfʋ sɛbɛraakɛ Hɩlkɩa bonɩ jidaar kɔɔ yɩnɩ Thãgba Kɔ̃tɩnɩ cɔ. 25 Jamana kpɩɩ na hale kɔɔ kʋlɛnɩ Jojɩasɩ ƴɩɛ, kɛ kɛranɩ bir Thãgba Kɔ̃tɩnna na ɔɔ ha fɛw, na ɔɔ kpɩɛr fɛw, na ɔɔ fãga fɛw ɔɔ kha, mɔ̃kɛ Mʋɩjɩɩ jɔfʋ sonɩ fɛʋa'. Dɩ jamana kpɩɩ na hale ɩrɛnɩ wo ɔɔ khiro a honaa ga.
26 Sɩrakɛ Thãgba Kɔ̃tɩn na faa nĩkhi khɩɩkɛ a gbananɩ Judaa tooa', dɩɩ do gɩrɛ fɛʋʋkɛ Manase cʋgʋʋnɩ dɩ nĩkhii fʋʋ dɔ kɩrʋ. 27 Dɩ Thãgba Kɔ̃tɩn so aa: «Ma hɛllɛ Judaa too dakha ɩ̃ ƴɛbʋrɔ na faa, mɔ̃ mɩ kɔɔ hɛlnɩ Ɩjɩrayɛldara a faa. Ma bor dakha Jerujalɛm dɩɩkɛra mɩ kɔɔ phiirni na faa, ɩ̃ bona cʋɔrɩkɛ mɩ kɔɔ sonɩ ayɩ: “Kɩɛr ɩ̃ i na n we.” » 28 Jojɩasɩɩ thɩmɩɩ gɩrɛ sɛnɩ na thɩ̃ɛ fɛʋʋkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Juda jamanasɔɔda.
Jojɩasɩ jamanaa khi
29 Jojɩasɩɩ jamana do bɔɔ, Faarɔ̃ Nekookɛ dɔnɩ Ejipiti jamana n jaal Asiiri jamanaa bul pa, Efɩratɩ mɩɩr khɔra. Dɩ Jojɩasɩ jamana caan ɩnɩ n varʋ. Dɩ Faarɔ̃ Neko kʋʋ dapaara Megido dɩɩra, mɔ̃ a na yɩɩnɩ. 30 Dɩ ɔɔ sɔrasɩsɔ gbaar ɔɔ khi le Megido, a pɛr koke hotorora, a jalna Jerujalɛm a dʋʋ ɔɔ kara. Agɩpɩ, dɩdara pɛrɛ niin ɔɔ bikuun Joakajɩɩ yʋɔ, a pɩɛraa dɩ do jamana ɔɔ thɩɩ kara.
Juda jamana Joakajɩɩ thɩmɩ \ref 2 Ch 6.2
31 Yɛna kpelẽ yẽther Joakajɩ kɔɔ hana sa do jamana. Dɩ a dor jamana Jerujalɛm dɩɩra a cʋʋna sɩpora yẽther. Ɔɔ nɩɩ i n dʋɔn Hamutal. Jeremɩɩkɛ thɛnɩ Lɩbɩna dɩɩra, ɔɔ bikhɛr gɩ. 32 A cʋʋrɛ gɩrɛ puuronɩ ka Thãgba Kɔ̃tɩnɩ ƴɛra, mɔ̃kɛra ɔɔ thɩ kɔ̃tɩ̃sɔ kɔɔ cʋʋnɩ fɛw. 33 Dɩ Faarɔ̃ Neko liire na jɔrkɔ̃ a khaanɔ Rɩbɩla dɩɩra, Hamatɩ bəənnə, gɩ do nɔɔ a na n do Jerujalɛm jamana bã. Agɩpɩ, Faarɔ̃ Neko pɛrɛ dɩdarara lãpho tir, dɩ wa n ti: dɛ bulo kilə gbɩlanɩ yẽther (3.000), na dɛ kilə kpelẽ yʋɔr dɩ wa n haa. 34 Agɩpɩ, Faarɔ̃ Neko pɛrɛ Jojɩasɩɩ bikuun Elɩakɩm dɩ do jamana ɔɔ thɩɩ kara, a debʋʋ ire da n do Yehoyakɩm. Sɩ Joakajɩ wer, Faarɔ̃ Neko jalnaanɛ Ejipiti dɩɩra dɩ khi le. 35 Dɩ Yehoyakɩm 'laarɛ dɛ bulo, na dɛra a ha Faarɔ̃ Neko. Sɩ dɩdarara a pɛr wa n te a na n 'laa mɔna Faarɔ̃ sonɩ. A pɛrɛ nʋɔ, a fɛrɛ dɩdara dɩ wa n ti dɛ bulo na dɛɛkɛra a na n hanɩ Faarɔ̃ Neko mɔ̃kɛra ntɛɛ puno hanɩ.
Juda jamana Yehoyakɩmɩ thɩmɩ