Babɩlɔndara sɔbɩrɛ Jerujalɛm cacadaa
24
1 Yehoyakɩmɩ jamana do bɔɔ, Nebukadinejaarɩkɛ dɔnɩ Babɩlɔn jamana jaal a kenaa kʋʋr. Dɩ Yehoyakɩm wure jʋʋraa a cʋʋna yɛna yẽther, sa bir ɩɩr wo a laanaa. 2 Le Thãgba Kɔ̃tɩn ti sɔrasɩ gbulonaakɛ dɔnɩ Kalde sɔrasɛ, na Siiri sɔrasɛ, na Moabɩ sɔrasɛ, na Amɔ̃ɔ məlsɔɔ sɔrasɩsɔ a pɛr Yehoyakɩmna. A thɔ̃ wɛr wɩ bũburone Judaa too mɔ̃kɛra ɔr Thãgba Kɔ̃tɩn kɔɔ thɔnɩ ɔɔ thɔ̃daraakɛ dɔnɩ ɔɔ mɩmɩɩsɔ dɩ wɩ so.3 Gele daan gɩdonɩ Thãgba Kɔ̃tɩn 'laanɛ hʋɛ. A ƴaalɛ a hɛl Judaa too ɔɔ ƴɛbʋrɔ a faa, gɩ do Manasee sopuusɔɔkɛ a kɔɔ cʋʋnɩ fɛw dɔ kɩrʋ. 4 Manase kɔɔ kʋʋrɛ dakha dɩpa 'leedara Jerujalɛm dɩ bɩnɔ jɔɔ ka, dɩ Jerujalɛm dɩɩ do tɔmɩ̃ haar. Gɛr gɩ Thãgba Kɔ̃tɩn na ƴaal a faa awɩ sopuə'.
5 Yehoyakɩmɩ thɩmɩɩ gɩrɛ sɛnɩ na thɩ̃ɛ fɛʋʋkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Juda jamanasɔɔda. 6 Agɩpɩ Yehoyakɩm khire a gbũ ɔɔ thɩ kɔ̃tɩ̃sɔɔra, dɩ ɔɔ bikuun Yehoyakɩn gba ɔɔ too pa a do jamana.
7 Dabɔɔle Ejipiti jamana na n the ɔɔ dʋɔ 'lo bã, gɩdonɩ Babɩlɔn jamana teere bənə fɛʋʋkɛ a n kɔɔ kʋmãdɩnɩ, a fʋna Ejipiti kɔlɔna foo, a jal dana Efɩratɩ mɩɩr.
Juda jamana Yehoyakɩnɩ thɩmɩ
8 Yɛna yʋɔr makõther Yehoyakɩn kɔɔ hana sa do jamana. Dɩ a dor jamana Jerujalɛm dɩɩra a cʋʋna sɩpora yẽther. Ɔɔ nɩɩ i n dʋɔn Nehusɩta, Ɛlnatãakɛ thɛnɩ Jerujalɛm dɩɩra, ɔɔ bikhɛr gɩ. 9 A cʋʋrɛ gɩrɛ puuronɩ ka Thãgba Kɔ̃tɩnɩ ƴɛra, mɔ̃kɛra ɔɔ thɩ kɔɔ cʋʋnɩ fɛw.
10 Dabɔɔlera Nebukadinejaarɩkɛ dɔnɩ Babɩlɔn jamanaa sɔrasɩsɔ pɔr a sɔbɩ Jerujalɛm dɩɩ wɩ kena wɩ kʋʋr. 11 Dɩ Nebukadinejaarɩ thɛthɛ pɔr a danɔ bɔɔraalera ɔɔ sɔrasɩsɔ hanɩle a sɔbɩ dɩɩ. 12 Dɩ Juda jamana Yehoyakɩn 'laarɛ ɔɔbara a the, ɔr na ɔɔ nɩ na ɔɔ sɔrasɩsɔ, na ɔɔ minisisɔ, na ɔɔ tɩɩ kɔ̃tɩ̃sɔ a jal Babɩlɔn jamanana; dɩ fʋʋ dɩ do khaɩdaar Babɩlɔn jamanaa yɛna makõther yɛraakɛ a cʋʋnɩ jamana dʋʋra. 13 Le Babɩlɔn jamana khɩɩ lẽle thɩ̃ɛ fɛʋʋkɛ hanɩ Thãgba Kɔ̃tɩnɩ cɔ, na jamanaa cɔ, sa kʋɛ Thãgba Kɔ̃tɩnɩ fʋɔr cɔ thɔ̃ do thɩ̃bisɔ fɛʋʋkɛ Salomɔ̃ɔkɛ kɔɔ dɔnɩ Ɩjɩrayɛl jamana kɔɔ cʋʋnanɩ dɛ mɔna Thãgba Kɔ̃tɩn kɔɔ sonɩ.
Caca tɩbɩlaakɛ wɩ fʋlɛnɩ jalna Babɩlɔn dɩɩra
14 Babɩlɔn jamana fʋlɛlɛ Jerujalɛmdara fɛw a jalna ɔɔ dʋɔ: Tɩɩ kɔ̃tɩnasɔ fɛw na sɔrasɩ kɔ̃tɩna fɛw, dɩ wɩ gbɛbɩ ha tɩbɩla gbɩlanɩ yʋɔr (10.000). A fʋlɛlɛ dakha ɲɛ̃ thɔ̃ dona fɛw na thɩr khaadara. Bɔdara dɩbara sɛ le dɩɩra. 15 A jalnanɛ Yehoyakɩn jamana Babɩlɔn dɩɩra, ɔr na ɔɔ nɩ, na ɔɔ khɛrsɔ, na ɔɔ thɔ̃daar kɔ̃tɩnasɔ, na dakha wɩrɛ dɔnɩ tɩɩ kɔ̃tɩnasɔ le dɩɩra. 16 Ko kenaakɛ a fʋlɛnɩ fɛw a jalna, wɩ har tɩbɩla gbɩlanɩ makoɲɔ (7.000), dɩ ɲɛ̃ thɔ̃ dona, na thɩr khaadara ha tɩbɩla gbɩlanɩ (1.000). Tɩɩ khenaakɛ hananɩ fãga a na puno na ke kʋʋr, Babɩlɔn jamana fʋlɛ wɛr fɛw a jalna Babɩlɔn dɩɩra.
17 Agɩpɩ, Babɩlɔn jamana pɛrɛ Matanɩaakɛ dɔnɩ Yehoyakɩnɩ thɩɩ õkuun dɩ do jamana Yehoyakɩnɩ kara, a debʋʋ ire da n do Sedesɩasɩa.
Juda jamana Sedesɩasɩɩ thɩmɩ \ref 2 Ch 36.11-21; Jer. 52
18 Yɛna kpelẽ bɩɛl Sedesɩasɩ kɔɔ hana sa do jamana. Dɩ a dor jamana Jerujalɛm dɩɩra a cʋʋna yɛna yʋɔr bɩɛl. Ɔɔ nɩɩ i n dʋɔn Hamutal. Jeremɩɩkɛ thɛnɩ Lɩbɩna dɩɩra, ɔɔ bikhɛr gɩ. 19 A cʋʋrɛ gɩrɛ puuronɩ ka Thãgba Kɔ̃tɩnɩ ƴɛra, mɔ̃kɛra Yehoyakɩm kɔɔ cʋʋnɩ fɛw. 20 Gele daan dɩɩ do nĩkhiikɛ Thãgba Kɔ̃tɩn gbananɩ Jerujalɛmdara, na Judaa too dɔ kɩrʋ, da n ƴaallakɛ a dʋna wɩ ƴɔɔ fĩi, wɩ hʋnɔna ɔɔ ƴɛ. Dɩ Sedesɩasɩ ɩɩrnanɛ lãʋ Babɩlɔn jamanana.